ክንቲው ፃንኩትዳ ትኩትጝ

ታደለ አጋጄ

ክንቲ እምፕላ አጌራው ፖለቲካው፣ ይኮኖሚውስታ ማይቤራዊ ልግሱ ቹዋ ኩልፍያኽ:: እምፕልታቖ ካንቲስ፣ ካሌቕትስስታ አቕትስ ቢኪፅጝስ እንቲታኪ ይኮኖሚው ልግስስ ቢዲሬ ስፍሬ እሜው ክንቲው ዜርፍያኽ:: ክንቲስ ሌጌስኹ ማቤርአቕ ይኮኖሚውሳ ልግሶ ቼሜትጝፅጝስ ካሌ:: ይቶፒያዳ ፌዩንኩ አሜትካዳ ክንቲው ታምብስታንትዳስታ ክንቲው ፃንኩትዳ ችግርካ ጌቴምካማጊ ይንቴካ:: ሰላሙስታ ፄትቲው ችግር እንቲታኪ ክንቲው ፃንኩትዳ ዝኩኽ ችግር አጌርታ ሲጊፃው ጉዳይ ያኻማጊ ይንታ::

አጌር አቡቑ ዩንቨርስቲውሳ ሚፅፄ ፍታኔ ካፃንኩ ክንታንትካ ዩንቨርስቲሾ ቱጙ አክም ማልጛ ዜሬቕቲኒያኽ:: ክልልታኪላ ፌዩንኩ ሹኻ አሜትካዳ ፍታኔ ፌቴንስታንኩ ያኻ:: ዩንቨርስቲሾ ፌይጝስ ፌቴንስታንኩ  ክንታንትካው ቼፍ ኪላ ማልጛ ልቓኽ:: እንሱ ቹዋ ምክንያቲ ዴሜካ ክልሉ ሰላሙስታ ፄትቲው አኺኒ እንቲታኪ አጌርታ ክንቲው ፃንኩትዳ እይስትኹ ሊሊቲ ትኩትስያኽ::

ክንቲ ሚኒስቴሩ ንባርታ 2015 ም.አታሱ ክንቲው ዝቤንዳ ፌቴንስቱንኩ 845ሻይዴስ ጃላ ክንታንትካዴስ 50 ታፋዴስስታ አንዴስ ጃላ ዋይሜ ሜዘጌብፅጝስ ካሉንኩ 27 ሻይ 267 ክንታንትካ ያኻኒስ ትክላሊስ ሊኽዴስ 3 ትኩሚ 2 ታፋኽ::

2016 ም/አታሱ ክንቲው ዝቤንዳ ዴሜካ አጌር አቡቑሳ ፍታኔ ፌቶንስቱንኩ 674 ሻይ 823 ክንታንትካ ክቻዴስ 36 ሻይ 409 ክንታንትካ ፍታኔ ፌይካ:: እንኪላ ፍታኔ ፌቴንስቱንኩ ክንታንትካዴስ ሊኽዴስ 5 ትኩሚ 4 ታፋ ዩንቨርስቲሾ ቱዌካ::

አሜት ቺፋ ዩንቨርስቲሾ ቱዋንኩ ክንታንትካው ቼፍ ማልጛ ኔኬታማጊ አንትጝ አጌራው ልግስዳ ቺፃው ቻኒስት ማልጛ ኬፍቲኒያኽ:: እምፕላ አጌራውሳ ልግስኔ ቼሜትጝፅጝሰ፣ እምፕልታቕ ክቻዳ ዝኩኽሳ ጉዶ ታምትጜ ሌጌፅጝስስታ እጉሳ ሴግቴንቶ ቼሜትጝፅጝስ ክንቲ ጝንካ ክንቲው ፃንኩትዳ ሊሊቴ ትኩቶ እይጝስ እንፃኽስትጝ ፋይፃንቲያኽ:: ቻስ አጌራው አሬኬብስታውሳ ክምንቶ አፌሬጝስ፣ ዩንቨርስቲሾ ቱዋንኩ ክንታንትካ ዜሬቕቲኔ ዋይሜ ሜዜጌብፅጙሳ ችግሮ ኽይጝስ ክንቲ ጝንካ ክንቲው ፃንኩትዳ ሊሊቲ ትኩት እይስታማ እንፃኽስታማጊያኽ::

ክንቲ ጝናታጊ 12ንቲ ቤኑ አጌር አቡቑ ፍታኒዳ ኬሽኹሳ ዋይሜ ሜዜጌብፃንታ ፄውጝስ ክንታንትካዋ ክዳሜስታ አድጉዌ ዴሜካማ ፊቲ ጊዝስስታ ቼካማ ክንትጙሳ አኺኔ ቴርሴካ::

