ውላዴስጊ ፍና ሰላም

ንግስቴ ተስፋ

አቒ ጚጛርትጛሊስታ ዙራሙሪሊ ሰላም ዝኩዋማ ልግስስታ አብርታ ዝኩጝስ ጛውሳ ታምቦ ፊትጛኒኪላ ሰላም ዝኮ ንጝስ ካሊስቴ:: አኽጝስኪ ሰላም ፖለቲካው፣ ይኮኖሚውስታ ማቤራዊ ዝኩዊኒዴስ ፌይኹስ አቒ አቒሊ፣ ፍትሬትሊስታ ዙራሙሪሊ ዝኩኽሳ ታምትጜኪላ ካንትናኒ ሰላም ዋኒኪ፣ ዋዳኪስታ አይስኪ ፋይፃንቲ ጉዳያኽ::

ይቶፒያው ታሪክዳ ጋቻ እሊውሳ ጋቻዋ ካሜናማጊ ጋቻስ ሞፄድስትናና ሰላሞ ናፊክኑታ ዝቤንካዋ ቼፍፅናናጊ አግስትኔ:: እንጚስኪላ ብሪታንያው ዲቨሎፕመንታል ይኮኖሚው ፕሮፌሰር ስር ፓውል ኮሊር ድኽካ አጌርካ ድኺትካማ ዝቤንካስ ዝኩዋንታ ፄውኽ ምፅድዴስ እምፕል ጋቻ አኽⶓ ፁፍዳ ጌሌፅካ:: ፕሮፌሰር እንጚ ፁፍዳ “ጋቻ እምፕል አጌሩሳ ኬፍቲኔ ይኮኖሚውሳ ውድሜቶ ታምፃው አኽጝስ ጋያኪ ላጛሴንካው ጋቻ አሜትካዋ ቼፍፃማጊ ካስኹ ቺፋ ጋቻ ጉዳትዴስ ፊታንኩ አቕ ሚንቼካማጊ ካሳንኩ አኽጝስ ሲፋውሳ ጋቻዋ ፌቴርጝስኪላ አብጂሌ ብሳዊያኽ” ናኒስ ፅናትዳ እንኩሬካ::

ህንዱ ኔፃኔቱ ታብሊ ማህተመ ጋንዴ ታክስናኒ ካይክማውሳ ዎሬሞ ዊፅጝስ ካሉኽ ሰላሙ ዳድስ እሺኾ:: ሰላሙ ዳድ ዋይሜ ኬይፃው አኽጝ አቕስቱኒውላ ዎሬም ታምፃው ጉዳትዴስ ኩፅኒ እፅፍስ እንፁኺያኽ:: ቹዋ ጉዳያኪላ ሰላማዊ ዳድስ አግስትኹ ድል ዊዳፋ ያኼ ንካ:: አማኻሪ ክልልዳ ፌቴርስትኹ ጋቻኪላ አጌር አቖ ውላቱዊ ዳድስ ጉዲስታንታ ፄውⶓ ጄሜሩኒዴስ ሹኻንቴ አሜቶ እሜ:: ሚንችካውሳ ይወቶ ፃንጌኽፃ:: ካሜናንትካ ቹትካው ቴስፊ አታታ ፄዋ:: ክንታንትካዋ እንግርግራ ጎሴሳ:: አሬሳቻንትካውሳ ልግሱሳ ዳዶ ፅንጋኽፃ:: እንጚ ሰላሙ ችግር ታምፃው ቻኒስቱ ጉዲስታንታ ያኹኽ ክልሉ ዙራሙርካዴስ ፋግቲ ለኮማ ወረዳ አቫላምቲዳ ቶኬምስቴ::

ፋግቲ ለኮማ ወረዳው አሸዋሻፍሪ ኬቤሊው ዝኩዋንቲ አቶ ተስፋው አደመ ሰላም ጛው ኬቤሊዳ እላ አኽጝስ ታምባውሳ ጉዳቶ ካንትካማጊ ይዳሳ ዋታኮው ጉዳት ታምቤይ ኻሲ? ናው ስጋትስ እንኬስታ ንፍሶ ድኪ ጊዝዴስ ፊቲሳኑሳ ዳዶ ድባኖ ይሜካማጊ አኽⶓ እንክርፄካ::

