ፋያኑሳ ምንግስቶ ጐሌልጝስ ቤዴራማ ቴርቶ ፄውጝ ቱስቲያኽ

ንግስቴ ተስፋ

ጉላሊ እዝቡ ፋይስታ ምንግስቱ ፖሊሲ፣ ዲሞክራሲስታ ውላቱዊ ቴኬምስታንት ቼሜትጛው ካይጝፂ ዳምቢያኽ እስታማ አምንስቴ:: ፖለቲካኩ ፓርትካ ጉላሊው ወክትዳ ስልታኖ እሚጝስ ናኒስ ኬሽኹሳ ስሩሳ ልማቶ ዲግስጝስ እዝቦ ቴኬማውሳ ቴግባሮ እንፃኽስታኑሳ ፖሊሴ ዲግስካማ ካሎ ቱዋና:: እንጚስ ባርኾቼኩ አጌርካዴስ ደቡብ ኮሪያ ምሳሊታ ቱኪምስቲ::

ጉላሊስ ስልታኖ እሜንኩ ጉሳንትካ እዝብስ ካሲስታንትካ አኽጝስ ሙስኒ ኔኬታንታ፣ ግልፄንት ዴሜካ ቼሜትጛታ ፄዋና:: እንጚ ዴሜካ ደቡብ ኮሪያ ቴክኖሎጂስስታ ኢንዱስትሪው ዜርፍስ አሌም አቡቕዳ ልኺትጛንታ ታኻታ ካሊፅⶓ ኮንግረስ ሜፃፍ ጝናሱ ንቫር ቶኬሜ::

ጋያኪ ጉላሊ ሰላሞ ኬቤርፅጝስ፣ ይኮኖሜ ሌጌፅጝስ፣ አሌምዳ እንኩዋኽስትስታ ቻቤልስት ዝኩኽሳ አጌሮ ፌቴርጝስ እንቲታኪ ሰላማዌ ማቤራዌ ታምትጜ ይስጝፅስ አጌላጌላው እጋዊ ሙሲሲኒያኽ::

እንጃቢሪ ኬቴሙ ዝኩዋንታ ዊዛሩ ምንትዋብ ካሳሁን ጛርትስስታ አጌራስ ቴኬማውሳ ምንግስቶ ጉሌልጝስ ፋዮ ካርድስ አቕፅጝ አጌር አቑ ግዲቴ አኽⶓ ዙሜካ:: ጛኪላ 7ንቲ አጌራዊ ጉላሊዳ ድምፆ እይጝስ ቴርትⶓ ድኹዌካ:: ጉላሊ ሰላምስ አሌድስታታ ውላጊ ሼውናማ ሜብቶስታ ግዴቴ ቤዴራማ አቕጝ ፋይፃው አኽⶓ ጉሽካ::

ዊዛሩ ምንትዋብ እያኑ ካንቲዳ ኹኑ ቴኬምስታንትስ ኬሻንቴ ፖሊሴ እሜማ ዲጋውሳስታ አጌራዋ ናካ ዝኪኹ ሰላሙ ችግርዴስ ካይፅጝስ ካሌ ንካማ አምናኑሳ ፓርቴ ጎሌልጝስ ፓርትካ ኻስካማ ዲጋኑሳ አሳቦ ሲፍጜካማጊ አኽⶓ ቶኬምካ::

ኹን እንግርግራ ናኑላ ጉላሊዳ አሴቴፍጜካማ ሰላም ዝኩትፃስታ ይኮኖሚስ ሌጌስቱፃ ይቶፒያዋ ክምንትስ አሬኬብፅጝስ ታምቦ ፊትጛንታ አሳቦ ዲግስካ::

7ንቲ አጌራዊ ጉላሊስ ካርዶ ካፅጝስ እይስታውሳ ጌርኮ ማንዲትጜካማጊ አኽⶓ ድኹዌካ::

ስጋዲ ኬቤሊው ዝኩዋንቲ አቶ ብርሃኑ ተረፈኪላ ጌፄሩ ዙራሙሪዳ ሚዲያው ታምብስታንት እላቲው ያኹኒውላ ብሽታንዳ ውማይቴንስታ ኬቤሊው አመራርካ ጉላሌ ካንትኹስ ንቫሮ ድኹዋንኩ አኽⶓ ዙሜካ::

ጉላሊውሳ ትክሞ እርዳትስትጝስ ሰላማዊ ዳድስ አጌርስታ አሬሳቻንትካዋ ቴኬማውሳ ፖለቲካውሳ ፓርቴ ጉሌልጝስ ፋያንኩ አኽⶓ ዲብስካ:: ክልልታ ሰላሙ ችግር ዝኩጝ አሬሳቻንትካው ውላቱዊ ልቕልቕቲዳ ቻኒስቶ ፌቴራማጊ አኽጝስ አጌራዋ ሰላማ ፄዋው ምንግስት ጎሌልስታታ ፋይ ዝኩክ አኽⶓ ቶኬምካ:: እንጚስኪላ ታምቦጊ ፊትጝጝስ ቴርትⶓ ጉሽካ::

