ችግርስ ታንባያው

ታደለ አጋጄ

ቲን ሜድኑ አግልግሎቲ ቤዴራማ ኬይስታው ዜሬቕቲኒ ጌንዜብስ ጝንአቕዳ ቲኑ ችግር ጌቴማው ጊዝዳ እክምኔ አግፃኑስታ ታክስስታያሱ ጌንዜቡ ፍሺዴስ ይጉፃው ሴልያኽ:: ድምክኒስኪላ ልቓ ጌንዜቦ ቤዴርካማ ኬይጝስ እምፕልታቕስ ቲኑሳ አግልግሎቴ አግፅጙሳ ዋስትኔ ቼሜትጝፃውስታ ጌንዜቦ አቲጙ ችግርስ እክምኔ አቲጙሳ ችግሮ ይጉፃዊያኽ::

ቲን ሜድኑ አግልግሎቲ ቹዋ አላሚኪላ እምፕልታቕዴስ ምንግስትዴስስታ እሊኩዴስ አብቶ ኩፕፅጝስስታ እምፕልታቕ ክቻዳ ጛስጛው እርዳትጝጚውሳ ቴርቶ ፌቴርጝስታ ፋውሳ ጌንዜቦ ይጉፅጝስ ፍታዊ፣ ፃንኩት ዝኩኽስታ ውላ አቡቕ ቲኑ አግልግሎቲውሳ ሽፋኖ ዊዳፊ ያኹኽ ዳድስ አግፃንታ ፄውጚያኽ::

ቲን ሜድኑ አግልግሎቲ ፋይፅኹ ቹዋ ምክንያቲ ዴሜካ ፍታዊስታ ፃንኩቶ ማንዱኽ ቲኑሳ አግልግሎቴ ውላ እምፕልታቕስ ታምባታ ፄውጝስ እምፕልታቖ ቴኬምስታንታ ፄውጝ፣ ውላ አቡቕ ቲን ሜድኑሳ አግልግሎቴ እሳንጝፅጝስ ማይቤራዊስታ ይኮኖሚው ልማትዳ ኬፍንኹሳ ፍሼ ፄውጝስስታ ጌፄሩስታ ኬቴሙ ዙራሙርካዳ እምፕልታቕ ጛስ ጛው እርዳትጝጚስ ጛርትስ ታምባው ኬፍቲኒ ያኹኽ ጌንዜቡ ፍሺዴስ ይጉፅጝስያኽ:: ቲን ሜድኑ አግልግሎቲ እክምኒስ ፋው ኬፍቲኒ ጌንዜቡ ምክንያቲስ እምፕልታቕ ችግርሾ ቱዋቲንታ ፄውጝስ ይቶፒያዋ ዴሜካማ ሊሊትጙንኩ አጌርካዳ ቴግባርዳ እሼማጊያኽ::

አጌር አቡቑ አችስ አግልግሎቲው ቴኬምስታንትካው ቼፍ 60 ሚሊዮንዴስ ጃላ ታምባ:: 2017 ም/አታሱ ቲን ሚኒስቴሩ ንባርታጊ ውላ አጌሩ ቤንካዳ አግስታንኩ እምፕል ሻይ 195 ወረድካዳ፣ 4ሻይ 347 ጛርቱስታ ምንግስቱ ኾትካዳ እምፕልታቕ ቲን ሜድኑ አግልግሎቲው ቴኬምስታንታ ያኼካማጊያኽ::

