ችግሮ ቲሪትጙንኩ ክንታንትካ

ታደለ አጋጄ

ክንቲ እምፕላ አጌራው ፖለቲካው፣ ይኮኖሚውስታ ማይቤራዊ ልግስስ ቹዋ ሜሳሪ ያኹኒውላ ሊሊትጙንኩ ምክንያትካስ ክንቲው ዜርፍዳ ችግርካ ኬሴትስታና::

ፌዩንኩ አሜትካዳ እሽኹ ይቶፒያው ክንቲው ፖሊሲ ክንቲው ፃንኩትዳ ችግርካ እሺንኩ አኽጝስ ስካዊ ክንቲው ፓሊሲ ቴርታማ እንፅኺሾ ቱስቱኽኪላ ዲጊስያኽ::

ክንታንትካዋ አችትስ፣ ካሌቕትስስታ ካንቲስ ዳሊፅጝስ ቴርትኹ እስካዊ ክንቲው ፍኖተ ካርቲ አማኻሪ ክልልታ ኬሴትስትኹ ችግርስ ፌዩንኩ ላጛ አሜትካዳ ሚንችካ ክንቲ ጝናኻዳ ክንቲ እይስታውላስ እጂጝ ታክስስቴ::

2018 ም/አታሱ ክንቲው ዝቤንዳ ኩፅኒ ክልሉ ሚንችካ ዙራሙርካዳ ክንትጝ ክንትፅጙ ካስት ጄሜራ:: ሚሊዮንስ ቼፍስታው ክንቲ ጝናሱ አብት ዎዴሙኒውላ  ክንታንትካ ክንቲሾ ዙርጝስ አቕቱ ፃንቑናዴስ ፊቴካማጊያኽ::

አዊ ብሄረሰቡ ቺፅጝፂው ሚንችካ ወረድካዴስ ላጛ አሜታስ ክንቲ እይስታውላስ እጂኹ ወረዳዴስ ዳንግሊ ወረዳ ቶኬምስቴ:: ዳንግሊ ወረዳዳ አግስታው ጊሲ ትክላሊ እምፕላንቲ አች ክንቲ ጝና ንጙዊኒ አሜትዳ ክንትጝ ክንትፅጙሳ ካስቶ ካስጝፃማጊ አግስቴ:: ስልኪስ እጂጜ ፄውንኩ ጊሲ ትክላሊ እምፕላንቲ አች ክንቲጝናዳ ዋልታንቲ ቤኑ ክንታንቲ አማረ ደሴ ላጛ አሜታስ ክንቲዴስ ሴጋ ያኻማ ችኹኒውላ ክንቲ ጄሜርጝስ ፍንሾሱ ክንትጙሳ ቴስፌ አግፅⶓ ዙማ:: ናካዳ ክንትፃንትካ ክንታንትካዋ ጉድ አኺኒስ ክንትፅካማጊ አኽⶓ ቶኬምኹ ክንታንቲ አማረ ፌያፌያጊ ኬሴትስታው ሰላሙስታ ፄትቲው ችግር ክንቴ ኬውጝፃማጊ አኽⶓ ዲብሳ:: “ክንቲዴስ ላጛ አሜታሳ እንግርትና፤ ዋኽትጙኽ ሰላም ቼሜትጛማ ክንቲ ሲፋይኒ ጉድ እሺኾ” ኑስ ክንቲስ ዝኩኽሳ ፋዮ ድኹዋ::

እምፕላንቲ ሴሚስተሩሳ ቲክሊልጝፄ ፍታኒ ፌቴንስትጝስ ቴርትⶓ ዙማ:: ክንታንቲ ክንቲ ጝናዳ ግባቱ ችግር ዋኽትጛውላስ ይጉጝ ዴሜካ ክንቲው ፃንኩትዳ ቻኒስቶ ቺፃው አኽⶓ ድኹዋ::

