ልግስኒው ፅንጋኺ

ንግስቴ ተስፋ

ሙስኒ ናው ካሉ ኽይ እሳን ያኹኒውላ አላፍቶ ጛርቱ አኹኪ ኬቹ ትክምስ ቱስታ ጋቲታ ቴኬምስትጝ ናው ኽይ ኩፅኒ ሚንችካዋ አስሜምጝፃዊያኽ:: ሙስኒ ምግባር ፅንታውሳ ሜርሆ ፌይጝስ ጛርቱሳ ትክሞ አግፅጝስ ኑስ ፌፄምስታው እምኔቶ ዳንጉስጙ ፂዊያኽ::

ሙስኒው ዙሪዳ ንቫሮ ፍሻው ትራንስፓራንሲ ኢንተርናሽናል እስትኹ አሌም አቡቑ አችት አውሮፓው ዝቤኑ ቼፍታ 2024ዳ ፍሽኹ ሪፖርትዳ ሶማሊያ፣ ቬንዝዌላ፣ ሶሪያ፣ ደቡብ ሱዳን፣ የመን፣ ሊቢያ፣ ሰሜን ኮሪያስታ ኤርትራ አሌም አቡቑ አችስ ኬፍቲኒ ሙስኒው ችግር ዝኩክ አኽⶓ ቼሜትጝፃ::

እንጚስኪላ አጌርካው ፖለቲካ ክቺያሱ አኽጝ፣ እጉ ሴግቴንት ኬቤርስታውላ ይጉጝ፣ ጚስጜዋ ጋቻስታ ምንግስቱ ግልፄንቱሳ ዳንጉኔ ምክንያትታ ቴኬምስትጝስ ሙስኒ ባስጛታ ፄውⶓ ሪፖርት ቶኬማ::

እሊውስ ዴሜካ ሙስኔ ካላካልጝጝስስታ ቼፍጝጝስ ኬሻንቲ ዴስ ዝኩክ አጌርካኪላ ዝኩኽ አኽⶓ ፅናት ቶኬማ:: እኒ አጌርካ ክቻዴስ ዴንማርክ አግስቲ:: ዴንማርክ ሙስኔ ካላካልጚው ሴልስ እሊኩ አጌርካዴስ ሊሊታ ፄዋው ፀረ ሙስኒውሳ ፖሊሴስታ ስትራቴጄ ፍሽጝስ ጌሌልቴንካ ፍትኩ ኾትካዋ ቲሪትጝፅጝስያኽ:: እንጚስኪላ እጉሳ ሴግቴንቶስታ ካሲስታንቶ ቼሜትጝፅጝስ ካሌ::

አማኻሪ ክልልዳ  ሙስኔ ካላካልጝጝስ ካሊፄ እስታማ ፉኽሳ እጎስታ አዋጆ ጉሽፃ ፄውጝስ ሙስኒ ፌፄምስታቲታ ፄውስታው ፅሬት ዝኩኒውላ ሰላሙ ችግር ኩፅኒ ሙስኒ ባስጛታ ፄዋማጊያኽ::

አዊ ብሄረሰቡ ቺፅጝፂ አገው ግምጃቤት ኬቴሙ ቺፅጝፂው ዝኩዋንታ ዊዛሩ እብስቴ ሁነኛው እዩኑ ካንቲስ አግልግሎቴ ፋያንትካስ ወክትስስታ ጊዝስ ቢሩዳ አግስታማ አጌላጌላውላ ይጉጝ ሙስኒው ጉሽፃ ያኻማ ካንትስታው ጉዳይ አኽⶓ ጉሽካ::

ምንግስቱ ልማቱ ፕሮጄክትካዳ ኪላ ሙስኒ ፌፄምስታው አኽጝስ ፋይስታው ሜቴንስስታ ወክትስ አሌድስታማ እንፅኺዳ እሼቲታ ሙስኒ ቻኒስቶ ፌቴራማጊ አኽⶓ ድኹዌካ::

እዝቡ ጌንዜብ ቱስታ ጋቲት ፕሮጄክቱ ግንባቲው ስምስ ዜሬፍስትጝስታ ኮንትራክተርካ ጌንዜቦ ዜሬፍካማ እንፅኼ አሌዳኑላ ድስጝ ልማቱ እንፅኺዳ  ቻኒስቶ ፌቴራማጊ አኽⶓ ዙሜካ::

ሙስኔ ኔኬትጝስ ኩፅኒ ጄርካዋ ዳዴኾ ፉቼው ዋሺኒኪ ጉዳይዳ አምንስታው ክምንት ያኻታ ጝን አቕስታ ክንቲ ጝንካ ይሴንትስ እንፃኽስትጝ ቱስታው አኽⶓኪላ ጉሽካ::

