ሼውስታያሱ ዜርፍ

ንግስቴ ተስፋ

አሌምዳ ኾሺ አብቱ ልማት እንሴስካዴስ አግሰታው ትክምዴስ ኬፍቲኒ አችዳ አግስታዊያኽ:: አሌምዳ ኾሺው ምርትስ አቕስቱንኩ አሜሪካ፣ ኢንዲያ፣ ቻይናስታ ብራዚል አይኔትስ፣ ፃንኩትስስታ ሚንቺትስ ዲግስጝስ ኬፍቲኔ ታምቦ ካፃንኩ አጌርካ ያኻኒስ ይቶፒያኪላ 2014 ምሬት አሜታዳ ካስጙኽ ፅናትስ አግፄው ምርት 7 ትኩሚ 1 ሚሊዮን ሊትር አኽⶓ /Dair farm and milk Product Processing/ እስትኹ ፅናቱ ፁፍዴስ አግፁኑኽ ንባር ካንትፄ::

አሌሙ ቲኑ አችት እንኩሩኽ ቲንዌና አቒ አግፅጝ ቱስታው ምግብዴሰ አሜትስ 2 ሊኻ ሊትር ኾሼ አኽⶓ ቶኬሜ::

ይቶፒያዳ ኬፍቲኒ እንሴስካው አብት አግስታት አጌራ አኽጝ አምንስቴ:: እን ዜርፍ አቤሬኬታው ፍሺ ኬፍቲኒ አኽጝስ ኾሺውሳስታ አሲውሳ ምርቶ ሚፂው አግፅፃ ፄውጝስስታ እንፅኼ ፌቴርጝስኪላ ልኺትጛንቲ እላቲው ዜርፍ አኽጝ አቕስቴ:: ያኼስጉ ዝኩኽ እንሴስካው አብቱ ሚንቺትታ ኩፅኒ ዜርፎ ዝቤናዊ ፄውጝዳ ትኩቶ ፋያው ዜርፍያኽ::

አማኻሪ ክልልዳኪላ እንሴስካው አብት ልማትስ ጎሌልስቱንኩ ኾሺውሳስታ እሺውሳ ምርቶ እያንኩ ዜርካ አግስታኑ ክልልያኽ:: ክልሉ እንሴስካውስታ አሲ አብት ልማት ፅ/ጝናሱ ንቫር ቶኬማውስታጊ እንሴስካው አብት ክልሉ ሴብል ልማትዴስ ሲፋማ ኬፍቲኒ ይኮኖሚው ታምብ ዝኩኽ ዜርፍያኽ::

አዊ ብሄረሰቡ ቺፅጝፂ ጉዋንጉዊ ወረዳዳ አቶ ብርሃኑ ተረፈ ኾሺኩ ክምካዋ እሩብፅጙ ዜርፍዴስ ቤዴራ 1982 ምሬት አሜታዴስ ጄሜራማ 32 አሜታስ ሴብሎ አሜሬትጝዳ አሴሜርጜካማ እጂካ:: 32 አሜታዴስ ጉሽፃማ ኩፅኒ እንዴስ ቤዴራ ችቔ፣ አሪ ኪዳስስታ ኮምፖስትስ ያኻውሳ ፍጌ አግፅጝስስታ ፌያፌያማ ኾሺው እንጉስ ያኻውሳ ትክሞ አግፅጝስ እሩብፃሺካ:: 2014 ምሬት አሜታዳ ኩፅኒ እስካዊስታ ዝቤናዊ ዳድስ ክምካዋ እሩብፅጝስ እክዶ ፍሽካማ ውማይቴንሊ ኩስጝጝስ ኬሽጙንኩ ኾሺኩ ክምካዋ እሩብፅጝስ ያኻውሳ ቤዴራ ቴርቶ አሌድካ:: ክምካ ጝናሳ ፃንኩቶ ማንዱኽ ፄውጝዴስ ጄሜራማ ክምካውሳ ኬሌቦ ቴርሱኒዴስ ፋሌንጋ ሴዛ ኬሽጙንኩ እምፕል አሜትኩ ኔዋሪዋ 100ሻይ ብርስ ጄውⶓ ድኹዌካ:: እሌት ቺፋ  ፄዋኑ አንኬባኬብጝስስታ ሲፍጝጚስ ሌጌሴካማ ሴዛጊ ክምንትስ ቢኬካ::

ጌርክ ቺፋ ማቢሪስ አችትጜካማ 22 ሊትራሳ ኾሼ ጝንዴስ ፊቴካማ 1 ሊትሮ 70 ብርስ ዋይጝስ ሚፄ አግፅⶓ ጄሜርⶓ እንክርፄካ::

