ጋቻ ፅንጋኻ ያኹኽ ዜርፍ

ታደለ አጋጄ

አማኻሪ ክልልዳ ኬሴትስትኹ ጋቻ ክንቲው ዜርፍዳ  ኬፍቲኔ ቻኒስቶ ታምፃማ ፌያ:: ላጛ አሜታዴስ ጃላ ክንትጝ-ክንትፅጙ ካስት ሚንችካ ዙራሙርካዳ ኬውጛማ እጄ:: ሚንችካ ክንታንትካዳ ሼው ፅንታሱ ጉዳት ታምባ:: ክንቲዉሳ አላሜ ዜኔግካማ እሊው እንፅኺው ዜርፍሾ አሴሜርጙንኩ ክንታንትካው ቼፍኪላ ልቓ ጋቲዊያኽ::

አዊ ብሄረሰቡ ቺፅጝፂዳ ጋቻስ ማልጛ ጉዳት ታምቡኽ ወረዳዴስ ጃዊ ወረዳ እምፕልያኽ:: ላንቡሳኺስታ ሚንችካ ክንቲ ጝንካ ልምትካማ ክንትጝ ክንትፅጙ ካስት ካስጛማጊ ጋቲዊያኽ:: ልቓ ክንቲ ጝንካ ኩፅኒ ክንትጝ ከንትፅጙ እንፅኺ ካስጛማጊ አግስቴ::

ስልኪስ ዙሚትጝፅኑክ ግባቻ እምፕላንቲ አች ክንቲ ጝናዳ ዋልታንቲ ቤኑ ክንታንቲ አቡሽ ተረፈ ክንቲ ጝና 2017 ም/አታዳ ጄሜራማ ክንትጝ ክንትፅጙ ካስት ካስጛማጊ አኽⶓ ዙማ:: ላጜታንቲ ቤኑ ክንታንቲ ያኻው እሺኹ ክንታንቲ አቡሽ እምፕሎ አሜቶ ክንቲ ኬውጝጝስ ዋልታንቲ ቤንዳ እንቲታ ጌዴድስታ:: “ጉድ ሰላሙ አኺኒ ዝኩጝ ክንቴ ሲፍጝናና ክንትናታ ፄዋ” ና:: ክንትፃንትካ ሲፍጜካማ ክንቴ እይካማጊ አኽⶓ ቶኬማማ ክንቲ ጝናዳ አውጚ ኮንኪው ሜፃፉ እንፂጝ ዝኩⶓ ድኹዋ:: ክንታንትካ ክንቲስ ዋይሚስታ ያኻንታ ክንቲ ጝናዳ ሜፃፍስታ ዎንቤር ዋኽትጝጛማ ዲጋያታኪላ ካሲካ::

እሊት ግባቻ እምፕላንቲ አች ክንቲ ጝናሱ ዋልታንቲ ቤኑ ክንታንታ ትግስት ኮየው ፌይኹ አሜትዳ ሰላሙስታ ፄትቲው ችግር ክንትጝ ክንትፅጙ ካስትዳ ቻኒስቶ ታምፃማ ፌይⶓ ዙሜ:: ናካዳ ክንትጝ ክንትፅጙ ካስት ጄሜርጝስ ዴስቴናኽ:: ክንታንትካ ክንቲስ ዋይሚስታ ያኻንታ ሜፃፍ ዋኽትጛማ ዲጋያታ ካስቴ::

አንዳርጋቸው ፈረደ ግባቻ ክንቲ ጝናዳ ክንትፃንቲያኽ:: ጃዊ ወረዳዳ ሊሊትጙንኩ ክንቲ ጝንካ ላጛ አሜታዴስ ጃላ ክንትጝ ክንትፅጝዴስ ሴጋ አኽጝ ክንታንትካዳ ቻኒስቶ ታምፅⶓ ጌሌፅካ::

ሚንችካ ክንታንትካ ክንቴ ኬውጝፃንታ ፄዋ:: ክንቲውሳ አላሜ ዜኔጉንኩ ክንታንትካ ዝኩⶓ ጉሽካ:: ንጙዊኒ አሜትዳ ኩፅኒ ፌዩንኩ አሜትካዴስ ኪቻ ልቓ ቴስፌ ዝኩⶓ ቶኬምካ::

ክንትጝ ክንትፅጙ ካስት ዋሺኒኪ ፖለቲካው አኺኒዴስ ኔፃ ያኻማ እይስትጝ ዝኮስኩስ አጌሮ አሬኬብስታውሳ ክምንቶ አቲስⶓ እርዳትፅካ::

ጋቻ ኬሴትስትኹ ጊዝዳ ክንቲ ጝና ካስጝ ይጉዋማ ጝንዴስ ፊጝጊ ቺጊርፂ እሺⶓ ጉሽካ::

ግባቻ ክንቲ ጝና ጉድ ሰላሙ አኺኒ ዝኩኽ አኽጝስ 2017 ም/አታዳ ጄሜራማ ክንትጝ ክንትፅጙሳ ካስቶ ካስጝፃማጊ አኽⶓ ቶኬምካ::

ክንትፃንቲ አንዳርጋቸው ዙሙኑውስታጊ እንዴስ ቤዴራ እሺኹስታ ዋኽስ ዋኾ ክንታንትካ  ክንትጝስ ካሌካያ:: እምፕላንቲዴስ ሴዛንቴ ቤኖኺስታ ዝኩንኩ ክንታንትካው ቼፍ ማልጛ ዴሜካ:: አንኩዋንቲ ቤንዴስ ሶኼታንቴ ቤኖኺስታ ዝኩንኩ ክንታንትካው ቼፍ ኩፅኒ ማልጛ ልቓ አኽⶓ ጌሌፅካ::

