ቴኬምስትናያሱ አብት

ንግስቴ ተስፋ

እን አጌራው እዝብዴስ 85 ታፋ ሊኽዴስ ያኻው ግብርኒው እንፅኺዳ አሴሜርⶓ ንቫርካ ቶኬማና:: ግብርኒኩ እንፅኽካዴስ ትክልቲውስታ ኩፓኩፒው ልማት ዴሜካ ልቓ ብቲዴስ ሚንች ትክም አግስታው ግርቦስታ ጊዞ ክብሳው እንቲታኪ አቒ ይሪሱ ቲንስ ፋይፃንቲ አኽጝ አቕስቴ:: አጌራው ትክልቲውስታ ኩፓኩፒው ምርት ትኩቶ ፄዋው ዴሜካ ችግኝኩ ጉትፕካዋ አኹኪ ቴክልካውሳ ፌሎ ሊጊፄ ብቴ አንኬባኬብጝስታ ሳይንሱ ዳድስ ሌጌፅጝ ፋይፃንቲ ጉዳያኽ::

ችግኙ ጉትፕካ ዙራሙሪ ቺፋ ዝኩጝ ፋያኑ ትክልቲኩ አይኔትካ አይር እግልታሳ ፂኒስኹ ዳድስ እዝብስ ታምብስታንታ ፄውጝስ ዙራሙሬ አምሉስታ ዴስፃው ግድ ዝኩዋታ ፄዌ:: ይኮኖሚው ልግስኒኪላ ዝኩኽ ፍሺ ልቓ ጋቲዊያኽ:: ቲን ዌና ኬሌብጚውዴስ ዝኩዋታኪላ እርዳቴ::

ችግኙ ጉትፕካዳ ፌልስስቱንኩ ትክልቲውስታ ኩፓኩፒው አይኔትካ ግብርኒውሳ ሳይንሶ ማንዱኽ ዳድስ ቴርታንኩ አኽጝታጊ እምቢቴካማ ሌጌስጝስ ምርትስ ታምባንታ፣ ቑንዜ ካላካልጛንታስታ ቱስታውሳ ሜቴኖ አፌራንታ ፄውጝስ አሜችኹሳ አኺኔ ፌቴራና::

ፋግቲ ለኮማ ወረዳ ኔቼላ አግቲ ኬቤሊዳ አግስታው ችግኙ ጉትፕ እንፃኽስስታማጊ ዝኩኽሳ ቴግባሮ ካንትኹስ አውጚው ራዲዮንሊ ስልኪስ እጂጜ ፄውንኩ ኔቼላ አግቲ ኬቤሊው ዝኩዋንቲ አሬሳቻንቲ  አማረ አንተነህ ችግኙ ጉትፕዴስ አግፁኑሳ ትክሞ ድኹዌካ:: ችግኙ ጉትፕ ቲሪትጛውላስ ዋጋቲዊያኽ ንካማ ቴኬላቲኑ እሺኑሳ ትክልቴስታ ኩፓኩፔ ናካዳ ቴኬልጝስ ትክሞ አግፄካማጊያኽ:: አቮካዶ፣ ቡኖ፣ ማንጎስታ ኮረሪማዋ ጉትፕዴስ ፌሎ ካፅካማ ቴኬልጝስ ሊሚፅⶓ ዲብስካ:: ፉቼ ሽንጉርቼ፣ ጉባሬስታ ዱኒዜ ጉትፕዴስ ዜሮስታ ፌሎ ካፅጝስ ዜሬካ ቴኬልካማጊ ኬሻንቴ ሚፄ አግፄካማጊ አኽⶓ ጉሽካ::

ችግኙ ጉትፕ አኹኪ ችግኙ ፌላ ፊልፂ ብቲ ሚንቾ ጊዞ ቲሪትጛው አኹ ዝኩክ ዙራሙርካዳ ያኹስ አኹዋቲስ ሊማንኩ ትክልትካዋ ፌልፅጝስ ዙራሙሪሊ አስሜምጛንኩ ትክልቲኩ አይኔትካዋ እዝብስ ቴኬምስታንታ ፄዌ:: አሬሳቻንትካው ዝኩዋኒውሳ አኺኔኪላ ኬሽጝፃንታ ፍሼ ፄውⶓ አሬሳቻንቲ አማረ ጉሽካ:: እንጚስኪላ ችግኙ ጉትፕዴስ አግፃኑ ትክምዴስ ቤዴራ ሲቑዊ ጝናዳ ዝኩዋኒስ እሺንኩ ኮርኮሩስ ግዲትፅካ ግቢቴካማ ክምካስታ አቒ ጝናሳ ጛራ ፄውጝስ ፃንኩቶ ማንዱኽስስታ ቲን ዌና ዝኩዊኔ ዝኩⶓ ጄሜርⶓ እንክርፄካ::

