ስራስሪው እጂፂ ብስስትጝ ቹትካዳ ታንባሺኹሳ ችግሮ ይጉፃማጊያኽ

ታደለ አጋጄ

ስራስሪው እጂፂ ጝን ብስስትጝ ስራስሪው ቲንስታ ዴክት ማንዲስታታ ፄውጝዴስ ድምክና ቹትካ ምንግስቱ እንፅኺዴስ ይጉጝስ እንፅኺዳ ታምባሺኹሳ ቤዴሎ ይጉፅኹ አኽⶓ ስራስሪውሳ እጂፄ ቴኬምስታንኩ ቹትካ ዙሙና::

ዊዛሩ አገኘሁሽ ተረፈ ጉዋንጊ ወረዳ ኹንስታ ሰራስሪ ፅፌት ጝናስቲ ውማይቴናኽ:: ወረዳዳ ስራስሪው እጂፂ አግልግሎቴ እይⶓ ጄሜርጝስ ማልጛ ዴስቴና አኽⶓ ዙሜካ:: እምፕል አሜትስታ ዋልቲ አርፋሱሳ ጄሮ ስራስሪው እጂፂዳ ፄውጝስ ምንግስቱሳ እንፅኼ ዎክትስ እንፃኽስቴታ እርዳቱክ አኽⶓ ድኹዌካ::

ስራስሪው እጂፂ ምንግስቱ አግልግሎቲ ኾትዳ ጄሜርጝ ስራስሬ ዲጊዳ ያኻማ ቼፍጝጝስ ካሊፃው አኽⶓ ዙሜካ::

ቹትካ ስራስሪዋ ሌጌፃንኩሳ እንፃኽሰታንትካዋ  ክንቲዴስ ኬውጝፅጝሰ ኬፄርጝ ክንቴ አግፃንኩ ኹን እንፃኻሪዳ ታምባውሳ ችግሮ ይጉፃው አኽⶓ እንክርፄካ::

ስራስሪው እጂፂ ብስስትጝ ሰራስሪው ቲንስታ ዴክት ማንዲስታታ ኬፍቲኒ ትክም ዝኩኽ አኽⶓ ቶኬምካ:: ስራስሪው አንኩሊውስታ አካሉ ልግስስ ኬፍቲኒ ፍሺ ዝኩኽ አኽⶓኪላ ድኹዌካ:: ስራስሪ ምስሊ ድሚው አችዳ አግስታንኩ አኽጝስ ዴስቴንካ ያኼካማ ሌጌሳንታስታ ማይቤራዌ ታምትጜ ይስጝፃንታ ፄዋው አኽⶓ ጉሽካ::

ዊዛሩ አገኘሁሽ አባላምታ ጄራዋ ካሜንታታ ሊጊፂስ ምንግስቱ እንፅኺዴስ ይጉጝስ እንፅኺዳ ቻኒስቶ ቺፃሺⶓ ቶኬምካ ስራስሪው እጂፂ ብስስትጝስ ምንግስቱሳ እንፅኼ ሳትስ አግስቴታ እንፃኽስቴታ ፄውኽ አኽⶓ ዙሜካ::

ስራስሪው እጂፂዳ ስራስሪው እንክሪፂ ዝኩኽ ያኹስ ፃንኩት ማንዲስታታ ፄውስታማ ምግብስታ ቹዋውሳ አንጐ ፃኹዌካማ ሳትስ ሳቔናዋ አግፃንታ ፄውስታው አኽⶓ ድኹዌካ::

እሊት ጉዋንጊ ወረዳው ቺፅጝፂው ፅፌት ጝናዳ እክዱስታ ባጀቶ ሲፍጝጚው ውማይቴና ዊዛሩ ትግስት ሙሉነህ ወረዳዳ ስራስሪው እጂፂ ብስስታማ አግልግሎቴ እይጝስ ዴስቴና አኽⶓ ድኹዌካ:: ዊዛሩ ትግስት እንዴስ ቤዴራ ኽሳንታ ጄራዋ ካሜንጝስ ሌጌፁኑ ጊዝዳ ምንግስቱ እንፅኺዳ ስራዋ ቡያታ እሽቲኾ ቲያሺቲኹ:: ናካዳ ላጛ አሚቴ ጄሮ ስራስሪው እጂፂዳ ፄውጝስ ምንግስቱሳ እንፅኼ ዎክትስ እንፃኽስቴታ ፄውኽ አኽⶓ ድኹዌካ::