ፍንሾስኪላ እርሺዴስ ኪቻ ኾሺ አብቱ ልማትዳስታ ክምካዋ ሌፍፅጙ ዜርፍዳ አሴሜርጚስ ኬሽኹሳ ዝኩዊኔ ዝኩጝስ እክዶ እሚⶓ ጉሽካ:: እንጚስ ቢኪፁንኩ ጌርክ ቺፋ ክምካስ ውማዩሳ ሲፍጝጜ ፄዋንኩ ውማይቴንካስ ምስጋኔ ዲግስካ::

“ዜርፎ ኬሽጝፅጝስ ምንግስት እሚኹ እክድስ ቴኬምስታንታ አቓ” ናንኩ አቶ ብርሃኑ እሊኩ አሬሳቻንትካጊ ዜርፍስ ቴኬምስታንታ ሼውቴ ፌቴርጝ ማንዲስታው አኽⶓ ቶኬምካ:: ጊዝቺፋ ዴሜካማጊ ካስኹ ክምካው ሜኑውሳ ክብርናቴ ኽይጝስ አሬሳቻንትካስ ጛው አክምስ ቴርስጝስ ካላኑሳ ሜኖ ቲኪጝስ ካላውሳ ሴሎ ውማይቴንካ ዲግስካያኒ ኽስኹስ ቴኬምስትጝስ ካላንኩ አኽⶓ ጉሽካ::

አሬሳቻንታ ዊዛሩ አቡኔ አምሳያኪላ እፂ ዋኻሳ ክምካዋ እሩብፃኒስ ሴጝካ:: እሩብፃንኩ ክምካው ዜር ኬሽጛያሱ አኽጝስ እሌታ እርባቲዴስ ፌያቲውሳ  ወክቶ “ድርትኒስሰታ ኪሳ ጋቲታ ፌይፅኑኽ ኪሳሪው ዝቤን” ናኒስ ፌይኹሳ ዝቤኖ ታክሳና::

ይኮኖሚስ ሌጌስጙ ሴል ሚንች ያኻስኩስ እንግራ ይጉዊ ካንቲስስታ ጊዞስታ ጌንዜቦ ዝቤናዊ ዳድስ ቴኬምስታውላ ይጉጝስ አሬሳቻንትካ ድኽትዴስ ፊጝስ ቼጌርስታንኩ አኽⶓ እንክርፄ:: ዊዛሩ አቡኔ ጊዝዴስ ፋሌንጋ ኩፅኒ እንሴስካው አብቱ ውማይቴንካ እይኑ ክንቲስ ኬሽጙኽ ክምካውሳ ዜሮ እሩብፅጝስ ጄሜርⶓ ዙሜካ:: ጉሽፄኪላ ላጛ አሜታዴስ ፍና ላጛ ኾሺኩሳ ክምካዋ 131 ሻያስ ጄውጝስ ኬሽኹሳ ትክሞ አግፄካማጊ አኽⶓ ዲብስካ::

አሪኬስታ ስልኼ ፍሽጝስ ግርቦ ባኬንፃሺንኩ አኽⶓ ጉሹንኩ ዊዛሩ አቡኔ ናካዳ ኩፅኒ ኾሺኩሳ ክምካዋ ጄውጝስ ኬሽጙኽሳ ክቺኹሳ ኬሌቦ አግፅጝዴስ ጃላ ሶኼት ቺፋ ሹኻ ኪሎ ስኔ ጌቤልስ ዲግስካማጊ አኽⶓ እንክርፄካ::

ፍንሾስኪላ ኾሺኩ ክምካዋ እሩብፅጙ ዜርፍስ ትኩትስ እንፃኽስትጝስ ምንግስት ሜኑሳ ዜሮ እንቲታኪ ኬሽጙንኩ ኖራውሳ ዜሮ እሳንስ ዲግሳይኒ ጛጛርትጛዴስ ፊቴካማ ኾሺዳስታ ሲኒዳ ዝኩኽሳ ጌቤሉሳ ክብርናቴ አሬኬዝፅጝስ ታምቦ ፊትጛንኩ አኽⶓ ዙሜካ::

ስጋዲ ኬቤሊው እንሴስካ አብቱ ውማይቲኒ ምንአለ ፀሃይ ጛሾስ ስጋዲ ኬቤሊ ኩላ ዲሪኺው አይር እግልታስታ ብቲው እንኩሪ ክምካዋ እሩብፅጝስስታ ሌፍፅጝስ አሜቻው አኽጝስ ዜርፎ ኬሽጝፅጝስ ውማይቴንካ ትኩትስ እንፃኽስቴካማጊ አኽⶓ ጌሌፅካ:: እንጚስኪላ ኬቤሊዳ 400ዴስ ጃላ አሬሳቻንትካ ክምካዋ እሩብፅጝዳ አሴሜርጙንኩ ያኻኒስ 25 አሬሳቻንትካ ዴሜካ ኬሽጙንኩ ኾሺኩ ክምካውሳ ዜሮ ቴኬምስትጝስ አችትጜካማ ኾሼ ጌቤልስ ዲግስጝስ ይኮኖሚስ ቴኬምስትካማጊ አኽⶓ ጉሽካ::