ሊሊትጙንኩ ሴብልካዋ ዴሜካማ ቴኬሉኑሳስታ ምርትስ ታምፁኑሳ ኩፓኩፔስታ ትክልቴ ላጚቲ አይኔታዴስ ጃላ ጛው ኬሌብዴስ ፊቲስካማ ጌቤሊስ ዲግስጝስ ይኮኖሚው ቴኬምስታንትካ አኽⶓ አቶ አማረ ጉሽካ::

እሊው ችግኙ ጉትፕካው ትክም ዴሜካ አሬሳቻንትካ እቺዴስ ጄዌካማ ቴኬላኑ ቴክል ካፃው ጌንዜቡስታ ግርቡ ክሳሪዴስ ይጉፅጝዴስ ፌይኹስ እንዜጝትጝፅጙ ጊዝዳ ጌቴማውሳ ፌሉሳ ቤዴልስትጙሳ ችግሮ ኽይጝስ  ኽሳንቴ ትክሞ እይⶓ ዲብስካ::

አሬሳቻንትካኪ ያኻ ዋሺኒኪ ኬቴምዳ አግስታው እዝብኪላ ትክልትካዋስታ ኩፓኩፕካዋ ዝኩኽ ብቲዳጊ ቴኬላማ ኬለብስታው እንቲታኪ ይኮኖሚው ቴኬምስታንትካ ያኻንታ ምንግስት እይኹ ትኩትዳኪላ ዴስቴንካ አኽⶓ አሬሳቻንቲ አማረ ቶኬምካ::

“ትክልቴስታ ኩፓኪፔ ፋይፃውሳ ላካ ምርቶ ዴሜካታ ፄውጝስ አኹ ታምብስታንት ዝኩዋታ ፄውጝስ ቴክኖሎጄ ቴኬምስትጝ ፋይፄ” ናንኩ አሬሳቻንቲ አማረ ውማይቴንካውሳ አሳቦስታ ኩስጜ ቻቤልካማ  ኬሸኹሳ አቾ ታምብጝስ እክዶ እሚⶓ ድኹዌካ::

ዊዛሮ ሻሽቱ ተስፊ ነቸላ ኬቤሊው ዝኩዋንታ ዙሙኑውሰታጊ ችግኙ ጉትፕዳ ፌልስታውሳ ቡኖ፣ ሽኩዋሩሳ ቓንፄስታ ሽኩዋር ዶኔዛሳ ካፅካማ ቴኬልጝስ ዋይካማ ቴኬምስታንታ ያኼካ::

ቤዴራ ብርክታ ኬቴምዳ ይቪቻ ኹስታውስታ ካንታኑሳ ሽኩዋር ዶኔዛሳኪላ ቴኬልካማ ጝንዳ ኬሌብስትጝዴስ ፌይኹስ ጌቤልሾ ፍሽጝስ አግፃኑ ጌንዜብስ ዝኩዋኔ ኪስካማጊ አኽⶓ ዲብስካ::

ስራስሪ ፋያኑሳጊ ኬሌብስትካማ ሌጌሳንታ ፄውጝስኪላ ችግኙ ጉትፕ ዝኩጝ ኬፍንኹሳ ፍሼ ፄዋማጊ አኽⶓ ዊዛሮ ሻሽቱ ቶኬምካ::

ዝኩዋኒዳ ጌቴማውሳ ጌንዜቡሳ ችግሮ ጌጌውጝዴስ ፌይኹስ እሌታ እርባቲ ዝኩዊኒዴስ ፊጝስ ካሊⶓኪላ ድኹዌካ::

ታፍዳ ጌንዜቦ አቲጝስ ጉሽትጝስ ቼጌርስታሺኑ ጊዝ ፌያማ ናካዳ ፋይታ ጌንዜቦ እሚጝስ ካሊⶓኪላ ዊዛሮ ሻሽቱ ዲብስካ::

ፋግቲ ለኮማ ወረዳ ግብርኒ ፅ/ጝናሱ ትከትሊ አላፊ የኔው አዳነ ችግኙ ጉትፕ ዙራሙሪዴስ ፌይኹስ ወረዳው አሬሳቻንትካ ትክልቴስታ ኩፓኩፔ ቴኬላንታ እሳንጝፅጝስ ፍሺ ዝኩኽ ኾት አኽⶓ ጌሌፅካ::