አውጚው ራዲዮንሊ እጂጜ ፄውንኩ ዚጋሚ ላጛንቲ አች ክንቲ ጝናስኩ ክንታንትካስታ ክንትፃንትካ ክንታንትካዋ ፊቲ ጊዝስ እርዳትጝስ ክንታንትካውሳ ዋይሜ ኬሽጝፅጝስ እንፃኽስቴካማጊ አኽⶓ ዙሜካ::

ክንታንቲ አምሳያ አድጎ ዚጋሚ ትክላሊ ላጛንቲ አች ክንቲጝናሱ ክንታንቲያኽ:: አጌር አቡቑ ፍታኒዳ ኬሽኹሳ ዋይሜ ሜዜጌብፅጝስ እክዶ ፍሻማ ፂኒሳማጊያኽ:: አባላምቲ ድንቤራ ክንቲዳ ጉዶ ዋይሜ ሜዜጌብፅⶓ ዙማ:: ክንታንቲ አምሳያ አፄብካሊ አኽጝስ እምፕልዳ ፂኒሴ:: ክንቲ ጝናዳ ቼካማ ፂኒስጙሳ ዴሶ ካፅጝስ አጌር አቡቑ ፍታኒስ ቴርትⶓ ዙማ:: ክንትፃንትካኪላ ክንታንትካ ኬሽኹሳ ዋይሜ ሜዜጌብፃንታ ጛው አክምስ እርዳቴ ፄዌካማጊ አኽⶓ ድኹዋ:: ክንታንትካ ጊዞ ቱስቲስ ቴኬምስትጝስ፣ እክድስ ጉስስትጝስ፣ ግልፃ ያኻያሱሳ ዴሜካ አፄብካሊ ካሲትጝጝስስታ ክንቲ ጝናዳ ቼካማጊ ክንትጝስ ኬሽኹሳ ዋይሜ ሜዜጌብፅጝስ ቴርትⶓ ጉሻ:: ፌይኹ አሜቱሳ ሽቶ እንፃኽስትጝስስታ ቴክኖሎጄ ቴኬምስታንታ ክንትፃንትካ ክንታንትካስ እርዳትካማጊ አኽⶓ እንክርፃ::

እሊው ክንታንቲ ልጅአለም ገድፈውኪላ 12ንቲ ቤንዳ ክንታዊያኽ:: ክንቲ ጝናዳ ክንትፃንትካ ክንትፃኑ ክንቲዴስ ድምክና ጝርጃ ቼካማ ክንትጝስ  ኬሽኹሳ ዋይሜ ሜዜጌብፅጝስ ናካዳ ጄሜራማ ቴርትⶓ እንክርፃ:: እምፕላንቲ ድንቤራ ክንቲዳ ጉዶ ዋይሜ ሜዜጌብፅⶓ ድኹጝስ አጌር አቡቑ ፍታኒስ ጉድጛ ቴርትⶓ ዙማ:: ፅክራ ላጛንቲ ቤንኩ ክንታንትካ እምፕልትስ ፂኒስጝስ ጛስጛዋ እርዳትጜካማጊ አኽⶓ ድኹዋ::

ፉሪውሳ ጊዞ ዴሜካማ ክዳሜስታ አድጉዌ እንቲታኪ ኻሩሳ ክንቴ አግፅⶓ ዙማ:: ኬሽኹሳ ዋይሜ ሜዜጌብፃማ ዩንቨርስቲሾ ቱጙ እክድ ዝኩኽ አኽⶓ እንክርፃ::

ክንቲጝናዳ ክንታንትካስ ዳላው ሜፃፍ እላቲው አኽⶓ ጉሽጝስ ኻራ ሜብራት ካሱኒውላ ጄኔሬተርስ ፂኒሳንታ ፄውስታማጊ አኽⶓ ድኹዋ:: ሜፃፍ ዳላው አክምስ ዋኽትጛታስታ ሜፃፍ ጝና ኻራ ብስታ ያኻያታ ካሴ::

ዚጋሚ ትክላሊ ላጛንቲ አች ክንቲ ጝናሱ ክንትፃንቲ አስረስ አምሳል 12 ቤንኩ ፌቴንስታንትካስ እርዳቴ ፄዌካማጊያኽ:: ክንታንትካ ቼካማ ክንታንታ ፄውጝስስታ፣ ፉሪውሳ ጊዞ ቱስቲስ ቴኬምስታንታ ክንታንትካስ እርዳቴ ፄዌካማጊያኽ:: አባላምቲ ድንቤራ ክንቲዳ ክንታንትካ ሜዜጌብፁኒ ዋይሚ ማልጛ ክርፂ አኽⶓ ቶኬምካ:: ክንትፃንቲ አስረስ ክንታንትካ ሜዜጌብፁኒ ዋይሚዴስ ጁጝስ እርዳቲ ፋይፃኩ ክንታንትካዋ ጎሌልጝስ እርዳቲውሳ ክንቴ እይካማጊ አኽⶓ ዙሜካ:: ክንትፃንትካ አጌር አቡቑ ፍታኒስ ያኻውሳ ካሴ ፍሻማ እይጝስስታ ፌይኹ አሜትዳ ፌቴንስቱኑሳ ካሴ እንፃኽስትጝስ ክንታንትካዋ እርዳታና::

