ቴኬምስታንቶ ቼሜትጝፅኹ ሴብል

ንግስቴ ተስፋ

ሚንች እን አጌራው ዙራሙሪ ጋያኪ ምእራብ ይቶፒያ ሩዙሳ ምርቶ አሜሬትጝስ አሜቻው ኽብፂስታ አይር እግልታ ዝኩኽ አኽⶓ ዜርፉ ውማይቴንካ ጌሌፃና::

ፃናው ዙሪዳ ይቪቺ 1 ሚሊዩን ሄክታርዴስ ጃላ ሩዝስ አስሜምጛው ብቲ ዝኩኽ ያኹኒውላ ላምቡሳኺስታ ሩዝስ ሾፌንስትኹ ብቲ ኩፅኒ 40 ሻይ ሄክታርዴስ ኽሳላ:: ያኼስጉ ሊኽዴስ 70 ታፋ ያኻው ሩዝ አሜሬትስታው ኩፅኒ አማኻሪ ክልልዳ አኽⶓ ፅናት ካንትፄ:: ይቶፒያዊንካው ሩዙ ፋይ 500 ሻይ ሜትሪክ ቶንዴስ ጃላ ያኹስ አጌራዳ አሜሬትስታማ ዲጋማጊ ዝኩኽ ዴሜካ 150 ሜትሪክ ቶንዴስ ኽስቲው አኽⶓ ንባር ቶኬሜ::

አዊ ብሄረሰቡ ቺፅጝፂዳኪላ 2014 ም/አሜታዴስ ጉሽፃማ ሩዙ ምርት አሜርትስትⶓ ጄሜርስታ:: ክልሉ ግብርኒው ምርምሪሊ ሙኪሪስ ጄሜርስትኹ ሩዙ ሴብሉ ልማት ናካዳ ኬሽኹሳ ዋይሜ ሜዜጌብፅጝስ 2017/2018 ምርቱ ዝቤንዳ 34ሻይ ሄክታር ብቲዴስ ጃላ ጉዋንጉዊ፣ ጃዊ፣ ዚጋሚ፣ ዳንግሊስታ አዩ ጉዋጉሲ ወረድካዳ አሬሳቻንትካው ማሲዳስታ አችትጙንኩ ዎታትካው ይጋሪው ብቲዳ ሊማማጊ አግስቴ::

ዳንግሊ ወረዳ ቓንፅን ኪዳነምህረት ኬቤሊው አሬሳቻንቲ ስለሺ ዘገዬ ሴዛ አሜታዴስ ፍና ላጛ ጌርካሱሳ ስልታኔ ካፅጝስ ወረዳ ሙኪሪስ ዲግስኹሳ ሩዙሳ ዜሮስታ ግባቶ ካፅጝስ ኩፅ ኪንዲ ብቲዳ ሩዞ አሜሬትⶓ ጉሽፃ ፄውንኩ አኽⶓ ድኹዌካ:: ሩዞ አሜሬትⶓ ጄሜራኒስ ኬሌብስ ያኻውሳ ምርቶ አታታ ችቔይ ኻሲ ናው ስጋት እሺኾ ናንኩ አቶ ስለሺ ሩዝ ዋትጛ ዋኒስታ ዋዳ አሜርትስታው ናውሳ ሼውቴ ውማይቴንካ ክንፄካማ ስጋትዴስ ኪቻ ቴስፊሾ ካይጛንታ ፄውⶓ እንክርፄካ::

ልንጉኼስታ ታፌ ዜሬካማ ላጛ ኩንታልዴስ አንኩዋ ኩንታላሳኺስታ አግፃሺኑ ዎክትዳ ምግብስ ጛሬ ካሊጝስ ቼግርስታሺካ፤ ናካ ኩፅኒ እምፕል ሄክታር ሩዙ ምርትዴሰ 45 ኩንታልዴስ 50 ኩንታላሳ ኺስታ ምርቶ አግፅጝስ ኬሽኹሳ ዝኩዊኔ ዝኩካማጊ አኽⶓ ዙሜካ::

