“ሜብቶ ካሲጝስ ድፍሬቶ እያላ”

ንግስቴ ተስፋ

አሌሙ ታሪክዳ ዋሺኒኪ ምንግስት አጌር አቕዳስታ ምንግስት ክቻዳ ፌፄምስታው ኢኮኖሚውስታ ማቤራዊ ውሉ ጉሽፂስ አጌር አቕስ ምንግስት እስታው አካል አቑሳ እንኬ፣ ኔፃኔቶስታ ንብሬትዳ ታምብጝስ ካላውሳ ጉዳቶ ካላካልጝጝስታ ልማቶ እሳንጝፅጝስ ካሎ ቱዌስጉ አጌር አቕ ዴሜካ እንጚ አግልግሎታ እይፂ ያኻውሳ ፍሼ ሾፌንጝስ ካላው ሚፂው ጉሽፂ ፋይፃዊያኽ::  ግብሮ ኬይጝኪላ ግዴቲታ ካፅስታማ አስሜምጝጝስ ጊዝቺፋ ግዴቲውስታ ሜብቱ ውል ቴግባርዳ እሼማጊ አግስቴ::

ግብሮ ኬይጝ አብቱሳ ሜቴኖ ሌጌፅጝስስታ አጌር አቑ ዝኩዊኒውሳ ሴሎ ኬሽጝፅጝስ ኬፍ ንኹ ታምብ ዝኩኽያኽ::  እን አጌራ ይቶፒያኪላ አጌር አቕስ እንፅኺውሳ ድሎ ፌቴርጝስስታ ልማቶ ቼሜትጝፅጝስ ግብሮ ኩፕፅⶓ እግዳ ግዴቲታ ዴንጌግጝስ እንፃኽስስታማጊ አግስቴ::

ግብሮ ኬያታ ግዴቲ እይስትኹ ዋሺኒኪ አቒ እይስትኹ ሊኪፂስ ግብሮ ኬይጙ ግዴቲ ዝኩኽያኽ:: ግዴቴ ፊትጛውላ ይጉኒ ኩፅኒ ወንጄልስ ካሲስትⶓ እግ ዴንጌግስታማ አግስቴ::

አዊ ብሄረሰቡ ቺፅጝፂ አዮ ጉዋጉሲ ወረዳ አዚኒ ኬቴሙ ዝኩዋንቲ አቶ አዲሱ በሪሁን 1994 ምሬት አሜታዴስ ጉሽፅካማ ጊፁ እንፅኺዳ አሴሜርጜካማ አግስታና:: አቶ አዲሱ ዳምቢሲ ኬቤሊዳ ካሜንስትካማ ሌጌሳንኩ ያኻኒስ ጊፁሳ እንፅኼ ጉላላ ፄውጝስ እንፅኼ ሽኩዋሩ ቓንፂው ጊፅስ ጄሜርካ:: ላኹ ናማ አንኩዋ ብርስ ሽኩዋሩሳ ቓንፄ ጛሪስ ቡጝስ  አዚኒዴስ ዳምቢሴ፣ ዳምቢሲዴስ ቲሊሌ ልኩስ ናኺሲ ጛሪዳ ቓንፄ ቡጝስ ችርቻሩስ ጊፅⶓ ጄሜርⶓ እንክርፅካ::

ጊፁሳ እንፅኼ እሌትዴስ እሌቶ ኬሽጝፅካማጊ ዝኮስኩስ ኩፅኒ ስሩ ልማት ዋኽትጛውላ ይጉጝስ ቼጌርስትⶓ ሼውንጝስ እንጚ ጊዛይ እሺኾ አጌራውሳ ግዴቴ ፊትጝጝ ቱስታው አኽⶓ እርዳትስትጝስ አግፃኑዴስ ፊቲዴስ ግብሮ ኬይⶓ ጄሜርⶓ ዲብሱኑ:: ወክትስ አች “ሐ” ግብሮ ኬያንትካ ያኼካማ ጄሜርⶓ ጉሽካ::

