ዲንቢኒ ንጉስያኽ

ንግስቴ ተስፋ

ጊፁ አሌምዳ ዲንቢኒ ንጉስያኽ እስታው ካል ዙማ ዴስስትኹያኽ:: ልኺትጚው ኢኮኖሚዳ ሊሊትጙኽ ጉላሊ ዝኩኽ አኽጝስ ፋዮ ዋኽትጝፃው አችትዴስ አጌላጌልስትጝስ ካላው አኽጝስያኽ:: አኽጝስኪ አግልግሎቴ እይጝስ ግዴቴ ቱኽ ዋሺኒኪ ውማይቲኒኪ ያኻ እንፅኺው አላፊ ቱስቲስ አጌላጌልስታንትካስ ፋይፃውሳ አግልግሎቴ እይጝ ማንዲስታው ጉዳያኽ::

ክችክቼ አግልግሎቴ እይጝስታ አጌላጌልስታንትካዋ ምግባር ፅንታስ ሌንጌድፅጝ እምፕል ወክቱ እንፅኺ ይቪቺ አኽጝ ቱስታላኪ፡፡

እን ያኼስጉ እን አጌራው አጌላጌልጙ እንፅኺው ካስት ሚንች ጊዝስ ክሬቲ ዲጋው እዝቦ ችግርሾ ሚፃማጊ ዝኩኽያኽ::

አዊ ብሄረሰቡ ቺፅጝፂ ዚጋሚ ወረዳ ሚፂ ፅፌት ጝናዳ ዝኩኽሳ አግልግሎቴ እይጜ ካንትኹስ አሳቦ እያንኩ ክላጅ ኬቴሙ ዝኩዋንትካ ዊዛሩ ይቶፒያ እርክይሁን 2006 ምሬት አሜታዴስ ጄሜራማ ቡኖ ጌፌርፅካማስታ ምግቦ ዋይጙ ጊፁ ዜርፍዳ አሴሜርጜካማ እንፃኽስቴካማጊያኽ:: እንፃኽስታኒስ ኩፅኒ ግብሮ ኬይጝስታ ጊፁሳ ፍካዶ እሚ ግዴቲ አኽⶓ እርዳትስትጝስ ግዴቴ ፊትጜካማጊ አግስታንኩ አኽⶓ ዲብስካ:: እን ያኼስጉ ጊፁሳ ፍካድ አዴስጝስኪ ያኻ ግብሮ ኬይጛ ሚፂው ፅፌት ጝናሾ አግልግሎቴ አግፅጛ ካሳኑ ወክትዳ ጌቴማውሳ ችግሮስታ ይሴኖ ጉዳዮ ድኹዌካ::

ዊዛሩ ይቶፒያ ናኑውስታጊ 12 አሜታስ አግፃኑ ሚፂዴስ ግብሮ ኬያኒስ ፌቴርስታው አግልግሎቴ እይጙ ዳንጉኒዴስ ዎክትስ ሌንጌድፃውላ ይጉጝ፣ እንፅኺዴስ ኪቻ ኩፕቴ ሚንቺስጝ፣ ኬፄሩስ ዙራዙርፅጝ፣ አኽⶓ ጉሽካ::

“ግዴቴ ፊትጝጝስ እንፅኼ ባናና አንጌሌትስትጝ ቱስታላ፣ እኖጂ ጊፁ ዜርፍዳ ይንታንኩሳ ዴምቤንካዋ ክብርስ ሌንጌድፅናውስታጊ ምንግስቱ ኾትዳኪላ አግፅናው አግልግሎቲ እምቢትንኹስታ ክብሮ እያው አኽጝ ቱስታው አኽⶓ ዙሜካ::

ዊዛሩ ይቶፒያ ናካዳ ወረዳው ሚፂ ፅ/ጝና አግልግሎቴ ወሬኬቱ ኔክትጚዴስ ፊጝስ ዲጂታልስስታ ግብሮ ኬያኒስኪላ ባንክስ አኽጝ አግልግሎቲውሳ ችግሮ ኽያማጊ አኽⶓ ድኹዌካ:: እንዴስ ቤዴራ ጊፁሳ ፍካዶ አዴስጝስኪ ያኻ ግብሮ ኬይጝስ ሶኼቶ ኺስታ ዙራዙራሺንኩ አኽⶓ ታክስጝስ ናካዳ ኩፅኒ 1ዴስ 2 ሳታሳ ኺስታ ዝኩኽ ጊዝዳ ኬሽጙኽሳ አግልግሎቴ አግፄካማጊ አኽⶓ ጉሽካ:: አግፃኑ ሚፂዴስ ጃላ ኬፍቲኒ ግብር ዋሴንስታኒኪላ ክሬቴ ዲግስካማ ክችስጝስ ካላኑ እንፃኽስትጚ ዝኩⶓ ቶኬምካ::