ሩዙሳ ምርቶ ኬሽጝፅጝስኪላ ውማይቴኑሳ  ኩስጜ ቴግባርዳ እሽፅጝስ አኬዱኑሳ ምርቱሳ ሜቴኖ አግፄካማጊ አኽⶓ አቶ ስለሺ ድኹዌካ::

አሬሳቻንቲ ናኑውስታጊ ምንግስት ኬሽጙኽሳስታ ኬሻንቴ ምርቶ እያማ ጌቤልስ ፋይስታንታ ያኹኽሳ ሴብሎ አሜርትናታ ፄዋው ቴግባርዴስ ድምከና ዝቤን ታምብኹሳ ሩዞ ፋላፋላውሳ ማሽኖ ዲግሳያታስታ ጌቤሉሳ ታምትጜ ፌቴርጝስ ካሊስታታ ምንግስት ኩርፄንትስ እንፃኽስታይስ ናኒስ ካሴ ዲግስካ::

እሊው አሬሳቻንቲ ሀብታሙ የኔሰውኪላ ሩዞ አሜሬትⶓ ጄሜራኑላ እሺኑ ዝኩዊኒ አሜቱሳ ኬሌቦ ዋኽትጝፅጝሱላ ቼግርስታሺንኩ አኽⶓ ዲብስካ:: ሩዙ ምርት እንዴስ ቤዴራ አሜሬታሺኑ ስምኪውሰታ ልንጉኹዊ ምርትሊ ካንትጛኒኪላ ላጛ ፅፋስ ድምክኔ ካንፅፅⶓ  ዙሜካ:: ውማይቴንካ እዩኑሳ ስልታኔ ጉሽፃ ፄውጝስ ዜሩኑ ሩዙ ምርት አሜቱ ኬሌብዴስ ፊታማ ጌቤልስ ዲግስካማ ቴኬምስታንታ ፄውⶓኪላ አሬሳቻንቲ ቶኬምካ::

ኬቤሊታ ሩዞ ዜራንታ ውማይቲኒ ዲግስኹሳ ካሴ ሚንችካ አሬሳቻንትካ ኬሴርፃዊያኽ ናው ስጋትስ ቻቤልናላኽ ናው ካንቲ እሺኹ አኽⶓ ታክሳንኩ አሬሳቻንቲ ሀብታሙ ኩፅ ኬንዳዴስ 10 ኩንታላሳ ቴኬምስትካማጊ አኽⶓ እንክርፄካ::

አቶ ሀብታሙ ናኑውስታጊ ሩዞ ብክሊስ፣ አንኪስ፣ ብኹሪሰሰታ ቱሺስ ቴኬምስትጝሰ ምግቡሳ ዋስትኔ ቼሜትጝፅካማጊያኽ:: ፊቱኽስ ዴሜካ ጌቤልስ ዲግስካማ ባይላዊ ዳድስ ዋይካማጊ አኽⶓ ዲብስካ::