ኬቤሊታ አሬሳቻንትካ ጉሻኑ ችግርዴስኪላ ኬሽጙኽ ክምካው ዜር ዲጊስ ሚንቾ ጊዞ ኹን ክምካዋ አግፅጝዳስታ ኪዩሳ ዜሮ አግፅጝዳ ዝኩኽሳ ዳንጉዊኔ ወረዳ ኽያታ ካሴ ዲግስⶓ ቶኬምካ:: ኬቤሊኩ አሬሳቻንትካ ክምካዋ እሩብፃኒስስታ ሌፍፃኒስ ባይላዊዴሰ ኪቻ ዝቤናዌ እንፃኽስትጜ ሲፋንታ ፄውጝስ ትኩትስ እንፃኽስስታማጊ አኽⶓ ኽይትጝፄካ:: ጊዝዴስ ጊዞ ዋይሚው ዴሜካውሳ ክምካውሳ ኬሌቦ አሬሳቻንትካ ጄውጝስ ቼጌርስትካማጊ አኽጝስ ጛው ሴልስ ቴርስጝስ ካላኑሳ ውማዩሳ ክንቴኪላ እይካማጊ አኽⶓ አቶ ምንአለ ጉሽካ::

ጉዋንጉዊ ወረዳ እንሴስካው አብት ልማት እቑስታንቲ ፅ/ጝናዳ እንሴስካውስታ ሜኑ ልማት ኬቹ ጉሳንቲ አቶ እስማኤል ጅብሪል ወረዳዳ ዝኩኽሳ ፍትሬቱሳ እይስቴ ቴኬምስትጝስ እንሴስካውሳ ዜሮ ኬሽጝፅጝዳ፣ ሜኑ ልማትዳስታ እንሴስካውሳ ቲኖ ማንዲጝዳ ትኩትስ እንፃኽስስታማጊ አኽⶓ ጉሽካ::

ቤዴራ እሩብፃንኩ ክምካው ቼፍ ሚንች ያኼስጉ ትክም ኩፅኒ አሬሳቻንትካው ይኮኖሚዳ ኪሴ ያጋያሱ አኽⶓ ቶኬምካ:: እንጚስኪላ ዙራሙሪኩ እምፕላ እሉዋዴስ ጌርክስ እምፕል ሊትር ኾሺ አግስታው አኽⶓስታ ኬሽጙኽ ዜርስ ካሚንስቲት እሉዋዴስ ጌርክስ 10 ሊትርዴስ ጃላ አግፄካማጊ አኽⶓ ቶኬምካ::

ክምካው ኬሌቢሊ እምትጛማ አሬሳቻንትካ ጉሹኑ ካሲስኪላ ምንግስታዋ ያኼካያስኩ አችትካሊ ቲቪቪርጚስ ኬሽጙኽ ኪዩሳ ዜሮ አሬሳቻንትካስ ዲግስጝስ ችግሮ ኽይጝስ እክድ እምስትⶓ ጌሌፅካ:: ዙራሙሪ ቺፋ አሬሳቻንትካ ኬሽጙኽ ክምካውሳ ዜሮ ቴኬምሰታንታ ፄውጙ ቴግባር ይስጛማ ሲፋው አኽⶓኪላ ኽይትጝፄካ::

አቶ እስማኤል ናኑውስታጊ ክምካው ኬሽጙኽ ዜርሊ እምትጛማ ዲጋውሳ ክሬቴ ኽይጝስ ክልሊ ዙሚትጜካማ ችግሮ ኽይጙ ቴግባርሾ ቱዌካ:: ኹና እሉዋውሳ ፋዮ ዋኽትጝፅጝስ ፅ/ጝና እንፃኽስትጝስ ጄሜርኹሳ ቴግባሮ አሬሳቻንትካ ጛው ፋይታ ክምካዋ እሩብፅጝስ ካላኑ እድል ዝኩኽ አኽጝስ ቱስቲስ ቴኬምስታንታ አሬሳቻንትካስ እንፅኼንቶ ዲግስካ::

ዋሺኒኪ ወረዳው ዝኩዋንቲ እንሴስካዋ እሩብፅጝዳስታ ሌፍፅጝዳ ጌቴማውሳ ችግሮ ካንትኹስ እንቲታኪ ክሬቴስታ ካሴ ፅፌት ጝናስ ዲግስጝስ ካላማ ችግር ኽይስታታ ዋኽ አላፍትስ ፅፌትጝና ኩርፄንትስ እንፃኽስታው አኽⶓኪላ አቕፄካ::