ትኩቶ አቱኽ ቑንዚ

ታደለ አጋጄ

አውሮፓው ዝቤን ቼፍታ 2023ዳ አሌሙ ቲን አችቱ ንቫር ካንትፃውስታ አሌምዴስ 40 ሚሊዮን ያኻንኩ አቕ ኤች አይ ቪ ኤዴስ ብራኻዳ አግስታኩ አኽⶓ ቶኬማ:: እንጚ አሜትስ 630 ሻይ አቕ ኤች አይ ቪ ኤድስሊ እምትጙኽስ ይዎቶ አቴካ:: እምፕል ትኩሚ ሹኻ ሚሊዮን ያኻንኩ አቕ ዴሜካ ቑንዚስ እምስትካ ኔ አሌሙ ቲኑ አችቱ ንቫር::

አሌምዴስ ኬፍቲኒ አችስ ኤች አይ ቪ ኤድስ እሳንጝጙኽ አጉር አፍሪካ ያኹስ ጋያኪ ሳሃራዴስ ኩክራ አግስታንኩ አጌርካ ደቡብ አፍሪካ፣ ታንዛኒያ፣ ሞዛምቢክ፣ ናይጄሪያ፣ ሌሴቶስታ ቦትስዋና ክፍቲኒ ታምቦ እሜና::

ይቶፒያዴስ ዴሜካ አዲስ አበባ፣ ጋምቤላ፣ ሀረርስታ ድሬደዋ ኤች አይ ቪ ኤድስ ኬፍቲኒ አችስ እሳንጝጙክ ዙራሙርካ አኽⶓ ቲኑ ሚኒስትርዴስ አግስትኹ ንቫር ካንትፄ::

ፌዩንኩ አሜትካዳ እንፃኽስትኹ እንፅኺስ ኤች አይ ቪ ኤድሱ እሳንጝጚው ሜቴን አውሮፓው ዝቤን ቼፍታ 2012ዳ እሺኹዴስ 1 ትኩሚ 26ዴስ ዐ ትኩሚ 87ሾ ኔኬትጝስ ካላ:: አጌርታጊ እሳንጝጚው ሜቴን ሊኽዴስ 1 ታፋዴስ ኩክራ ያኹኒውላ እሳንጝጚ ናካኪላ ክልልዴስ ክልሎስታ ኬቴምዴስ ኬቴሞ ሊሊት ዝኩⶓ ንቫር ካንትፄ::

ይቶፒያዴስ ዋልታ ክልልካዳ ኤች አይቪ ኤድሱ እሳንጝጚው ሜቴን ሊኽዴስ እምፕል ታፍዴስ ጃላኽ:: አዲስ አበባዳስታ ጋምቤላዳ ሊኽዴስ 3 ትኩሚ 2 ታፋ፣ ሀረርዳ 2 ትኩሚ 7 ታፋ፣ ድሬድዋዳ 2 ትኩሚ 5 ታፋ፣ ትግራይዳ ዴሜካ 1 ትኩሚ 1 ታፋ፣ አማኻሪ ክልልዳ ዴሜካ 1 ትኩሚ 1 ታፍያኽ::

ጌፄሩ ዙራሙርካዳ 0 ትኩሚ 4 ታፋ ያኹስ ኬቴምዳ ዴሜካ 2 ትኩሚ 9 ታፋ እሳንጝጚው ሜቴን ዝኩኹ አኽⶓ ንቫር ቶኬሜ::

ይቶፒያዳ እምፕል አሜትስ እምስታንኩ 74 ሻይ 442 አቕዴስ ዎታትካ ኬፍቲኔ ታምቦ እሜና::