ዊዛሩ ይቶፒያ ግብር ዎሴንስቱስ ክፃቲያኽ እስታማ ኬይስታው አግልግሎቴ እይጚው አኺኒኪላ ክቼታ አሳቦ ዲግስካ::

ሆቴሉ ዜርፍ ጊፁ እንፅኺዳ አሴሜርጙኽ አቶ ኢሳያስ ነብዩ ጛሾስ ሚፂ ፅ/ጝናሱ አግልግሎቴ እይጚው ሴል እንዴስ ቤዴራ ጊዞስታ ጌንዜቦ ባኬንፃንታ ፄዋሺኹ አኽⶓ ጉሽካ:: ጌርክ ቺፋ እሊው ጌርክስ ዙራን ናው ኬፄሩስ ፋያኑሳ አግልግሎቴ አግፅጝስ ቼጌርስታሺንኩ አኽⶓ ታክስካ::

አግልግሎቴ እይጚኪላ ዎሬኬትዴስ ፋያሱ እሺኹ አኽጝስ ዝቤንሊ ካሳውሳ አግልግሎቴ አግፅጝስ ቼጌርስታሺንኩ አኽⶓ ድኹዌካ:: ፍታዋ ያኹኽሳ ግብሮ ወክትስ ኬያንታ ፄውስታው ውማይቴንካው አግልግሎቴ እይጚ ኩፅኒ ምስጋኒ እይስታው አኽⶓ አቶ ኢሳያስ ዲብስካ::

እሊውሾስ ግብሮ ኬይጝ አጌር አቑ ግዴቲ አኽⶓ ሼውንጝስ ወክትስ ጊፁሳ ፍካዶ አዴስጝስ ፅ/ጝና ካሳኑ ወክትዳ አሻሬ እያኑ ማሽን እላቲው አኽጝስ ቻግኒ ኬቴምሾ ካሳን እስታንኩ አኽⶓ ጉሽካ:: አቶ ኢሳያስ ግብሮ ኬያንትካስ ፋይፃው ጉዳይጊ ዋኽትጛማ  ዲጊዳ አግልግሎቴ አግፅጝስ ካላንታ ፅፌት ጝና ትኩትስ እንፃኽስትጝ ቱስታው አኽⶓ ካንቴ እይካ:: እስካዊስ ፉኽ አዋጅኪላ ቴግባርዳ እሼማ ቱስቲ ዝኩኽ ዳድስ ግብሮ ኬያንትካ አግልግሎቴ አግፅጝስ ካላንታ እንፃኽስትጝ ፋይፃው አኽⶓ ዙሜካ::

ዚጋማ ወረዳው ሚፂ ፅ/ጝናዳ ሚፄ ኩፕፅጙ ቴቬቬርጝፃንቲ አቶ አለነ አረፈው አግልግሎቲ እይስታው ዴዴጝ ጊዝስ፣ ክቻክቺስታ ሊጊሲሚ ጊዝስ እስታማ እክድስ እንኩርጝስ ክላጅ ኬቴምዳ 7 ሊኻዴስ ጃላ ጌፄንስታ ግብሮ ኬያንትካስ አግልግሎቲ እይስታማጊ አኽⶓ ጉሽካ::

ግብር ዎሴንስቱስ ፅናትስስታ ሜሜሪስ አኽጝስ ግብሮ ኬያንትካዳ ክሬቴ ፌቴራቲታ ፄውስታው ዳድ ዝኩⶓ ጌሌፅካ:: ግብሮ ኬያንትካዳ ክሬቲታ ዲጋሺኹ ግብር እምፕላኒስ ኬያሺኑ  አዋጅ ኬሽጛማ ናካዳ አሜትዴሰ ሲዚኒ ኬያንታ ፄውስትጝ ኪላ አጌላጌልስታንትካስ ፉሬ እይⶓ ኽይትጝፄካ::

