ይሴንቶ ፋያው

ንግስቴ ተስፋ

አኾ ዝቓማጊ ልቡስ ልቦ ሌጌሳማ አጙስ ዙሬ እፅስታማ ጉም ንጝስ እቒ ይሪሱሳ እላፎ ባሬቕፃውሳ፤ እሳን ኻሪሳኒ ሼሌቻቲውሳ ኽሬ እያው ፅጌሬዳው አቪቪታጊ፣ ልጌሳ አቬቫማ ጚሪሶ ዋሺኒኪ ችግራ ጋቲታ ፍትሬት እይኹሳስታ ዝቤን ታምብኹሳ ልግስኔ እያማ ካንፅፃታ ጚኩ ውዳጅካጊ እንጉስታኑዊያኽ እንጃቢሬ ኬቴሞ::

ዲጊዴስናቴ ኰፅኒ እንፃኽስታ ሊፋማ አግፃውሳ  አብቶስታ ጌንዜቦ ኹጝዴስ ኪቻ ካንትስታማ ድሳውሳ ትቡሳ አብቶ ቓሊትጝስ አቒውሳ ይወቶ ድፅጝስ ወንጄሉ ቴግባርዳ አሴሜርጛንኩ ኬቴማውሳ ልግስኔ እንግርግራ ጉሳንኩ፣ አጌር አቑ ስጋታ ያኻንኩ ወንጄሉ ታራታርስታንትካ አታቲኑ ኬቴም ያኻማጊ ይንታ::

ውላጊ ታምቦ ፊትጙኒ ኩፅኒ እስጜ ወንጀሎ ድፅጝስ ካሊስቴ:: ፍንሾስ ስጋታ ጋቲታ ዝኩጝስ ሌጌስጝስ ካሊስታውሳ እንጃቢሪዳጉ ዝኩጝስ እስትጝስ ውላስጊ ጎሌልስታው ኬቴም ያኻታ ኩፅኒ ውላውሳጊ ቲቪቪርጜ ካሴው ጉዳይ ያኻማ ካንትስቴ::

አቶ መሃሪ የኔት እንጃቢሪ ኬቴሙ ቺፅጝፂ 05 ኬቤሊው ዝኩዋንቲያኽ:: ክልልዳ ፌቴርስትኹሳ ሰላሙሳ ችግሮ ምክንያትታ ቴኬምስትካማ እጋፌ ቴግባሮ ፌፄማንኩሳ ካላካልጝጝስ ጛው ኬቤሊዳ አችትጜካማ ወንጄሎ ካላካልጜካማጊ አኽⶓ ድኹዌካ::

ጌርኩሳ ዜቦስታ ኻሩሳ ሮንዶ ማንዳንኩሳ ኬቴሙ ዝኩዋንትካዋ ንቫሮ እይጝስ፣ ሜሳሬ እሜማ ወንጄሎ ካላካልጚስስታ ቴቬቬርጝፅጝስ ካላንኩ አቖ አክምታ፣ እድሚታስታ ፆቲታ ቤንጝፅጝስ ወንጄሎ ካላካልጝጝስ ካሊፃውሳ አቺትጜ ፌቴርካማ ኬቤሊው ዝኩዋንትካውሳ ዴክቶ ኬቤርፅካማጊያኽ::

እንጚስኪላ እንዴስ ቤዴራ ቺጊርፂ እሺኹ ዳዴኹ፣ አትሌልጝፅጙስታ ሰላሞ አቲስጙ ወንጄልዳ አሴሜርጛሺንኩሳጊ ካላካልጝⶓ ጉሽካ:: እንፃኽስታኑላ ሌጌስጝስ ወንጄሎ ፌፄማንኩሳጊ እግስ ፌይፃማ እይጝስ ወንጄሎ ጛው ኬቤሊዴስ ካላካልጝጝስ ካሊⶓ እንክርፄካ::

ፍንሾስኪላ ወንጄሉሳ ቴግባሮ ፌፄምጝስ ካሌ ንካማ ታራታርጛኑሳ አቔጊ ፖሊስስ ንቫሮ እይጝስ እግስ ዳኚስታታ ኬቴሙ ዝኩዋንትካው ዴክት ቼሜትጛታ ፄውጝስ ታምቦጊ ፊትጛንኩ አኽⶓ ቶኬምካ::

ዊዛሩ ምንትዋብ ካሴ ዴሜካ ጛው ድሚስ ካንትካ ያቔካያሱ ወንጄል ኹን ኬቴሙ ዝኩዋንትካዳ ቻኒስቶ ፌቴሩኒዴስ ላጛ አሜታዴስ ጃላ ቼፍፅⶓ ዙሜካ::