ምንግስት ዴሜካ ሙስኒ ባስጛታ ፄዋንኩ ምክንያትካዋ ቤዴራማ ካላካልጝጝስታ፤ ፌፄምስታማ አግስታኒ ኩፅኒ ይሴኖ ክፃቱሳ ፖሊሴስታ አዋጆ ፍሽጝስ ሙስኔ ልቓስኪላ ያኹኒ ኔኬትጝስ ካሊስታው አኽⶓ ቶኬምካ::

እሊው አገው ግ/ቤት ኬቴሙ ዝኩዋንቲ አቶ ሞላ ፈካዱ ሙስኒው ፂዊ እንፅኺውሳ ሳቶ ኬቤርፅጝዴስ ጉሽፃማ ጉቦ ቱስታቲውሳ ጌንዜቦ ካሲⶓስታ ልማትስ እስትኹሳ ጌንዜቦ ጛርቱ ትክምስ እሽፅⶓ ኺስታ ፌያፌያማ ፌፄምስታው አኽⶓ ታዜቡኑሳ ካንቴ እይካ::

እዝቡ ልማቱ ካሲስ ዙርሜ እያንኩ ፕሮጄክትካ ግቢትስታኒስ ቱስታ ጋቲታ ሙስኒ ኹስታው ጌንዜብ እዝብ ምንግስቶ አምናቲታ ፄውጝዴስ ፌይኹስ ልማቱ ፋይ ዋኽትጛቲታ ፄዋማጊ አኽⶓ ቶኬምካ::

አቶ ሞላ ናኑውስታጊ ሙስኒስ ታራታርስታንትካዋ እግስ ፌይፃማ እይጝሾዳ ዜሬቕቲኒ አኽጝስ ባስጛታ ፄዋማጊያኽ:: ምንግስትኪላ ሙስኔ ፌፄሙንኩዳ ካፃው ክፃት ይሴን ያኻውላ ይጉጝ እሊው ሙስኒው ቴግባር ድፍሬትስ ፌፄምስታታ ፄዋው ምክንያቲ አኽⶓ ዙሜካ::

ሙስኒው ዙሪዳ ንቫሮ ፍሻንኩ ዝቤን ያጉኽ ቴክኖሎጂው ሴልካዋ ቴግባርዳ እሽፅጝኪላ ፋይፃው አኽⶓ አቶ ሞላ ጉሽካ:: ዳዴኾስታ እምኔቶ ዳንጉስⶓ ፍቼውሳ ክምንቶ ኔፌርጝስ ሙስኒ ታምፃውሳ እንዙራኽ እስታቲውሳ ጉዳቶ ካላካልጝጝስ ውላውጊ ታምብ ኬፍቲኒ አኽⶓ ቶኬምካ::

አገው ግ/ቤት ኬቴሙ ቺፅጝፂ ብልፅግኒ ቻፊ ፅ/ጝናሱ አላፊ አቶ አማረ ባይነሳኝ ኬቴምዳ ባስጛማጊ ይንቱኽ፤ ኬቴሙ ልግስስ ስታ ልማቱ እሳንጚስ ፍታና አኽጝስ ካላ::  ሙስኒውሳ አይኔቶ ጎሌላማ ቤዴራማ ካላካልጚስስታ ፌፄማንትካዳ ፋይፃንቴ እርምጄ ካፅጝስ አኮሜችስታው ቴግባር ዝኩⶓኪላ ጉሸካ::

ኬቴሙ ዝኩዋንትካው ዝኩፂ ጝኑሳ ካሴ ኽይጝስ አኮሜችስታው ቴግባርዳ ኬቴማው ፕላን ፌኬዳውዴስ ሴጋ ፕላኖ እንፃኽስትጝስ ሙኪሬ ፄውጝስታ እጋፊ ደላልካ ክችዳ ቱዌካማ ችግሮ ፌቴርጝ ኬቴማዳ ሙስኒ ባስጛታ ፄዋማጊ አኽጝስ ጉዳዮ ማራማራማ ምንግስት እንፃኽስስታማጊ ያኹኒውላ እዝቡ ቲቪቪርጚ ኩፅኒ ፋይፃንቲ አኽⶓ ቶኬምካ::

