አኹዋቲው ልማትስ አሜሬትጝ ምግብስ ጛሬ ካሊፃዊያኽ

ንግስቴ ተስፋ

ችኹ እሪዴስ ፌይኹስ አኹዋቲ ልማታስ ሴብሎ አሜሬትጝ ምግብስ ጛሬ ካሊጝስ እርዳቱክ አኽⶓ ጉዋጉሲ ሽኩዳድ ወረዳው አሬሳቻንትካ ዙሙና::

ጉዋጉሲ ሽኩዳድ ወረዳ ወንጄሊ ኬቤሊው አሬሳቻንቲ መዝገቡ አያሌው እዩኑ ካንቲስ እሪውሳ ዎክቶ ማንዳኑላ አኹዋቲስ ሴብሎ ሊሚፅጝስ ምግብስ ጛሬ ካላንታ እርዳትⶓ ዲብስካ::

ንጙዊኒ ምርቱ ዝቤንዳ አኹዋቲስ ሊሚፃኑ ብቲዴስ ኪንዲ ሄክታርዴስ ኽሳው ማሲዳ ስንዳዮ፣ ጉባሬ፣ ዱኒዜ፣ ቲማቲሞ፣ ኪቶስታ እሊኩሳጊ ቴጋንኩ ትክልትካዋ ሊሚፅጝስ ድኹዌካ::

ጋያኪ እስካዊስ ግቢትስታማጊ ዝኩኽ አኹዋቲው ዴዴክ አሌድስታኒ አኹዋቲስ ሊሚፃኑሳ ብቴ እሳንፅጝስ እክዶ እሚⶓ ዲብስካ::

አሬሳቻንቲ መዝገቡ ናኑውስታጊ ምንግስት ጄሜርኹሳ ግብርኔ ዝቤንፅጙ ቴግባር ይስጛማ ሲፋታ ካሲካ:: አኹዋቲስ አጌላጌሌ እስታማ እክድ እምስትኹ አኹዋቲው ዴዴክ ወክትስ አሌድስታታ እንቲታኪ ፌያፌያማ ካንትስታው ጉልሊ ዜሩስታ ኽብፂ ማዳባሪው ዲግስጚውስታ ክብርናቲው ችግር ክቼማ ሜቴንጙኽ ጌንዜብስ ዲጋያታኪላ ካንቴ እይካ::

ጉዋጉሲ ሽኩዳድ ወረዳ ግብርኒ ፅ/ጝናዳ አኹዋቲ ልማቱ ውማይቲኒ አቶ ግዛቸው ብርሃን ወረዳዳ 14 ኬቤልካዳ ሊማው አኽⶓስታ 2018 ምርቱ ዝቤንዳ 4ሻይ 19 ሄክታር ብቲ ዝኩⶓ ጌሌፅካ:: 3ሻይ 300 ሄክታር ብቲ ስንዳይስ ሾፌንስታው ያኹስ 7 ሻይዴስ ጃላ አሬሳቻንትካ አኹዋቲ ልማቱ እንፅኺዳ አሴቴፍጛንኩ አኽⶓ ጉሽካ::

አቶ ግዛቸው ናኑውስታጊ ወረዳዳ 18 ዝቤናዊ አኹዋቲው ዴዴክ እንቲታኪ ባይላዊ አኹ ቴኬምስትጚው ሴልስ ሊሚፅጝስ ካላው አኹ ታምብስታንት ዝኩⶓ ጉሽካማ 48 አኹዋ ፍሽፂ አኹዋቲው ሞተር ፓንፕጊ ትክምዳ እሼው አኽⶓ ኽይትጝፄካ::

ውንጂሊ ኬቤሊዳ 2016 ም/አሜታዳ ኬውጛሺኹ ዲብ ኩፅኒ 2017ዴስ ጉሽፃማ ግቢትስታማጊ ዝኩኽ አኹዋቲ ዴዴኩ ግንባቲ ወክትስ አሌድስታውላ ይጉጝ አሬሳቻንትካዳ ክሬቴ ፌቴሩኒውላ ወክትስ አሌድስታማ እንፅኼ ጄሜራታ ኩፅኒ ሲፍጜካማጊ አኽⶓ ቶኬምካ::

