እንፅኼ ሳሴርፃው ቴክኖሎጂ

አለሚቱ የኔት

አሳንሰር አኹኪ ሊፍት ንጝ አቕ አኹኪ አክኼ እንፃኻዳ ልቓ ሀዲድካሾስ ቲሬንቲ ዳድስ ፎክዴስ ፎክሾ እንዜጝትጝፃው ኤሌክትሪኩ ሞተርስ ልቕልቕናው ሜሳሪያኽ:: አሳንሰር አኹኪ ሊፍትዴክት ማንዲስትኹ ያኻታ አሬኽቱሳ ቼፍጝጜ፣ ዴክቱሳ ብሬኮስታ ቤር ኩሊፍፂ ሲስተምካ ጌቴምስትካዩኑዊያኽ::

ቻይና ጉዋንግዡ ኬቴምዳ አግስታው ሲቲኤፍ ፋይናንቫል ሴንተር ድባኖ ኔክፅጝ ኬፍኑንኩ እንፃዋ፣ አሌሙ አሬኻንቲ አሳንሰር አኹኪ ሊፍት ዌናኽ::

ቲሪኪላ 530 ሜትር ያኻው እንፃው ወሌል ዴሜካ 111 ብቲዴስ ጃላስታ አንኩዋ ብቲዴስ ኩክራ ፎክካ ዝኩኑ ያኹኒኪላ አቑሳ አንኩሌ ጉሱኽ “ብቲው ሮኬት” እስታንኩ ላጛ ሂታቺው አሳንሰርካኽ አኹኪ ሊፍትካኽ::

95ንቲ ፎክሾ ታምብጝስ ልኩስ እንዜጝጝስ ሜንችካ ደኪካዋ ካፅጝስ ካሌ:: አሳንሰርስ አኹኪ ሊፍትስ ያኹኒ ኩፅኒ ሰላምቲስ ዋቺኹናማ ዙርሚ እይስታውላ አሊዴ ፎኮ ታምብጝስ ካሊስቴ:: እኒ አሳንሰርካ አኹኪ ሊፍትካ አቕ ብቲዴስ ጁዌካማ 95ንቴ ፎኮ ታምፅጝስ አሌዳው ጊዝ ኩፅኒ 43 ሴኬንድ ይቢቺያኽ::

ሳትስ 72 ኪሎ ማትሮ (44 ትኩሚ 7 ማይሎ) እንዜጝጝስ ቤዴር ኑስ ታይፔስ 101 ፎኮ እሚሺኹሳ 61 ኪሎ ሜትሩ አሬኽቱሳ ክብረ ወሰኖ ኽሳታ ፄዋ:: ማንዲስካ አሳንሰሮ አኹኪ ሊፈቶ ሩብሊውሳ ንፋሶ ቲሪትጝⶓ ኔኬታታ ፄዌካማ ኬሬፅካ:: አኽስኪላ ማልጜ ሳሴርስታ አይሊና ያኹንኩ ማግኔቱ ሞተርካ ጌቴምስትካይካ::

ኬፍቲኒ አሬኽትስ ጃላሾ ፋኒስ ፌቴርስታው ኬፍቲኒው ኪሲ እንኮኺዳ ቻኒስቶ ፌቴርጝስ ካሌ:: ያኼስጉ እን አሳንሰር አኹኪ ሊፍት ጚጛራሱ አይሩሳ ሺንኬ ቼፍጝጛው ዝኩኽ አኽጝስ ብቲዳ ዝኩንኹሳ ኮው አኺኒ እንኮኽስታታ ፄዌ:: ዋሺኔኪኮውሳ ንዝሬቶ ካላካልጛታ ፄውስታማ ግቢትስትኹ አኽጝስኪላ ኽቴናቴ ወዠወዥናንውላ ሰላምስ ታምፂሾ ታምባና::

አሳንሰር አኹኪ ሊፍት እንሱ አሬኽትስ እንዜጙስ ታክሲሎ 300ዲግሪ ሴንቲ ግሬዶ ታምባውሳ ኬፍቲኔ እንኩዊንቶ ቲሪትጝጝስ ካላታ ፄውስታማ ግቢትስትⶓኪላ ኦዲት ሴንተራል ዜጌባ::

ትክላሊስ እንፃኻዳኪላ 95 አሳንሰርካ አኹኪ ሊፍትካ ዝኩኒኪላ እኒ ላጛ ኩፅኒ አቒያሱ ምህንድስኒው ትቤብ ዋሳ ታምብⶓ አሌምስ ካንትፅካማጊ አግስታና:: ንባሮ አግፅንኹኪ ኢቢሲዴስያኽ::