ፍትሬት አብታሳ ማንዲጙ እንፅኺ ምርቶ ዴሜክጝስ እርዳታዊያኽ

ታደለ አጋጄ

ፍትሬት አብታ ማንዲጚው እንፅኺ ምርቶ  ሌጌፅጝስ ማልጛ ፋይፃንቲ አኽⶓ ጉዋንጉዊ ወረዳው አሬሳቻንትካ ዙሙና::

ፍትሬት አብት ማንዲጚው እንፅኺ ኽብፂ ኩሪስ ሺሽርስታማ ካቲታ፣ ብቲው አሉምት ዙራታስታ ምርትስታ ምርታምት ዴሜካታ ፄውጝስ አሜት ቺፋ አሬሳቻንትካስ እንፃኽስስታው ቴግባርያኽ:: ፍትሬት አብት ማንዲጚው እንፅኺ እንፃኽስስትⶓ ጄሜርኹ ጊዝዴስ ናቴ ብቴ ዙርፃማ ሊሚፅጝስ ኪሲ ካንትስታማጊያኽ::

እንዴስ ቤዴራ ሊሊትጙኽ ምክንያቲስ ኽብፂ አሉምቶ አቲጝስ ምርቶ እያቲው እሺኹ ብቲዳ ፍትሬት አብት ልማቱ እንፅኺ እንፃኽስስትጝስ ምርቶ ሌጌፅጝስ ካሊⶓ ጉዋንጊ ወረዳ ዋይከላ ኬቤሊው ዝኩዋንትካ ዙሜካ::

ፃምርትጙኽ ፍትሬት አብት ማንዲጚው እንፅኺዳ አግስቴካማ ካንቴ እዩንኩ አሬሳቻንቲ አብዮት ትላሁን ዙሙኑውስታጊ ቴፋስስ ልማቱ እንፅኺ አሬሳቻንትካውሳ ዝኪዊኒ ኪስኹ አኽጝስ ጛው ፋይስ እንፃኽስትካማጊያኽ::

ቤዴራ ብቲ ኩሪስ ሺሽርስታማ አሬ ዋግፅⶓ አቲጝ፣ ጋኻ አኽጝ፣ ምርት ኔኬትጝ ኬሴትስታሺኹ አኽⶓ ቶኬምካ:: እንፃኽስስትኹ ተፋስስ ልማቱ እንፅኺስ ሚንችካ ትክምካዋ አግፅⶓ ዙሜካ::

አሬሳቻንትካ ብቴ ቱስታው ዳድስ አንኬባንኬብካማ እሚጝ ምርት ዴሜካታ ፄዋው አኽⶓ ጉሽካ::

ተፋስስ ልማቱ እንፅኺ ዊዳፊስ ማንዲስታማ ዝኩዋታ ግብርኒኩ ውማይቴንካውሳ ኩስጜ ቻቤልጝስ እንሴስካው ኔክትጚዴስ ኔፃ ፄውጝስ እንፃኽስትካማጊ አኽⶓኪላ አሬሳቻንቲ ዙሜካ::

እሊው ዋይከላ ኬቤሊው አሬሳቻንቲ መንገሻ ከበደኪላ ፍትሬት አብት ማንዲጛው እንፅኺ እንፃኽስስቱኒዴስ ናቴ ካጋሺንኩ ብንካዴስ አሊ ፊⶓ ጄሜርⶓ ዲብስካ::

ብቲ ኩሪስ ሺሽርስታማ ኽብፂው አሉምት ኔኬትጙ ምክንያቲስ ኬሽኹሳ ምርቶ አግፃቲንኩ እሺንኩ አኽⶓኪላ ቶኬምካ:: እምፕልታቕ ዝማቺስ እንፃኽስታንኩ ተፋሰስ ልማትኩ እንፅኽካ አሬሳቻንትካውሳ ዝኩዊኔ ኪሲካማጊ አኽⶓ ዙሜካ::