እንጃቢሪው እዝብ ሌንጌዳ ቻቢሊስታ ጊሪቲ አኽⶓ ሼዎ ሴሌሉንኩ ወንጄሉ ታራታርስታንትካ ላጜቱሳ ወርኮውላ ይጉዋውላ ኹንዴስ ዜሬፍጙ ወንጄልዳ አስሜርጜካማ ዝኩዋንትካ ሰላምስ ዝኩጙ ሜብት ኬቤርስታቲታ ፄዌካማጊ አኽⶓ ዲብስካ::

2018 ም/አሜታዴስ ናቴ ኩፅኒ ኬቴሙ ዝኩዋንትካ ቴቬቬርጜካማ እንፃኽስቱኑ ወንጄሎ ካላካልጚስ ታራታርስታንትካዋ እግስ ካሲስታንታ ፄውጙ ቴግባር ካስጝⶓ ድኹዌካ::

ሚንቾ ጊዞ ኹን ሰላሙ ችግር ፌቴርስታኒ ወንጄልስ ፂኪስትጙ ጉዳይ እሳንጛማጊ አኽⶓ ጉሽካ:: ጋያኪ አብት ንብሬት ዝኩክሳ ኹኖ አትሌልፅጝስ ቱትጚውሳ  ውሎ እሚጝስ ኹን አፌሩኑሳ አብቶ ዜሬፋማ ድስጝኪላ እሳንስ ካንትስታው አኽⶓ ቶኬምካ::

ችግሮ ኽይጝስ ኬቤሊ ቺፋ ኹን አችትጜካማ ጛጛርትጛሳ ዝራፊዴስስታ ዳዴኹ ወንጄልዴስ ካላካልጜካማጊያኽ:: ሼውቲው እንፂጝስ ወንጄሌኖ እግስ ፌይፃማ እይጝስ ጅፊስትጝ፣ እያዋ እንዳር ሚፄ ንጙ ታክስጚ ኩፅኒ ክቼታ ምንግስት ሼውቴ ፌቴርጙሳ እንፅኼ ይስጝፃማ ሲፍፅጝስ ኹኖ ጉዳትዴስ  ካላካልጝጝ ፋይፃው አኽⶓ ካንቴ እይካ::

እንጃቢሪ ኬቴሙ ቺፅጝፂዳ 01 ኬቤሊዳ ፍቱስታ ዴምቡ አላፊ አቶ ስንታየሁ ሽፈራው ጛሾስ ሮንዶ ማንዲፃንኩ 51 ፌፄምፃንትካዋ 46 ብሎክዴስ ጎሌልጝስ ወንጄሎ ካላካልጝጝስ እንፃኽስቴካማጊ አኽⶓ ጌሌፅካ::

ሙሪ ቺፋ አግስታንኩ ኬቴሙ ዝኩዋንትካ ጚስጜዋ አቕትጜካማ እስካዊ አቒ ይንታኒ ዴሜካ ፂኒስጝስ ወንጄሎ ካላካልጜካማጊ አኽⶓ እርዳትፅካ::

“ፌይኹ አሜትዳ ሚንችካ እንቹ እንፄሪ ወርኮስታ ብሮ ዜሬፍስትካሺና” ናንኩ አቶ ስንታየሁ ናኪኒ ወክትስ ኩፅኒ ወንጄሎ ትንካኪስ ካላካልጙሳ እንፅኼ እንፃኽስትጝስ እምፕልታቕ ፉሬ አግፅⶓ ቶኬምካ::

01 ኬቤሊዳ ቺጊርፂ ወንጄል እሺኹዴስ ጝኖ ብሳማ ዜሬፍጝ፣ ስራስሪዋ ቤፍፃማ ብሮ ኬታን ንጝ፣ ሴኬራማ ሊሊትጙኽሳ ወንጄሎ ፌፄምጝ ምኽምኽፃሺⶓ ጉሽካ:: ናካዳ ኩፅኒ እምፕልታቕ ጜዋንትስ ካላካልጛኒ  ስጋትዴስ ፊⶓ  ጉሽካ::

ሰላሙሳ ችግሮ ፌቴራንኩ፣ እጋፊ ዳድስ ዎሬሞ ጎሌሉንኩስታ ኬቴሙ ፄራ ያኹንኩ አይልካስ እንጃቢሪ ኬቴምዳ እንጅኩካማ ስልኪስ አሱሳ ንቫሮ እያንኩሳጊ ሲፍጜካማ ፂኒስካማጊ ፖሊስስ ታፎ እያንታ ፄውⶓ ጌሌፅካ:: አቶ ስንታየሁ ሰላሙ ችግር ምክንያታስ ኬውጛሺኹ እምፕልታቕ አቩቑ ፖሊሱ እንፅኺ ኩፅኒ ጄሜራታ ካሴ ዲግስካ::