እሊው ዚጋሚ ትክላሊ ላጛንቲ አች ክንቲ ጝናሱ ክንትፃንቲ አለበል ፈንታሁን ኑኑውስታጊ ክንታንትካውሳ አቕቶ ስሬታ ፄውኽስ ክንታንትካስ እርዳትካማጊያኽ:: አጌር አቡቑ አችስ አንትጝስ ካላንኩሳ ፍታንካዋ ፍሽጝስ ክንትፃና::

ክንታንትካስ ወርክ ሽቶ ቴርስጝስ፣ ካስካዋ ሜፃፍ ጝንካዳ እንኩርጝስ፣ ክንታንትካስ ሊሊቴ ፕሮግራሞ ፍሽጝስ ክንትፅጙ ፕሮግራም እይስታው አኽⶓ ቶኬምካ::

ዚጋሚ ትክላሊ ላጛንቲ አች ክንቲጝናሱ ጛሪ ስለሺ ፈንቴ ክንቲ ጝናታ አጌር አቡቑ ፍታኒዳ ክንታንትካ ኬሽኹሳ ዋይሜ ሜዜጌብፃንታ ፄውጝስ እክዶ ፍሽⶓ ጌሌፅካ:: ክንታንትካስ ጊዝ ማልጛ ፋይፃው አኽጝስ  እርዳቲ ፄውስታማጊ አኽⶓ ቶኬምካ:: ኻራ ሜፃፍ ጝና ብስስታያታ ንካማ ካሲኑ ካሲስ ዙራሙሪ ሰላሙ አኺኒ ቺጊርፂ አኽጝስ ክንታንትካዳ ችግር ታምባቲታ ፄውጝስ አኽⶓ ቶኬምካ:: ክንታንትካስ ፋይፃንኩሳ ሊሊትጙንኩሳ ሜፃፍካዋ ጄዌማ እንኩርⶓኪላ ጉሽካ::

ክንቲ ጝና ዝኩኽሳ አብቶ ክንታንትካውሳ ዋይሜ ኬሽጝፅጝዳ እሽፅጝስ እንፃኽስታው አኽⶓ እርዳትፅካ:: ክንቲ ጝናዳ ቼካማ ክንታንታ ፄውስታማ ዋይሜ ኬሽጝፅጝስ እንፃኽስታማጊ አኽⶓ ጉሽካ::

ዚጋሚ ወረዳው ክንቲ ፅፌት ጝናሱ አላፊ አቶ ሙሉአለም የኔው ወረዳታጊ 2018 ም/አታሱ ክንቲው ዝቤንዳ እምፕል ክንቲ ጝና ይቪቺ 12ንቲ ቤኑ አጌር አቡቑሳ ፍታኔ ፌቴንፃው አኽⶓ እርዳትካ:: ዚጋሚ ትክላሊ ላጛንቲ አች ክንቲ ጝና ይቪቺ 229 ክንታንትካዋ ፌቴንፅጝስ ቤዴራ ቴርቶ ፄዋማጊ አኽⶓ ጌሌፅካ::

ክንትፃንትካ ክንታንትካ ቼካማ ክንታኑሳ ፕሮግራሞ ጄሜርፅጝስ፣ ኬሽኹ ክንትፃንቲ ሜዴብስታማ፣ ሶኼትዴስ ሶኼቶ ፕሮግራም ፋማ ክንታንትካዋ እርዳታንታ ፄውጝስ እንፃኽስስታማጊ አኽⶓ ጉሽካ::

ወረዳታጊ አጌር አቡቑሳ ፍታኔ ፌቴንስትካማ ዩንቨርስቲሾ ቱዋንኩ ክንታንትካው ቼፍ ጊዝዴስ ጊዞ ኬሽጝጛማጊ አኽⶓ ቶኬምካ:: ፌይኹ አሜቱ ክንታንትካው ፌይጙ ምታኒ ሊኽዴስ 2 ትኩሚ 5 ታፋ አኽⶓ ኽይትጝፅካ::

ንጙዊኒ አሜትዳ ዴሜካ ፄውስትኹ ቤዴራ ቴርትዴስ ጁጝስ ኬሽኹሳ ዋይሜ ሜዜጌብፅጝስ ቴስፊ ዝኩⶓ ጉሽካ::

ቼካማ ክንታንኩ ክንታንትካ ጉሹኑ ኹርፂውሳ ችግሮ ኽይጝስ ጋማጋምⶓስታ ዲጊስ  ዋኽትጛው አኽⶓ ቶኬምካ::