እምቢትንኹሳ አገልግሎቴ እይጝስ ካሊፃው ስልታኒው ማይኬል ቲሪትጝጝ ፋይፃንቲያኽ

ንግስቴ ተስፋ

አግልግሎቴ እምፕልታቕስ እይጝስ ካላውሳ አቒውሳ አይሎ አፌርጝ ፋይፄ ናኒስ አማኻሪ ክልሉ ኩስጚ ጝናስኩ አባልካ ካሲና::

ወክትስ፣ ጊዝስስታ አጌላጌልስታንትካዋ ምግባር-ፅንታስ ሚዛናዋ ያኻማ አጌላጌልጝዳ ሚንች ዳንጉዊኒ ፌቴርስታማጊ አኽጝስ ጉዳዩ ክችስጝስ ትኩትስ እንፃኽስስትጝ ፋይፃንቲ ያኻ:: እንጚስኪላ ኬሽጙኽ ምንግስቱ እንፃኽስታንትካው አዋጅ ቴርታማ ኩስጚ ጝናስኩ አባልካስ ዲጋ::

እንጚስኪላ ሲቪል ሰርቪሱ እንፃኽስታንትካውሳ ካሌቕቶስታ ምግባር ፅንታሳ ሌጌፃውስታ ክችሳውሳ ስልታኔ እይጝስ ካሊፃውሳ ማይኬሎ ቲሪትጝፅጝስ አዋጆ ፍሽጝ ፋይፃንቲያኽ::

አጌላጌላንቴ እንፃኽስታንቴ ፍሽጝስ እሊኩ ክልልካ ቴግባርዳ እሽፅጝስ ሜዜጌብፁኑሳ ኪሴ ፅናታ ፄውጝስስታ ክልሉ አኺኒታ ዴሶ ካፅጝስ ቴግባርሾ ቱጝስ ዲግኹሳ አዋጆ ኩስጚ ጝና ማራማራማ ፄዴክፃታ ዲጛ::

ናኪኒ ወክትስ አግልግሎቴ እይጚዳ ዝኩኹሳ ችግሮ ካይጝስ አግልግሎቴ እይጜ ዝቤናዋ ፄውጝ ካሌቕት ዝኩክሳ ውማይቴንካዋ አፌርጝስስታ እንፅኺዳ ዝኩንኩሳ ይስጝፅጝስ ፋይፃንቲ አኽጝስ አዋጅ ኬሽጛማ ዲጋ::

ኾትካ ፍታዌስታ ቴክኖሎጂስ ዳጌፍስትኹሳ እምቢት ንኹሳ አግልግሎቴ እያንታ እንፃኽስታንትካዋ ካሌቕቶስታ ውማዬስ ጎሌላማ እንፅኺስ ሊኪጝስ ካሊፃው አዋጅ አኽⶓኪላ ቶኬምስታ:: ካሜንቱትስ ቹዋስ እይስታው ፍካድ ዝኩኹስታጊ ሹኻ አርፋ ዋኻያሱሳ ጄሮ ጉዲፍቻስ ካፅካማ ሌጌፃንኩ ምንግስቱ እንፃኽስታንትካስ ሹኻ አርፋሱሳ ፍካዶ እይጝስ ካሊፃው አዋጅ ቴርትጝኪላ አዋጅዳ እንኩርስታ::

ኬሽጛማ ዲጉኽ ምንግስቱ እንፃኽስታንትካው አዋጅዳ አሳቦ እዩንኩ ኩስጚ ጝናሱ አባል ማተብ ታፈረ (ዶ/ር) ምንግስቱ እንፃኽስታንትካውሳ ካሌቕቶ ሊኪፂስታ ሴሊቲንፂ ማይኬሎ ቲሪትጝፅጝስ ኬሽጛማ አዋጅ ፊጝ ችግሮ ኽይጝስ ፋይፃንቲ አኽⶓ ጉሽካ:: ያኼስጉ ማይኬሎ ቲሪትጝጝፅጝ ሚንቾ ፍሼ ካሴው አኽጝስ አማኻሪ ክልሉ ስቴት ዩኒቨርስቲሊ ቲቪቪርጚስ አቭርታ እንፃኽስትጝ ኩፅኒ ምንግስቱሳ ባጀቶ ኔኬትጝስ ካላው አኽⶓ ቶኬምካ::

ሲቪል ሰርቪስ ቲሪትጝፅጝስ ታክስኹሳ ማይኬሎስታ ስቴት ዩኒቨርስቴ ሜሴልጝፃው ቴግባርስታ አላሚ ዝኩኽ አኽጝታጊ አዋጅዳ ዲጉኻ አሳብ ክልሉሳ ፍሼስታ ባጀቶ ግምትዳ ሚፃያሱ አኽጝስ ስቴት ዩኒቨርስቲሊ እንፃኽስትጝ ጉዳዮ ሳሴርፅጝስ ካሌ ናውሳ ካንቴ እይካ::