እንጃቢሪ ኬቴሙ ቺፅጝፂ ቼፍ እምፕል ፖሊስ ፅ/ጝናዳ ወንጄሉ ካላካልጚው አላፊ ኢንስፔክተር ጌታቸው ደሳለው ጌሌፁኑውስታጊ ወንጄል ንጝ እምፕልኪ እገ-ምንግስትዳ ፂፔንኪ እስትኹሳ ፄዋማ አግስትጝስታ ፄፓን እስትኹሳ ፄዋውላ ይጉጚያኽ::  እምፕልታቕ ዝኩዋኑ እምፕል ዙራሙሪዳ እምፕልታቕ ፌኬድካያሱስታ ቻቤልስት እላቲውሳ ጉዳዮ ፌፄማማ አግስትጝ ወንጄል እስታው አኽⶓ ኽይትጝፄካ::

ክልልታ ፌቴርስትኹ ሰላሙ ችግር ፌፄምስታው ወንጄልስ አሜችኹሳ አኺኔ ፌቴራሺኹ ጊዝ እሺⶓላ ጉሽካ:: ኢንስፔክተር ጌታቸው እንጃቢሪ ኬቴምዳ አግስታው ኬቤሊ ቺፋ እምፕልታቕስ ሼውቴ ፌቴርጝስስታ ጛጛርትጛሳ ወንጄሎ ፌፄማንትካዴስ ካላካልጝጝስ ካላኑሳ ሴሎ ኩስጝፅጝስ አኮሜችስትኹ ቴግባር ዝኩⶓ ጌሌፅካ::

እንጃቢሪ ኬቴሙ ዝኩዋንትካ ወንጄሎ ፌፄምⶓ ፋያቲንኩ፤ ፌፄምስታማ አግስታኒ ዴሜካ እግስ ዜቦ ቲሬንኩ አኽⶓ ጉሽካ::

እንጃቢሪ ኬቴምዳ አሱሳ ንቫሮስታ ሊሊትጙኽ አትሌልፅጙሳ ወንጄሎ ቴኬምስትካማ እምፕልታቕዳ ወንጄሎ እንፃኽስታሺንኩ 26ዴስ ጃላ  ታራታርስታንትካዋ 2018 ኩርማን አሜቱ በጀትዳ እግስ ካሲስታንታ ፄውስትⶓ ኽይትጝፄካ:: ጋያኪ ቺጊርፂ ወንጄል እሺኹዴስ አትሌልፅጙስታ ዳዴኽጙሳ ወንጄሎ ካላካልጝጝስ 2018 ባጀት አሜቱ ኩርማን አርፍካዳ እንፃኽስስትኹ ይሴን ወንጄሎ ካላካልጚው ቴግባር እምፕልታቕስ ፉሬ እይኹ አኽⶓ ቼሜትጝፄካ::

አይማኖቱ ታብሊስታ ትኩታኩ ቤንካሊ ቲቪቪርጚስ ወንጄሎ ካላካልጝጝስ ካሊፃው ክንቲ እይስትጝስኪላ ወንጄል ናካዳ እንጃቢሪ ኬቴምዳ ኔኬትⶓ ቶኬምካ::

አቖ አጌትካማ ጌንዜቦ ካሲጙ ወንጄልኪላ እንጃቢሪዳ ጄሜርስታሺኹ ያኹኒውላ አኮሜችስትኹ ወንጄሎ ካላካልጚው ፖሊሱስታ ዝኩዋንትካው ኩርፄንትስ ካላካልጚስ ካሊስትⶓ ጌሌፅካ::

እንጃቢሪ ኬቴምታ ወክት ያጉኽሳ ፄትቲውሳ ችግሮ አጋታሚታ ቴኬምስትካማ እንጃቢሪሾ አንትጝስ ክራይቴካማ ወንጄሎ ፌፄማንኩሳ ካላካልጝጝስ ዋሺኒኪ ጝኖ ክራይፃንትካ  ዋኾ ንቫሮ እሚጝስስታ ኬቤሊስ እይጝስ ወንጄሎ ፌፄማንትካዋ ቼፍጝጝስ ካሊስትኹ ያኹኒውላ ፌያፌያማ ካንትስታውሳ ወንጄሉሳ ፂዌ ይጉፅጝስ ኩርፄንትስ እንፃኽስትጝ ማንዲስታው አኽⶓ ጉሽካ::

እንዴስ ቤዴራ አቒ አይሉ እንፂጝ ኬውጛሺኹ እምፕልታቕ አቩቑ ፖሊሱ ወንጄሎ ካላካልጚው ሴልኪላ ዲጊስ ይሴንስ አችትጛማ እንፅኼ ጄሜራታ ፄውጝስ እክድ እምስትⶓ ቶኬምካ::