ዋሺኒኪ እንፅኼ ቴስፊስስታ እክድስ እንፃኽስስቱኒጊ ኪስስትጝስታ ሌጌስጝ ይጉዋቲው አኽⶓ ጉሽካ:: አቶ አዲሱ ናካዳ አግፃኑውስኪ ያኻ ኬያኑ ግብርስ ዴስቴንካ አኽⶓ እንክርፄካ:: ናኺሲ ልኩስ እንዜጜካማ ጊፆ ጄሜርጝስ ናካዳ ኢኮኖሚስ ይስጜካማ ጝን አቖ ቺፅጝፅጝስስታ አጌራኪላ ሌጌስታታ አግፃኑ አግልግሎቲስ ግብሮ ኬይጝስ ግዴቴ ፊትጛንኩ አኽⶓ ጛውሳ ዴሶ ዙሜካ:: “ግብሮ ኬናው እንጛርትጛስያኽኪላ” ንካ::

አዚኒታጊ አግልግሎቴ እያንቲ ሚፂው ፅፌት ጝናኪላ ግብሩሳ አላሜስታ ፋይፃንቶ ካንትኹስ ወክት ቺፋ ሼውቴ ፌቴርጝስ ፂንስስትኹሳ ግብሮ ኬያንትካዳ ዋሴናማ አቕፃው አኽጝስ ቤዴር ንካማ ወክትስ ኬያንኩ አኽⶓ ቶኬምካ::

ፌያፌያማ ወክት ቺፋ ፋው እሰካዊ ሜሜሪ ግብሮ ኬያንትካዳ ቻኒስቶ ፌቴሩኒውላ እጋዊ ዳድስ ክሬቴ ዲግስጝስ ክቼያታ ካሲጝስ ቱስቴ ግብሮ ኬያንኩ አኽⶓ ጉሽካ:: ደረሰኞ እይጝስ ጊፁ ልቕልቕቲዳ እንፅኼ እንፃኽስታንኩ አኽጝስ ግብሮ ኬያኒስ ችግር ፌቴርስታቲኩ አኽⶓ ዙሜካ::

ናካዳ አሪው ሜካዚን ጝናሳ እሳንጝፄካማ ጊፆ ቱስቲስ እንፃኽስቴካማጊኪላ አግስታና:: አች “ሀ” ግብሮ ኬያንቲ አኽጝስ ቤዴርካማ ግዴቴ ፊትጝⶓ ዲብስካ::

እሊት አዚኒ ኬቴሙ ዝኩዋንታ ዊዛሩ አስቴር ብዙነህ ኩርስ ጝናሳ ብስካማ ጊፁ እንፅኺዳ 2012 ምሬት አሜታዳ ጉሽፃማ እንፃኽስቴካማጊ አግስታንኩ አኽⶓ እንክርፄካ::

ግብሮ ኬይጝ ግዴቲ አኽጝስ ወሴንስትኹሳ ግብሮ ወክትስ ኬየካማጊ አኽⶓ ጉሽካ:: አጌራው ልማትስ ታምቦ ፊትጝጝ ቱስታኩ አኽⶓ ሼውንጝስ አግፃኑሳ ሚፄ ቤፍፃኑላ ቱስቲስ ግብሮ ኬይጙ ዴስ ዝኩክ አኽⶓኪላ እንክርፄካ:: ግብሮ ኬይጙ ወክት ታምባኒ ውማይቴንካ ካፃኑሳ ንቫሮ ጉሽፃ ፄዌካማ ወሴናኑ ግብሩሳ ሜቴኖ ቱስቲስ ኬያንኩ አኽⶓ ዲብስካ::

“ግብሮ ኬይጝዴስ እንግርግራ ንጝ ሜብቶ ካሲጝስ ድፍሬቶ እያላ” ንካማ አምናንኩ ዊዛሩ አስቴር እንፃኽስቴካማ አግፃኑዴስ አጌራው ልማትስ ታምቦ ፊትጝጝስ ዴስቴንካኽ” ንካ:: ግብሮ ኬያውላ ይጉጝ እንቲታኪ አግፃኑሳ ሚፄ ቤፍፅጝ ወንጄልስ ካሲፃው አኽⶓ ውማይቴንዴስ ክንቴ አግፅጝስ ግዴቴ ፊትጜካማጊ አኽⶓ ዙሜካ::

