ምርቶ ጊዛያስ

ንግስቴ ተስፋ

ሴብል ምሚው አችዴስ ጉሽፃማ ኪዲስታማ አኹኪ ፋላፋልስታማ ጎተሪሾ ቱዌምቡ ኺስታ ባኬንጝስ ካላው አጋታሚ ሚንቺያኽ::

ምርቱ ዝቤንዳ ኩፒጝ ቱስታው ምርትዴስ ዎክቶ ማንዳያሱ እሪ ምክንያታስስታ ኩፕፅጙ አኺኒስ ፌቴርስታው ችግሩ ምክንያቲስ ምርቱ ሜቴን ኔኬትጝስ ካሌ:: ምርት ኔኬትጝ ንጝ ዴሜካ ምርቱ እንፂጝ ኬሴትስትኾ ንጚያኽ:: እን ዴሜካ ዝኩዊኒውሳ ክብርናቴ ሲፍፅጝስ ካሌ::

አሌሙ እርሺውስታ ምግቡ አችቱ /ፋኦው/ ፅናትታጊ ይቶፒያዳ ክቻክቺስ 30 ታፋ ሊኽዴስ ምርት ኩፕኑስ ባኬናው አኽጝ ጌሌፅስታ::

ይቶፒያው ሜትሮሎጂው ኢንስቲቲውቱ ንቫርታ ይንታንኩ 15 ጌርካኻዳ ዎክቶ ማንዳያሱ እሪ እሉዋው አኽጝስ ኩፒጝስ ታምቡኽ ሴብል ዎክትስ ጉዲስታውላ ኩፒጝ ቱስቴ ኑስ ንቫሮ ፍሽጝ ታክስስቴ::

አዊ ብሄረሰቡ ቺፅጝፂ ጃዊ ወረዳ ከበሌ ኬቤሊው አሬሳቻንታ ብርቱካን ደሳለኝ አግስታኑ ዙራሙሪ ኩል አኽጝታጊ አኩሪ አቲሬ፣ ስሊቶስታ ለውዞ ዜሬካማ ናካዳ ታምቡኽሳ ሴብሎ ኩፕፅካማጊ አኽⶓ ድኹዌካ:: ታምብኹሳ ሴብሎ እምቢታማ አፄድጝ፣ እሪ አቤሌሻቲታ ቴንኬክስትጝ፣ ኩሪስታ ፆፃ አቤሌሻቲታ ክችክቼ እንኪባኪብጜ ፄውጝ አሬሳቻንትካው ቴግባር አኽⶓ ዲብስካ::

“ሴብል ካጋውላ ኩፕናማ አቤሌሽስታቲታኪላ አዊዳ ዋሽጝ እሪ እሉዋው ዎክትዳ ዴሜካ ኬንዳዋ ሴይፅጝ ቱስቴ” ንካ:: አሬሳቻንታ ብርቱካን ስሊቱ ምርት ኩፓማ ኪዴካማ ጌቤልስ ዲግስካማጊ አኽⶓ ጉሽካ:: ናኪኒ ወክትዳ ሴብሎ ኩፕፃኑኪ ያኻ ኩፑኽ ሴብል አቤልሽስታቲታ ፄዋኑ ባይላዊ ዳድስ አኽⶓ ቶኬምካ::

አሬሳቻንታ ብርቱካን ናንውስታጊ ፌያፌያማ ካንትስታው ዎክቶ ማንዳያሱ እሪ ትክምስ ታምቡኽ ሴብልዳ ጉዳቶ ታምፃቲታ ዙራሙሪ ቺፋ ቲቪቪርጚስ ውቢሪስ ኩፕፅጝስ ፅሬቶ ፄዋካማጊያኽ::

