ካሌቕቶ ቴኬምስትኹ ዎታት

አለሚቱ የኔት

ዩንቨርስቲውሳ ክንቴ አሌድካማ ምንግስቱሳ እንፅኼ ፋይጝስ  ጊዞ ፌይፃንኩስታ ፌቴሪው እንፅኺሾ ቱጝስ ጁትጝጙ ፋይ እላቲኩ ዎታትካ ሚንችካኽ:: ፌያፌያማ ኩፅኒ ድሚዴስጊ ጃላ ያኹኽ ታክስጚስ ትቡሳ ታፎ ካንታኑወላ ጛጛርትጛሳ ፌቴሪው እንፅኺሾ ሚፅፅጝስ አቕስታንቴ አግፃንኩኪላ ዝኩና::

አዲስ አበባ አብነትስታ ሳሪስ ዙራሙሪዳ ካሜንስታማ ሌጌሱኽ ዎታት ክዱስ ሄኖክ ጌና እንፃኺታስያኽ ዝኩዊኔ እንግሊዝዳ ፄውኺ:: ዝኩዊኔ እንግሊዝዳ ፄዋማ ኩፅኒ ይቶፒያዋ አቕትጝፅጙ ፋይ ዝኩኽ አኽጝስ ፌቴሪው እንፅኺሾ ቱⶓ ታክሳ:: ታክስጝስ ይቢቻኪላ ቲሪፃያላኪያኽ:: እን 24 አሚቲ ዎታት ሄኖክ  አግልግሎቲስ እሼቲንኩ አክኽካዋ ቴኬምስትጝስ ካኒዴስ ብሽክሊሊታዋ ግቢትጙሳ እክዶ እሜማ ቴግባራዋኪላ ፄዋ:: ኢቢሲ ሄሎ ይቶፒያሊ ፄውኽ እጂጚዳ ቤርዴስ ኪቻ ካኔ ሳሴርስ አግፅጝስ ካላው አኽጝስ ዙራሙሪዳ እምፕልታቕስ አግልግሎቴ እያው ሱፐርማርኬትዳ ውላጊ አቒ ጌንዜቦ ኬያማ ፋያውሳጊ ግቢትጝስ ካላው ስፍሪዳ ካስጝስ ፋያው ሜቴንስ ብሽክሊሊታስ ያኻውሳ ካኔ ቴርስጝስ ቤር ፋይፃው ስፍሪዳ ዴሜካ ቤሮ ቴኬምስትጝስስታ መሪስ አኹኪ እንዝርፅጝስ ያኻውሳ  ዴሜካማ ጉቢንጜ ፄውስ አሬሳቻንትካዴስ ስቶቲስ አግፅኹሳ አጋዛኑሳ ጄንጆ ቴኬምስትጝስ ብሽክሊሊታዋ ግቢትጝስ ካሊⶓ እንክርፃ::

ግቢቱትሳ ብሽክሊሊታዋ ኩፅኒ ግቢትኹ ሱፐርማርኬታኻዳ ካንቲ እይስትኹ ስሬታስ እንዝጜ ፄውጝስ አኬድⶓኪላ ዎታት ሄኖክ ዲብሳ:: አኬድኹሳ እንዝጜ ቴግባራዋ ፄውጝሰ ቱጝስኪላ እንዝጜ እንግሊዝዴስ ስኮትላንድሾ ፄውጝሰ 120 ያኻንኩ ኬቴምካዋ ፌይጝስ ካሊⶓ ዙማ:: እኒጊ ኬቴምካዋ ኬውጝፃማጊ እንዜጙስ ኪላ ላጛ አርፋሳስታ ኪንዴ ካፅⶓ ቶኬማ:: እንዝጚው ወክትስኪላ ቺጝስ ፋያኩ ዙራሙርካዳ ፋያኩ ዲብካዋ ሼውታ አግፃቲው አኽጝስ ሚንቾ ፍታኔ ፌይፅኹ አኽⶓ ሄሎ ይቶፒያስ እንክርፃ:: እንዝጜ ካስጝፁስ ዴሜካ ሚንችካ ይቶፒያውያንካ ዴስንካማጊ ቲሪፅጝስ ዴስቴ ጌሌፅካያንኩስታ ይስጝፃንኩ እሺⶓኪላ ቶኬማ:: እና ብሽክሊሊታዋ ግቢታማ ዙራማጊ አጌሮ ጐቤኑስኪላ ባርኾቼው አጌር አቕስ ፌያፌይጝፅጝስ ፋይኹ እንፅኼንት ዝኩዋማ አኽⶓ ጉሻማ ይቶፒያውያንካ ባርኾቼዋ ካሳኑ ጌንዜቦ ፋያ ይቪቻ ያኻውላ ዝኩኽሳ አቕቶ ቴግባርዳ እሽፅጝስ ካላንኩስታ እሊኩስ አቕቶ ቤንጝፅጝስ አኽⶓ ሼውናንታ አኽⶓኪላ ዎታት ክዱስ ዲብሳ:: እን ዎታቱ እንፅኺ ባርኾቼሾ ካስጝስ ጌንዜቦ ይቢቻ ኩፕፅጝስ ታክስናኻ ዎታትካስጊ ክንትፂ አኽⶓ ማሊጝስ ዎታቱሳ ዴሶ ካፃማ ቴግባራዋ ፄውጝ ቱስቴ::