አዊ ብሄረሰብ ቺፅጝፂ ፋግቲ ለኮማ ወረዳው እምፕልታቖ ቲን ሜድኑ አግልግሎቲው ቴኬምስታንታ ፄዋማጊ አኽⶓ ዙሜካ:: ትዝታ አንተነህ ፋግቲ ለኮማ ወረዳ ጊዚኺሪ ኬቤሊው ዝኩዋንትካኽ ጄር ቑንዳስታኒ እክምኒስ ቲኑ ጉትፕሾ ካሳና:: ጄርዳ ይዝኩዊ ቲኑ ችግር ታምቡኽ አኽጝስ ሪፈርስ ሆስፒታልሾ እንፃኻኒ እንጃቢሪ ሆስፒታልሰሾ ካፃና:: ጄርኪላ እክምኔ አግፃማ ኬሽምባኺስታ ሹኻ ሶኼታሳ ሆስፒታልዳ ኹራማ ፌይፅⶓ ድኹዌካ:: ጌርክ ቺዳ እጁስ ፋውሳ ጌንዜቦ አሴላኒ 30 ሻይዴስ ጃላ ጌንዜቦ ካሴዉ እሺኹ አኽⶓ ድኹዌካ:: ያኼስጉ ዊዛሩ ትዝታ ኩፅኒ እምፕል ሻይ ብርስ ቲን ሜድኑ አግልግሎቲዉ አባላ አኽጝስ ጄር ኔፃስ እክምኔ አግፃማ ኬሽጝስ ካሊⶓ እንክርፄካ::

አኽጝስኪላ ቲን ሜድኑ አግልግሎቲ እምፕልታቖ ቴኬምስታንታ ፄዋማጊ አኽⶓ ጛዳ ታምቡኽ ችግርዴስ ጁጝስ ዊዛሩ ትዝታ ድኹዌካ:: “እምፕል አቒ ቑንዳስታማ እክምኒ ጝና ካሱኒጊ እምፕላኒስ አኬምስትጝስ 500ዴስ ጃላ ጌንዜቦ ካሲስትጝስ ካሌ” ናኒስ እምፕልታቕዳ ታምባውሳ ጌንዜቡሳ ፍሼ ቶኬምካ::

ዋሺኒኪ አቒ ቲን ሜድኑ አግልግሎቲስ ክቻ ቴኬምስታንታ ፄዋው አኽⶓ ቶኬምካማ እያውሳ ትክሞ እርዳትስትጝስ ቲን ሜድኑ አባል አኽጝስ እንግርግራ ንጝ ቱስታቲው አኽⶓ ዙሜካ:: እምፕልታቕ ቑንዳስታኒስ እክምኒሾ ካስጝስ አኬምስታኑ ቲን ሜድኑ አባል አኽጝ ፋይፃንቲ አኽⶓ ቶኬምካ:: እምፕላኒስ ኬይስታው ጌንዜብስኪላ አሜቶ ዋኾ እክምኔ አግፃንኩ  አኽⶓ እንክርፄካ::

እክምኒው ውማይቴንካኪላ ቲን ሜድኑ ቴኬምስታንትካ እምፕልታቖ ቱስቲስ ቻቤልካማ ሌንጌድፃንኩ አኽⶓ ዙሜካ::

እሊት ፋግቲ ለኮማ ወረዳ አይካልታ አንኩሪ ኬቤሊው ዝኩዋንታ አዘነጉሽ አምባዬ ቲን ሜድኑ አባላ አኽጝስ ሚንቾ ትክሞ አግፅⶓ ዲብስካ::

ቲን ሜድኑ አግልግሎቲ አንትጝዴስ ቤዴራ እምፕልታቕዳ ሚንች ችግር ታምባሺኹ አኽⶓ ድኹዌካ:: ቲን ሜድኑ አግልግሎቲ ጄሜራውላስ ቑንዳስትኹ አቒ ሚንቾ አብቶ ድኻማ እክምኔ አግፅጝስ ካሌ፤ ጌንዜብ እላቲው ዴሜካ እክምኒዳ ካሴውሳ ጌንዜቦ አቲጝስ ቑንዳስታማ ክርⶓኺስታ ታምባው አኽⶓ ዲብስካ::

