ትርስታ ቱሪዝም

13 አርፊው ፄጊዌና ይቶፒያ አሜቶ ዋኾ ጐቤንስታንኩ ታብፅካዌናኪላኽ:: ቴሳስ አርፊዴስ ጄሜሪማ ዝኩንኩ ሹኻ አርፍካ ዴሜካ ሊሊትኑስኪ አማኻሪ ክልልስ ሊሊቲ ፍንት ዝኩኺያኽ:: ጊኒው አኹኪ ልዴቱ፣ ፅምቕቱ፣ ግዬኑ፣ አገው ፌሬስቴንካው፣ አስተርዩው፣ መርኮርዩሱ ባልካ ዴሜካ ትር አርፊው ሊሊትካ ጌሌፅካኽ::

ቱሪዝም አሌሙ ይኮኖሚዳ 1ዐ ሊኽዴስ አኹኪ 10 ትኩሚ ሴስታ ትሪሊዮን ዶላር ታምብ ዝኩኽ አኽⶓ አሌሙ እንዝጚውስታ ቱሪዝም ካውንስል አ.ዝ.ቼ 2024 ፍሽኹ ንባር ቶኬሜ::

ይቶፒያው ቱሪዝም ሚኒስቴርኪላ ቱሪዝም ትክላሊ አጌራኻሱ ምርትዴስ ላጛ ትኩሚ ላጜታ ሊኽዴስ ታምብ ዝኩኽ አኽⶓ ቶኬማ::

አማኻሪ ክልል ቱሪዝሙ ዜርፍስ አጌራስ ኬፍቲኔ ፍሼ ፄዌካማጊ ዝኩንኩ ክልልካ ክቻዴስ ቤዴርትስ ቶኬምስታንቲያኽ:: አይማኖታዊ፣ ባይላዊ፣ አቓ ግብሪስታ ፍትሬቱ ጉስፂ አብትካው አግፂስታ ውላዋጊ ኮውሳ ቱሪዝሙሳ ዜርፎ እሚኹ ክልልኪላኽ::

አይማኖታዊ ባልስታ ባይላውካ ኩምችንካኪላ  ቹዋ ቱሪዝሙ ፄግካኽ::

ልዴቱሳ ባሎ ላሊበላዳ ኬቤርፅጝዴስ ጄሜራማ ይካቲት ኪንዴኺስታ ኬቤርስታንኩ ባልካዋ ጐቤንጝስኪላ ክልሎ ታምብፃ ፄዋንኩ አጌራኻስኩስታ ባርኾቼ አጌርካው ጐቤናንትካዋ ኬሻንቲ ዳድስ ሌንጌድፅጝስ ድምክኔ ፉሪፄ ስፍሬ ቴርስⶓ ዴሜካማ ኬሻንቲ ቴርት ፄውስትጝኪላ ቱስቴ::

ፅምቕቱ ባል ክልሉሳ ጉስፂው ብትካዋ እሳንስ ጐቤንፅጝስ ድሎ ፌቴራንኩ አይማኖታዊ ባልካ ክቻዴስ ቹዋኽ:: ባል ውላጊ ዙራሙሪዳ ኬቤርስቱኒኪላ ጐንዴር፣ ባርዳርስታ ምንጃር ሸንኮራ ወረዳ ኢራንቡቲዳ ሊሊቲ አኺኒስ ኬቤርስታዊያኽ::

ፅምቕትዴስ ኬፄላማኪላ ካና ዘገሊላውስታ ግዩኑ ባል፣ ታና አይክዳ ታንኳዋ ኬዜፍጙ ልኺትጚ፣ አስተርዬ ማርያሙ ባል፣ እንጃቢሪዳ አገው ፌሬስቴኑ፣ ደብረታቦርዳ መርኮርዩሱ ሊሊቲ አኺኒስ ኬቤርስታው ትር አርፊው ባልካኽ:: ትሩ አርፊዳ ኬቤርስታንኩ አይማኖታውካስታ ባይላውካ ባልካዋ ጐቤንጛ ይንታንኩ ሌንጌድካዴስኪላ አግስታው ሚፂ አጌራው ይኮኖሚስ ዝኩኽ ፍሺ ልቓ ጋቲው አኽⶓ ማላማ ሌንጌዶ ቱስቲስ ቻቤልጝ ፋይፃንቲያኽ::

ክልልዳ ኬቤርስታንኩ ባልካዋ ጐቤንጛ ይንታንኩ ጐቤናንትካዳ ሆቴልካዋ ዴሜካማ አግልግሎቴ እያንትካ ጌንዜቡሳ ድምክኔ ፄውጝስ ሌንጌድካዳ ቻኒስቶ ፌቴርጝኪላ ቱስታጋው አኽⶓ ማሊጝ  ፋይፄ::

ይንታንኩ ሌንጌድኪላ ዙራሙሬ እንካኔካማስታ ዴስቴና ያኼካማ እጂጚውሳ ጊዞ ዴሜካንታ ፄውጝሾዳኪላ ውላጊ እንፃኽስትጝ ቱስቴ::

ትሩ አርፊዳ ቱሪዝሙ ዜርፍስ አግፅፃው ሚፂዴስ ኽስኹስ ዴሜካ ዎታትካስ እንፅኺ ድላሳ ፌቴርጝስ ቴኬምስታንቶ ኬፍፅጝስ ካሊፃው አኽⶓ ማሊጝ ፋይፄ:: እስጜ እርዳትስትጝስ ቤዴራማ እክድስ ልቕልቕንጝዳ ትኩታ ፄውጝ ቱስታውያኽ::