“ክንቲዳ ኬሽኹሳ ዋይሜ ሜዜጌብፅጝስኪላ ሜፃፍ ጝናሳ ቱስቲስ ቴኬምስትጝ፣ ክንትፃንትካ ክንትፃኒሳ ሲፍጝጝስስታ ክንትኹሳ ፂኒስጝ ኬሽኹሳ ዋይሜ ሜዜጌብፅጝስ ቴርትኹ አኽⶓ ዙማ::

እሊት ጊሲ ትክላሊ እምፕላንቲ አች ክንቲ ጝናሱ ዋልታንቲ ቤንቲ ክንታንታ ትግስት ግርማውኪላ ጉድ ክንትጝ ክንትፅጙ አኺኒ ዝኩⶓ ድኹታ:: ክንትፃንትካ ክንታንትካዋ ጁትጝጚስ ክንታንታ ፄዌካማጊ አኽⶓ ዲብስታ:: ክንቲዳ ዋይሚስታ አኽጝስ ኬሽኹሳ ዋይሜ ሜዜጌብፅጝስ ቴርትⶓ ዲብስታ::

አለምፀሃይ እውነቱ ጊሲ ትክላሊ እምፕላንቲ አች ክንቲ ጝናዳ ይሳቡ ክንትፃንታኽ:: ክንቲ ጝና ላጛ አሜታሳ ኬውጛማ እጂኒዴስ ፋሌንጋ 2018 ም/አታዳ ኩፅኒ ሜስኬሩም አርፊዳ ጄሜራማ ጉድ ክንትጝ- ክንትፅጙ አኺኒ ዝኩⶓ ጌሌፅካ:: ክንቲ ጝና እንዴስ ፍና ዶንጌቱንኩ አይልካው ፉሪፂ አኽጝስ ሚንች ክንቲው ሜሳሪ ዎዴምኹ አኽጝስ  ክንታንትካስ ክንቴ ክንትፅጝስ ግባቱ ችግር ዝኩⶓ እርዳትፅካ::

ክንታንትካዳ ኬፍቲኒስ ክንትጙ ፋይ ዴሜክⶓ ቶኬሙንኩ ክንትፃንታ አለምፀሃይ ሰላም እሺኹ ጊዝዳ ሚንች ክንታንቲ ኬውጝፃሺኹ አኽⶓስታ ናካ ኩፅኒ ክንቴ ኬውጝፃማ ይጉዋው ክንታንቲ እላቲው አኽⶓ ጉሽካ::

ክንታንትካስ ቲቶሪያሉሳ ክንቴ እይጝስ፣ ወርክሽቶ ቴርስጝስስታ ክንቲስ ዜሬቕኑንኩሳ ክንትፅጝስ ኬሽኹ ክንትጝ ክንትፅጝ ካስጛታ ፄውⶓ ቶኬምካ:: ክንቲ ጝናዳ ዳንጉዊትጙኽሳ ግባቶ ዋኽትጝፅጝስ እምፕላታቑ እርዳቲ ኬፍቲኒ አኽⶓ ዙሚጝስ ፃንኩት ዝኩኽ ክንቲ እይስታታ ኩፅኒ ክንቲ ጝና እርዳቴ ፋያው አኽⶓ ቶኬምካ::

ክንቲ እንዳርማኪ ችግራ ጋቲታ ካስጛታ ኩፅኒ ናካኪላ ዋኽትጙኽ ሰላም ቼሜትጝጝ ቱስታው አኽⶓ ጉሽካ:: ፌያፌያማ ኬሴትስታው ፄትቲው ችግርስ ክንቲ ኬውጛታ ፄውስታማጊ አኽⶓ ቶኬምካ ናካዳ ክንታንትካስ እምፕላንቲ ሴሚስትሩሳ ፍታኔ ፌቴንፅጝስ ቴርትካማጊ አኽⶓ እርዳትፅካ::

