ፍትሬት አብታው ማንዲጚ ይኮኖሚስ

ንግስቴ ተስፋ

እን አጌራው ይኮኖሚስ ቹዋ ጉሽፂ ያኹኽ ግብርኒ አኽጝታጊ ፍትሬት አብት ልማቱ እንፅኺው ፍሺ ኬፍቲኒያኽ:: ፍትሬቱ አብት አኽዳ ኽብፄ ዴሜካማ ማሴ ክምካውሳ ውታኼስታ ካዌኖ እንቲታኪ አኾ እሚ:: እንሳ ፍትሬት እይኹሳ አብቶ ቱስቲስ እሜማ ቴኬምስትጝ ኩፅኒ ውላዴስጊ ማንዲስቴ::

ግብርኒው ሚኒስቴርዴስ አግፅኑኽ ንቫርታጊ 50 አሜታዴስ ቤዴራ እን አጌራው ካዌኑ ሽፋን ሊኽዴስ 40 ታፋ እሺኾ ያኼስጉ እዝቡ ቼፍ ዴሜካማጊ ካስጝሊ እምትጛማ ካዌን ቻፋቻፍስትጝስ ኽብፂ ሺሽርስታማጊ ጊዝዴስ ጊዞ ኽብፂው አሉምት ኔኬታማጊ ይንታ:: አሜትካዴስ ቤዴራ አጌራ አቡቑ አችስ ጄሜርስትኹ ተፋሰስ ልማቱ እንፅኺ ኩፅኒ ኪሴ ሜዜጌብፃማጊ አግስቴ::

ጃዊ ወረዳ አዲስ ወይን ኬቤሊው ዝኩዋንታ ዊዛሩ ሙሉ ንብረቴኪላ ፍትሬቱ አብት ቱስቲሰ ማንዲስታውላ እጂኹ ወክትዳ ታምባሺኹሳ ጉዳቶ ስልኪስ ካንቴ ታምፅካ:: ዙራሙሪ ኩል አኽጝሊ እምትጛማ ካዌን ቻፋቻስታኒ ባግት ባስጛማጊ አቒዳኪ ያኻ እንሴስካዳ ታምፃሺኹሳ ጉዳቶ ታክስካ:: ወክትስ አኾስታ እሬ አግፅጝስ ካላቲንኩ እሺⶓ አኽⶓ ጉሽካ:: ኽብፂ ሺሽርስትጝሊ እምትጛማ ካዌንዴስስታ ጛርቱ ብቲዴስ አግፃሺኑ ትክም ዝኩዊኔ ጉስጝስ ቼግርፃሺኩ አኽⶓ ዊዛሩ ሙሉ ዲብስካ::

ዊዛሩ ሙሉ ኑኑውስታጊ ናኪኒ ወክትዳ ኩፅኒ ኬቤሊው እዝብስታ ውማይቴንካ ቴቬቬርጜካማ እንፃኽስቱኑ ፍትሬቱሳ አብቶ ማንዲጙ እንፅኺስ አብቶ አፌሬካማጊያኽ:: እልስ ካንትጝስ ሳሲፃውሳስታ ቓሊፃውሳ ዙራሙሬ ፌቴርጝስ ካሊⶓ ጉሽካ:: ክምካውሳ ኬሌቦ አቲጝስ ዋይካሺንኩ ኾሺኩ ክምካዋ ጄዌካማ እሩብፅⶓ ጄሜርⶓ ዙሜካ::

ዊዛሩ ሙሉ ኬቤሊኩ ዝኩዋንትካ አቺትጜካማ ማንዳኑ ተፋስስዳ ሊሊትጙንኩ ክዩ /ክራሪው/ስታ ቴክሉ አይኔትካዋ ቴኬልጝስ አቒውስታ ክምካው ኔክትጚዴስ ኔፃ ፄውጝስ እንፃኽስታኑ እንፅኺዴስ ሚፄ አግፄካማጊ አኽⶓ ጉሽካ::

ማንጎስታ አኒኔ እሳንስ ቴኬልጝስ ፍትሬቱሳ አብቶ ቱስቲስ ማንዴካማጊ ሚፂው አግፅፃ ፄውⶓ ዙሜካ:: “ድሳሺንኩ ካዌንኩ እንሴስካኪላ ዙራሙሪሾ ዙርካማጊያኽ” ኑንኩ ዊዛሩ ሙሉ ቤሬኽትሊ አምትጛማ ታምባሺኹ ጉዳትኪላ ኔኬታማጊ አኽⶓ ዲብስካ::

