እንኬ ፊቲት አንጉቻ

አለሚቱ የኔት

አሜሪካ ካይሮው ካምዳ ብሉፍተን ፓርኩ ዳድዳ እንዜጛሺኹ እንዝርናንቲው ጐማ ስራዳ ትይትሳ አንጉቻዋ እንዝርናንቴ ቲሪፃማ ታስስትⶓስታ ታስስቲያ አኽⶓ አቕጝስ ፋያማ አግፅጝስ ካላያ:: አኽጝስኪ ዲጊዳ አግስታው ሌጉሳ ኬሴቶ ድፃው ጉትፕሾ ቱጝስ እርዳታንታ ካሲⶓ ዩፒአይ ድረገፅ አንቤብፃ::

ብሉፍተን ታውንሺፑ ሌግ ኬሴቱ ካላካልጚው ሜምሪ ማቤራዊ ሚዲያዳ ፍሽኹ ንባርታጊ እንዝርፃንቲ ታክሲሎ ፕሬታ ትይትሳ አንጉቻዋ ታስስትⶓስታ ታስስቲያ አኽⶓ ካንትጝስ ቲሪስ አንጉቻውሳ ድምፆ ጃጊ ዝኪኹሳ ብቴ አግፅጝስ ካላውላስ ይጉዋ::

ካብስ ፋየካማኪላ አግፃኑውላ ይጉጝስ እንዝርፅⶓ ጄሜሩስ ዴሜካ አንጉቻውሳ ክልኾ እንኮኼ፣ እንጊዛይኪላ እንዝርናንቴ ዝኩታ ቲሪፃማ እርዳታንቲሊ አኽጝስ አንጉቻዋ ፋየካማ አቴካ::

እንዝርፃንቲስታ አብርታ እሺኹ ጄር “ብረንት ቸርች” ዳድዳ አግስታው 30ንቲ ሌጉ ኬሴቱ ካላካልጚው ጉትፕሾ ካሳና:: እፃኻዳ ቱዌካማኪላ እንዝርናንቴ ቲሪፅጝስ ታክሲሎ አግፁክ ጉትፑ እንፃኽስታንቲስ እርዳትፃና::

ጌቴሙኽሳ አኺኔ ቹኒቱንኩዴስ እምፕልኪላ ፍካዴና ያኻማ ፋይጝስ አጌላጌላንኩሳ ሜሳርካዋ እሜማ እንዝርናንቲው ስርሾ ቱኻ::

ሌግ ኬሴቱ ካላካልጚ ጉትፑ ኬፍቲኒ ሜካኒክ ታየለር ዌሊያምኪላ ድምፆ ፍሻማ “ሚያው” ናማጊ አንጉቻዋ ዙርፄታ ድምፆ እንኮኽፄታ ፄዌ:: ሲፍፅጝስኪ ዝኪኹሳ ስፍሬ ማሊጝስ ሼውናማ ፋየ::

ሜካኒክ አንጉቻ ዝኪኹሳ ናቕቶ ሺሹኒዴስ ፋሌንጋኪላ ፋይጝስ አሜቻታ ልቓ እንዝርናንቲው ቤንካዋ ኽያማ ፋይስታንታ አንጉቻሾ ታምብⶓ እንዝርናንቲ ዌናሾ ይወትስ ፊቲⶓ ናፌካንኩ ታብሊስታ ጄርስ ድኹኻ::

አሊዲዳኪላ እንዝርናንቲው ስርዳ ፍካዴንትስ ቱኽ ሜካኒኩ ፋይስ ይወቶ ፊቲስጙ ፅሬት ሳኪትጛማ አንጉቻዋ ትየታ እምስቲኹዴስ ፍሽⶓስታ ዲጊዳ አግስታው እንሴስካው እንጉፂሾ ሚፅፅጝስኪላ ካሊስታ::

ይቶፒያዳ ዲጊዴስ ናቴ ክልልታናማኪ አጌርታ ፌቴርስታማጊ ዝኩኽ ሊሊትጙንኩ ምክንያትካስ ፌቴርስታው ቱትጜ አቲጝስስታ ጋቻስ አቒ ጄራዳ አቕትዴስ ፉኽ ሚንች ጉዳትስታ ይወቶ አቲስጙ ቴግባር ፌፄምስታማጊ ዝኩኽ ጊዝዳ ሌጌሱንኩ አጌርካዳ ኩፅኒ እንሴስካው ይወት ውላ ድሳቲታ ፄውስታው ፅሬት እኖጂ ክንቴ ካፅናና ቴግባራዋ ፄውናታ እርዳታውያኽ::