ሰላሙ ዳንጉዊኒ ኢንቨስተርካዳ ችግሮ ፌቴራማጊያኽ

ታደለ አጋጄ

ሰላሙስታ ፄትቲው ችግርስ ግብርኒው ዜርፍዳ አሴሜርጙንኩ ኢንቨስተርካዳ ኬፍቲኒ ጉዳት ታምብⶓ ግብርኒው ኢንቨስትመንትዳ አሴሜርጙንኩ ጛርት አቕ ዙሙና::

አማኻሪ ክልልዳ ኬሴትስትኹ ሰላሙሰታ ፄትቲው ችግር ሚንችካ ዜርፍካዳ ቻኒስቶ ታምፃማጊ ያኹስ ግብርኒ ኢንቨስትመንቱ ዜርፍዳ አሴሜርጙንኩ አብትዌንካዳ ታምቡኽ ጉዳት ኩፅኒ ማልጛ ኬፍቲኒያኽ::

አዮ ጉዋጉሲ ወረዳ አምቢሊስታ ዳዲ ደንገሰብ ኬቤልካዳ ሚንችካ ኢንቨስተርካ ግብርኒው ዜርፍዳ አሴሜርጜካማ እንፃኽስታሺካ:: ያኼስጉ ክልላኻዳ ኬሴትስትኹ ፄትቲው ችግርስ ሚሊዮንስ ቼፍስታውሳ አብቶ አቴካ::

አቶ ባይነሳኝ ገረም አዮ ጉዋጉሲ ወረዳ አምቢሊስታ ዳዲ ደንገሰብ ኬቤልካዳ 2003 ም/አታስ ጄሜርካማ ግብርኒው ዜርፍዳ አሴሜርጜካማ እንፃኽስታሺካ:: 2015/16 ምርቱ ዝቤንዳ ኩፅኒ ዜሩኑሳ ሴብሎ ዶንጌቱንኩ አይልካስ ዜሬፍስትⶓ ዙሜካ:: ሰላሙስታ ፄትቲው ችግር ኬሴትስቱኒዴስ ጉሽፃማ ላንቡሳኺስታ ኢንቨስትመንቱ ብቲ ዶንጌቱንኩ አይልካስ ዎሬርስትⶓ ዲብስካ::

እንፃኽስታኑ እንፅኺዴስ አሜትስ 40ዴስ 50 ሚሊዮን ጌንዜቦ አግፃሺንኩ አኽⶓ ቶኬሙንኩ አቶ ባይነሳኝ ናካ ኩፅኒ ግብርኒው እንፅኺዴስ ፌካማ ጝንዳ እንጅኩⶓ እንክርፄካ::

ቦሎኬ፣ ማሾ፣ ሹምቤ፣ ቤርቤሮስታ ታፌ እሳንስ አሜሬትጝስ ኬሽኹሳ ትክሞ አግፃሺንኩ አኽⶓስታ ባርኾቼውሳ ምንዛሬ አግፃንኩ ሴብልካዳ ትኩትስ እንፃኽስትጝስ ጌቤልስ ዲግሳሺንኩ አኽⶓ ዲብስካ::

ኢንቨስትመንቱ ብቲዴስ 81 ሚሊዮንዴስ ጃላ ጌንዜብስ ቼፍስታውሳ አብቶ ዜሬፍስትⶓ ጉሽካ:: ባንክዴስ ጉሽቱኑሳ ጌንዜቦ ዙርፅⶓ አቲጝስ ዝኩፄ ጝኖ ዋይጝስ ኬዩንኩ አኽⶓ ዙሜካ::

4 ሊኻዴስ ጃላ እንፃኽስታንትካዋ ኬፄርካማ እንፃኽፃሺንኩ አኽⶓ ቶኬምካ:: ምንግስት ሰላሞ ማንዲፅጝስ እንፃኽስታማጊ ያኹኒውላ ቢሬኺው ዙራሙሪ አኽጝስ ቼጌርፅⶓ ዲብስካ::

ዶንጌቱንኩ አይልካ እሚኑሳ ዘራሙሬ ምንግስት ኦፕሬሽኖ እንፃኽስትጝስ ሰላሞ ማንዲፃንትካዋ አሴሜርጝፅጝስ እርሺው እንፅኺሾ ዙራንታ ፄውስታያታ ካሲካ::