አኹዋቲው ልማትስ ያኻው ኽብፂው ማዳባሪ እሳ ዜጌቤ ቴርስኔምባኺስታ ዲጋያሱ አኽⶓ ጉሹንኩ ውማይቲኒ ወረዳታ ፋይፃውሳ ግባቱሳ ሜቴኖ እክዶ ፍሽጝስ እምፕልቱ እንፅኺው ማቤርካስ አቕፄካማ ወክትስ ዲጋታ ሲፍጜካማጊ አኽⶓ ቶኬምካ:: ጉልሊ ዜሩ ክብርናቲ ኩፅኒ ምርትዳ ቻኒስቶ ፌቴራቲታ ሊሊትጙኽሳ ሴሎ ቴኬምስትካማጊ አኽⶓ ኽይትጝፄካ::

አኹዋቲ ልማትዳ ናኪኒ ወክትዳ ወረዳታ ዝኩኽ ሰላሙ ችግር ኬፍቲኔ ቻኒስቶ ፌቴሬ ናው ስጋት ዝኩክ አኽⶓ ጉሽካ:: እንጚስኪላ 142 ወረዳኩ ኬቤልካዳ ወክትስ አሬሳቻንትካስ ውማዩሳ ድጋፎ እይጝስ ሴብሎ ሲፍጝጝስስታ ግብርኒው ሜካናይዜሽኖ ቴግባርዳ እሽፅጝስ ፄትቲው ችግር ኬፍቲኔ ቻኒስቶ ታምፃማጊ አኽⶓ ሰላም ኬቤርስታኒ ኩፅኒ ወረዳታ አኹዋቲ ልማትስ ዝኩኽ እይስቲ ቱስቲስ ትክምዳ እሼታ ፄውስቱኒጊ ኪሴ ሜዜጌብፅጝስ ካሊስታው ቴስፊ ዝኩⶓ አቶ ግዛቸው ጌሌፅካ::

አዊ ብሄረሰቡ ቺፅጝፂ ግብርኒ ሜምሪ ትክልቲስታ ኩፓኩፒ አኹዋቲ አብቱ ቴኬምስትጚ ኬቹ ጉሳንቲ አዲሱ አለሙ 42 ሻይ 900 ሄክታር ብቲዴስ ጃላ 2018 ምርቱ ዝቤንዳ አቫላምቲ አኹዋቲ ልማትስ ሊሚፅጝስ እክድ እምስታማ ትኩትስ እንፃኽስስታማጊ አኽⶓ ኽይትጝፄካ::

እንሳ ዜጌቤ ቴርስንኹሳ ወክቶ ኺስታ 17 ሻይ ሄክታር ብቲ ዜርስ ሾፌንስትጝስ ቴርታማ ዲግⶓ አቕፄካ::

ብሄረሰቡ ቺፅጝፂታ አኹዋቲውሳ ልማቶ ዋይሚስታ ፄውጝስ ፌፄምፃንትካ አካልካ ቱስቲስ አላፍቶ ፊትጛንታ ፄውጙ ቴግባር አኮሜችስትⶓ ጉሽካ:: እንጚስኪላ ብሄረሰቡ ቺፅጝፂዳ አግስታንኩ 12 ወረድካጊ አኹዋቲ ልማቱሳ እንፅኼ ይስጝፄካማ ሲፍⶓ ኽይትጝፄካ::

ብሄረሰብታ 3ሻይዴስ ጃላ አኹ ፍሽፂ ፓንፕ አሬሳቻንትካስ ዲጋማ አሬሳቻንትካ አኾ ቱስቲስ ቴኬምስትካማ አኹዋቲስ ሴብሎ አሜሬትጝስ ካላንታ ቤዴራ ቴርት አሌድስትⶓ ኽይትጝፄካ:: አኹዋቲ ልማቱሳ ዴዴኮ ታምብስታንታ ፄውጝ፣ ጉልሌ ዜሮ ስታ ኽብፂውሳ ማዳባሬ ወክትስ ዲግስጝ ቹዋ ቴግባር አኽⶓ ጉሽካ::

