ቢሪው ጛፅ ፍሬንታ

አለሚቱ የኔት

ብሪው ጛፅዴስ መኪናው ፍሬኑሳ ቤኖ ግቢታው እንፅኼ ፌቴራንቲ ዎታቱ ፌቴሪው እንፅኺ::

ቢሪውሳ እሼ ምግብስ ቴከምስትኑኒዴስ ፋሌንጋ ጛፆ ፃሚሾ ዝጉዊጝ አኹኪ ግሴጝስ እይጝ ዴስስቱኺያኽ:: እምፕል ዎታት ኩፅኒ ቢሪውሳ ጛፆ ቴኬምስትጝስ ግቢትኹ ፌቴሪው እንፅኺ ሚንችካስ እንፅኺውሳ ድሎ ፌቴራ::

ዎታት በሀይሉ  ሰበካ እስቴ:: ሜካኒካል ኢንጂነሪንግስ ጄሜሪውሳ ዲግሬ ክንታ:: አዲስ አበባዳ አግስታው አስኬማ አችቱ ቲሪትጝፃንቲ ያኹስ እንፃኺታዴስ ጄሜራማ  አቑ ችግርስ ኽያ አኽጙ ፋይ እሺⶓ ኢቢሲስ ዙማ:: ዎታት ሚካኒካል ኢንጂነሪንጉ ክንቲውሳ ዳቒርፄ ፕሮጀክቶ ጛፅስታ ችክችኪኒ ቤርዴስ ቴኬምስትጝስ ግቢትጝስ እንፅኼ ፌቴራንታ ያኻ::

ዎታት መኪናው ፍሬኑሳ ቤኖ አጌራኻዳ ቢሪው ጛፅ፣ ችክችኬንካ ቤርካዴስስታ ሴራሚክዴስ ግቢትጝስ ጚጛርትጛዴስ ፌያማ እሊኩስ እንፅኺውሳ ድሎ ፌቴራ::

ኾት መኪናው ፍሬኑሳ ቤንካዋ አሜሬትጝስ ቤራውሳ ጛፆ ሊሊትጙንኩ አሬድፅካ አችትካስታ እሺ ጝንካዴስ ኩችፃው ያኹስ ችኽችኪኒ ሴራሚኮስታ ቤርካዋ አሚሪትፂ አችትካው ዋያንትካዴስ አግፃው አኽⶓ ጌሌፃ::

ምርትካስ ቴኬምስታኑ ጛፁ ቤን ዳሊሾዳ ዝኩኽ ቢሪው አካሉ ቤን ያኹስ ጛፁሳ ባይሬስታ ይሴንቶ ፂኒስጝስ ማሊፃው አኽⶓ ዙማ:: ዎታት በሀይሉስ ቲሪትጙኽ አስኬማ አችት 268 እንፃኽስታንትካዋ እሚኹ ያኹስ 6ሻይ 400ዴስ ጀላ ዴንቤንካ ምርቶ ቴኬምስትካማጊ አግስታንኩ አኽⶓ ጌሌፃ:: ዎታት ዙሙኽስታጊ አችት ዳዱ ግብሪስ አጌላግላንኩ ማሽንካዋ ኪስጝፅካ አክኽካዋኪላ ግቢታማጊ ያኹስ አይ ኤስኦ /ISO/ ስርትፍኬት ዌናኪላ አኽጝስ ካላ::

ንቫሮ አግፅንኹኪ ኢቪሲዴስያኽ::