ዳር አቴንስቱስ

ታደለ አጋጄ

1911 ም/አታስ አሌማ አቡቑ አችስ ጋያኪ አውሮፓዳ ሚሊየንስ ቼፍስታንኩ አቑ ክርጝስ ምክንያታ ያኹኽ “ስፓኒሽ ፍሉ” እስታው ኢንፍሉዌንዛ ቑንዚው ወረርሽኝ ኬሴትስታሺኾ::

ይቶፒያዳኪላ ቑንዚ ኬሴትስትኹ አባላምቲዳ ቑንዚው ምልኻት አሌምዳ ካንትስቱኒዴስ 8 አርፋሳ እጄማ ዳር 7ዴስ 20 1911 ም/አሜታሳኺስታ 14 ጌርክካዋ አኽጝ ድኹስቴ::

ብላቴን ጌታ መርሳኤ ሀዘን ወልደ ኪርኮስ 20ንቲ ዝቤን ቤናው ናው ሜፃፍዳ ፃፋኑ ንባርታጊ ወረርሽኝ 40 ሻይዴስ ጃላ ይቶፒያንካዋ ኩⶓ ፃፌካ:: አዲስ አበባ ኬቴምዳ ይቢቻ 9 ሻይ እምፕልታቕ ክርካ::

ወረርሽኝ ይቶፒያዳ ኬሴትስትኹ ዳር አርፊዳ አኽጝስ “ዳሩ ቑንዚ ፃኻሲቪ” እስታውስታ ጋያኪ ዳር 12ስ ሚንችካ ይቶፒያንካ ክሩኑ አኽⶓስታ ዙራሙሬ ፃንኩፃንታ አዋጅስ ዙሚስታሺኹ አኽⶓ ሜፃፍ አንቤብፄ::

እሊውሾስ ዴሜካ ይቶፒያ ጅቡቲ ባቡሩ ዳድ እንፅኼ ጄሜርኹ ዎክት አኽጝስ እን ጊዛዳ ዴሜካ ቑንዚ ኬሴትስትጝ ባቡሩ ቑንዚ ንጝስ ታሪኩ ፃፋንትካስ ዙሚስቴ::

ወረርሽኝ አሬኽትስ አቒዴስ አቒሾ ፌያፌይጝጝስ እክምኒኩ ዉማይቴንካጊ ቑንዚስ ፂኪስታሺካ::

ዎክትስ እሺንኩ ጀርመንኩ አኪምካ ወረርሽኙ ጁፂ ፃንኩቱ ዳንጉዊኒስታ  አይርስ ፌያፌይጜ ናው ግምትዳ ታምቡኒውላ ክችክቺ ኽይቲ ኩፅኒ አግፅጝስ ካሌካያ::

እንሳ ሲፋማኪላ ኽይ ናኑሳ እንኩሩንኩ ያኻኒስ እምፕልታቕ ፃሜ ፍሽካማ ሌግስ ፃይፃንታ ፄውጝስ ቑንዚ ድስጝ ዙሚስቴ:: ልቓ ጊዝዴስ ፋሌንጋ አይር አቴንስትኹ አኽጝስያኽ ቑንዚ ድስኹ ንጝስ ዳር 12ስ እምፕልታቕ ፃሜ ሌግስ ድጙፅጝስ ዳር አቴንስቱስ ናው ስም እይስትኹ አኽⶓ ታሪክኩ ሜፃፍካ እርዳትፃና::

ናካኪላ ፌይኹሳ ታሪኮ ታክስጝስ ዳር 12ስ ሊሊትጙንኩ አኼንካስ ኬቤርፃና::

ጉዋንጊ ወረዳ አምቢቒ ኬቤሊው ዝኩዋንትካ መሪጌታ ልኡል እምፕልታቕ ዳር አርፊዳ ምድራሺ ቑንዳፃውዴስ ንካማ ቑንዜ ፍንጃኑ ባይል እሺⶓ እንክርፄካ::

መርጌታ ልኡል ዙሙኑውስታጊ ዳር አርፊ አቪቪ ኩፔ እሜው ዳር 14 ፋሌንጋ ዴሜካ ፁም ቱዋው፣ ድባይዳ ብኹሪ ብኹርስታው አርፊ አኽⶓ ቶኬምካ::

ስራስሬ ቑንዳፃው ዳር አርፊዳ አኽጝስኪላ አቕ ዳድዳ ፌካማ ቡኖ ጌፌርፅጝስ፣ እምፕልታቕ እምፕልዳ ኩፔካማ እንክርጝስ ቑንዜ ፌክፃሺኑ ጊዝ አኽⶓ ታክስካማ እንክርፄካ:: ናካ ኩፅኒ እክምኒ እሳንጝጝስ ይጉⶓ ጉሽካ::