ክንትፃንቲ አንዳርጋቸው ክንቲ ጝናዳ ዎንቤር፣ ሜፃፍስታ እሊኩ አክኽካ ዋኽትጛኑላስ ይጉጝ ክንትጝ ክንትፅጙሳ ካስቶ እንግርግራ ፄዋው አኽⶓ ጉሽካ::

ሃብታሙ ስንሻው ዴማካ ጃዊ ወረዳ ግባቻ ትክላሊ እምፕላንቲ አች ክንቲ ጝናሱ ጛሪያኽ:: ክንቲ ጝና 2018 ም/አ ክንትጝ-ክንትፅጙሳ ካስቶ ኬሽኹ አኺኒስ እያማጊ አግስታው አኽⶓ ጌሌፅካ:: ፌይኹ አሜትዳ ጄሜራማ ክንቴ እያማጊ አግስታው ግባቻ ክንቲ ጝና ንጙዊኒ አሜትዳ ሚንችካ ክንታንትካዋ ሜዜጌብጝስ ክንትጝ ክንትፅⶓ አኮሜቻማጊያኽ::

ክንቲ ጝናሱ ጛሪ ሀብታሙ ኑኑውስታጊ ክንቲ ጝና ፌይኹ አሜትዳ 4 ሊኻ 80 ክንታንትካ ክንቲው ማንድዳ እሺካ:: ንጙዊኒ አሜትዳ ዴሜካ 1 ሻይ 5 ሊኻ ላጜታ ክንታንትካ ክንቴ ሲፍጜካማጊያኽ:: እክዱሳ 98 ታፋ ያኻው ክንታንቲ ሜዜጌብስታ:: እኒጛዴስኪላ 6 ሊኻ 50 ክንታንትካ እምፕላንቲ ቤንኩ ክንታንትካ አኽⶓ እርዳትፅካ:: ላጜታንቲዴስ ሶኼታንቴ ቤኖኺስታ ክንታንኩ ክንታንትካው ቼፍ ማልጛ ኔኬትⶓ ቶኬምካ:: ሚንችካኪላ ትዳሮ ሜሴሬትⶓስታ እርሺው እንፅኺዳ አሴሜርጝⶓ ክንቲ ጝናሱ ጛሪ ጉሽካ::

ክንቲ ጝናዳ ዳንጉዊትጙንኩ አክኽካ ዋኽትጛንታ ፅሬት ፄውስታማጊ አኽⶓ ጉሽካ:: ክንቲ ጝናዳ ክንታንትካው ቼፍ ዴሜካማጊ ካስጝስ ክንቲ ጝናሱ ካቪ ፄቤብⶓ ቶኬምካ:: ክንቲ ጝና እሳንጛማ ክንታንትካስ አሜችኹ ያኻታ ፄውጝስ ጉዳይ ካንታኩ አካልካ እንፃኽስታንታኪላ ካሲካ::

ጃዊ ወረዳው ክንቲ ፅፌት ጝናሱ ትክትሊ አላፊ ሀይለ ኢየሱስ መኩሪያው ወረዳታጊ ክንትጝ ክንትፅጙ ካስት እንኮጛዴስ ኬሽኹ ያኹኒውላ ፋይስታውሳ ላካ ዋይሚ ሜዜጌብስትጝስ ካሊስታያሱ አኽⶓ ኽይትጝፅካ::

ወረዳዳ ክንትጝ ክንትፅጙሳ ካስቶ ካስጝፅጝስ ኬፍቲኒ ቻኒስት ዝኩⶓ ቶኬምካ:: እሊኩ ወረድካሊ ካንትጛኒ ጃዊ ወረዳዳ ሚንችካ ክንቲ ጝንካ ልምቱንኩ አኽⶓ ቶኬምካ::

ወረዳታጊ 16 ክንቲ ጝንካዳ ይቪቺ ክንትጝ ክንትፅጙ ካስት እይስታማጊ አግስታው አኽⶓ ቶኬምካ:: 57 ክንቲ ጝንካዳ ክንትጝ ክንትፅጙ ካስት ካስጛማጊ ጋቲው አኽⶓኪላ ጌሌፅካ::

ክልልታ ካንትስታኒ ጃዊ ወረዳ ክንቲው ዜርፍስ ኬፍቲኒ ችግር ዝኩኽ አኽጝስ ትኩትስ እንፃኽስትጝ ፋይፃው አኽⶓ ጉሽካ:: ዶንጌቱንኩ አይልካ “እኖጂ ፌኬድናውላስ ክንቲ እይስታላኽ” ንጝስ ክንትፃንትካዳስታ ማቤር አቕዳ ችግሮ ታምፅካማጊ አኽⶓ ቶኬምካ::

ጃዊ ወረዳ ክንታንትካዉ ምዝጋቢስ ያኻ ክንቲ ጝናሱ ብስስትጝስ ሊኽዴስ 20 ታፋ አኽⶓ ኽይትጝፅካ:: ክንቲ እይስታማጊ ዝኩክ ክንቲ ጝንካዳ እምፕላንቲ ቤንኩ ክንታንትካው ቼፍ ሚንቺጝ ዴሜካ ላጛ አሜታስ ክንቲ ልምትጙ ምክንያቲ አኽⶓ