ምንግስቱ እንፅኺ ብታዳ ኩፕቲ ካስጛው ጊዛይ ቡይኹ ስር እሴማጊ አሬቤሽጝስ ቼጌርፃሺት አኽⶓ ቶኬምካ:: ናካዳ ስራስሪው እጂፂ ብስስትጝ ስራስሪ  ምንግስቱሳ እንፅኼ ዎክትስ እንፃኽስቴታ ፄዋው አኽⶓ ዙሜካ::

ጄሮ እንግርዳ ቡጝስ ምንግስቱሳ እንፅኼ እንፃኽስትጝ ማልጛ ይዝኩዊያኽ ኑንኩ ዊዛሩ ትግስት ቡስታማ ሌጌስኹ ስር አካልስኪላ አድርትኹ አኻቲታ ፄውⶓ ድኹዌካ::

ስራስሪው እጂፂ ስራስሪውሳ ፋይፃው አክኺ ዋኽትጛማ ሚንችካ ቹትካ ቴኬምስታንታ አኽጝ ቱስታው አኽⶓ ጉሽካ:: እሊው ምንግስትኩ ኾትካዳጊ እሳንጝጝ ቱስታው አኽⶓኪላ ቶኬምካ::

አዊ ብሄረሰቡ ቺፅጝፂው ኹኑስታ ስራስሪው ሜምሪው አላፋ ዊዛሩ አምባነሽ ስሜነህ ስራስሪው እጂፂ ጉዋንጊ ወረዳዳ ብስስትጝስ ምንግስትኩ እንፃኽስታንትካ ኹኖ ቴኬምስታንታ ፄውⶓ ጌሌፅካ:: ብሄረሰቡ ቺፅጝፂዳ አግስታንኩ ወረድካዴስ ስራስሪው እጂፂ ጝን ብስስቱኒውላ ጉዋንጊ ወረዳ ይቪቺዳ አግልግሎቲ እይስትⶓ ጉሽካ::

ውላ ወረድካዳ ስራስሪዉ እጂፂ ብስስታማ አግልግሎቴ እያታ ፄውጝስ እክዶ እሚⶓ እርዳትፅካ:: ስራስሪው እጂፂ ምንግስትኩ እንፃኽስታንትካ እንፅኼ እምፕላ ሼውትካማ እንፃኽስታንታ ስራስሪ ሜቴቴንጙኹሳ ምግቦ አግፃንታ ፄውስታው አኽⶓ ጌሌፅካ:: ስራስሪ ቹዋውሳ አንጐ ዲጊዳ ያኼካማ አግፃንታ ፄዋው አኽጝስ ስራስሪው አካሉስታ አንኩሊው ልግስስ ኬፍንኹ ትክሞ ዝኩኽስታ ስራስሪውሳ ሜብቶ ኬቤርፃው አኽⶓ ቶኬምካ::

እምስትኹ ባጄት አሜትዳ ውላ ወረዳዳ ስራስሪዉ እጂፂ ጝኖ ብስጝስ እክድ እምስትⶓ ጉሽካ:: ይጋሪ ዝኩፂ ጝንዳ ዝኩዋንኩ እምፕልታቕስ ስራስሪውሳ እጂፄ ብስጝስ እንፃኽስታንኩ አኽⶓ ቶኬምካ::

ቻ አጌሮ አሬኬብስታንኩ ስራስሬ ውላ እምፕልታቕ  ትኩት እይጝስ ጄርካዋ ሌጌፅጝ ቢዲሪ እንፅኺ ፄዌካማ እንፃኽስታንኩ  አኽⶓ ጌሌፅካ::