ላጛ አሜታዴስ ናቴ ወረዳዳ ፌቴርስትኹ ሰላሙ ስጋት እንፅኺ ቓቔፃታ ፄዋሺኹ ያኹኒላ ናኪኒ ወክትዳ ኩፅኒ ሰላም ልቓሱላ ያኹኒ ኬቤርስታማጊ አኽጝሊ እምትጛማ ይስጛማ ሲፍⶓ ድኹዌካ:: ፍንሾስኪላ ሰላም ኬቤርስታማ እንፅኺዳ ትኩቶ ፄዋንታ ትኩታው ቤን ሰላምሾ ዙራታ ናኒስ ካንቴ እይካ::

እሊው አዲሴወይኑ ዝኩዋንቲ አሬሳቻንቲ ሙላቴ ደስታውኪላ ፍትሬት አብት ቱስቲስ ማንዲስትጝ አሬሳቻንትካው ይኮኖሚዳስታ ግብርኒው እንፅኺዳ ካንትፅኹሳ ቴስፌ እንክርፄካ:: ፍትሬቱ አብት ጉዲስትጝሊ እምትጛማ ትክልቲስታ ኩፓኩፒ፣ ካናኻፂ፣ ክይስታ አኹ ዲጊዳ አግስታቲው ወክት ፌያማ ናካዳ ፍትሬቱሳ አብቶ ማንዱኑ እንፅኺስ ዙራሙሪ ውላቱዌ ኪሴ ሜዜጌብፃማጊ አኽⶓ ዲብስካ::

“ይው ናንቲ እሺያሱ ዙራሙሪ ናካዳ አንኬባኬብስታማ ማንዲስታኒ ሚፄ አግፅፃማጊያኽ” ናንኩ አቶ ሙላቴ እንጚ እንፅኺስኪላ ሼውዴስ ዴስቴንካ አኽⶓ ጉሽካ:: ኽብፂው አሉምት ዙራማ ናካዳ ሴብሎስታ ክዮ ዋግፅጝስ ግብርኒው እንፅኺስ ኪሴ ሜዜጌብጝስ ካሊⶓ ቶኬምካ::

አሬሳቻንትካው ካንቲ ኪስስታማጊ አኽጝስ ፍትሬቱሳ አብቶ አንኬባኬባውጉ ጉዳቶ ታምፃው አቒኪላ እላቲው አኽⶓ ጉሽካ::

ሺሽርስታ ጉዲስታማ አሬ ዋግፅጝስ ካላቲው እሺኹ ብቲዳ ማንጎስታ አኒኔ ቴኬልጝስ አግፃኑሳ ሚፄ ሌጌፅⶓ አቶ ሙላቴ ድኹዌካ:: ኬቤሊታ ሊሚፃኑስታ አንኬባኬባኑ ተፋስስዳኪላ ወታትካስ እንፅኺውሳ ድሎ ፌቴርጝስ ክምካዋ እሩብፅጝዳስታ ፅኻራዋ ስኹፅጝዳ አሴሜርጛንታ ፄውስትⶓ ዙሜካ::

ወረዳዳ ካንትስትኹ ሰላሙ ልቕልቕቲ ዊዳፌ አግፁኒጊ ፍትሬቱሳ አብቶ ሊሚፅካማጊስታ አንኬባኬብካማጊ ቴኬምስትጝስ እክዶ እሚⶓ አቶ ሙላቴ አሳቦ እይካ::

ጃዊ ወረዳ አዲሴ ወይን ኬቤሊው ግብርኒ ፅ/ጝናሱ አላፊ አቶ በላይ ተስፋ ኬቤሊታ ፌዩንኩ አሜትካዳ አኮሜችስትኹ ፍትሬቱሳ አብቶ ሊሚፅጙ እንፅኺስ ምርትዳ ካሴ ካንትፅኹ አኽⶓ ጌሌፅካ:: እንጚስኪላ ሶኼንትስታ አሉምት ካጋሺኹ ዙራሙሪዳ አሊ ፋታስታ ኽብፂው አሉምት ዙራታ ካሊፅⶓ ጉሽካ::

ፍትሬትስታ አቒ አስሜምጛማ ዝኩዋው ዙራሙሪ ያኻታ ቢኪፅⶓ ቶኬምካ:: ሊሙኽ ተፋሰስዳ ዎታትካስ እንፅኺውሳ ድሎ ፌቴርጙ ቴግባር ጄሜርስትⶓ ጌሌፅካ:: እንጚስኪላ ክምካዋ ሌፍፅጝስ፣ ፅኻራዋ ስኹፅጝስስታ ትክልቴስታ ኩፓኩፔ ሊሚፅጝስ ካሊፃው እንፅኺ አኮሜችስትጝስ ቤዴራ ቴርት አሌድስትⶓ እርዳትፅካ::

