ልኻኽዴስ ፉኽ ክንቲ ጝና

ታደለ አጋጄ

ፅክራ ሹኻ ሚሊዮንዴስ ጃላ ያኻንኩ ክንታንትካ ፌዩንኩ ላጛ አሜትካዳ ክልልዳ ኬሴትስትኹ ጋቻው ምክንያቲስ ክንትጝ-ክንትፅጙ ካንትዴስ ሴጋ ያኼካማ እጂⶓ አማኻሪ ክልሉ ክንቲ ቢሩ ንባር ቶኬሜ:: ክልላኻዳ ኬሴትስትኹ ጋቻ ሚንች ዜርፍዳ ጉዳቶ ታምፁኒውላ ክንቲው ዜርፍዳ ታምፃማጊ ዝኩኽ ችግር ኩፅኒ ሳሴር ጋቲዊያኽ::

ፌዩንኩ ላጛ አሜትካዳ ሚንችካ ክንታንትካ ክንቲ ጝናዴስ እቺካ:: አቕቱ ፃንቑናስ እምስትካ:: እምፕልካ እምፕልካ አክም ዝኩክ ቹዋ ታብል ጄርካዋ እሊው ዙራሙሪሾ እንፃኽጝስ ክንቴ አግፃንታ ፄዌካማጊያኽ::  አክም እላቲኩ ቹዋ ታብል ዴሜካ ቻ ሰላም ይንታዊያኽ ናኑ ቴስፊስ ልሻንኩ ዝኩና:: አጌራዋ አሬኬብስታውሳ ክምንቶ ክንትጝ-ክንትፅጙ ካስትዴስ እቺስጝ አጌራዳ ሲፍፃው ጉዳት ሚንች ጊዝዴስ ፋሌንጋ ኬሴትስትጝ ታራታርጝፃቲዊያኽ::

አፍሪካው እምፕልትዳ ፖሊሲው፣ ስልታኒውስታ ኩስጝፅጙ አግልግሎቲ “አማኒ አፍሪካው ሚዲያስታ ምርምሪው አግልግሎቲ” እስታው ኾት አፍሪካው ክንትጝ ክንትፅጙ ካስትዳ ጋቻ ኽሳንቲ ችግር አኽⶓ ጌሌፃ:: ክንቲዳ ታምባማጊ ዝኩኽሳ ችግሮ ናካዳ ችግም ንጝስ ካንትጝ ቻ ታምፃውሳ ቻኒስቶ ዛራዛራ::

አሌማ አቡቑ አችስ ጋቻ ሊኽ ሚሊዮንስ ቼፍስታንኩ ክንቲስ ታምቡንኩ ስራስራዋ ክቲዴስ እቺሳ:: ዊዳፊ ሰላም ሴፌናውላሳ  ፌያ ፌያማጊ እይስታው ክንቲ ዝኩኒውላ ኹኖስታ አካል ጉዳቴንካ ስራስሪዋ ክንቲዴስ ሴጋ ፄዌ:: ድማ ጋቲታ ቱትጚ እሳንጛታስታ ፆቲው ፅካት ፌፄምስታታ ፄዋው አኽⶓ አማኒ አፍሪካ ሚዲያስታ ምርምሪው አግልግሎቲ ናውዳ ፃፊስትኹ ንቫር ቶኬሜ::

ጋቻ ዴዴጝ ጊዝስ ኽዬ አግፃውላስጊ ክንቲ ጝንካዳ ታምባው ፅካት ዴሜካማጊ ካሳው አኽⶓስታ ክንታንትካ ክንቲዴስ ሴጋ አኽጝ አጌራዳ ክችክችት ዝኩዋቲታ ፄዉጝስ ድኽቶ ሲፍፃማ ፌያው አኽⶓ አቕፃ::

አዊ ብሄረሰቡ ቺፅጝፂዳ ላጛ አሜታሳ ሚንችካ ክንቲ ጝንካ ልምትካማ እጂካ:: እኒጛ ክንቲ ጝንካዴስ እምፕል ዚጋሚ ወረዳዳ አግስታው አኺቲ ትክላሊ እምፕላንቲ አች ክንቲ ጝናኽ:: 2018 ም/አታሱ ክንቲው ዝቤንዳ ኩፅኒ ጉድ ሰላሙ አኺኒ ፌቴርስትጝስ ክንትጝ-ክንትፅጙሳ ካስቶ ጄሜራ::