ጊሲ ቓንፅን ኬቤሊው ሴብል ልማቱ ውማይቲኒ ወርኩ ገብሬ ዜሮ ትኩሚ እምፕል አንኩዋ ሄክታር ብቲዳ ሴዛ አሜታዴስ ቤዴራ ኬቤሊታ ሩዝ አሜሬትስትⶓ ጄሜርⶓ ጉሽካማ ናካዳ ኬቤሊታ 120 ሄክታር ብቲዳ ሊማማጊ አግስታው አኽⶓ ጌለፅካ:: ጂሚሪዳ ሴብል ዙራሙሪስ እስካዊ አኽጝስ አሬሰቻንትካዋ ዴስጝፅጝስ ሚንቾ ፍታኔ ፌይፅⶓ ቶኬምካ:: ቱስቲስ ውማዩሳ ኩስጜ ቻቤልካማ እንፃኽስታንኩ አሬሳቻንትካ ናካዳ ኪሴ ሜዜጌብፅካማጊ አኽⶓ ቶኬምካ:: 2017/2018 ምርቱ ዝቤንዳኪላ ሄክታርስ 40-45 ኩንታል ምርቶ አግፅጝስ ካላንታ ውማዩሳ እርዳቴ ቱስቲስ እይካማጊ አኽⶓ ቼሜትጝፄካ:: ፌያፌያማ ኬስትስታው ግባቱሳ እንፂⶓስታ ጌቤሉሳ ታምትጜ አቲⶓኪላ ትኩታው ቤንስ አቕፄካማ ችግር ኽይስታውሳ ዳዶ ማንዲትጜካማጊ አኽⶓ ጌሌፅካ:: ሩዞ አሜሬትⶓ ጄሜርካያስኩ ኬቤሊኩ ዝኩዋንትካኪላ እሊኩዴስ ዴሶ ካፅካማጊ ዜርⶓ ጄሜራንታስታ ዝኩዊኔ ኬሽጝፃንታ ትኩትስ እንፃኽስስታማጊ አኽⶓ አቶ ወርኩ አቕፄካ::

ዳንግሊ ወረዳ ግብርኒ ፅ/ጝናሱ ሴብል ልማቱ ኬቹ ጉሳንቲ ይሄነው ዱባለ ጛሾስ ዳንግሊ ወረዳታ 0 ትኩሚ 64 ሄክታር ብቲዳ ሙኪሪስ ጄሜርስትኹ ሩዙ ምርት ናካዳ ሹኻ ኬቤልካዳ 350 ሄክታር ብቲዳ ሩዙ ሴብል ሊማማጊ አግስታው አኽⶓ ጌሌፅካ::

ዳንግሊ ወረዳታ 8 ሊኻ ሄክታር ብቲ ሩዝስ አሜቻው አኽⶓ ጉሽካ:: ሩዙ ምርቱ ሜቴንኪላ እሊኩ ሴብልካሊ ካንትጛኒ ሹኻ ፅፋስ ኽሳው አኽⶓ ጌሌፅካ:: እንጚስኪላ ፌይኹ አማትዳ ሄክታርዴስ ክቻክቺስ 38 ኩንታል ምርት አግስትⶓ ቶኬምካ::

ምንግስታዋ ያኼካያስኩ አችትካሊስታ ፎገራ ግብርኒው ምርምርሊ ቲቪቪርጚስ አሬሳቻንትካስ ኬሽጙኽ ዜር ዲጋማ ቴኬምስታንትካማጊ አኽⶓ ጌሌፅካ::

ሰላሙ ችግር ግብርኒው እንፅኺዳ ቻኒስቶ ፌቴራቲታኪላ አሬሳቻንትካ ወክትስ ጉልሌ ዜሮስታ ኽብፂውሳ ማዳባሪ አግፃንታ እንፃኽስስትኹ ቴግባርኪላ ይስጝፃው አኽጝስ 2017/2018 ምርቱ ዝቤንዳ ኬሻንቴ ምርቶ ኩፕፅጝስ ቴስፊ ዝኩⶓ አቶ ይሄነው እርዳትፅካ::

ሩዞ ፋላፋላውሳ ማሽኖ ዲግስጝዳስታ ጌቤሉሳ ታምትጜ ፌቴርጝዳ ጄሜርስትኹ ቴግባር ዝኩⶓ ጌሌፅካ:: አኽጝስኪ ክልል ፌኬድኹ ሩዙ ፋላፋልፂ ማሽን ዲጊ ጊዝስ ወረዳሾ ቱዋው አኽጝስ አሬሳቻንትካ ቴኬምስታንታ ናኒስ አቶ ይሄነው እንፅኼንቶ ፌያፌይጝፄካ::