2018 በጀት አሜትዳ ኬቤሊታ ጉዲስትኹሳ ብቴ ዙርፃማ አንኬባኬብጝስ እምስትኹ ኽብፄስታ አኾ አንኬባኬብጝስ አኮሜችስታው 680ዴስ ጃላ እርኬኑስታ እሊው ቴግባር ቱስቲስ አኮሜችስታማጊ አኽⶓ አቶ በላይ ኽይትጝፄካ:: ዙራሙሪው አይር እግልታሊ አስሜምጛውሳስታ ዴስጛውሳ ቴክሎ ቴኬልጝስ ካንትስትኹ ዋይሚ ይስጝፃው አኽⶓ ቶኬምካ::

አሬሳቻንትካ ይውያኽ ንካማ ፍትሬቱሳ አብቶ ማንዲጙ ዴስኪላ እንዳ አሜትዳ ኬቤሊታጊ ጋሺስታው አኽⶓ ጌሌፅካ:: ፍንሾስኪላ ፍትሬቱሳ አብቶ ማንዲጝዳ ሊሊትጙኽሳ እክዶ ፍሽጝስ ኬሽኹሳ እንፅኼ እንፃኽስትጝስ አሬሳቻንትካሊ ኩስጜካማጊ አኽⶓ እርዳትፅካ::

ጃዊ ወረዳ ግብርኒ ፅ/ጝናዳ ፍትሬት አብት ልማቱ ኬቹ ጉሳንቲ አቶ ነጋልኝ ናካቸው ጛሾስ 2018 ምርቱ ዝቤንዳ ወረዳዳ አግስታንኩ 28 ኬቤልካዳጊ ፍትሬቱሳ እንፅኼ ይስጝፃማ እንፃኽስትጝስ እክድ እምስቱኒውላ 22 ኬቤልካ ይቪችካ እንፅኼ ጄሜሩንኩ አኽⶓ ጌሌፅካ:: ይጉዋንትካዳ ኩፅኒ ሰላሙ ችግር ዝኩክ አኽጝስ ይስጝፃማ እንፅኼ ሲፍፅጝስ ቼጌርስትⶓ ጉሽካ::

ወረዳታ ፌዩንኩ አሜትካዳ እንፃኽስስቱኽ 22 እሺኹ ተፋሰስ ሊሚፅጙ እንፅኺዴስ ድምክና 13 እስካዊስ ሊማው ተፋስስ ዝኩⶓ አቕፄካ:: ኽብፄስታ አኾ ማንዲጙ እንፅኺዳ ትኩት እይስትኹ አኽⶓ ጌሌፅካ::

ተፋስስ ልማቱ እንፅኺዳ እርኬኑ እንፅኺ 3 ሊኻ 55 ኪሎ ሜትር ኽብፄስታ አኾ ማንዲጙ 10ሻ 2 ሊኻ ስትራክቸርስታ ሺሽርስትኹሳ ብቴ 60 ሄክታር ብቴ ሊሚፅጝስ 37 ሻይ 654 እምፕልታቕኩ ቤንካዋ አሴቴፍጝፅጝስ እክድ እምስትⶓ ኽይትጝፄካ::

አቒውስታ እንሴስካው ኔክትጚዴስ ኔፃ ፄውጝስ ይኮኖሚስ ቴኬማውሳ ትክልቴስታ ኩፓኩፔ እንቲታኪ አኒኔ እሳንስ ሊሚፅጝስ እንፃኽስስታማጊ አኽⶓ አቕፄካ::

እንዴስ ቤዴራ እንፃኽስስትኹሳ ተፋሰሱሳ ልማቶ አሬሳቻንትካስ እምፕልቱ እንፅኺው ማቢሪስ አችትጝፅጝስ አሬኬብስትካማ ጜዋንቱ እንኩዋኽስትስ ቺፅጝፃንታስታ ሚፄ አግፃንታ ፄውስትⶓ ጌሌፅካ:: ናካኪላ ወረዳዳ ጄሜርስትኹ ፃምርትጙኽ ተፋሰስ ልማቱ እንፅኺ ውላጊ ኬቤልካዳ ይስጛማ ሲፋው አኽⶓ ኽይትጝፅካ::

ወረዳዳ እሳን እታኑስታ አኒኒው ምርት ዝኩኽ አኽጝስ ፍትሬቱሳ አብቶ ቱስቲስ ማንዲጝስ ዎታትካስ እንፅኼ ፌቴርጝስ እክድ እምስትⶓ ቶኬምካ:: ፌያፌያማ ወረዳዳ ዝኩኽ ሰላሙ ችግር ዋኽስ ዋኾ ኽይስታማ ሰላም ኬቤርስታውላ ይጉኒውላ ምንግስትስታ እምፕልታቕ ሰላሞ ኬቤርፅጝስ እንፃኽስትጝስታ ልማቶኪላ ይስጝፃማ ሲፍፅጝ ፋይፃው አኽⶓ አቶ ነጋልኝ ቶኬምካ::