ችግኙ ኾትዳኪላ ቡን፣ አቮካዱ፣ ሽኩሩ ዱኒዚ፣ ኮረሪማ፣ ሽኩዋሩ ቓንፂስታ እሊኩጊ አግስቱንኩ አኽⶓ ጉሽካ:: ችግኙ ጉትፕ አቫላምቲዳ ጉሽፃ ፄውሲ አሬሳቻንትካዋ ዴስጝፅጝስ፣ ትክሞ ያቓንታ ፄውጝስ ኔፃስ ፌሎ እያሺኹ አኽⶓ ታክስፅካ::

አቶ የኔው አድነው ጊሊፂታጊ ወረዳዳ እሳንስ አኹዋቲስ ሊማው ብቲ ዝኩኽ አኽⶓ አጋታሚታ ቴኬምስትጝስ ትክልቲውስታ ኩፓኩፒ ፌሉ ጉትፕ ቲሪትጛታ ፄውጝ ዋይሜ ሜዜጌብፅኹ ውሳኒ አኽⶓ ኽይትጝፅካ::

2018 ምርቱ ዝቤንዳ ትክልቲስስታ ኩፓኩፒስ ሊማውሳ ዴሜካማ 2ሻይ ሄክታር ብቱዴስ ጃላ አኹዋቲስ ሊማማጊ አኽⶓ ጉሽካ:: እሊው ሞተር ፓምፑሳ ታምብስታንቶ ቼሜትጝፅጝስ እንፃኽስስታው ቴግባር ዝኩⶓ አቶ የኔው ጌሌፅካ::

ቲሪትጙንኩ ችግኙ ጉትፕካዋ አንኬባኬባማ እሚጝስታ ሚንች አይኔት ትክልትካውሳስታ ኩፓኪፕካውሳ ፌሎ ቴርሳማ አሬሳቻንትካስ ቤንጝፅጝስ እሳንጝፅጙ እንፅኺ ይስጛማ ሲፋው አኽⶓ አቕፄካ::

ትክልቲስታ ኩፓኩፒዴስ ድምክና ትክላሊስ አኹዋቲው እንፅኺስ ወረዳታጊ እይስትኹ ትኩትስ ቱስታውሳ ግብርኒኩ ውማይቴን አሬሳቻንትካስ ውማዩሳ ድጋፎ እያንታ ፄውስታማጊ አኽⶓ ጌሌፅካ::

ኔቼላ አግቲ ኬቤሊ ምንግስት ትኩቶ አይኹ ስፍሪ አኽⶓ ወረዳው ፖለቲካውስታ አክም ግንባቲው ዜርፉ አላፊ ታደለ አለማየሁ ጌሌፅካ:: ችግኝኩ ጉትካ ካንትፃኑ ዋይሚ ክርፂ አኽጝታጊ ፍንሾስኪላ ይስጛማ ሲፋው አኽⶓ ጉሽካ::

ወረዳዳ አግስታንኩ 26 ኬቤልካስጊ ፌሎ ዲግስጝስ አቕስታው ጉትፕ ኬቴሙስታ ጌፄሩ እዝብ ትክልቲስስታ ኩፓኩፒስ ቴኬምስታንታ ያኻታ አሜሜችጝፅጙቴግባር አኮሜችስታማጊ አኽⶓ አቕፄካ::

ኔቼላ አግቲዳ አግስታው ችግኙ ጉትፕ 1991 ምሬት አሜታዴስ ጉሽፃማ ወረዳው እዝብስ እያው ትክምዴስ ፌይኹ ጉዋንጉዊስታ ዳንግሊ ወረዳው እዝብስኪላ ፌሎ ዲግሳማጊ አኽⶓ ቶኬምካ::

ችግኝኩ ጉትፕካ ኽስኹስ ዋይሚስታ ያኻንታ ፅንጋኻ ያኻንኩ ችግርካ ኽይጝስ ትኩትስ እንፃኽስስቴ ኑንኩ አቶ ታደለ አሬሳቻንትካው ዝኩዊኒው ሴል ኬሽጛታ ጄሜርስትኹ ፅሬት ጋያኪ ጌፄሮስታ ኬቴሞ አምሉ አሻሪስ ግዲፅጙ፣ ትክልቲስስታ ኩፓኩፒስ ቲንዌናሳ ክምንቶ አፌርጙ ቴግባር ይስጛማ ሲፋው አኽⶓ ቶኬምካ::