ልማትስ ጁንኩ አሬሳቻንትካስ ብቲው ትክ እይስቱኻ

ንግስቴ ተስፋ

ልማትስ ጁንኩ 84 አሬሳቻንትካስ ጝና ግቢትፂ ትክ ብቲ እይስትጝ ሱኺቲ አሜታሱሳ ክሬቴ ኽይኹ አኽⶓ አሬሳቻንትካ ዙሙና::

እንጃቢሪ ኬቴሙ ቺፅጝፂ ቢዲ ጁጊሊስታ ፉሽቲ ኬቤሊዴስ ልማትስ ባድሜ ባይፅካማ ጁንኩ 84 አሬሳቻንትካስ ጝኖ ግቢታኑ ትክ ብቲ እይስታ:: ሱኺቲ አሜታስ ፌኔኬልጜካማ እጂንኩ 2018 ምሬት አሜታዳ ትኮ ብቴ አሬኬብስቱንኩ አሬሰቻንትካ እንጃቢሪ ዩኒቨርስቲው እሳንጝፂ ግንባቲው ምክንያቲስ 2010 ም/አሜታስ ጁንኩስታ ወክትስ ትክ ብቲ እይስታያስኩ እሺንኩስ አኽጝ ጌሌፅስታ::

ትኮ ብቴ አግፁንኩ አሬሳቻንትካ ክቻዴስ አቶ ብርሃኑ አደራ ወክትስ ምንግስቱሳ ትዛዞ ኬቤርፅካማ ብቴ ልማትስ ባይፅካማ ጁⶓ ዙሜካ:: ልማቱ እሳንጝፂው ቴግባርስ ብቴ ባይፅካማ ጁጝስ ዴስቴንካ እሺⶓ ዲብስካ:: ወክትስ እንጃቢሪ ዩኒቨርስቲ ብቲውሳ ካሴኪላ ኬይⶓ ታክስፅካ::

አቶ ብርሃኑ አደራ ዙማኑውስታጊ ትክ ብቲ 2014 ም/አሜታዳ እይስታዊያኽ እስታማ ፋይፃውሳ ጉዳዮጊ 2015 ም/አሜታዳ ዋኽትጝፄካማ አሬሳቻንትካ ማንዲትጙ ኒውላ ክልልታ ፌቴርስትኹ ሰላሙ ችግርስታ ወክት ቺፋ እንፅኺው አላፍካ ኪስጝጝ ኩፅኒ አሬሳቻንትካ ዝኩፄ ጝኖ ወክትሰ ግቢቴካማ ዝኩጝስ ካላቲንታ ፄዋ::

ጝኖ ግቢትጝስ ያኼ እስታማ እይስትኹ ጌንዜብ ወክትስ ትክ ብቲ እይስታስኩኒጊ ቼጌርስታኑላ ጝኖ ግቢትጝስ ካላንኩ እሺካ:: ሱኺቲ አሜታስ ጝኖ ክራይቴካማ ቺጊርፄ አኺኔ ፌይፁንኩ አኽጝስ ጌንዜብ ቤቴንስታማ አሌድስትጝስ ጝኖ ግቢትጝስ ቼጌርስትጝስ ካላንኩ አኽⶓ ቶኬምካ:: ያኼስጉ ትኮ ብቴ አግፅጝስ ዴስቴንካ አኽጝስ እርዳትጚስስታ ሊሊትጙኽሳ እንፅኼ እንፃኽስትጝስ አግፃኑ ሚፂስ ጝኖ ግቢትጝስ ኩፅኒ ኩርፄንካ አኽⶓ ጉሽካ::

አቶ ግርማው ካሴኪላ ትኮ ብቴ አግፁንኩዴስ እምፕል ያኻኒስ ሱኺቲ አሜታስ ጝኖ ግቢታኑሳ ትኮ ብቴ አግፃኑላ እጂጝ ቴስፌ ኬውፃሺኩ ያኹኒውላ ናካዳ ክሬቲ ኽይስትጝስ ኩፅኒ ዴስቴንካ አኽⶓ ዙሜካ::

