ኬሾ ካንትፅኹ እንፅኺ

ታደለ አጋጄ

ፍትሬቱሳ አብቶ ማንዲጚው እንፅኺ ኩሪስ፣ ንፋስስ፣ ክምካውስታ አቒው ኔክትጚስ ሺሽርስትኹሳ ብቴ አሉምቶ ዙርፅጝስ እሳንስ አኮሜችስታው ግብርኒው እንፅኺያኽ:: ዊዳፊ ፍትሬት አብቱስታ ተፋሰሱ ልማት እንፅኻ እምፕልትቖ ቴኬምስታንታ ፄውጝስ፣ ጌፄሩ ግብርኒውሳ እንፅኼ ስራ ፄውኽ ልማቱሳ ስትራቴጄ ሲፍጝስ፣ እንግራ ይጉዊ አሬስጙሳ ሴሎ ኪስጝስስታ ኩሪስ ሺሽርስትኹሳ ብቴ ዙርፅጝስ አኮሜችስታው ቴግባርያኽ::

አሬሳቻንትካ ሚንችካ አሜትካስ ጉዲስትኹሳ ብቴ  አሉምትሾ ዙርፅጝስ አሜት ቺፋ ውላ ዙራሙርካዳ እምፕልታቖ አሴቴፍጝፅጝስ ፍትሬት አብት ማንዲጚውሳ እንፅኼ አኮሜችካማጊ አግስታና:: ፍትሬት አብቱስታ ተፋሰሱ ልማት እንፃኽስስቱንኩ ዙራሙርካዳ ቴክልካዋስታ ኩፓኩፕካዋ ሊሚፅጙ ቴግባርስ፣ እንሴስካዋ ሌፍፅጙ እንፅኺስ፣ ፅኻራዋ ስኹፅጙስታ ዴኑ ልማትስ አሬሳቻንትካ ቴኬምስታንታ ያኼካማጊያኽ::

ፍትሬት አብት ማንዲጚው እንፅኺስ ኬሽኹሳ ኪሴ ካንትፅኹ ዙራሙሪዴስ እምፕል ፋግቲ ለኮማ ወረዳኽ:: ስልኪስ ካንቴ ታምፁንኩ ጊዚኺሪ ኬቤሊው አሬሳቻንቲ ገረም ብዙነህ ተፋስሱሳ ልማቶ ጄሜርጝዴስ ቤዴራ ብቲ ኩሪስ ድኻማ አሬ ዋግፃቲው እሺኹ አኽⶓ ድኹዌካ:: ግብርኒው ውማይቴንካ አሬሳቻንትካዋ ቴኬምስታንታ ፄውጝስ፣ ኽብፂው አሉምት ካቲታ  ፍትሬት አብቱ እንፅኺስ እርኬኖ ግቢትፅጝስ እርዳቴ ፄውⶓ ጄሜሩኑ ጊዝዴስ ናቴ ግብርኒው እንፅኺስ ኪሴ ካንትⶓ ዙሜካ::

አሬሳቻንቲ ገረም ዙሙኑውስታጊ ፍትሬት አብቱ እንፅኺ ጄሜሩኒዴስ ናቴ ካጊ እሺኹ ብቲ አሉምትሾ ዙራ፤ ዜራኑ ሴብልዴስ ኬሽኹሳ ምርቶ ዋግፃና:: አሊ ፊⶓ ጄሜራ:: እንዳራኪ ዋግፃቲው እሺኹ ብቲ ስምኬ፣ ዱኒዜ፣ ስንዳዮስታ እሊኩሳ ሴብልካዋ ዋግፅⶓ ድኹዌካ::

ካናጋሚ ያኹኽስታ እርኬን ግሽስታቲው ስፍሪዳ ዴሜካ ቴክሎ ቴኬልጝስ ኽብፂ ኩሪስ ሺሽርስታማ ካቲታ ፄዌካ::

አሬሳቻንትካስ ብቲ ይዎት አኽጝስ ፍትሬት አብቱ እንፅኺስ ሊሊቴ ትኩቶ እይካማ እንፃኽስትጝስ ዝኩዊኒዳ ኪሴ ካንትፅⶓ ድኹዌካ::

