“ጝንታጉ ዋሊኒታ ዝኩዋላ”

ቱስታያሱ ድግስ ንጝ አቕ እምፕሎ ፕሮግራሞ ስራ ፄውጝስ ልክዴስ ጃላ አኹኪ አክም ፌኬዳቲው አኺኒስ ዴጌሳኑውያኽ::

“አቕ ጝንታጉ ዋሊኒታ ቻላ” ናውሳ ዙሜ እንግርግራ ባይጝስ ክስታንቱ፣ ዝክሩ፣ ኻሱ፣ ቴስካሪው ፣ ሰደካው ናማኪ ማቢሪው ስምስ አቕ ታፎ ዙርፃኻ ንጝስ ጉሽታማ ዴጌስጝስ ችግርዳ ቱዋኒስ ሼውስቴ:: ቱስታ ጋውሳ ድግሶ ቴርስጝስ ጉሽትጝዴስ ፌይኹስኪላ አግፅንኹዋኽናማ አሜርትስታማ ጝንሾ ቱኽሳ ምርቶኪላ አኻ ሴግፅጝስ እስቱስ ወክቶ ማንዳውላ ዋያማኪ ያኻ ዴጌሳማ ባኬንፅጝ ቱስታላኪ:: ሚንቾ ምርቶ አግፅናኽ ናው እንኮኽስትስ ቱስታ ጋውሳ ድግሶ ቴርስጝ ፍንሾሱ ዝኩዋኒ እሌታ እርባቲዴስ ፋቲታ ፄውጝስ ዝኩኽ ፍሺ ኬፍንኹ ያኻታኪላ ፄዌ::

ቤዴር ኑንኩ አሜትካዳ ቱስታ ጋውሳ ድግሶ ይጉፅⶓስታ ክብስⶓ ካንትኹስ ሚንችካ እንፅኽካ እንፃኽስስትጝስ ይንቱንኩ ኪስካ ዝኩኒኪላ ናካኪላ እንግራ አጌሬሽኹስታ ያኻማ ካንትስታማጊያኽ:: እስጜ ኩፅኒ ይጉፅጝስ ካሊስታው ቴርስናውሳ ቱስቲስ ፄውኑስስታ ክብስጝ ፍንሾስ ዝኩዊኔ ኪስጝስ ቹዋ ጉዳይ አኽⶓ ማሊናና ቴግባርሾ ቱኑስያኽ::

ታፎ ዙርፃውላማ ናው ታክስጚስ አይ አዴስ እንፄ ናማ ጉሽታማስታ ዝኩኽሳጊ ናኼስፃማ ዴጌስጝ እንግርግራ ይጉጝዴስ አኽⶓኪላ ማሊጝ ቱስቴ:: ቱስታጋቲው ድግስዴስ ድምከና ቱስቲስ ዲግስጝስታ ሜጌብስትጝሾዳኪላ ዳንጉዊኒ ዝኮ:: እምፕል አቒ ቴኬምስትጝ ቱስታውሳ ሜቴናማ ጉሽጝሾዳኪላ ክቺጝ ቱስታው ጉዳይ ካንትስቴ:: ዝኩኽሳጊ ዴጌሳማ ዊድጝስ ልግስሾ ካስጝስ ካሊስታቲውስታ ዝኩዊኔኪላ ኬሽጝፅጝስ ፅጋኺ አኽⶓ ሼውናማ ቴግባራዋ ፄውጝ ቱስቴ:: አቑ ዝኩዊኒውስታ አብቱ አች ሊሊትጙኽ አኽጝታጊ ውላጊ አቒኪላ አክምታጊ ዝኩጝ ፋይፄ:: አክሞ ማሊጝ ዴሜካ ፄውናውሳጊ ዝኩናው ሜቴንስ ፌፄምጝስ ቼጌርፃላኪ:: አክማጋቲታ ፄውስታው ድግስ ዝኩዊኒውሳ ቻኒስቶ ፌቴርጝዴስ ፌይኹስ ጛርቱ ቲንዳኪላ ችግሮ ፌቴራው አኽⶓ ማላማ ክችስጝ ቱስቴ:: ቱስታ ጋቲውሳ ድግሶ ዜርፋ ሚንቼ ችግሮ ሲፍፃው አኽⶓኪላ ሼውንጝስታ ክችስጝ እኖጂዴስ ማንዲስታው ጉዳያኽ:: ቱስታጋው ድግስ ይጉፅንኹዋ ንጝ ዴሜካ ፍንሾስ ያኻውሳ ክብስጝስ ካሊጝ አኽⶓኪላ ማሊጝ ፋይፄ:: ክብስስታው ዴሜካ ጌንዜቦ ይቢቼ ያኻውላ ምርቶኪላ አኽⶓ ሼውንጝስ ቴግባራዋ ፄውጝዳ ዝኩኽሳ ዳንጉዊኔ ካንታማ ክችስጝኪላ ቱስቴ::