ችግራ ኽይ ኩስጚ

አለሚቱ የኔት

ኬችካዳ፣ እምፕልታቕዳ ኬፍኑስኪ አጌር አቕ ክቻዳ ፌቴርስታውሳ ጊዌ፣ ቱትጜ አቲⶓስታ ጋቻዋ ድፃማ ሰላሞ ሴፌንፅጝስ ልኻዋ ዊድፃው ቡንካ ፄውስታው ሰላሙ ዋይሚው ቴሜን ማልጜ ኬፍንኹ አኽጝስያኽ::

ሰላሞ አቲናቲታ ውላጊ ቴንኬክስትናናስታ አንኬባኬብናና ማንዲናው ያኹስ አጋታሚታ ያኻማ ኩፅኒ ዙሪዳ ዝኩንኩ ሰላሞ ስንክራንኩ አኼንካው ምክንያቲስ አቲንኹሳ ውላጊ ይጋሪው ፅሬትስ እንፃኽስትናና ዙርፅናውያኽ::

ሰላም እንዳርማዴስኪ ጃላ አኽጝስ ሰላሞ ፋይጝስ ሞኬርስታቲው አኺኒ ዝኩዋላኪ:: አሬጌግጙኽ ሰላም ፌቴርስታታ ትኩቶ እያማ እንፃኽስትጝስታ ሰላሞ አቲስፃንኩ አኼንካዋ ቤዴራማ ካላካልጝጝ ሰላም አቲⶓስታ እንጚሊ እምትጛማ ይንታውሳ ዜርፋ ሚንቼ ችግሮ ካላካልጝጝስ ፋይፃው አኽጝስ ሊሊትጙንኩ አጌርካዴስ ዴሶ ግልፅስ ካንትናናጊያኽ::

ሰላሙሳ ፄዌንቶስታ ጋቻውሳ ኪፊፃ አኽⶓ ሰላማዊ እዝብዴስ ኪቻ ወሬማኻዳ ፌይኹስታ ታምብኹጊ ኽስኹስ እርዳትስቴ::

አማኻሪ ክልልዳ ላጛ አሜታዴስ ጃላ እጂኹ ሰላሞ አቲጙ ችግርስ ሚንችካ ሙሬ ባይፅካማ ፊጝስ ችግርስ ጌሬፍስትካ:: ካሜናንታ ጝና ጋቲታስታ ካኒ ናቕታዳ ካሜንጝስ ጊዲዲስቴ:: ዎሌጅካ ናቔኑሳ አቲጝስ ብሽታንዳ ይጉዋውላ እንጉትጝስ ጌርኮ ፌይፅካ::

ሰላም ድሳማ ጋቻ ኔጌሳው ዝቤን፣ አብትስታ ንብሬት ይጉዋማ ይወትኪላ እውቶ አታው ጊዝ ያኻማ ፌያ:: እን ውንስኪላ ካንትፂ እልውኒው ስጋትሾዴስ አማኻሪ ክልሉ እዝብ ይኮኖሚው እቲጝሾዴስ አጌራዋ ዴሜካማ አፍሪካውያንካ ምስክርካኽ:: ስርፖውል ኮሊር ሹኻንቲ አሌሙ አጌርካዋ ድኽታኻዳ ዝኩዋንታ ፄዋንኩ ምክንያትካ ክቻዴስ ወሬም ቹዋ አኽⶓ ቶኬማና::

ሰላም አቲጛ ክርⶓ፣ አካል ዳንጉዊⶓ፣ ንብሬት ድኽⶓ፣ ስዴቶ፣ ምርኬ ትክላሊስ ማቤራዌስታ ይኮኖሚያዌ ኬውሶ ሲፍፃማ ፌያው አኽጝ አዴስኪ ቤፍቱኽ ጋቲዊያኽ:: እንዴስጊ ችግርዴስ ፊጝስ ዴሜካ ሰላም ማንዲስታታ ውላጊ እንፃኽስትጝ ቱስቴ:: ሰላም ይንታውኪላ ዲግጛማ ኩስጝጝስ አኽጝስ ውላጊ አግስታው ዙራሙሪቺፋ ዲግጛማ ኩስጝጝስ ችግሮ ኽይጝስ ልቕልቕቲ ካስጛማጊያኽ::

