ፅንጋኺዴስ ይጉኽ

ንግስቴ ተስፋ

አማኻሪ ክልልዳ ፌዩንኩ ላጛ አሜትካዳ እሺኹ ሰላሙ ችግር ጄሜርስቱኽ ልማቱ እንፅኺዳ ፅንጋኻ አኽጝዴስ ጃላ አጌር አቑ እንኪስ ዝኩጙ ሜብትዳ ስጋታ ያኻማ እጄ:: እንጚስኪላ ሚንችካው ይወት ድሳታስታ አብት ንብሬት ዜሬፍስታታ ፄዋ:: እንጚስ ደሜካ ሚንችካው ልማቱ ካሲዴስ ኪቻ እንኪስ ዝኩጙ ሜብት ኬቤርስታታ ፄውጝዳ ትኩት እይስታማ እጄ::

አዊ ብሄረሰቡ ቺፅጝፂዳ ሚንች አሜቱ ካሲ እሺኹ 2015 በጀት አሜትዳ ኩፅኒ ዙርሜ አግፁኽ ሹኻ አሜታስ አሌድስቴ እስታማ እክድ አምስትኹ 84 ኪሎ ሜትሩ አስፓልት ዳዱ እንፅኺኪላ ኬውጛታ ሰላሙ ችግር ምክንያታ ያኻ:: እምፕልታቕ ልማቱ ቴኬምስታንታ ያኻቲንታ ቻኒስቶ ፌቴራ:: እምፕልታቕ ውላቱዊ ልቕልቕቲዳ ቴስፌ አታንታ ፄዋማኪላ እጄ:: ሰላማዊ ዳድስ ካሴ ዲግሳማ ኽዮ ፋይጝዴስ ኪቻ ወሬሞ ጉላላ ፄውጝ ችግሮ ባስጝፅጝዴስ ጃላ አጌር አቑ ዝኩዊኒው ስጋታ ያኻማ አዊ ብሄረሰቡ ቺፅጝፂው ዝኩዋንትካ እሊኩ ይቶፒያው አጌር አቕታ ልማትስ ቴኬምስታንታ ያኻቲንታ እንግርግራ ይጉፃ::

ዚጋሚ ወረዳ ክላጅ ኬቴሙ ዝኩዋንቲ አቶ አብዬ ሰለሞን ዚጋሚዴስ ቻግኔ ዝኩኽሳ ዳዶ ቴኬምስታኒስ ጌንዜቡሳ፣ ግርቡሳስታ ጊዙሳ ኪሳሬ ታምፅጝዴስ ጃላ ይወትዳ አዲጌ ታምፅጝስ ካላው ዳድ አኽⶓ ዙሜካ:: አሜሬቱኑሳ ሜቴቴንጙኽ ዋይሚስ ዲግስካማ ይኮኖሚስ ቴኬምስታቲንታ ዳዱ ችግር ፅንጋኻ አኽⶓ ድኹዌካ::

ጋያኪ ዚጋሚ ወረዳዳ ሆስፒታል እንፅኼ ጄሜራያሱ አኽጝሊ እምትጛማ ቹትካኪ ያኻ ሪፈራ እስታንኩ እክምኔ ፋያንትካ ወክትስ እክምኔ አግፃቲንታ፤ ዳድዳ አንጌሌትስታንታ ቻኒስቶ ፌቴራሺኹ አኽⶓ ጉሽካ::

አቶ አብዬ ናኑውስታጊ እምፕልታቑ ችግራ ያኹኽ ዳዱሳ ችግሮ ኽይጝስ እስታማ ሹኻ አሜታዴስ ፍና አስፓልት ዳዱ ግብሪ ጄሜርስታታ ፌኬድስትጝ ሼውዴስ ዴስቴ ፌቴራሼ::

አስፓልቱ ዳድ ጊቢትስቱስ እምፕልታቕታጊ ታምቦ ፊትጝጝስ ፅሬቶ ፄዋኒስ እሺካ:: እንፅኼ ጄሜርጝስ ቴግባርሾ ቱስቱኽ ወክትዳ ክልልታ ፌቴርስትኹ ወሬም ኩፅኒ ቴስፌ ቴግባርስ ካንታቲንታ ችግርዳ ችግሮ ኻሳማ አንትⶓ አቶ አቢዬ ድኹዌካ:: ዚጋሚዴስ ቻግኔ ጄሜርስትኹ አስፓልት ዳዱ ግብሪኪላ እንፅኼ ቲሪፃታ ጌዴድስትⶓ ዙሜካ:: አሜትካው ካሲስ ኽዮ አግፃውላ ይጉጝ ወረዳው ዝኩዋንትካውሳ ቴኬምስታንቶ አቲስⶓ ጉሽካ::

ናኪኒ ወክትዳ ኩፅኒ ሰላም ኬቤርስታማጊ አኽጝሊ እምትጛማ ካብስ አስፓልቱ እንፅኽ ይስጛማ ጄሜርⶓ ቶኬምካ:: ናካዳ ዝኩኹ እንፅኺው ፊፂምጚታ ሲፉኒጊ ዳዱ ችግር ኽይስታማ ሼውታ እንዜጝትጝስ ፄዋው አኽⶓ ጉሽካ::