አሬሳቻንቲ ገረም ኑኑውስታጊ ፍትሬት አብቱ እንፅኺ እንፃኽስስትኹ ብቲዳ ምርት እፅፍስ ዴሜካ:: ሚንቾ አቓ ግብሬ ማዳባሬ ፋያሺኹ ብቲዳ ልቓ ማዳባሬ ቴኬምስትጝስ ምርቶ ዜራና:: ሴብል ኩሪስ ኹስታላ:: ፍትሬት አብቱ ልማት እንፃኽስስትኹ ብቲዳ ኬሽኹ ምርት አግስታው አኽⶓ ጉሽካ:: ሲፋውስኪላ ተፋሰሱሳ ልማቶ ይስጝፄካማ ሲፍጝስ እንፃኽስታንኩ አኽⶓ ቶኬምካ::

እምፕልታቕስ ተፋሰሱ ልማትዳ ሼውቲ  ጛው ፋይስ እንፃኽስታንኩ አኽⶓ ድኹዌካ:: እሊው ኬቤሊስጊ ዴስ ያኻውሳ እንፅኼ አኮሜችⶓ ሼውፅካ::

ኪስ ዋሲሁን ሰውነትኪላ ጊዚኺሪ ኬቤሊው አሬሳቻንቲያኽ:: ግብርኒው እንፅኺዴስ ኬምፕስ ኬምፖ ፍትሬት አብት ልማቱሳ እንፅኼ አኮሜቻና:: ፍትሬት አብቱ ልማት እንፃኽስትⶓ ጄሜርጝዴስ ቤዴራ ብቲ ጌላ ያኻማ ሴብሎ ዋግፃቲው እሺⶓ ዙሜካ::

ጛ ዝኩዋኑ ዙራሙሪ ካናጋሚ አኽጝታጊ ሊሙኽ ኽብፂ ኩሪስ ሺሽርስታማ ካሳሺኾ:: ብቲ ጋኻ ያኻማ አቕስታ እንሴስካዋ ፌይፃቲው እሼ:: ናካዳ ኩፅኒ ፍትሬት አብቱ ልማትስ ጋኻ ያኹኽሳ ብቴ ዙርፅጝስ ካሌካ:: ብቲዳ እርኬኖ እንፃኽስትጝስ ኬሽኹሳ ምርቶ ዋግፅⶓ ጉሽካ::

ኪስ ዋሲሁን ዙሙኑውስታጊ እርኬን እንፃኽስትኹ ስፍሪዳ ኩሪ ጁዋላ:: ዲፒ ቲሬማ ብቲ ክዮ ዋግፄ፤ አሬሳቻንትካው ዝኩዊኒ ኪስስታ:: ክምካ ፌካማ ቱዋቲኑ እሺኹ ብቲ ዙራማ ኬሽኹሳ ትክሞ እይⶓ ድኹዌካ:: ግብርኒው ውማይቴንካ አሬሳቻንትካው ዝኩዊኒ ኪስስታታ ኩስጜ ቤንጝፃንኩ አኽⶓ ቶኬምካ::

እሊት ጊዚኺሪ ኬቤሊው አሬሳቻንታ አብዮት መላኩ ተፋሰሱሳ ልማቶ ግብርኒው ውማይቴንካዉ ኩስጚ ስሬታስ እንፃኽስትካማጊ አኽⶓ ድኹዌካ:: ውላ እምፕልትቖ አሴቴፍጝፃው እንፅኺ አኽጝስ ማቢሪስ አችትጜካማ እንፃኽስትⶓ ጉሽካ:: ጛ ዝኩዋኑ ዙራሙሪዳ ችግኞ ቴኬልጝስ ብቲው አሉምት ዙራታ ፄውⶓ ዙሜካ:: ችግኝ ኮቺስትኹ ብቲ ዙራማ ካግⶓ ጄሜራኒ ችግኙ ቴኬልጝስ ቴርትⶓ ዲብስካ:: ፍትሬት አብቱ ልማት እንፃኽስስትኹዳ እንሴስካ ቱዋቲንታ ፄውስታማ ማንዲስታው አኽⶓ ዙሜካ::