ዩኒቨርስቲው ልማትስ ብቴ እይጝስ እንቲታኪ ጛው ዙራሙሪዳ ግቢትስትጝ እንፅኼ ፌቴራማ እንፃኽስትጝስኪ ያኻ እምፕልት አቡቑሳ አግልግሎቴ አግፅጝስ ካሊፁክ አኽⶓ ዲብስካ::

እንጃቢሪ ኬቴሙ ቺፅጝፂ ኬቴሙስታ ስሩ ልማት ፅ/ጝናሱ አላፊ አቶ የኮየ ትላሁን ሊሊትጙኽ ምክንያቲስ ክሬቲውስታ ካሲው ጉሽፃ ያኻማ እጂኹሳ ልማትስ ጁዋንትካውሳ ካሴ ዙርፅጝስ እንፃኽስስትኹ ቴግባርስ 126 ልማቱ ጁዋንትካስ ትክ ብቲ እይስትⶓ ጉሽካ::

እንጚስኪላ እንጃቢሪው ዝኩዋንትካ ምንግስት ልማትስ ብቴ ፋያኒ ፍካዴናስታ ቴቬቬርጛንትካ ያኼካማ ኬቴሙ እሳንጚስስታ ልግስስ ታምቦ ፊትጜካማጊ አኽጝስ ምስጋኒ ቱስታኩ አኽⶓ ጌሌፅካ::

ሱኺቲ አሜታሳ ትኮ ብቴ አግፃኑላስ ታጌስካማ ምንግስቱሳ ዙርሜ አግፂኒምባ ኺስታ እጂጝስ ናኪኒ ወክትስ ኩፅኒ ችግርስ ኽዮ አግፅⶓ ኽይትጝፄካ:: እንጚስኪላ ቢዲጁጊሊ፣ ፉሽቲስታ ባታ ኬቤሊው ዝኩዋንትካስ ትኮ ብቴ እይⶓ ቶኬምካ::

አዊ ብሄረሰቡ ቺፅጝፂ ኬቴሙስታ ስር ልማት ሜምሪው አላፊ አቶ አይተነው ታዴ ጛሾስ ብቲ ዌን እጎስታ ሜሜሬ ጉሽፃ ፄዌካማ ሜብቶ ኬቤርፅጝስ ካሴ ዲግስጝ ሜብት አኽጝታጊ ላምቡሳ ኺስታ ትኮ ብቴ አግፃኑላ እጂጝ ቱስታ ጋቲው አኽⶓ ጌሌፅካ::

ሊሊትጙኽ ምክንያቲስ አግልግሎቲው ችግራ ያኻማ እጂኹሳ ክሬቴ ኽይጝስ አኮሜችስትኹ ቴግባር ኩፅኒ ፍንሾስ ችግር ፌቴርስታቲታ ትንካኬ ፄውጝ ቱስታው አኽⶓ ክንቴ እይⶓ ኽይትጝፄካ::

ፍንሾስኪላ ኬቴሙሳ ልማቶስታ ልግሶ ቼሜትጝፅጝስ አኮሜችስታው ቴግባርዳ ኬቴሙ ዝኩዋንትካኪ ያኻ አሬሳቻንትካ ቴቬቬርጛንታ እንቲታኪ ግዴቴስታ ሜብቶ ክችክቺስ ፊትጛንታ እቑዌ ዲግስካ::

አዊ ብሄረሰቡ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው አችቺፋ ፌፄምፃንትካ ኾትካ እምፕልታቕዴስ ዲጋውሳ ካሴኪ ያኻ ክሬቴ ወክትስስታ ጊዝስ ዙርሜ እይጝስ ፌቴርስታውሳ ክርፂ ቺፅጝፂውሳ ችግሮ ኔኬትጝስ አጌላጌልጝ ቱስታው አኽⶓ ጌሌፅካ::

አግልግሎቴ እያንትካ ኾትካኪ ያኻ ምንግስቱ እንፅኺው አላፍካ እዝብ እይኹሳ አላፍቶ ክችክቺስ ፊትጝጝስ እምፕልታቕ ልማትስኪ ያኻ አግልግሎቲስ ዴስቴና ያኻንታ ፄውጝ ቱስታው አኽⶓ ታክስፅካ::