ወረዳዳ ሰላሙ ችግር ፌቴርስትጝ ጊፁ እንፅኺዳ ቻኒስቶ ቺፃሺኹ አኽጝስ ግብሮ ኬይጝስ ቼግርስታሺንኩ አኽⶓ ቶኬምካ:: ናኪኒ ወክትስ ኩፅኒ ሰላም ኬቤርስትጝስ  እንፃኽስቴካማ ወክትስ ግብሮ ኬይጝስ ሳሴር አኽⶓ ጉሽካ::

አዮ ጉዋጉሲ ወረዳ ሚፂ ፅ/ጝናሱ አላፊ አቶ ያረጋል ምናየሁ 2018 በጀት አሜትዳ 220 ሚሊዮን 90 ሻይዴስ ጃላ ሚፄ ኩፕፅጝስ እክድ እምስታማ ግብሮ ኬያንትካስ ሼውቴ ፊቴርጝስስታ ፌፄምፃንትካ አካልካዋ ኩርፄንትስ አላፍቶ ፊትጛንታ አስሚምጚዳ ታምብስታማ እንፅኺሾ ቱጝስ ክርፂ ልቕልቕቲዳ አግስታንኩ አኽⶓ ኽይትጝፄካ:: ዋሺኒዳ ሚፂው አይኔትዳ ትኩቶ እይጝ ፋይፄ ናውሳኪላ ጎሌልⶓ ቶኬምካ::

እንጚስኪላ 2018 ኩርማን አሜቱ ፊፂምጚዳ አኮሜችስትኹ ቴግባርስ 22 ትኩሚ 51 ታፋ ሊኽዴስ ፌፄምⶓ እርዳትፅካ:: ፊፂምጚ ፌይኹ አሜት ምስሊ ወክትሊ ካንትጛኒ  ሌኽዴስ 6 ታፋ  ኽስት ዝኩኽስታ ኬሽኹ ፊፂምጚ አኽⶓ ጌሌፅካ::

ውማይቴንካው ደሞዚውስታ ትክሙ ካሲ ዙርሜ አግፁኽ አኽጝስ ውማይቴን እንፅኺዳ ትክቶ ፄውጝስ ኬሻንቴ ዋይሜ ሜዜጌብፅⶓ ጉሽካ::

ፌዩንኩ አሜትካዳ እሺኹ ሰላሙ ስጋትኪላ ኬሽጛማ እንፅኺዳ ትኩቶ ፄውጝስ ኬሻንቴ ግብሮ ኩፕፅጝስ ቢኪⶓ እርዳትፅካ:: ወረዳው ዝኩዋንትካ ግብሮ ኬይጝዳ ዝኩኽ ካንቲኪላ ኬሽጝጝስ ግብሮ እንግርግራ ናኑላ ኬያንታ ካሊፅⶓ ጉሽካ::

እንፃኽስትጜ ዝቤናዋ ፄውጝስ፣ ፅናትዳ ጉሽፃ ፄውኽሳ ግብሮ ወሴንጝስ ግብሮ ኬያንትካዋ አንጌሌትስትጝዴስ ይጉፃውሳ እክዶ ፍሽጝስ ኬሻንቴ እንፅኼ እንፃኽስትጝስ እስካዊስ ቴርትኹ አዋጅኪላ እርዳታው አኽⶓ ቶኬምካ::

ጌፄንኪ ደረሰኞ እይⶓ  ጄዋንትካ ዴሜካ ቻቤልⶓ ዴሳ ፄዋንታ እንፃኽስትጝስ ቴግባርዳ እሽፅጝ ግዴቲ አኽⶓ ቶኬምካ::

ግብር ኩፕናውላ አጌራውሳ ዋሺኔኪ ጉዳዬ ፌፄምጝስ ካሊስታቲው አኽጝስ ዋሺኒኪ ጊፂኒኪ ያኻ ግብሮ ኬያንቲ ግዴቲ እይስቱክ አካልስታ ምንግስቱ እንፅኺው አላፍካ ግብሮ ኩፕፅጝዳ ቴቬቤርጛንታ አቶ ያረጋል እቑዌ ዲግስካ::