ሚንቾ ጊዞ ወረዳዳ አሜሬትስታው ስንኪው አሪ አኽጝታጊ ጌቤልስ ዲግስካማጊ እንዴስ ቤዴራ ኬሻንቴ ሚፄ አግፃሺካ:: ናካዳ ሰላሙ ችግር ፌቴርስትጝ ኩፅኒ ጌቤሉ ልቕልቕቲዳ ቻኒስቶ ፌቴራማ ፋያኑሳ ላካሳ ሚፄ አግፅጝስ ካሌካያስኩ አኽⶓ ጉሽካ:: ኬቤሊ ቺፋ ጌቤሉ ማይኬል ቲሪትጛማ ሜቴንጙኽ ዋይሚስ ሚፄ አግፃሺንኩ ያኹኒውላ ናካዳ ዝኩኽ ሰላሙ ችግር ምክንያታስ ኩፅኒ አሬሳቻንትካ ጉዲስትካማጊ አኽⶓ ዲብስካ::

አሬሳቻንቲ አባይ ሞላ ጛሾስ 2018 ምርቱ ዝቤንዳ 6 ሄክታር ብቲዳ ሴብሎ ዜሩኒዴስ ሰሊቶ ዋኽስ ዋኾ ኩፕፅካማ ጊቤልስ ዲግስካማጊ አኽⶓ ዲብስካ:: :

ፌይኹ አሜትዴስ ኪቻ ንጙዊኒ ወክትዳ ኬሻንቴ ምርቶ አግፅጝስ ሴብሎ ኩፕፃኒስ ትንካኬ ፄዌካማጊ አኽⶓ ጉሽካ:: ያኼስጉ ወክቶ ማንዳያሱ እሪ እሉዊጝስ ሰሊትዳ ጉዳቶ ታምፅጝስ 50 ኩንታልዴስ ጃላ አግፃኑ እሺኹዴስ 35 ኩንታሎ ይቪቼ አግፃንታ ቻኒስቶ ፌቴርⶓ አሬሳቻንቲ አባይ ዲብስካ:: እንጚ ያኻማውላ ጌቤል ኹዋውሳ  ምርቶ አሜሬትጝስ ኩፅኒ ዝኩዊኔ ኪስጝስ ካሊⶓ እንክርፄካ::

አሬሳቻንቲ አባይ ሞላ ናኑውስታጊ እምፕል ጌርክስ እምፕል ጌርኩሳ እንፃኽስታንቴ  7 ሊኻዋ ኺስታ ጄውጝስ ሴብሎ ኩፕፅካማጊ  አኽⶓ ኽይትጝፄካ:: ዜሩኑሳ ሴብሎጊ ኩፕፅካማጊ አግስታኑ ባይላዊ ዳድስ አኽⶓ ጉሽካ::

ባይላዊ ዳድስ ሴብሎ ኩፕፃኒስ ኩፅኒ ውዳኔ አኬልካማ፣ኬንዳዋ ቤቴርካማ፣ ቱስቲስ ካጋያሱ ዝኩዋኒ አዋዋ አግፅጝስ ካላውሳ ዳዶ ፌቴርካማ እሪ እሉዋኒ ዴሜካ ኬንዳዋ ሴይፅጝስ ሴብል ባኬናቲታ ትንካኬ ፄዌካማጊ አኽⶓ ዙሜካ::

ዙራሙሪ ሰላማ ያኻውላ ይጉጝ፣ ውማይቴንካ ዙራሙሪ ቺፋ አግስቴካማ ውማዩሳ እርዳቴ እያኑላ ይጉጝ አሬሳቻንትካዳ ቻኒስቶ ፌቴርጝዴስ ፌይኹስ ጌቤልስ ዲግስካማ ሜቴንጙኽሳ ሚፄ አግፅጝስኪላ ፍታና አኽⶓ ዙሜካ:: አሜሬቱኑሳ ምርቶ ሜቴንጙኽ ዋይሚስ ዋይጝስ ካላኑ ዳድኪላ አሜችጛያታ ምንግስት ታምቦጊ ፊትጙኒ ናኒስ ካሴ ዲግስካ::