እንፃኽስስትኹ ተፋሰስ ልማቱ እንፅኺ እንሴስካስ አቤሌሽስታቲታ ፄውጝስ ማንዳንኩ አኽⶓ ጉሽካ::

ፍትሬት አብት ማንዲጚው እንፅኺ ምርቶ ሌጌፅጝስ ማልጛ ፋይፃንቲ አኽጝስ ይስፅካማ እንፃኽስታንኩ አኽⶓ ዙሜካ::

ዜና ትንታኔ ማሟያ

ይጋርዱሽ አምሳል ጉዋንጊ ወረዳ ዋይከላ ኬቤሊው አሬሳቻንትካኽ:: ቴፋሰሶ ልማትዳ ኹንኪላ ክቻ አሴቴፍጜካማ እንፃኽስታንኩ አኽⶓ ድኹዌካ:: ኬቤሊታ ሊሊትጙንኩ ዙራሙርካዳ ጉዲስትኹ ብቲዳ ተፋስስ ልማቱሳ እንፅኼ እንፃኽስትⶓ ጉሽካ:: ተፋሰሶ ልማት እንፃኽስስትኹ ብቲዳ አሜትዴስ አሜቶ ኬሻንቲ ምርት ዋግጝስ ትክሞ አግፅⶓ እንክርፄካ::

ግብርኒው ውማይቴንካ እያኑሳ ኩስጜ ቻቤልጝስ ብቴ ሊሚፅጙሳ እንፅኼ አኮሜችካማጊ አኽⶓ ዙሜካ:: ሊሊትጙንኩ ቴክልካ ቴክልስታኑ ስፍሪዳ ቴክል ቴክልስታታ፣ ሺሽርስትኹዳ ዴሜካ እርኬኖ ግቢትጝስ ብቲው አሉምት ዙራታ ፄዌካማጊ አኽⶓኪላ ዲብስካ::

እንፃኽስስትኹ ተፋሰስ ልማትዳ እንሴስካ ቱዋቲንታ ደሜካ ማንዳውሳ ዚቢኔ ኬፄርጝስ ማንዲስታታ ፄውⶓ ቶኬምካ:: እንዴስ ጌናኪላ ብቲ ጉዲስታቲታ ፄውጝስ ተፋሰስ ልማቱሳ እንፅኼ ይስጝፄካማ እንፃኽስታንኩ አኽⶓ ዙሜካ::

ጉዋንጉዊ ወረዳ ግብርኒ ፅፌት ጝናሱ አላፊ አቶ አበባው አምሳል እምስትኹ ባጄት አሜትዳ ወረዳታጊ 78 ተፋሰስ ልማትዳ 650 ሄክታር ብቴ እስካዊስ ሊሚፅጝስስታ እንፃኽስስትኹሳ ዴሜካ ፄጌንጙ እንፅኺ አኮሜችስታማጊ አኽⶓ ጌሌፅካ::

1ሻይ 710 ሄክታር ብቲዳ እንዴስ ቤዴራ እንፃኽስስትኹ አኽጝስ ፅጋኒ ፄውስታው አኽⶓ ጉሽካ::

19 ሻይ 900 አቒው አይል ጎሌልስታማ እንፅኺሾ ቱስትⶓ ቶኬምካ::

ውላ ኬቤልካዳ ቴፋስስ ልማቱ እንፅኺ ጄሜርⶓ ቶኬምካማ ወረዳዳ ሺሽርስትኹ ብቲ ሚንቻው አኽጝስ ተፋስስ ልማቱ እንፅኺ እሳንስ እንፃኽስስታማጊ  አኽⶓ ጌሌፅካ::

ቴፋስስ ልማቱሳ እንፅኼ እንፃኽስቱንኩ ዙራሙርካዳ ይኮኖሚውሳ ትክሞ እያንኩሳ ችግኝካዋ ቴኬልጙ እንፅኺ አኮሜችስታማጊ አኽⶓ አላፊ እርዳትፅካ::