ዚጋሚ ወረዳዳ ክንታንኩ ክቻዴስ ገነት አሳዬ አኺቲ ትክላሊ እምፕላንቲ አች ክንቲ ጝናሱ ክንታንታኽ:: ሰላሙስታ ፄትቲው ችግርስ ላጛ አሜታስ ክንቲ ጝናዴስ እቺቴታ እጂቴ:: ናካዳ ክንትጝ-ክንትፅጙ እንፅኺ ጄሜርጝስ ዴስቴና አኽⶓ አውጚው ሬዲዮንስ ስልኪስ ዙሜ:: ላጛ አሜታሳ ክንቲ ኬውጙኽ ጊዝዳ ሚንችካ ክንታንትካ ኽይስትካ:: እምፕልካ እምፕልካ ዴሜካ እሊው ዙራሙሪሾ ካስካማ ክንትጝስ ካሊⶓ ክንታንታ ገነት ድኹታ:: ክንቲ ጝናዴስ ሴጋ ያኼካማ እጂጝ ክንታንትካው አንኩሊዳ ቻኒስቶ ታምፅⶓ ዙሚት ክንታንታ ክንቲ ጝናዳ ሜፃፍ ዋኽትጛውላስ ይጉጝ ክንትጝ-ክንትፅጙ ካስትዳ ቻኒስቶ ታምፅኹ አኽⶓ ጉሽታ::

አኺቲ ትክላሊ እምፕላንቲ አች ክንቲ ጝናሱ ክንትፃንቲ ካሳሁን አምሳሉ ክንቲ ጝና ክንትጝ-ክንትፅጙሳ እንፅኼ ጄሜሩኒውላ ክንትጝ-ክንትፅጝስ ያኻው አክኺ ዋኽትጛውላ ይጉጝስ ቼጌርስትⶓ ዙሜካ::

ዋይሚስታ ያኹኽ ክንትጝ ክንትፅጙሳ ካስቶ ካስጝፅጝስ ግባት ዋኽትጛውላስ ይጉጝ፣ አቒ አይሉ እንፂጝስታ ሰላሙስታ ፄትቲው አኺኒ ሲጊፃው አኽⶓ ቶኬምካ::

ክንቲ ጝናዳ እሺኹ አብት ዋኽስ ዋኾ ዎዴምⶓ ቶኬሙንኩ ክንትፃንቲ ካሳሁን ክንታንትካውሳ ንቫሮ ክችክቺስ ማሊጝስ ቼጌርስትⶓ ጉሽካ:: ክንታንትካ ክንቲዳ ፌይፃኑ እሺኑሳ ላጛ አሜታሳ ባኬንፅጝ ክንታንትካዳ ታምብኹሳ ችግሮ ጉሽካ:: ናካኪላ ፌያ ፌያማጊ ትይቱ ድምፅ እንኮኽስትጝ ክንታንትካ ዋኽ አንኩሊስ ክንቴ ሲፍጛቲንታ ፄዋማጊ አኽⶓ ዲብስካ::

ክንቲ ጝናዳ ግባት ዋኽትጛታ ዙራሙሪኩ ካሜንስታንትካ እርዳቴ ፄዋያንታኪላ ካሲካ::

ደብረ ማርኮስ ዩንቨርስቲዳ ሼው ፅንታው ክንትፃንቲ ሰዋገኝ ደመላሽ ክንታንትካ ክንቴ ኬውጝፅካማ ጝንዳ እሺጝ ክንታንትካው አንኩሊዳ ኽሳንቴ ቻኒስቶ ታምፃው አኽⶓ ኽይትጝፅካ::

እምፕል ክንታንቲ ክንቲዴስ ሴጋ ያኻማ ጝንዳ እሺጝ ጉድ ምግባር ፅንታ ዝኩዋቲታኪላ ፄዋው አኽⶓ ጉሽካ::