ቲን ሜድኑ አግልግሎቲ ጄሜርጝስ እክምኒስ ድኻውሳ ሚንቾ አብቶስታ ንብሬቶ ይጉፅጝስ ካሉኽ አኽⶓ እንክርፄካ:: እምፕል አሜትስ ኬያኑ ቲን ማድኑ ጌንዜብኪላ 2 ሻይ 400 ብሮ ታምብⶓ ዲብስካ:: ቲኑ ውማይቴንካ ቲን ሜድኑሳ ዴብተሮ አዴስፅካማ ቴኬምስታንታ ኩስጝፄካማጊ አኽⶓ ድኹዌካ:: እምፕልካ እምፕልካ ጛርት አቕ ቲን ሜድኑ አግልግሎቲዳ ካንቲው ችግር ዝኩⶓ ቶኬምካ::

ጊዚኺሪ ኬቤሊው ዝኩዋንቲ አቶ የኔው ወንድምኪላ 2010ም/አሜታዴስ ጄሜራማ ቲን ሜድኑ አባላ አኽጝስ አግልግሎቲስ ቴኬምስታንታ አኽⶓ ዲብስካ:: ወረዳዳ ፄትቲው ችግር ጌቴማሺኹ ጊዝዳ እምፕሎ አሜቶ ቲን ሜድኑ አግልግሎቲ ልምትጝስ ማልጛ ቼጌርስታሺንኩ አኽⶓ ዲብስካ:: ቲን ሜድኑ አባላ አኽጝስ ልቓ ጌንዜቦ ኬይጝስ ፋያኑሳ ስፍሬኺስታ ካስጝስ እክምኔ አግፅጝስ ካሊስታው አኽⶓ ድኹዌካ::

ፋግቲ ለኮማ ወረዳዉ ቲኑ ፅፌት ጝናሱ አላፊ ዲያኮን አባይ ወረዳዳ እምፕልታቕ ቲን ሜድኑ አግልግሎቲዳ ቴኬምስታንታ አኽⶓ ጌሌፅካ:: ያኼስጉ ወረዳዳ ፌቴርስታሺኹ ፄትቲው ችግር ምክንያታስ እምፕሎ አሜቶ አግልግሎቴ እያውላስ ይጉጝስ እምፕልታቕ ቼጌርስታሺንኩ አኽⶓ ቶኬምካ:: እምፕልታቕዳ ቲን ሜድኑ አግልግሎቲስ ቴኬምስታንታ አኽጙ ፋይ ዴሜካማጊ አኽⶓ ጌሌፅካ::

ሚንችካ እክምኒዳ ካቲንኩ እሺንኩ እክምኔ አግፃንታ፣ አክም እላቲኩ አኬምስታንታ ፄውጝስስታ ኬሽኹ ቲኑ አግልግሎቲ እይስታታ ፄውስታማጊ አኽⶓ ጉሽካ:: እንስኪላ ሚንችካ እምፕልታቕ ቲን ሜድንስ ቴኬምስታንታ አኽጝስ ምስጋኔ ዲግስካማጊ አኽⶓ ቶኬምካ::

ቢሬ፣ ጝኖስታ ብቴ ዋይጝስ እክምኒስ ፍሻኑሳ ፍሼ ይጉፅኹ አኽⶓ ቶኬምካማ እክምኒስ እሊው ዙራሙሪሾ ካስጝስ እክምኔ አግፄካማጊ አኽⶓ ጌሌፅካ::

ወረዳዳ ላጜታ ቲንኩ ጉትፕካዳ ቲን ሜድኑ አግልግሎቲ እይስታው አኽⶓ እርዳትፅካ::

ቲን ሜድኑሳ ዴብተሮ አዴስፃንታ ሼውቴ ፌቴርጙ እንፅኺ አኮሜችስታማጊ አኽⶓ ጉሽካ::

አግልግሎቴ እይጝጜ ኬሽጝፅጝ፣ እጆ ዋኽትጝፅጝስታ እንፃኽስትጝ ቱስታው አኽⶓ ዙሚጝስ እምፕልታቕ ቲን ሜድኑሳ አግልግሎቴ አዴስፅጝስ ይንቴካማ ኬያንታ ፄውስታው አኽⶓ ጌሌፅካ::