እሊው ጉዋንጊ ወረዳ አምቢቒ ኬቤዉ ዝኩዋንቲ ጌታቸው አብዩ ዳር 12ስ ታይ አሬድስታማ እሳንስ ኬቤርስታው ባል አኽⶓ ዙሜካ:: ዳር አርፊ አቪቪው ዝቤን አኽጝስ ሚንችካ እምፕልታቕ ዴስቲስ ኬቤርፃኑ ባል አኽⶓ ቶኬምካማ ታይ አሬድስታማ ክምካዋ ድባይዴስ እፂሾ ሚፃኑ ጊዝ አኽⶓ ዲብስካ:: ዋሺ ዋሽስታማ፣ ታይ አሬድስታማ ክምካስ ጉዶ እንጐ እንጉስትኑ አኽⶓ ቶኬምካ::

ምንጊሱ ጊዝዳ ስራስሬ ቑንዳፃውሳ ቑንዜ ፍንጂጝስ ንካማ ዳድዳ ቡኖ ጌፌርፅካማ እምፕልትስ እንክራኑ ጊዝ እሺኾ፤ ናካ ኩፅኒ ድስኹ አኽⶓ ቶኬምካ::

እንጃቢሪ ዩንቨርስቲዳ ኮንኪስታ ፁፍ ፅንታው ክንትፃንቲ እሱባለው ክንዴ አቴንጝ ሊጊሲሜ ጊዞ እጂኹስታ እምፕልታቑ ውላቱዊ ልቕልቕቲሊ ኩራርጙኽ አኽⶓ ጌሌፅካ::

ክንትፃንቲ እሱባለው ዙሙኑውስታ አዋኾዳ አቴንስታው ዳር አርፊዳ ይቪቺ ጋቲዊያኽ:: ስልኺ ዜኬታኒስ ጐሮ፣ ጋፆ፣ ጝኖ፣ ፅኻራውሳ አንኪሜ አቴናና፣ እንታኮው አኺኒ ጌርክ ቺፋሱ ዝኩዊኒሊ እምትጙኽ አኽⶓ ኽይትጝፅካ::

ዳር አርፊ ካይጝጚው አርፊያኽ፤ ችኽዴስ ሳኑሾ ካይጝናው ዎክት አኽጝስ እንዴስ ፍና እሺኹሳ እሬ፣ ችቔ፣ ንፍሳትካዋስታ ቑንዜ ያጋንኩሳ ዲብካዋጊ አቴንጝስ ሳኑሾ ካይጛኑ ጊዝ አኽⶓ እርዳትፅካ::

ዳር አቴንስቱስ ሊሊትጙንኩ ኩምችንካ ፄውስታንኩ አኽⶓ ቶኬሙንኩ ክንትፃንቲ ክምካውሳ ሞሬፆ  ፃንኩፅካማ ቑንዜ ያጋንኩ ዲብካዴስ አቴንጝስስታ ሊሊትጙንኩ ምግብካዋ ዲግስጝስ ክምካዋ ድባይዴስ እፂሾ ሚፃና ንካ::

እንዴስ ቤዴራ እምፕልታቕዳ ኬሴትስታሺኹሳ ቑንዜ ፍንጂጝስ ዋሺ ዋሽስቴ እምፕልታቕ ኩፔካማ እንክርጝስ ፃኻሲቪ እስታውሳ ቑንዚ ፍንጂጝስ ፄውስታው ባይል አኽⶓ ጌሌፅካ::

እምፕልታቕ እምፕልትስ እንክርጝስኪላ ቑንዳስትኹ ቑንዜ ዜኔጋታ ፄውስቴ፣ ኬሽኹ አኽጙ እንኮኽስት እንኮኽስታታ፣ ሼው ፅንታሱሳ ዴስቴ አግፃታ ፄውጝስ እምፕልትስ ኬቤርፃኑ ባል አኽⶓ ጉሽካ::

እንታኮው ባይል እምፕልታቕ እምፕልትስ ኬቤርፃኑ ማይቤራዌ እምፕልቶ ይስጝፅጝስስታ ሜልካሜ እንጉስትጝስ ኬቤርፃኑ ባል አኽⶓ ጌሌፅካ::

ዳር አርፊ ዴስቲው አርፊ፣ አሪ ታምባው፣ ጛርጊ ኬውስታው ጊዝ አኽⶓኪላ እርዳትፅካ::