ዊዛሩ በየነች የኔአባት አገው ግምጃቤት ኬቴሙ ዝኩዋንትካኽ:: 17 አሜታዴስ ናቴ ኤች አይቪ ኤድሱሳ እጆ ሲፍጝጚስ  ካፅካማጊ አግስታና:: ኤች አይቪ ኤድሶ ማራማርስትካማ አቕጝዴስ ቤዴራ አካላት ኔኬትጝ፣ እውርፅጝስታ እሊኩ ምልኻትካ ካንትስትⶓ ጅኹዌካ:: ካቢትጝጚስ ቑንዚስ ቑንዳስታኒ አኪም ጝና ካስጝስ ማራማርስትካማ ኤች አይ ቪ ኤድስ ብራኻዳ አግስትⶓ ድኹዌካ::

ኤች አይቪ ኤድስ ብራኻዳ አግስትⶓ ማሉኒዴስ ናቴ እጆ ሲፍጝጜካማ ካፅጝስ ቲንስ ዝኩⶓ እንክርፄካ::

ኤች አይ ቪ ኤድስ ብራኻዳ ዝኩኒውላ እጆ ሲፍጝጜካማ ካፁኒጊ እምፕል ቲን ዌና አቒ ዝኩዋውሳ ድሜ ዝኩጝስ ካሊስታው አኽⶓ ዙሜካ ዊዛሩ በየነች እምፕልካ እምፕልካ ኤች አይቪ ኤድስ ብራኻዳ ዝኩንክ አቕ ቴስፌ ኬውጝስ እጆ ኬውጝፃኑ ጉዝማ ክርጝስ ታምባንኩ አኽⶓ ዲብስካ::

አልኮሉ ዝቒዴስ ክብስስትጝስ ሲፍጝጜካማ እጆ ካፅጝ ቱስታው አኽⶓ እንክርፄካ::

ኤች አይ ቪ ኤድሱ ቑንዚ እሳንጝጛማጊ አኽጝስ ሊሊቲ ትኩት እይስታማ እንፃኽስትጝ ቱስታው አኽⶓ ጉሽካ:: ሚንችካ አቕዳ ማላኑላስ ኤች አይ ቪ ኤድስ ብራኻዳ ዝኩጝስ ካላው አኽጝስ ዝማቺስ ምርማሪ ካስጛማጊ ቑንዚ እሳንጝጛቲታ ካላካልጝጝ ቱስታው አኽⶓ ዙሜካ::

ኤች አይ ቪ ኤድሱ ቑንዚው ፌያፌይጚውስታ ካላካልጙሳ ዳድካዋ ብሽታንዳስታ ክንቲ ጝንካዳ ክንትፃንኩ አኽⶓ ዊዛሩ በየነች ድኹዌካ::

እሊት አገው ግምጃ ቤት ኬቴሙ ዝኩዋንታ ዊዛሩ ሙሉነሽ አድማስ ኤች አይቪ ኤድስ ብራኻዳ ዝኩጝስ እጆ ካፅካማ አግስታና:: ላጛ ጄርካ ቹ ያኹንኩ ሙሉነሽ ጄርካው ታብሊ ክሪስ አግሌልቱኒዴስ ፋሌንጋ ቑንዚ ቑንዳፅⶓ ዲብስካ:: ቑንዚዴስ ኬሽጝስ ናኒስ ፄቤልዳ ቱዋኒውላ ኬሽጝስ ኩፅኒ ካሌካያ:: ፄቤልዴስ ኬውጝፅጝስ አኪም ጝና ካስካማ ማራማርስታኒ ኩፅኒ ቲቪው ቑንዚስ ቑንዳስትካ:: ቲቪውሳ እጆ ካፅካማጊ ዝኩኑ ጊዝዳ ኤች አይ ቪ ኤድስ ማራማርስትጝስ ቑንዚ ብራኻዳ አግስትⶓ ድኹዌካ::

ኤች አይ ቪ ኤድስ ብራኻዳ አግስታኩ እምፕልታቕ ቲሪትጝፁኑ ማቪሪዳ ቱጝስ ጛዳ ታምብኹ እሊኩ አቕዳ ታምባቲታ ክንትፅⶓ ጄሜርካ::