ክንታንትካ ክንቲ ጝና ካስካማ አግፃኑ አቕትዴስ ድምክና ክንቲጝናዳ ካሳማ እሺጝ ክንታንትካው አንኩሊው ልግስኒዳ ኽሳንቲ ትክም ዝኩኽ አኽⶓ ቶኬምካ::

አኺቲ ትክላሊ እምፕላንቲ አች ክንቲ ጝናሱ ጛሪ አርአያ በዛብህ ክንቲ ጝና ሰላሙ ችግርስ ዎዴምኹ አኽጝስ እምፕልታቑ ቴሳትፉስ ግባቶ ዋኽትጝፅጝስ ክንትጝ ክንትፅጙ ካስት ጄሜርⶓ ጌሌፅካ:: ናካዳ 8 ሊኻዴስ ጃላ ክንታንትካዋ ሜዜጌብጝስ ክንትፅጙሳ እንፅኼ ጄሜርⶓ ቶኬምካ::

ማይቤራዊ ሚዲያዋ ቴኬምስትጝስ ፄውስትኹ አብቶ ኩፕፅጙ እንፅኺስ ክንቲ ጝናዳ ፋይስታውሳ ግባቶ ዋኽትጝፃንታ ፄውⶓ እርዳትፅካ::

ክንቲ ጝና አውጚውስታ አማኻርጚው ሚዲያስ 75 ዴስ ጃላ ክንትፃንትካ ክንትፃሺኑ ኽሳንቲ ክንቲ ጝና አኽⶓ ዲብስካ::

ክንቲ ጝናዳ ሚንች ግባት ዳንጉዊትጙኽ አኽጝስ ማይቤራዊ ታምትጝፂ ፍንስ እርዳቴ ይስጝፄካማ ሲፋንታ ክንቲ ጝናሱ ጛሪ ካሲካ::

ዚጋሚ ወረዳው ክንቲ ፅፌት ጝናሱ ትክትሊ አላፊ ታከለ አረጋ ወረዳታጊ 30 ሻይ 254 ክንታንትካዋ  ሜዜጌብጝስ ክንትጝ ክንትፅጙሳ ካስቶ ካስጝፄካማጊ አኽⶓ ስልኪስ ጌሌፅካ:: እንኪላ እክዱሳ 68 ታፋ አኽⶓ ኽይትጝፄካ::

እንዴስ ቤዴራ ቤንሻንጉል ጉምዙ ክልሊ ዎሌን ኬቤልካዳ እሺኹ ፄትቲው ችግርስ ዎዴሙንኩ ላጜታ ክንቲ ጝንካ ክንትጝ ክንትፅጙሳ እንፅኼ ጄሜርካያስኩ አኽⶓ ጉሽካ::

ትክላሊስ ወረዳታጊ ሶኼታ ክንቲ ጝንካ ክንትጝ ክንትፅጙሳ ካስቶ ካስጝፃቲንኩ አኽⶓ ኪላ ቶኬምካ::

አኺቲ ኬቤሊው ዙራሙሪዴስ ፌኔኬልጛሺንኩ እምፕልታቕ እሺኑ ስፍሪሾ ዙርጝስ አኺቲ ትክላሊ እምፕላንቲ አችስታ አኺቲ ላጛንቲ አች ክንቲ ጝና ከንትጝ ክንትፅጙሳ እንፅኼ ጄሜርⶓ ጉሽካ:: ፄትቲው አይልካ ኬቤሊዳ ዝኩንኩ አኽጝስ ጉድ ሰላሙ አኺኒ ዝኩⶓ ጉሽካ::

ወረዳታጊ ልምቱንኩሳ ክንቲ ጝንካዋ ብስጝስ ፅሬት ፄውስታማጊ አኽⶓ ጌሌፅካ::

ሊሊትጙንኩ ክንቲ ጝንካዳ ዎዴሙንኩሳ አክኽካዋ ዋኽትጝፅጝስስታ ክንትጝ ክንትፅጝስ ያኻውሳ ሜፃፎስታ አቒውሳ አይሎ ዋኽትጝፅጝስ እክድ እምስትⶓ ቶኬምካ::