ኩስጚ ጝናሱ አባላ ዊዛሩ አድና ምህረቱ ጛሾስ ምንግስቱ እንፃኽስታንትካስስታ አጌላጌልስታንትካስ ይቪችካስ ያኻውላ ዝቤን ካሴውሳስታ ፍንሾስ ካይፅጝስ ካላውሳ ዝርዝሮ አሳቦ እሚኹ አኽጝስ ዲጉኽ አዋጅ ፄዴካማ ክልሎ ኬሽኹ አችሾ ታምፅጝ ፋይፃንቲ አኽⶓ ጉሽካ::

ቲሪትጝፅጝስ ታክስስትኹ ካሌቕቶ ሊኪፂውስታ ሲሊቲንፂው ማይኬል ጛሬ ካላማ እንፅኼ ጄሜራታ አዋጅዳ ዲግኹሳ አሳቦ ቴግባርሾ ኪስጝ ቱስታው አኽⶓ አሳቦ እይካ::

አቒ አብቱ ቺፅጝፂው ቱሪዝም ልማቱ ጉዳይካው ቲሬንቲ ኮሚቴ አቶ አበረ ፈንታው ምንግስቱ እንፃኽስታንትካዋ ኬፄርጝ፣ እንፅኺዳ ቱዋኑላስ ስልታኔ እይጝስታ ትክላሊስ ሲቪል ሰርቪሱ እንፃኽስታንትካዋ ሴሌቴንፃማ ቱስቴ አግልግሎቴ እያንታ ፄውጝስ እክዶ እሚኹ አዋጅ አኽⶓ ኽይትጝፄካ::

አኽጝስኪ ስልታኖስታ ቴግባሮ ግልፅስ እንኩሩኽ አዋጅ አኽጝታጊ ጛሬ ካላማ እንፅኼ አኮሜችጝስ እንቲታኪ ሲቪል ሰርቪሱ አግልግሎቴ እይጚዳ ካንትስታውሳ ዳንጉዊኔ ክችስጝስ ካሊፃው ኬሽጙኽ አዋጅ ፄዴካታ ውሳኒውሳ አሳቦ ዲግስካ::

ኩስጚ ጝናሱ አባልካዴስ ጁኽስ ካሲስስታ ካንቲስ ዙርሜ እዩንኩ ሲቪል ሰርቪሱስታ አቒው አብት ልማቱ ቢሩ አላፋ ዊዛሩ ባንቺአምላክ ኔፃ ጊሊልቲኒስታ ቴግባሮስታ አላፍቶ ቱስቲስ ፊትጛውሳ፣ ዝቤናዊ ቴክኖሎጂስ ካሌቕቶ ሌጌፅኹሳ ምንግስቱሳ እንፃኽስታንቴ አፌርጝስ ሊሊትጙኽ ፅናት ካስጙስ እጄማ አዋጅ ፊⶓ ኽይትጝፄካ::

ምንግስቱ እንፃኽስታንትካው ኬሽጙኽ አዋጅ ሴቴት ዩኒቨርስቲሊ ቲቪቪርጚስ እንፃኽስትጝስ ካሊስታውሳ ጉዳቶ ግልፅስ እንኩሩኽ ያኹኒውላ ምንግስቱ እንፃኽስታንትካ ዝቤናዌስታ ኬሽጙኽሳ አግልግሎቴ እያንታ ካሊፃው ሲሊቲንፂ ማይኬል ኩፅኒ ጛሬ ካላማ ቲሪትጝጝ ግድ አኽⶓ ጉሽካ::

ናካዳ ችግራኻዳ ዝኩኽሳ አግልግሎቴ እይጜ ዊዳፊስ ኽይጝስ ታክስስታማ አዋጅ ኬሽጝⶓስታ ማይኬል ቲሪትጛታ ፅናት ካስጝⶓ ዊዛሩ ባንቺአምላክ ጌሌፅካ::

አጌራ ቴግባርዳ እሽፄታጊ ዝኪኹ ዲጂታላይዜሽን እንፃኽስትጚስኪላ ምንግስቱ እንፃኽስታንትካ ታምቦ ፊትጛንታ አዋጅ ኬሽጛማ ዲግⶓ ጉሽካ:: ክልልዳ አግስታንኩ ዩኒቨርስትካሊጊ ቲቪቪርጚስ ምንግስቱ አግልግሎቴ እይጚዳ ዝኩኽሳ ዳንጉዊኔ ክችስጝስ ኬሽጙኽ አዋጅ ቴግባሮስታ አላፍቶ ግልፅስ እንኩራው አኽⶓ ኩስጚ ጝናስኩ አባልካስ ኽይትጝፄ እይካ::

ኬሽጛማ ዲጉኽ ምንግስቱ እንፃኽስታንትካው አዋጅዳ ኩስጚ ካስጙኒዴስ ፋሌንጋ ቴግባርዳ እሼታ ዳብዚ እንኩርስታ::