ጋያኪ ኹንስስታ ቹትካስ ፉሬ እየ ንካማ ዚጋሚዴስ ቻግኔ ዝኩኽ አስፓልቱ ዳድ ጄሜርስቱስ ቴስፋ ፄዋሺንኩ ዚጋሚ ወረዳ ክላጅ ኬቴሙ ዝኩዋንታ ዊዛሩ ስመኝ ካሳሁን ሰላሙ ችግር ልማት አሌድስታማ ቴኬምስትጝስ ይጉዋማ እንኪስ ዝኩጝዳ ስጋት እሺⶓ ቶኬምካ:: ቺጊርፂ ዝቤን ፌያማ ኬውጛሺኹ አስፓልት ዳዱ እንፅኺ ይስጛማ ሲፍጝ ኩፅኒ ካብስ ዴስቴ ፌቴራዩክ አኽⶓ ድኹዌካ::

“ይግባኞ ካሴማ ኬፍቲኒ ፍርድ ጝናዳ ፍቶ አግፅጝስ፣ አሜሬቱኑሳ ምርቶ ሼውታ ጌቤልትጚስ፣ ኹን ዋሺኒኪ ጉዳይዳ አሴቴፍጚስ ዚጋሚዴስ ቻግኔ ዝኩኽ ዳድ ቺጊርፂ አኽጝስ ኹንዳስታ ቹትካዳ ታምባው ቤዴል ኬፍቲኒያኽ” ናንኩ ዊዛሩ ስመኝ ናካዳ ሰላም ኬቤርስታማ እንፅኺ ጄሜርጝ ዜርፋ ሚንቼ ችግሮ ኽያው አኽⶓ ጉሽካ::

ዚጋሚ ወረዳ ዳዱስታ ትራንስፖርት ፅ/ጝናዳ ዎኬልስታንቲ አላፊ አቶ አንተነህ በከለ ሊጊሲሚ አሜቱ ወረዳው እዝቡ ክርፂ ቺፅጝፂው ችግር እሺኹ አምቢሊ-ዚጋሚ-ቻግኒ 84 ኪ.ሜ አስፓልት ዳዱ ካሲ ዙርሜ አግፅጝ ቴኬምስታንቶ ሌጌፃውስታ ኬሴቶ ኔኬታው ዳድ ያኹኒውላ ሰላሙ ችግር ምክንያታስ ኩፅኒ ላጛ አሜታስ እንፅኺ ፋይስታው ልክስ አኮሜችስታውላ እጂⶓ ጉሽካ::

2018 በጀት አሜትዳ ፌቴርስትኹ ሰላሞ ኬቤርፅጙ ቴግባርስ ኩፅኒ እንፅኺ ጄሜርስትⶓ ጌሌፅካ:: ሹኻ አሜታስ አሌድስቴ እስታማ እምስትኹ ውልስ አሌድስታውላ ይጉጝ ክሬቴስታ ጉዳቶ ባስጝፃማጊ ያኹኒውላ ናካዳ ኩፅኒ ትኩትስ እንፃኽስታታ ፕሮጄክቱ አላፍካሊ ኩስጜካማጊ አኮሜቻኑ አስፓልት ዳዱ እንፅኺ ኬሽኹ አችዳ ታምብⶓ ቶኬምካ:: ናካ ዝኩኽ ፊፂምጚስ ሲፋኒጊ ዚጋሚዴስ ቻግኔ ኺስታ ዝኩኽ 45 ኪ./ሜትር ዳድዴስ 20 ኪ./ሜትራሳ አስፓልታ ፄውጝስ 2018 በጀቱ አሊዴ ኺስታ እክዶ እሚⶓ አቕፄካ::

አስፓልቱ ዳድስ ብቴ ባይፁንኩስ ምስጋኔ ዲግሱንኩ አቶ አንተነህ ልማቱ እንፅኺስ ታምቦጊ ፊትጛንታ እቑዌ ዲግስካ:: ካሲሊ እምትጛማ ዲጋው ክሬቲስ ኽዮ እይጝስ እንፃኽስስቴካማጊ አኽⶓ ጉሽካ::

ዚጋሚ ወረዳው ቹዋ ቺፅጝፃንቲ አቶ መልካሙ አለነ ጛሾስ ሰላሙ ችግር ምክንያታስ ኬውጛሺኹ አስፓልቱ ግብሪ ናካዳ እንፅኼ ጄሜራማ ክርፂ እስታው ፊፂምጚዳ አግስታው አኽⶓ እርዳትፅካ:: ወረዳታጊ ፋይፃንቴ ድጋፎ ፄዌካማጊ አኽⶓ ጉሽካ::

ናካዳ አስፓልቱ ዳድስ ያኻውሳ ፄፄሮ አሜሬትጝ፣ ቱቦ ዴውጝ፣ እንቲታኪ ዳላዳልጙ ቴግባር አኮሜችስታማጊ አኽⶓ አቕፄካ::

ፋይፃንቴ ሜሳሬ እንፅኺሾ ሚፅጝዴስ ጄሜራማ እንፅኺስ ያኻውሳ ካምፖ ግቢትⶓ ኺስታ 2018 በጀት አሜትዳ አኮሜችስትⶓ አቶ መልካሙ ጌሌፅካ::

ፕሮጄክቱ እንፃኽስታንትካሊ ፋይፃንቴ ኩስጜስታ ሲፍጜ ካስጝፄካማጊ እዝቡስታ ክርፂ ቺፅጝፂውሳ ችግሮ ወክትስ ኽይጝስ አኮሜችስታው ቴግባርኪላ ይስጝፃው አኽⶓ አቕፄካ::