እሊው ግብርኒ ኢንቨስትመንቱ ዜርፍዳ አሴሜርጛሺንኩ አቶ ካሳሁን አበሻ ጋቻ ታምፅኹሳ ጉዳቶ እንያኽ ናማ ዙሚጝስ ቼጌርፄኽ ኑኑ:: 2015/16 ምርቱ ዝቤንዳ ዜሩኑሳ ሴብሎ ኩፕፃኑላስ ውላዋ ዜሬፍስትካ፤ ካፅጝስ ካሌካያሱሳ ዴሜካ ሌግስ ድጙፅⶓ ዙሜካ::

አብትዌንካው አብት ዎዴምኹሳ ኮሚቴ ፂኒሳማ ግብሩ ኬሽጝጚ ፄውስትጝዴስ ይጎ እንዳርማኪ እርዳቲ ፄውስታያሱ አኽⶓ ጉሽካ::

ጛኪላ 480 ሚሊዮንዴስ ጃላ ያኻውሳ አብቶ ዜሬፍስትⶓ ዙሜካ::

አዮ ጉዋጉሲ ወረዳው ሴብል ልማት ኬቹ ጉሳንቲ አበበ አንተነህ ወረዳዳ 41 ጛርት አቕ እርሺው ኢንቨስትመንትዳ አሴሜርጛሺንኩ አኽⶓስታ 13 ኢንቨስተርካ ይቪችካ ይጉዋኒስ እሊኩ ማሲዴስ ፌኔኬልጜካማ አግስታንኩ አኽⶓ ጌሌፅካ::

አብትዌንካ ዜሬፍስቱኑሳ ሴብሎ ኮሚቴ ፂኒሳማ ጉዳይ ካንታው አካልስ ሪፖርት ፄውስትⶓ ኽይትጝፅካ::

ወረዳታጊ እምስትኹ ምርቱ ዝቤንዳ 42 ሻይ 244 ሄክታር ብቲ ሊሊትጙንኩ ሴብልካስ ሾፌንስትጝስ አኬድስታማ 41 ሻይ 457 ሄክታር ብቲ ሊሊትጙንኩ ሴብልካስ ሾፌንስትⶓ ጌሌፅካ:: ሊሊትጙንኩ አሬሳቻንትካ ጛው ማሲዳ አሜሬታኑላስ ይጉኒውላ ዶንጌቱንኩ አይልካስ ብቲ ሊሊትጙንኩ ሴብልካስ ሾፌንስትⶓ ቶኬምካ::

41 ኢንቨስተርካዴስ 13 አብትዌን ጛውሳ ማሴ ሊሊትጙንኩ ሴብልካስ ሾፌኑንኩ ያኹስ ይጉዋንትካው ብቲ ኩፅኒ አይስ ዜርስትኹ አኽⶓ ማሊስታያሱ አኽⶓ ኽይትጝፅካ:: ሰላምስታ ፄትቲ ማንዲስታማ አብትዌንካ እርሺው እንፅኺሾ ዙራንኩ ያኹኒ ፋይስታውሳ ግባቶ እይጝስ እርዳቴ ፄዋንኩ አኽⶓ ጉሽካ::

አዊ ብሄረሰቡ ቺፅጝፂው ሰላሙስታ ዴክቱ ሜምሪው አላፊ ጌታቸው ቢሻው ግብርኒው እንፅኺዳ አሴሜርጙንኩ አብትዌንካ ጛዉሳ አብቶ ሊሚፃቲንታ ዶንጌቱንኩ አይልካ ልቕልቕናኑ ዙራሙሪ አኽጝስ ዋኽስ ዋኾ ሰላም ማንዲስታያሱ አኽⶓ ጌሌፅካ::

ሰላሞስታ ፄትቴ ማንዲፅጝስ አኬድስትኹ እክድ ስሬታስ ካስጝስ ካሊስታያሱ አኽⶓ ቶኬምካ:: አብትዌንካሊ፣ አመራርካሊስታ አጌሩ ካላካልጚው አይልሊ ይጋሬ እንፅኼ እንፃኽስታማ ችግሮ ኽይጝስ ኩስጝጜ ካስጝፅⶓ እርዳትፅካ::

እጋፊ ዳድስ ብቴ ዎሬሩኑሳ ዙራሙሬ ሊሊቲ ትኩትስ እንፃኽስታማ ልማትሾ ዙራንታ ፄውስታው አኽⶓ ቶኬምካ:: ፌኔኬልጛሺንኩ አሬሳቻንትካ ኩፅኒ ሰላም ፌቴርስታማ ግብርኒው እንፅኺሾ ዙራንታ ፄውስትⶓ ጌሌፅካ::