ኽብፂ ማዳባሪው ክብርናቲ አሬሳቻንትካው ምርትዳ ቻኒስቶ ፌቴራቲታኪላ ጄውⶓ አክም እላቲኩስ ፂኒስስታማ ጉሺስ ዲግስጝስ ቴግባርኪላ ይስጛማ ሲፍⶓ ቶኬምካ::

ብሄረሰቡ ቺፅጝፂዳ አኹዋቲስ ኬሻንቲ ምርት አግስታኩ ሴብልካዳ ትኩቶ ፄውጝስ ምግቡሳ ዋስትኔ ቼሜትጝፅጝስ እክድ እምስታማ እንፃኽስስታማጊ አኽⶓ አቶ አዲሱ ኽይትጝፄካ::

አማኻሪ ክልሉ ግብርኒ ቢሩ አኹዋቲውስታ ሆልቲ ካልቸር ቴክኖሎጂው ካይጚው ዳይሬክተር አቶ ይበልታል ወንድነው ኢዚአስ ጌለፄኑውስታ ምግቡሳ ፋዮ ዋኽትጝፅጝስ ችኹ ወክትስ ዜርስትኹሳ ሴብሎ አንኬባኬብጝዴስ ቴርቴራ አኹዋቲው ልማትስ ትኩት እይስታማ እንፃኽስስታማጊ አኽⶓ ጌሌፅካ::

2018 ምርት ዝቤኑ ሳኑ ወክትዳ 1 ትኩሚ 3 ሚሊዮንዴስ ኽሳንኩ አሬሳቻንትካዋ አሴቴፍጝፅጝስ 383 ሻይ 686 ሄክታር ብቴ ሊሚፅጝስ ካሊፃው ቴግባር አኮማችስታማጊ አኽⶓ ጉሽካ::

አኹዋቲስ ሊሊትጙኽ ሴብሉ ዜርስ ሊማው ብቲዴስ 260ሻይ ሄክታር ብቲ ስንዳይስ ሾፌንስታው አኽⶓ ቶኬምካ::

አኹዋቲስ ሊሚፅጝስ ፋይፃውዴስ አሬሳቻንትካው ታፍዳ አግስታው 68ሻይዴስ ኽሳው አኾ ፍሽጝስስታ ሴብልስ ሊሚፅጝስ ቴኬማው ቴክኖሎጄስታ አኹዋቲውሳ ዴዴኮ ቴኬምስትጝስ እክዶ ዋይሚስታ ፄውጝስ ትኩትስ እንፃኽስስታማጊ አኽⶓ ኽይትጝፄካ::

አኹዋቲስ ሊማውዴስ እምቢታማ ታምባውሳ ትክልቴስታ ሊሊትጙኽ ሴብሉሳ ዜሮ አቫላምቲዴስ ሹኻንቴ ዙሬ ሊሚፅጝስ ክልልታ 52 ትኩሚ 3 ሚሊዮን ኩንታልዴስ ጃላ ምርቶ ኩፕፅጝስ እክድ እምስትⶓ አቶ ይበልታል አቕፄካ::

ሰላሙ ችግር ግብርኒው እንፅኺዳ ቻኒስቶ ፌቴራቲታ ውላውጊ ቲቪቪርጚስ እንፃኽስስታማጊ አኽⶓ ጉሽካ::  ጉልሌ ዜሮስታ ኽብፂውሳ ማዳባሬ አሬሳቻንትካስ  ታምፃማ ቴኬምስታንቶ ቼሜትጝፅጝስ ትኩት እይስታማ እንፃኽስስታማጊ አኽⶓ ኽይትጝፄካ::