አዊ ብሄረሰቡ ቺፅጝፂዳኪላ ሊሊትጙንኩ ዙራሙርካዳ ሰላም ማንዲስታታ ፄውጝስ እዝብሊ ኩስጝጚ ካስጛማጊ አግስቴ:: አዮ ጉዋጉሲ ወረዳዳ ስንብቶ ካስጙኽ እዝቡስታ አመራርካው ኩስጚዳ አሴቴፍጙንኩ አቶ አለሙ ገበየሁ ሰሜኑ ወሬም ምክንያታስ ክልልዳ ሚንች ጉዳት ታምብⶓ ጉሽካ:: አስጜኪላ ክብሪ አቒው ይወትስታ አብትንብሬት ድኹኒዴስ ፋሌንጋ አሪክጚስ ኽይስትኹስታጊ ናካዳ ዙራሙሪዳ ዝኩኽ ጋቻኪላ ኩስጚስስታ አሪክጚስ ኽይስትጝ ቱስታው አኽⶓ ዲብስካ::

ሰላሙ ዳንጉዊኒስ አዌክስታማጊ ዝኩኽ አሬሳቻንቲኪላ ችግር ኽዬ አግፃማ እርሺው ቴግባርሾ ቱጝስ ማንዲትጛማጊ አኽⶓኪላ ዙሜካ:: ዶንጌትካማ ካዌንሾ ቱጝስ ስራስሪ ክንቴ ሲፍጛቲንታ እምፕልታቕ ሼውታ ዝኩዊኔ ጉሳቲንታ ፄዋንኩ ቤንካኪላ እምፕልታቕዴስ ፉንኩ አኽጝስ ዙራንታ ፄውጝ ቱስታው አኽⶓ ዲብስካ::

ዊዛሩ ሙሉ አለነ አዚኒ ኬቴሙ ዝኩዋንታ ስልኪስ ዙሙኑውስታጊ ዙራሙሪዳ ሰላሙ ችግር ጌቴሙኒዴስ ላጛ አሜታዴስ ጀላ ያኻ:: እን ሰላሙ ዳንጉዊኒ ዴሜካ ኹንዳ ኬፍንኹሳ ጉዳቶ ሲፍፃማ ፌያ:: ዋኹኽ ጝንዴስ ፌካማ ዳድ ዳዳዳ ጊዞ ፌይፃንታ ፄዋሺኹ አኽⶓኪላ ታክስፅካ:: ዲጊ ጊዝዴስ ናቴ ኩፅኒ ቹትካ ፄዋኑ ኩስጚስ ቱስታ ጋቲታ ዶንጌትካማ ካዌንሾ ቱዌካሺንኩጊ ዙራንታ ፄውስትጝስስታ ውኖ ማሌካማጊ አንትጝስ ሰላማዊ አኺኒሾ ዙርጝስ እሺኹ ሰላሙ ዳንጉዊኒ ክቼማጊ አኽⶓ ዊዛሩ ሙሉ ዲብስካ::

ኬርትኹ ዳድስ ዶንጌትካማ ካዌና ቱዋንታ ጌንዜቦ እይጝስስታ አትሌልፅጝስ ካፁንኩ ዎታትካዋ ሰላማዊ ዳድሾ ይንታንታ ፄውጝስ ኪላ ቹትካ ጝንቺፋ ኬፍቲኔ አላፈቶ ፊትጜካማጊ አኽⶓኪላ ዊዛሩ ሙሉ ዙሜካ::

እቑስታው ኩችቲዳ ፌካማ አሳቦ ጌሌፅጙ ችግር ዝኩዋችኹኒኪላ ሙሪ ቺፋ ካስጛው ኹኑ አችትጚዳ አግስታንኩ ኹን ፄውስታው ኩስጚዳ እይስታውሳ አሳቦ እሚጝስ ሰላም ይንታታ ፄዋኑ ፍሺ ልቓ እስታቲውስታ ዋይሚስቲ አኽⶓ ድኹዌካ:: ፍንሾስኪላ ውላጊ ዙራሙሪ ሰላማ ያኻታ ኹን ካላኑሳጊ ፅሬቶ ፄውጝስ ፍካዴንትስ እንፃኽስታንኩ አኽⶓ ካንቴ እይካ::

