ችግርዴስ ፊጝስ ጊዛታስ ኩፕፅጝ

አይር አግልታው ኪሲው ዛቢትጝጙ ምክንያታስ ክልልታኪ ያኻ ብሄረሰቡ ቺፅጝፂታ ፌያፌያማ ሊሊትጙንኩ ዙራሙርካዳ እሉዋማጊ ዝኩኽ ወክቶ ማንዳያሱ እሪስታ ዳመኒ ሴብልካዋ ኩፕፅጝስ አሪባሪብጚ ፄውስትየስጊ ኬፍቲኒ ምርቱ ባኬንጝ ጌቴምጝስ ካሌ::

አኽጝስኪ ዎክቶ ማንዳያሱሳ እሬ ካላካልጝጚስ ሴብሎ ኩፕፅጙ እንፅኺ ይስጛማ ኬፄላታ ፄውጝስ እንፅኼ እንፃኽስትጝዴስ ፌይኹስ ሲፋሲፍጜስታ እርዳቴ ፄውጝ ፋይፄ::

አሬሳቻንትካኪላ ሴብሎ ወክትስ ኩፕፅጝስ ቤሴቕጝስ አቓ ግብሪስ ፍትሬቱ ኬሴትዴስ ካላካልጝጝ እያኑ እንፅኺ አኽጝ ቱስቴ:: ታንቡንኩሳ ሴብልካዋኪላ ወክታ ጋው እሪ አቤሌሻቲታ አሬኽትስ ኩፕፅጝስ ካሊስታታ ጝናቑ አችስ፣ ወበሪስ፣ ማቢሪስ እንቲታኪ ግርብ እንፅኻስ ቴኬምስትጝ ፋይፄ:: እንሳ ፄውጝስ ዴሜካ ውላጊ እምፕልታቑ ቤንካ አሬሳቻንትካስ ፄውስታውሳ ውላቱዌ እርዳቴ ይስጝፃማ ኬፄልፅጝ ቱስቴ::

አሌም አቩቑ አችስ 8 ሊኻ ሚሊዮንዴስ እንቲታኪ አፍሪካዴስ 278 ሚሊዮን እዝብ ምርኪው ኬሴትስ ታምብጝስ ካላው ምርቶ ኩፕፅጝዴስ ይጉዋው ዳንጉዊኒስ ጌቴማው ምርቱ ባኬንጝስ  አኽⶓ ቶኬሜ:: እን ምርቱ ባኬንጝስኪላ ይቶፒያው ምግቡ ዋስትኒዳ ኬፍቲን ቻኒስት ዝኩዋታ ፄውኽ አኽⶓኪላ ካንትፃ::

ታንቡንኩ ሴብልካዋ ኩፕፅጝስ እሪ ዝኮ እላ ናውሳ ማንዲጝኪላ ፋይፃላኪ:: ታንቡኽሳ ሴብሎ ዎክትስ ኩፕፅጝስታ ኪዳማ ጝንሾ ሚፅጝ ቱስታ ጋቲታ ችክችኪጝስ ባኬናውሳ ምርቶ ማንዲጝስኪላ ቹዋ ኽያኽ:: ታንቡንኩ ሴብልካዋ ኩፕፅጝስኪላ ወሴኽጝ ቱስታላኪ:: ታክስስትኹሳ ምርቶ አግፅጝስ ካሊስታታ ዴሜካ ምርት ዋሺኒኪ ችግር ምክንያታስ ባኬናቲታ ፄውጝስ እንፃኽስትጝ ፋይፃንቲ ጉዳያኽ:: ምርቱ ባኬንጝስ ጌቴማውሳ ችግሮጊ ካላካልጚስ ካሊስታውኪላ ቱስቲ ዝኩኽ ዳድስስታ ዎክትስ ፍትሬቱኪ ያኻ አቓ ግብሪ ኬሴትዴስ ማንዲጝስ ምርቶ ኩፕፅጝስ ካሊስቱስያኽ:: አሌሙ ምግቡስታ እርሺው አችትኪላ ይቶፒያዳ ሌኽዴስ 30 ታፋዴስ ጃላ ያኻው ግብርኒው ምርት ባኬናው አኽⶓ ቶኬማ:: እንኪላ ካንትስታኒ ልቓ ጋቲውያኽ:: ዝኩኽ ጌቤሉ ክብርናቲሊ እምትጛማ ምርቱ ባኬንጝ ዴሜክስታኒ ዴሜካ እምፕልታቕዳ ታንባው ዝኩዊኒው ቻኒስቶ ዙርፅጝስ ካሊስታቲው አችሾ ታንብጝስ ካሌ:: እስጜ ችግሮ ቤዴራማ ካላካልጚስ ካሊስታው ዴሜካ ሊሊትጙንኩ ምክንያትካስ ባኬናውሳ ምርቶ ቤዴራማ ኩፕፅጝስያኽ:: ምርቱሳ ባኬንⶓ ካላካልጚስ ካሊስታታኪላ እይስታንኩ ኩስጚው አሳብካዋ ቱስቲስ ቴኬምስትጝ ፋይፄ::