ካርድስ ፋዮ ሳኪትጝፅጝ

ጉላሊው ቴርት ሊብራል ዲሞክራሴኪ ያኻ ሶሻል ዲሞክራሴ ሲፋንኩ አጌርካዳ ኬፍንኹሳ ፍሼ ፄዋው ዲሞክራሲው ኾትያኽ::

ውክልኒው ዲሞክራሲዳ እዝብ ወኬልስታንትካዋ ጐሌላው፣ ጐሌሉክሳ ወኬልስታንትካዋ ካሲስታንታ ፄዋውስታ ውክልኔ እንካኒቲየስ ኩፅኒ ውክልኒዴስ ጉሽጝስ ካላው ይቪቺ ዳድ ኔፃስታ ፍታዊ ጉላሊ ይቪቺያኽ::

ይቶፒያው ብሄራዊ ጉላሊ ቦርዱ ማቤራዊ ፍንዴስ አግፅንኹ ንባርታጊ ናካ ሊሊትጙንኩ አጌርካዳ እንፅኺዳ እሺንኩ ሊሊትጙንኩ ጉላሊው አይኔትካ ዝኩና:: እኒ ጉላሊው ቴርትካ ውላጊ ፖለቲካው ቴርታኻዳ አግስታንኩ ልኺትጛንትካውሳ ፅኹሮ እሚጝሾዳ ጚጛርትጛሱሳ ፍሼ እንክራና::

ጉላሊው ቴርት ሊሊትጙንኩ ካንትካ ዝኩንኩ ድምፆ እያንትካውሳ ፋዩ ታምትጝፃማ ፓርላማው ውክልኒ ዝኩዋታ ፄዋው ዲሞክራሲው ኾትያኽ::

ዋሺኒኪ አጌርዳ እዝብ ጉላሊዴስ ማንዳው ሚንች ዲብ ዝኮ:: እምፕልስታ ቹዋ ጉዳይኪላ ጐሌልኹሳ እዝቡሳ ትክሞስታ ፋዩ ወኬላው አሬጌግጙኽስታ አኹኪ እምቢታማ ኽያው ኬልታፊ ምንግስት ቲሪትጛማ ካንትጝያኽ::

እምፕል ዲሞክራሲው ቴርታኻዳ ፖለቲካ ፓርትካው እንፅኺ ጉላሊስ ልኺትጛማ ዊፅጝስታ ምንግስቶ ቲሪትጝፃማ አጌሮ ጉስጝ ይቪቻ ጋቲዊያኽ:: ፖለቲካው ፓርትካ እምፕል አጌራኻዳ ፓርላማው ኬዌምጛንታ ያኼካማ እንክራኑ ፍሺዴስ ፌይኹስ ጋቻዋ ኽይጝስ፣ ጁዋቲታ ፄውጝስታ አጌሮ አሬጌግጝፅጙሳ እንፅኼኪላ እንፃኽስታና::

ጉላሊው ቴርት ቱስቲስ ካስጝጝ ድምፆ እያንትካ እምፕልታቑሳ ትክሞስታ ፋዮ ፖለቲካው ቴርታኻዳ ወኬልስታታ ፄዌ፣ ይሴንስታ አሬጌግጙኽ ምንግስት ፌቴርስታታ ካሊፄ፣ እዝብ ዳሊት ዝኩክ ወኬልስታንትካስ ወኬልስታታ ፄዌ፣ ምንግስቶ እዝብስ ካሲስታንታ ፄዌ እንቲታኪ ሊሊትጙንኩ ፖለቲካው ታንብ ዌንካዋስታ ሲፍጛንትካዋ ዲግስጝፄ:: እንጊ ፍሽካዋ እዝብ ቱስቲስ አግፅጝስ ካላታኪላ ጉላሊውሳ ቴርቶ ቱስቲስ ሲፍጝጝ ፋይፄ::

ፋናውስ ሜቴንስ ምንግስትዴስ አግልግሎቴ አግፅጝስስታ አጌራው ሰላምኪላ አሬጌግጙኽ ያኻታ እዝብ 7ንቲ አጌራዊ ጉላሊዳ ጐሌልጝስ ካሊፃውሳ ጉላሊውሳ ምዝጋቤ ጊዞ ማንዳማ ቱስታው ዙራሙሪዳ ሜዜጌብስትጝ ቱስቴ:: ሜዜጌብስትናና ቱስቲስ ጐሌልንኹሳ ወኬልስታንቴ ዴሜካ ፋናውሳ ዋኽትጝፃኪ ያኻ ዋኽትጝፃያላኪ እናና ቲቺጝስኪላ አሜቻው ያኼ:: ጐሌልጝስ ካሊፃው ምዝጋቢዴስ ጄሜራማ ዝኩኽሳ ቤዴራቴርቶ ዋኽትጝፅናውላ ይጉጝስ ጉላሊዳ አሴቴፍጝናውላ ኩፅኒ ጉላሊውሳ ቴርቶ ቺችጝስኪላ ካሊስታላኪ::

ጐሌልጝስ ካሊፃውሳ ምዝጋቤ ቤዴራማ ሜዜጌብስትጝስኪላ ፋይስታውሳጊ ጉላሊው ካርድስ ድርብጝስኪ ያኻ ጉሽጝስ ካሊስታው ድል ታፍዳ ዝኩኽ አኽⶓ ማሊጝ ፋይፄ::