“አሬስናና አሜሬትንኹሳ ጌቤልስ ዲግስናና እዶ ኬናካሊናያ፤ ወክትስ ዲጋውሳ ጉልሌ ዜሮስታ ኽብፂውሳ ማዳባሬ ካፅጝስ ቼጌርስትኔ” ናንኩ አቶ ተስፋው ወሬም ጌርኮ ልኻኻ ፄዋማ ዝኩጝዴስ ስዴቶስታ ክርⶓ እንጉስታንታ ፄዋማጊ አኽⶓ ዙሜካ::

ጛው ኬቤሊታጊ ሰላሙሳ ችግሮ ፌቴርጛ ካዌንሾ ቱንኩሳ ሹማጌልስታ አይማኖቱ ታብል ኩስጚሾስታ እርክሾ ዙርፁኒውላ ዊዳፊ ሰላም ዝኩዋታ ፄውጝስ ኩፅኒ ምንግስት ኩርፄንትስ እንፃኽስትጝ ማንዲስታው አኽⶓ ጉሽካ::

አቒ ክሚታ አጌትስታማ ጌንዜብ ኬይስታማ ባይስታው ባስጝኑስኪ ኩስታው ላጛ ሴንካው ኩትጚው ዝቤን አኽⶓ ዲብስካ:: ሰላም ኬቤርስታውላ ይጉጝስ ዎንጄሌንስታ ዎሬምስ እዝቡሳ ካሴ ዙርፅኔ ናንኩ አይልካ እዝብዳ ታምፅካማጊ ዝኩኑሳ ጉዳቶ አሬኬዝካማ ሼውንጝስ ሰላሙ ጉላሊሾ ዙሩኒ እዝብስ ፊኹዌ እያንኩ አኽⶓ ዙሜካ::

ምንግስትኪላ ጉዳዮ ዋዚታ ካንታውላስታ ጊዞ እያውላ አጌር አቕዳ ታምባውሳ ጉዳቶ ግምትዳ ሚፅጝስ ኽቴ ናቴ ዎሬምስ ድጙትጝፅጝዴስ ኪቻ ሰላሞ ኬቤርፅጝስ ኩርፄንትስ እንፃኽስታማ ኩስጚውሳ ዳዶ ጉላላ ፄውኒ አሬሳቻንትካ ሰላምስ ዝኩጝስ ካላንኩ አኽⶓ አቶ ተስፋው ጉሽካ:: ዶንጌቱንኩ አይልካኪላ ጚቹ ጚታላሱ ባድሚዳ ያኻማ ጚው ዎጌንሊ ዎሬሞ ጌቴምጝዴስ ኪቻ አጌር አቕስ ቴኬማው ሰላምስ ኩስጛማ ችግሮ ኽይጝስ ሰላምስ ቢዲሬ እያንታ አሳቦ ዲግስካ::

ስሞ ጌሌፅጝስ ፍየካያስኩ ካንቴ እያንታኪላ ስልኼስታ ስኔ ጊፅስጝዳ አሴሜርጜካማ ዝኩዊኔ ጉሳንኩዊያኽ:: ፌቴርስትኹ ሰላሙ ችግርስ ኩፅኒ ጊፅስጝ ይጉዋማ እንኪስ ዝኩጝሱውላ ጌርክ ቺፋ ሲኪኪኒዳ አኽⶓ ዙሜካ:: ካንቴ እያንታ ናኑውስታጊ ስኔ ሊሊትጙኽ ዙራሙሪሾ እንፃኼካማጊስታ ስልኼ ቴርሳኑ ድቒስ ዴሜካ ክምካዋ እሩብፄካማጊስታ ስልኼ ዋይካማጊ ዴስቲውሳ ዝኩዊኔ እሺካ:: አማኻሪ ክልልዳ ሹኻንቴ አሜቶ እሚኹ ሰላሞ አቲጙ ችግርስ ኩፅኒ አጌላኑ ንቭሬትጊ ድኻማስታ ጊፁሳ እንፅኼጊ ቲሪፅካማ ናካ እሌትስ ኬሌብስታኑሳ ምግቦ አግፅጝስ ቼጌርስትካማጊ አኽⶓ እንክርፄካ::

