እምፕልቱ ጌርክ

እገ ምንግስት እምፕላ አጌራው አጉዊኒ እግ ያኹኽስታ አጌር አቕ ይጋሪስ ዝኩጝስስታ ሌጌስጝስ ጉስስትኔ ንጝስ አስሜምጙኑ ካልኪዳኑ ሴኔድያኽ:: እምፕላ አጌራ አጌርታ ክችክቺስ ቲሪቴታ፣ አቕቱስታ ዲሞክራሲያዊ ሜብት ኬቤርስቱት፣ ሰላም፣ ልማት፣ ዲሞክራሲስታ ልግስ ዝኩት ታኻታ ኬፄልጝስ እገ ምንግስት ጚው ያኹኽ ኬፍቲኒ ፍሺ ዝኩቲያኽ::

ፌዴሬሽኑ ኩስጚጝና ማንዚ 21/ 1998 ም/አ ካስጝፁኽ 2ንቲ ሚዲቢኒ ኩችቲዳ እገ ምንግስት ፄዴኩኽሳ ዳር 29 ጌርኮ አሜት ቺፋ ይቶፒያው ብሄር ብሄረሰብካውስታ እዝብካው ጌርክ እስታማ አጌር አቡቑ አችስ ኬቤርስታታ ወሴንጝ ታክስስቴ:: እን ውሳኒኪላ ይቶፒያው እዝብካ ኩስጜካማስታ ፌኬድካማ ፄዴክፁኑ እገምንግስት አግፅፃይኹሳ ትክሞ ታክሳንታ ሜብትካዋስታ ኔፃኔትካዋ ማንዴካማ እጂፅጝስ ይቪቻ ያኻውላ ጛስጛዋ አቕትጝፅጝስስታ ታምትጝፅጝስ ካላንታ ፄውጝስያኽ::

1999 ም/አሜታስኪላ አቫላምቲ ይቶፒያው ብሄር ብሄረሰብካውስታ እዝብካው ጌርክ አዲስ አበባዳ ኬቤርስትⶓ ጄሜራ::

ብሄር ብሄረሰብካውስታ አዝብካው ጌርክኪላ ፌዩንኩ 19 አሜትካኻዳ ኬቤርስቱስ እዝብካውሳ ታምትጜ አድርፅጝስ፣ ክልልካውሳ ኢንቨስትመንቱሳ ልቕልቕቴ ሌጌፅጝስ፣ ቱሪዝሙ ስርኩ ልማትካዋ ሊሚፅጝስስታ አቕትጝፅጝዳ ከፍንኹሳ ፍሼ ፄዋ:: ዎሌን አጌርካው ዲፕሎማሲውሳ ታምትጜ ይስጝፅጝስታ አጌሮ አድርፅጝዳኪላ ፍሺ ልቓ ጋዊያኽ::

ብሄር ብሄረሰብካውስታ እዝብካው ጌርክ ኬቤርስትጝ ሊሊትጙንኩ ብሄረሰብካ ጛውሳ ባይሎስታ ዎጐ አደባባይዳ ፍሽካማ አቕትጝፅጝስስታ ጛው ባይልስ ኩሪጝስ ካላንታ ፄዋ:: ልቓ ብሄርካው ሴግቴንትስ ቻኒስት ፌቴርስታማ ጛውሳ አይቶ ፍሽካማ ካንትፅጝስ ካላቲንኩ እሺንኩ ብሄረሰብካኪላ ሼዎ ዋኽካማ አይትስ አምንጜካማ አደባባይሾ ፋንታ ካሊፃ:: እን ዴሜካ አጌራዳ ዝኩንኩ ብሄር ብሄረሰብካስታ እዝብካ ጛ አጌራዳ ኩሬካማ ሼውታ ፋያኑሳ ኮንኬ ፋያኑ ዙራሙሪዳ ዙሚጝዴስ ፌይኹስ አይቶ ጌሌፃውሳ ስዬ ሴይጝስ ሼውታ ልቕልቕንጝስኪላ ካሊስታ:: እንሳ ሜብቶ እይኹሳ እገ ምንግስቱሳ ሜብቶ ዴሜካ ይዊያኽ ኽሳው ናንኩ አጌር አቕውላዳ ቻቤልስታንቶ አግፃያሱ አኽጝስ አሜት ቺፋ ኬቤርስታውሳ ጌርኮ ዴጌፋቲንኩ ዝኩና::

ዲሞክራሲያዊ ቴርት ሴፌናማ አጌር አቑ አቕቱ ሜብት ኬቤርስታታኪላ ጌርክ ኬቤርስትጙ ፍሺ ኬፍንኹያኽ:: ናካኪላ አሜት ቺፋ ኬቤርስታው ብሄረሰብካው ጌርክ ኬቤርስታታ ፋያቲንኩ ዝኩጝስ እንሳታክስጜ ኪስጝ ፋይፃንቲያኽ:: እምፕል እሊውሳ ኬቤርፅጝስኪላ አግስታው ፍሺ ልቓ ጋው አኽጝስ እገ ምንግስት እይኹሳ አጌር አቑሳ ሜብቶ ኬቤርፅጝ ዴሜካ አጌር አቑ ዲሞክራሲያዊ ሜብት ኬቤርስታታ ጉሽፂ አኽⶓ ማላማ ሊሊትሊኪላ ያኹኒ አምናማ ቻቤልጝ ቱስቴ:: እገምንግስት ፄዴኩኽሳ ጌርኮ ብሄር ብሄረሰብካው ጌርክ እስታማ ኬቤርስትጝስ ክር እስትናኻ ዝኩኑኒኪላ ውላጊ እምፕላ አጌራው አጌር አቕካ አኽⶓ አምናማ ባል ውላውጊ  አኽጝስ እምንኹሳ ፊሪስፄ አሳቦ ባይጝ ፋይፄ::