ጃዊ ወረዳ ከበሌ ኬቤሊው ግብርኒ ፅፌት ጝናሱ ውማይቲኒ አብታሙ አብዬ ወክቱ ሰላሙ አኺኒ ኩቲስ ኩታ አሬሳቻንትካውላዳ አግስቴካማ ውማዩሳ እርዳቴ ፄዋቲንታ ኽሳንታ ፍታና አኽⶓ ጉሽካ:: እንጚኪላ አሬሳቻንትካ ሴብሎ ዜራኒስ ጉሽፃማ ኩፕፅካማ ጎተሪሾ ሚፂኒምባ ኺስታ ዝኩኽሳ ውማዩሳ እርዳቴ ፄዋኑውላ ይጉኒውላ ስልኪስ  ንቫሮ ኪስጜካማጊ አኽⶓ ቶኬምካ:: እንዴስ ቤዴራ ኬቤሊ ቺፋ አሬሳቻንትካ አችትጜካማ ሴብሎ ጌቤልስ ዲግሳንታ ፄውስታሺኹ ዳድ ዝኩⶓ ጉሽካ::

ጃዊ ወረዳ ግብርኒ ፅፌት ጝናዳ ሴብል ልማቱ ኬቹ ጉሳንቲ አብታሙ አለምነህ ወረዳዳ 19 ሻይ ሄክታርዴስ ጃላ ብቲ ሴብልስ ሾፌንስትⶓ ጉሽካ:: ወረዳዳ እሳንስ አሜሬትስታው ሰሊት፣ ለውዝ፣ አኩሪ አቲሪስታ ሹምቢ አኽጝስ ቤዴራማ ታምብኹሳ ሴብሎ ወክትስ ኩችፅጝስ ኩፅኒ ሰላሙ ችግር ፍታና አኽⶓ ጌሌፅካ::

ዝቤናዌ ቴክኖሎጄ ዲግሳማ አሬሳቻንትካ ቼጌርስታኑላ ምርቶ ኩፕፅጝስ ፄውስታው ቴግባርዳኪላ ሰላሙ ችግር ፅንጋኻ አኽጝስ አሬሳቻንትካ አቒው አይልስስታ ባይላዊ እንፃኽስትጚው ሴልስ ሴብሎ ኩፕፅካማጊ አኽⶓ ጉሽካ:: እን ዴሜካ ታክስስትኹ ግብርኒው ሜካናይዜሽኑ እንፅኺ ቴግባርዳ እሼቲታ ፄዌማጊያኽ ንካ::

አሬሳቻንትካ ወክታ ጋቲታ እሉዋው እሪ ታምቡኽ ሴብልዳ ጉዳቶ ታምፃቲታ ውማዩሳ እርዳቴ እይጝስ ሰላሙ ችግር ስጋታ ያኻ:: ኬቤሊ ቺፋ ዝኩንኩ ጎሌልስቱንኩ አሬሳቻንትካሊ ሰልኬ ኪስጝስ ንቫሮ ኽቴ ናቴ ቤንጜካማጊ ሴብል ባኬናውላስስታ አቤሌሽስታውላ ኩፕንጝስ ካላታ ፄውስታው ቴግባር ዝኩⶓ ኬቹ ጉሳንቲ ኽይትጝፄካ::

ሚንቾ ጊዞ ጌቤልስ ዲጋንኩ ስንኪው ሴብልካዳ ጌቤሉ ታምትጚው ችግር ፌቴርስትⶓ ካሉኽ ሰላሙ ችግር ምክንያታስ አኽⶓ ኬቹ ጉሳንቲ ጉሽካ:: ወረዳዳ አግስታንኩ 28 ኬቤልካዳጊ አሬሳቻንትካ አችትጜካማ እምፕልዳ አኽጝስ ኬሽኹ ዋይሚስ ሴብሎ ጌቤልትጚስ ካላኑ ዳድ ዝኩⶓ ጌሌፅካ::

ሄክታርዴስ 8 ኩንታሎ ኺስታ አግፅጝስ አኬድስታማ ናካዳ ሴብሎ ኩፕፅጙ ቴግባር ይስጛ ሲፋማ ክርፂ አችዳ አግስታው አኽⶓ ቶኬምካ:: አሬሳቻንትካኪ ያኻ ውማይቴንካ ቲቪቪርጚስ ሴብል ባኬናውላ ወክትስ ኩፕፅጙ እንፅኺዳ ዋሴኻቲንታ እንፅኼንቶ ፌይጝፄካ::