እጋዋ ያኻያሱሳ እጋዌ ፄጌርሳማ ዲግስጝ፣ ጄራ ያኻያሱሳ ብርስ ጄውስታማ 15-20 ኺስታ ጄሬኽ ናማ ዲግስጝ እንቲታኪ እግ ፌኬዳቲው ዳድስ አቺትጛማ ሙስኔ ፌፄምጝ ናኪኒ ወክትስ ኬቴማው ልግስዳስታ ዝኩዋንትካው ልማቱ ፋይዳ እን ቻኒስቶ ፌቴራማጊ አኽⶓ ጉሽካ::

እንጚኪላ አችትጙንኩ ጝኖ ፋያንትካ ማቤርካስ ወክትስ ጝና ግቢትፄ ብቴ እይጝሰ ካላቲንታ ፄዋማጊያኽ:: ጋያኪ ፍቱ ውማይቴንካዋ ዴሜካማ ጉዳይ ካንታኩ ውማይቴንካ አችትጜካማ ሙስኒውሳ ውንጄሎ እጋዊ ፄጌርፅጝስ እንፃኽስቴካማጊ አኽጝ ዴሜካ ጉዳዬ ቺጊርፂስታ እግስ ካሲሲታንታ ፄውጝስ ጊዞ ካፅⶓ ጌሌፅካ::

አችትጜካማ ሙስኒውሳ ወንጄሎ እጎ ናቒካማ ፌፄማንኩ ምንግስቱ ኾትካዴስ ፊትጙንኩ ውማይቴን፣ ፍቱ አካልካስታ እንፅኺኩ አላፍካ ሙስኒ ባስጛታ ፄውⶓ ጌሌፅካ:: እዝብ ምንግስቶ አምናማ ካሲስ ዙርሜ አግፃቲታ ቻኒስቶ ፌቴርካማጊ አኽⶓ ቶኬምካ::  ጉዳዬ እግስ ዲግስጝስ ጄሜርስትኹ ፅናት ዝኩኒውላ ጉዳይ ውሳኔ አግፃታ ፄውጝስ ኩፅኒ እዝብ ንቫሮ እይጝስ ቴቬቬርጛታ እቑዌ ዲግስካ::

አዊ ብሄረሰቡ ቺፅጝፂ ፅ/ጝናሱ አላፊ አቶ ይርጋ ወሌ ጛሾስ ሙስኔስታ እጋፌ እንፃኽስትጜ ቤዴራማ ካላካልጝጝስ ሼውቴ ፌቴርⶓስታ ሙስኒ ይጋሪስ ካላካልጝጝስ ካሊፃው ቴግባርዳ ትኩትስ እንፃኽስስታውማጊ አኽⶓ  ጉሽካ::

ፕሮጄክትካ ግቢትስታኒስስታ እዝቡስታ መንግስቱ ንብሬት ጄውስቱስ ፌያፌያማ ክችክቻ ያኻያሱ እንፃኽስስትጚስታ ሙስንው ቴግባር ካንትስታኒ ትኩታኩ ቤንክ ካስጝፃኑ ሲፍጚስ ጉዳይ ክቼታ ፄውስታማጊ አኽⶓ ቶኬምካ::

ሙስኒው ወንጄል ፌፄምስታማ አግስታኩ ወረድካዳ ቲንኪክፂ እይስታማ እግስ ካሲስታንታ ንቫር ኩፕናማጊ አኽⶓ ጌሌፅካ::

አገው ግ/ቤት ኬቴምዳ አቺትጙንኩ ጝና ፋያንትካስ ወክትስ እይጝስ ፄውስታው ልቕልቕቲዳ እጋፊ ዳላልካስታ ሙስኔ ፋያንትካ ችግሮ ፌቴርካማጊያኽ ናው ትኮሚ ታምባውላ ይጉኒውላ ሙስኒው ፂዊ ዝኩኒ ኩፅኒ እግስ ካስፅጝስ ትኩትስ እንፃኽስታው አኽⶓ አቶ ይርግ ጉሽኮ:: እንዴስ ቤዴራ ምስሊ ጉዳይ ቻግኒዳስታ ኬቴሙ እንጃቢሪ ኬቴምዳ ጌቴማኒ ንቫሮ እሚጝስ እግስ ካሲስታንታ ፄውⶓ እርዳትፅካ::

ብሄረሰብ ቺፅጝፂዳ 575 ክርፂ ቺፅጝፂኩ ችግርካዋ ጎሌላማ ኽይጝስስት ሙስኔ ካላካልጝጝስ አኮሜችስታው ቴግባር ፍንሾስ ፍቶስታ ይጋሪውሳ ቴኬምስታንቶ ቼሜትጝፅጝስ ትኩትስ እንፃኽስስታማጊ አኽⶓ አቕፄካ::

ሙስኔ ካላካልጝጝስኪላ ውላጊ ታምቦ ፊትጛታ ታክስፅካ::