“ውላዴስጊ ሰላም ኽሴ” ንጝስ ዙሚትጜ ጄሜሩንኩ ስሞ ጌሌፅጝስ ፋየካያስኩ ወረዳው ዝኩዋንቲ ዴሜካ ወረዳዳ ሰላም ዳንጉዊጛስ ሼውታ ጌቤላ ካስጝስ ካላቲንኩስታ እሩብፁንኩ ክምካዋ ዋይካማ ዙርጝስ ካላቲኑ አኺኒዳ አኽⶓ ድኹዌካ:: ጌቤልዳ ሌቤቶ ዋይካማ እሚኑሳ ጌንዜቦ ሰላምስ ካፅካማ ፋዩኑውስ እሽፅጝስ ካላቲንኩስታ ዳድዳ ማንዴካማ ኪማንኩ አኽⶓኪላ ቶኬምካ:: እንጊ ችግር ጌቴማውኪላ እምፕልታቕ ክቻዴስ ፌካማ ካዌና ቱንኩ አካልካስ አኽⶓኪላ ጉሽካማ ኽይኪላ ዙሚትጛማ አሪክጚ አኽⶓ ካንቴ እይካ::

አዩ ጉዋጉሲ ወረዳው ቹዋ ቺፅጝፃንቲ አቶ ገበየሁ በሪሁን ጌሌፁኑውስታጊ ወረዳዳ አግስታንኩ 20 ኬቤልካዴስ 15 ኬቤልካዳ ሰላሙ አኺኒ ቼሜትጙኺያኽ:: ናካዳ ዝኩኽ ሰላሙ አኺኒ ፌይኹ አሜትሊ ካንትጛኒ ኬሻንቲ አኺኒዳስታ አሪጊግጚ ካንትስትኹ አኽⶓኪላ ቶኬምካ::

ወረዳዳ አግስታንኩ ዎታትካ፣ ኹን፣ አጌር ሹማጌልካስታ አይማኖቱ ታብልጊ ናካዳ ውላጊ ሰላምስ ዜባ አኽጝስ ካሊⶓኪላ አቶ ገበየሁ እርዳትፅካ:: ዋሺኔኪ ድኬ ቴግባሮ ቻቤላቲውስታ ፌፄምስታማ አግስታኒኪላ ፍን ፍና ቡንክትጛው እምፕልታቕ አኽⶓኪላ ቶኬምካ:: ሰላም ዳንጉዊጙ ምክንያታስ ወረዳዳ አገልግሎቴ እይጚዴስ ጄሜራማ ሊሊትጙንኩ ልማትካው እንፅኽካዳጊ ፅንጋኻ ያኻማ እጂⶓ ጉሽካ::

ሰላሞ ማንዲፅጝሊ ኬምፕስ ኬምፖኪላ ክልሉ ምንግስት እንኩርኹሳ ልግሱሳ እክዶኪላ ስራ ፄውጝስ እዝቦ አሴቴፍጝፅጝስ ወረዳታ እንፃኽስስታማጊ አኽⶓ ኽይትጝፅካ::

አዊ ብሄረሰቡ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው ካስጙኽ ኩስጚዳ ኑኑውስታጊ አዩ ጉዋጉሲ ወረዳው እዝብ አይቶ አብርትሊ እምፕልሳማ ካሊትጚስስታ ኪቪቪርጚስ ዝኩዋው ልማቱ አርቢኒያኽ::

ወረዳው እዝብዳ ዶንጌቱንኩ አይልካ ፌቴሩኑ ፄትቲው ችግርስ አቕቱስታ ንብሬቱ ክሳሪ ታምቡኽ አኽⶓኪላ ጌሌፅካ:: እዝብ ፄትቲው አይልሊስታ ምንግስትሊ ጐንዳ ቲሪጝስ ዶንጌታንትካ አይልካዋ ቡንክትጝጝስ ናካዳ ሰላም ዙራማጊ አኽⶓኪላ አቶ ቴዎድሮስ ቶኬምካ::

ኩስጚዳኪላ እዝብስታ ምንግስትሊ አኽጝስ አብኖ ኽቴናቴ ፄውጝስ ዶንጌቱንኩ አይልካውሳ አሳቦ ካስጝፅጝስ እንፃኽስታንኩ ዝኩንኩ አኽጝስ እን ኬርትኹ ቴግባርዴስ ክቼንታኪላ ኩስጜ እይካ:: ወረዳዳ ሰላም አቲጝ ምክንያታስ ጄሜርስትካማ ቲሪንኩ ልማትካ እንፅኺሾ ቱዋንታ ፄዌካማጊስታ እሊኩ ኪላ ስርኩ ልማትካ ዋኽጝትጛንታ እንፃኽስስታማጊ አኽⶓ አቶ ቴዎድሮስ ቶኬምካ::