ጊዚኺሪ ኬቤሊው ግብርኒው ውማይቲኒ አስማማው ቢተው ፍትሬት አብት ማንዲጚው እንፅኺ ጊዚኺሪ ኬቤሊዳ ኬሽኹ ዳድስ እንፃኽስታማጊ አግስታው አኽⶓ ጌሌፅካ:: 26 ሄክታር ብቲዳ ፍትሬት አብቱ ልማት ስታ ሊሊትጙንኩ ፍትሬት አብት ልማቱ እንፅኽካ አኮሜችስትⶓ ጉሽካ::

ፍትሬት አብቱ ልማት እንፃኽስትኹ ስፍሪዳ ክምካ ቱዋቲንታ እፅስታማ ማንዲስታው አኽⶓ ጌሌፅካ:: አሬሳቻንትካው ብቲዳ እንፃኽስትኹሳ እርኬኖ ክምካስ ፌሬሳቲታ አሬሳቻንትካስ ፌሬምፅጝስ አሬኬብፃንኩ አኽⶓ ቶኬምካ::

ዙራሙሪዳ ሺሽርስትኹ ብቲ ዝኩኽ አኽጝስ ብቲው አሉምት ኩሪስ ሺሽርስታማ ካቲታ ፄዌካማ እንፃኽስትⶓ እርዳትፅካ:: ችግኝ እሺኹ ብቲዳ ችግኝ ኮቺስታማ ድኽጝስ ብቲ ኩሪሳ ሺሽርስታማ ካቲታ ፄውስታማ እንፃኽስትጝስ ስታማጊ አኽⶓ ጉሽካ::

ፋግቲ ለኮማ ወረዳዳ ግብርኒ ፅፌት ጝናሱ ፍትሬት አብት ልማቱ ኬቹ ጉሳንቲ ምንይችል ነጋ ወረዳዳ አግስታንኩ 27 ኬቤልካው 59 ተፋሰሱ ልማት እንፃኽስታው ስፍሪ ጎሌልስታማ ቴሳስ እምፕልዴስ ጄሜርካማ እንፃኽስትካማጊ አኽⶓ ጌሌፅካ::

ትክላሊስ ወረዳታ 2ሻይ 90 ሄክታር ብቲዳ ፍትሬት አብቱ ልማት እንፃኽስትጝስ አኬድስታማ 2 ሻይ 185 ሄክታር ብቲዳ እንፃኽስትⶓ ቶክምካ::

እንዴስ ፍና ወረዳዳ ብቲ ካጋማ አሬ ዋግፃቲው እሺⶓ ቶኬምካማ አሬሳቻንትካ ፍትሬት አብቱ ልማትስ ዝኩዊኒ ኪስስትⶓ ጉሽካ:: ዎታትካስ እንፅኺው ድል ፌቴርስታታ ፄውስትⶓ ቶኬምካ:: ኽብፂው ማዳባሪስ ፍሻኑ ፍሺ ኔኬታማጊ አኽⶓ ጉሽካ:: አሬሳቻንትካ ኽብፄስታ አኾ ማንዲጙ እንፅኺዴስ ድምክና ብቲዳ ቴክሎ ቴኬልጝስ ብቲው አሉምት ዙራታ ፄውስትⶓ ቶኬምካ::

ፍትሬት አብቱ ልማት ሴብሉስኪ ያኻ እንሴስካው ልማትስ ቹዋ ስር አኽጝስ ፍትሬት አብቱ ልማት እንፃኽስስታውላስ ይጉኒጊ አሬሳቻንትካ ድኽትሾ ቱጝስ ካላንኩ አኽⶓ እርዳትፅካ:: ዴኑ ልማትስ አሬሳቻንትካዳ ዴስ ዝኩክ አኽጝስ አግፃኑሳ ትክሞ እርዳትስትጝስ ውላ ዙራሙርካዳ ጁትጚስ እንፃኽስቴካማጊ አግስታንኩ አኽⶓ ኽይትጝፅካ:: 35 ተፋሰስ ልማቱ ማቢሪ ቲሪትጛማ ግቢትስትኹ ፌሬሳቲታ ጛስጛዋ ማንዲትጜካማጊ አኽጞ ጌሌፅካ:: ፍትሬት አብቱ ልማት ይካቲት 30ኺስታ እንፃኽስታው አኽⶓ ቶኬምካ::