“ቹትካዳስታ ስራስሪዳ ጋቻ ታምፃው ጉዳት እንዙራ እስታቲዊያኽ” ናንኩ ኬቴሙ ዝኩዋንታ እንፃኽስስታማ ኪስስትጝስ ይጉዋማ እንጅኩዋማ ፊኹጝስ ሰላም ፋይፃንቲ አኽⶓ ዙሜካ:: ዎሬሙሳ ድምፆ እንኩዋኻማጊ ሼርስትኹስታ ካሜንስትኹ ጄር ቲንዌና አኽጝስ ካላው፣ ቹዋ ካሜንጝስ ካላው እድሉላ ፅባብ አኽⶓ ዲብስካ::

“ሰላሞ ኬቤርፅጝስ ቹትካስታ ኹን ታምቦ ፊትጝኑኒውላ ምክንያት ክችስታያሱ ዳድስ ዎሬም ባስጛማጊ አኽⶓ ዲብስካ:: ሰላሙ ጉዳይ ቻስ እስታቲው አኽጝስ ዴዴጝ ጊዝስ ዳራኪ ሴኬኬናስታ ስጋታ ጋቲታ እንፃኽስታኑውስታ ሌጌሳኑ ዎክት ይንታታ ኽቴናቴ ሼውናማ ታክስጝስ እንፃኽስትጝ ፋይፃንቲ አኽⶓኪላ ጉሽካ::

ፋግቲ ለኮማ ወረዳ ሰላምስታ ዴክት ፅ/ጝናሱ አላፊ ኢንስፔክተር አየነው ፈንታሁን ወረዳዳ 26 ኬቤልካ ዝኩንኩ አኽⶓ ጉሽካማ ጋቻዋ ፌቴርካማጊ አግስታንኩ አይልካ 12 ኬቤልካዳ ሰላሞ አቲስጝስ እዝብ ማቤራዊ፣ ፖለቲካውስታ ይኮኖሚው ትክምዴስ እንግርግራ ናታ ፄውⶓ ጉሽካ::

ወረዳው እዝብ ጋቻዴስ ኪቻ ሰላምስ ዜቦ ቲሪው ያኹኒውላ ዶንጌቱንኩ አይልካ ኩፅኒ ዲሞክራሲው ዳዴስ ኪቻ ወሬሞ ጉላላ ፄውጝስ አጌር አቕ ምንግስትዴስኪ ያኻ ዋሺኒኪ ኾትዴስ አግፅጝ ቱስታውሳ አግልግሎቶስታ ትክሞ አግፃቲታ አሱ አብንስስታ ግዴቲስ እዝቦ ችግርዳ ሚፃቲንታ ምንግስት ሰላሞ ኬቤርፅጝስ ኩርፄንትስ እንፃኽስስታማጊ አኽⶓ ጉሽካ::

“ዋሺኒኪ ጋቻው ጉዳይዴስ ቢዲሪዳ ሰላምስስታ ኩስጝጚስ ችግርካዋ ኽይጝ ምንግስቱ ቹዋ ቴግባሪያኽ” ናንኩ ኢንስፔክተር አየነው ዶንጌቱንኩ አይልካ ኩፅኒ ልኻዋ ፄጌራው ጋቻው እንዝጚዴስ ክብስስትካማ ወረዳው እዝብ ሰላምስ ዝኩጙ ሜብት ኬቤርስታታ ዎሬምዴስ ኪቻ ኩስጚስ እላፎ ዙርፃንታ እቑዌ ዲግስካ::

እዝቡሳ ካሴ ዙርጝስ ካላው ሴብትጚዴስ ኪቻ ሰላሙ ኩስጚስ አኽⶓ እርዳትስትጝ ፋይፃው አኽⶓ ቶኬምካ:: እንጚስኪላ ምንግስት እዝቡ ሰላም ኬቤርስታማ ክንቲ ጄሜርስታታ፣ አሬሳቻንትካ እንፅኺስ ይስጛንታ ጌፄን ጊፅሳንታስታ አግልግሎቴ እያንትካ ኾትካጊ እንፅኼ ይስጝፃንታ ጄሜርስትኹ ቴግባር ወረዳዳ አግስታንኩ 26 ኬቤልዴስ 14 ኬቤሊዳ ይቢቺ አኽⶓ ቶኬምካ:: እን ንጝ ዴሜካ ወረዳው ኪንዲ እዝብ ሰላሙ ችግራኻዳ አኽጝስ ሰላሞ ኬቤርፅጝስ ዋሺኔኪ ጉላሌ ቴኬምስትካማጊ አኽⶓ ጉሽካ::