እንጃቢሪ ዩኒቨርስቲዳ ፖለቲካ ሳይንሱ ፍልስፍኒው ክንትፃንቲ አለምነህ አጋጄ ጉላሊ ምንግስቱሳ ቻቤልስቶ፣ አምንስቶ፣ ካሲስታንቶ ቼሜትጝፅጝስ፣ አጌር አቕ ፋያኑሳ ፖለቲካውሳ ፖሊሴ ሲፍጝስ፣  ካሊፄ እስታማ አሌምዳ ዝኩንኩ አጌርካጊ ሲዚ አሜታዴስ እምፕላኒስታ አንኩዋ አሜታዴስ እምፕላኒ ጉላሌ ካስጝፃንታ እገ-ምንግስትዳ እንኩርስታስኩኽ አኽⶓ ኽይትጝፄካ::

ጉላሌ አምንስታንታስታ ዲሞክራሲያዊ ያኻታኪላ ጉላሊኩሳ ሜርህካዋ ኬቤርፅጝስታ ጉላሊው ምግባር ፅንታሳ ቼሜትጝፅጝ ውላዴስጊ ማንዲስታው አላፍት አኽⶓ ጉሽካ::

ምንግስትስታ ልኺትጛንትካ ፓርትካ ዴሜካ ሰላማዊ ያኹኽሳ አሳቡሳስታ ፖሊሲውሳ ልኺትጜ ካስጝፅጝስ ዲሞክራሲያዌ ጉላሌ ቼሜትጝፅጝ ማንዲስታኩ አኽⶓ ጌሌፅካ::

ጉላሌ አምንስትኹስታ ፍታዋ ያኻታ ጌሌልቴንካ ጉላሌ ፌፄምፃንትካዋስታ ታዜባንትካዋ ሜዴብጝኪላ ጉላሊ ቦርድዴስ ማንዲስታው ቴግባር አኽⶓ ቶኬምካ::

ክንትፃንቲ አለምነሁ ኽይትጝፂታጊ ምንግስት እጎ ኬቤርፅጝዳስታ ጊሊልቲኒስታ አምንስትኹ ጉላሊ ያኻታ ቤዴራ ስፌ ማንዳማ ልኺትጛንትካ ፖለቲካው ፓርትካ ፖሊሴስታ ማኒፌስቶዋ አቕትጝፅጝስ ካላኑሳ ዲሞክራሲውሳ ሜንድሬኾ ፌቴርጙ አላፍት ዝኩኽ አኽⶓ ጉሽካ::

ሰላማዊ ፓለቲካው ቻቤልጚ ዝኩዋታ ክልል ቺፋ ዶንጌትካማ ወሬምስ ካሴ ዙርፅጝስ ቡንክትጛንኩ አይልካጊ ወሬምዴስ ኪቻ አሳቡ፣ ፖሊሲው እንቲታኪ ማኒፌስቶው ልኺትጚስ ቴርቴካማ ጉላሊስ ጉዳዩ ኽያንታ አሳቦ ዲግስካ::

ምሁራንካኪላ 7ንቲ አጌራዊ ጉላሊ ኔፃ፣ ጊሊልቲኒስታ ዲሞክራሲያዊ ያኻታ ሚዲያስኪ ያኻ ሊሊትጙኽ ዳድስ እዝብስ ሼውቴ ፌቴርጝስ አጌር አቕቱሳ ግዴቴ ፊትጝጝ ፋይፃው አኽⶓ ቶኬምካ::

ፖለቲካው ፓርትካ ዴሜካ ሚዲያዳ ዲግካማ ላኹትጚዴስ፣ ክብሮ ኔክፃውሳ ካሎ ዲብስጝዴስስታ ቑሎ ፊትጚዴስ ፌካማ እዝብስ ቴኬማውሳ ፖሊሴ ዲግስጝ፣ አቕትጝፅጝ፣ ችግሮ ኽያውሳ አጌራዋስታ አጌር አቖ ፍንሾ ካይፃውሳ ፖሊሴ ኻሳማ ዲግጝ ማንዲስታንኩ አኽጝ ቶኬምካ::

አጌር አቕኪላ ኔፃኔትስ፣ ሜብቶስታ ግዴቴ ማሊጝስ እንቲታኪ ጛጛርትጛሳስታ አጌራዋ ቴኬማውሳ ፓርቴ ጎሌልጝስ ሰላማዊስታ ሌጌስቱት አጌራዋ ክምንትስ አሬኬብፅጝስ ታምቦ ፊትጛንታ ክንትፃንቲ አለምነህ አሳቦ ዲግስካ::