ሚንችካ ግብሮ ኬያንትካው ክሬቲ እሺኹ ወሬኬትዳ ፋይሎ እሚጝ ናካዳ ኮምፒውተርሾ ኪስስትጝ ሳሴርስ ሚፄ ኩፕፅጝስ ካሊስታው ሴል ፌቴርስትⶓ ቼሜትጝፄካ:: ግብሮ ኬይጝኪላ ባንክስ አኽጝስ ኔፃስታ ፍታዊ ያኹኽ እንፃኽስትጚ ፌቴርስትⶓ ጉሽካ:: ናኪኒ ወክትዳ ኬፄሩ እይስታማ ካሳው አግልግሎቴ ፋያንቲ እላኽ ናንኩ አቶ አለነ እንዴስ ቤዴራ እሺኹ ዙራዙርፅጝስታ አንጌሌትጝ ይጉⶓ ቶኬምካ::

ናኪኒ ወክትስ ዲጂታልስ አግልግሎቴ እይጝስ ጄሜርስትኹ እንፃኽስትጚ ዝኩኒውላ ዋኽስዋኾ ቴግባርዳ እሽፅጝስ ኩፅኒ እንፅኺው ሜሳሪ ዋኽትጛውላ ይጉጝ እንፅኺዳ ቻኒስቶ ፌቴርⶓ ጌሌፅካ:: እንዴስ ድምክና ጌርክ ቺፋ ላጛ አቒዴስ ጃላ አግልግሎቴ ፋያው ጉዳይ ዌናስ ሌንጌድፅጝስ አሻሪው ማሽን አቤሌሽስትጝ  ክሬቴ ፌቴርⶓ ጉሽካ::

አቶ አለነ ችግሮ ኽይጝስ ትኩታው ቤንስ አቕፁኒውላ ላምቡሳ ኺስታ ኽይ እይስታያሱ አኽⶓ አቕፄካ:: ፅ/ጝና ጚው አክምስ ችግሮ ኽይጝስ ቼጌርስቱኒውላ ጊዛዊ ኽያ ያኼ ንጝስ ጉዋንጉዊ ወረዳሊ ቲቪቪርጚስ ውማይቲኔ ኬፄርጝስ አሻሬ ፋያንትካ ቻግኒሾ ዙራዙርካማጊ አጌላጌልስታንኩ አኽⶓስታ ስልኪስ ቲን ናምበር ቴርታታ ንቫሮ ኪስጜካማጊ እንፃኽስታንኩ አኽⶓ ጌሌፅካ::

ዳር አርፊዴስ ጄሜራማ ቴግባርዳ እሼው አዋጅኪላ ዋሺኒኪ ግብር ኬይስታው ሲስተምስ እስታማ ዎሴንስትኹ አኽጝስ ፅ/ጝናዳ ዳላው ኮምፒውተሩ ችግር ዝኩጝስ  አግልግሎቴ እይጝስ ካላቲንኩ አኽጝስ ትኩታው ቤን ችግሮ ኽያታ አቶ አለነ ክሬቴ ዲግስካ::

ዚጋሚ ወረዳው ትክትሊ ቺፅጝፃንቲስታ ብቲ ቺፅጝፂ ፅ/ጝናሱ አላፊ አቶ አብታሙ ታዬ ጛሾስ ምንግስት ሚፄ ኩፕፅጝስ አኮሜቻው ቴግባርዳ ሚፂው ፅ/ጝናዳ ችግር ፌቴርስትጝስ አግልግሎቴ እይጚዳ ፅንጋኻ ያኻንኩ ጉዳይካ ፌቴርስታቲታ ወረዳ ትኩትስ እንፃኽስስታማጊ አኽⶓ ጉሽካ::

እንጚስኪላ አግልግሎቴ እይጜ ሳሴርፃውስታ አጌላጌልስታንትካ ቼጌርስታኑላ አሜችኹ ዳድስ ሌንጌድትጝስ ካላኑሳ ግባቶ ዋኽትጝፅጝስ እክድ እምስትⶓ ጉሽካ:: ኮምፒውተር ጄውስታታኪላ እንፅኼ ጄሜርⶓ ጌሌፅካ::

ግብሮ ኬያንትካ ፍካዶ ፍሻኒስስታ አዴሳኒስ ፋይፃው አሻሪው ችግርኪላ ኽይስታታ ክልልስ ካሴ ዲግስካማ ችግሮ ኽይጙ ቴግባር አኮሜችስታማጊ አኽⶓ ጉሽካ:: አግልግሎቴ እይጜ ሳሴርፃውሳ ዲጂታላይዜሽኑሳ እንፃኽስትጜኪላ ወረዳ ቴግባርዳ እሽፅጝስ ፋይፃውሳ ሜሳሬ ዋኽትጝፅጝስ ኩርፄንትስ እንፃኽስታው አኽⶓ አቶ አብታሙ አቕፄካ::