ጊሲ ትክላሊ እምፕላንቲ አች ክንቲ ጝናሱ ጛሪ አየሁልኝ መኮነን ጊሲ  ቤዴራማ ክንትጝ- ክንትፅጙሳ ካሰቶ ጄሜርኹ ክንቲ ጝና አኽⶓ እርዳትፅካ:: ፌያፌያማ ካንትስታው ፄትቲው ችግር ዝኩኒውላ ክንቲ ጝና ክንታንትካስ ክንቴ ኬውጝፃውላ ክንትፃማጊ አግስታው አኽⶓ ኽይትጝፅካ:: ጊሲ ትክላሊ እምፕላንቲ አች ክንቲ ጝናዳ 1ሻይ 5 ሊኻ 26 ክንታንትካ ክንቴ ሲፍጜካማጊ አግስታንኩ አኽⶓ ጌሌፅካ:: ፄትቲው ችግር ኩፅኒ ክንታንትካው ሼው ፅንታዳ ጉዳቶ ታምፃማጊ አኽⶓ እርዳትፅካ::ክንቲ ጝናዳ ዳንጉዊትጙንኩ ግባትካዋ ዋኽትጝፅጝስ እምፕልታቕ ጌንዜቡሳ እርዳቴ ፄውጝስ ክንትጝ ክንትፅጝስ ያኻውሳ ግባቶ ዋኽትጝፁኒውላ ፄትቲው ችግርስ ማልጛ ጉዲስትኹ ክንቲ ጝና አኽⶓ ቶኬምካ::

ቤዴራ እምፕላንቲ ቤንኩ 123 ክንታንትካዋ ሜዘጌብጝስ ክንቲ ጝናዳ ምግቦ ጄሜርፅጝስ ፅሬት ፄውስታማጊ አኽⶓ ጌሌፅካ::ክንቲ ጝናዳ ክንታንኩ ክንታንትካ ክቻዴስ 15 ክንታንትካ ሊሊቲ ፋይ ዝኩክ አኽጝስ ጛጂ ፋይፃውሳ ክንቲውሳ ሜሳሬ ዋኽትፅጝ ቱስታው አኽⶓ ጉሽካ::

ዳንግሊ ወረዳዉ ክንቲ ፅፌት ጝናሱ አላፊ በላይነህ ዋሴ ወረዳ ላጛ አሜታሳ ክንቴ ኬውጝፃማ ችኹኽ ወረዳ አኽⶓ ቶኬምካማ ወረዳዳ አግስታንኩ 71 ክንቲኩ ኾትካዴስ 64 ክንቲ ጝንካዳ ክንትጝ-ክንትፅጙ ካስት ካስጝጛማጊ አግስታው አኽⶓ ጌሌፅካ::

ሰላሙስታ ፄትቲው ችግርስ ሚንችካ ክንቲ ጝንካዳ  አብትስታ ንብሬት ዎድምⶓስታ ዜሬፍስትⶓ ቶኬምካ:: እርዳታንትካ ኾትካ ክንቲ ጝንካስ ግባት ዋኽትጛታ ፄውስታማጊ አኽⶓኪላ ጉሽካ:: ወረዳ 50 ሻይ 7 ሊኻ 89 ክንታንትካዋ ሜዜጌብጝስ አኬዳማ 26 ሻይዴስ ጃላ ክንታንትካ ክንቲው ማድዳ አግስታንኩ አኽⶓ ጌሌፅካ:: እኒጛዴስ 8 ሻይ 600 ያኻንኩ ክንታንትካ እምፕላንቲ ቤንኩ ክንታንትካ አኽⶓ ቶኬምካ::

እስካዊ ክንቲው ፍኖተ ካርቲስ ቴርትኹ ሜፃፍ አኽጝስ እምፕላንቲ ቤንካስ ይቪቻ ይጉስ  እሊኩ ቤንኩ ክንታንትካስ ሜፃፉ ችግር እላቲዉ አኽⶓ ጌሌፅካ::

ሚንችካ ክንቲ ጝንካዳ ግባቶ ዋኽትጝፅጝስ ፅሬት ፄውስታማጊ አኽⶓ ቶኬምካ::

ጋቻው ምክንያቲስ ሚንች ጉዳት ታምቡኽ ወረዳ አኽጝስ እርዳትጝስ ፋይ ዝኩክጊ እርዳቴ ፄዋንታ እቑዌ ዲግስካ::