አቶ አስማረ ከበደኪላ አገው ግምጃ ቤት ኬቴሙ ዝኩዋንትካኽ:: ኤች አይቪ ኤድስ ብራኻዳ አግስትጝስ ብሩህ ተስፋ ማቢሪዉ አባል ያኼካማ እክምኒው ውማይቴንካ እያኑሳ ኩስጜ ቻቤልጝስ እጆ ሲፍጝጜካማጊ ካፃና::

ምንግስት እጆ ኔፃስ ዲግስጝስ እጆ ካፅካማጊ አይኪ አቒ እንፃኽስታውሳ እንፅኼ እንፃኽስትጝስ ጛጛርትጛሳ ቺፅጝፃንኩ አኽⶓ ዲብስካ::

ቤዴርንኹ ጊዝዳ ኤች አይ ቪ ኤድስ ዝኩክሳ አቖ አግሌልጙ ችግር እሺⶓ ቶኬምካማ ናካዳ ኩፅኒ እድርዳኪ ያኻ እሊው ማቢሪዳ ኔፃስ ቱዋንታ ፄውስታማጊ አኽⶓ ዙሜካ::

ብሩህ ተስፋ እስታው ማቢሪዳ ዝኩንኩ አባልካ ኤች አይ ቪ ኤድሱ ዙሪዳ እምፕልታቕስ ሼውቴ ፌቴርካማጊ አኽⶓ ድኹዌካ::

አንኪሺ ጉዋጉሲ ወረዳዳ ኤች አይ ቪ ኤድሱ ካላካልጚውስታ ቼፍጝጚው ኦፊስር አምሳሉ ጌታሁን ኤች አይቪ ኤድሱ ቑንዚ ፄትቲው ችግርሊ እምትጛማ ቑንዚስ ትኩት እይስታውላስ ይጉጝ ማልጛ እሳንጛታ ፄውስትⶓ ጌሌፅካ::

ወረዳታ ኤች አይቪ ኤድስ ብራኻዳ ዝኩንክ አቕ እጆ ሲፍጝጜካማ ካፃንታ ፄውስታማጊ አኽⶓ እርዳትፅካ:: ቑንዚ ብራኻዳ ዝኩክ ጛርት አቕ ፄትቲው ችግርስ ዳድ ልምትጝስ እጆ ኬውጛፃንኩ ዝኩⶓኪላ እርዳትፅካ:: ወረዳታጊ ኩርማን አሜትዳ ማራማርስቱንኩ 1 ሻይ 9 ሊኻ ሶኼታ አቕዴሰ 4 አቕዳ ቑንዚ አግስትⶓ ቶኬምካ:: 212 አቕ  ዴሜካ እጆ ካፅካማጊ አግስታንኩ አኽⶓ ጌሌፅካ::

ኤች አይቪ ኤድሱ ቑንዚስ እንዴስ ቤዴራ ሊሊቲ ትኩት እይስታማ እንፃኽስስቱስ እሺⶓ ቶኬምካማ ናካዳ ኩፅኒ ዜኔግስትኹ ዜርፍ አኽⶓ ኽይትጝፅካ:: ወረዳዳ ቑንዚ ዝኮ እስታማ ታራታርስታው ዙራሙሪዳ ምርማሬ ካስጝፃው ጛርቱ አችት ዝኩⶓ ጌሌፅካ::

ኤች አይ ቪ ኤድሱ ቑንዚስ እይስታው ትኩት ኔኬትጝ ቑንዚ እሳንጛታ ፄዋው አኽጝስ ማራማርጝስ አጌላጌላንኩሳ ሜሳርካዋ ዋኽትጝፅጝ ቱስታው አኽⶓ ጉሽካ:: ጛራ ጛራ ቲኑ ኾትዳ እምፕል ቤን ኤች አይ ቪ ኤድሶ ማራማርጝስ ቴርትኹ ቤን ዝኩⶓ ቶኬምካ:: ቑንዚውሳ እሳንጝጜ ኔኬትጝስ ጉዳይ ትኩታኩ አካልካ ጛውሳ ታምቦ ፊትጛንታ እቑዌ ፌያፌይጝፅካ::