ካቢትጝፃማ አሬስጝ ምርታምት ዴሜካታ ዝኩኽ ፍሺ ኬፍንኹያኽ

ታደለ አጋጄ

እርሼ ሳኑዳ ካቪትጝፃማ አሬስጝ ምርት ዴሜካታ ካሊፃዉ አኽⶓ ዚጋሚ ወረዳው አሬሳቻንትካ ዙሙና::

አሬሳቻንትካ ጛውሳ ዝኩዋኔ ኬሽጝፅጝስ እንቲታኪ ምግቡሳ ዋስትኔ ቼሜትጝፅጝስ ግብርኒውሳ እንፅኼ ይስጝፄካማ እንፃኽስታና:: ኬሽኹሳ ሴብሎ ዋግፅጝስ ፄውስታው ፅሬትዳ ግብርኒው ውማይቴንካውሳ ኩስጜ ቻቤልካማ ሳኑዳ እርሼ ላሳላስፅካማ አሬሳና::

ቢሪው  ግርብዳ ስርታማ እጂኹሳ ግብርኒውሳ እንፅኼ ናካዳ ትራክተርስ አሬስጙ ግብርኒው ሜካናይዜሽንሾ ቱጝስ እንፃኽስታና:: አሬሳቻንትካ ችኹ ዎክትዳ አሜሬታንኩ ሊሊትጙንኩ ሴብልካስ ናካዳ ጄሜርካማ ቤዴራ ቴርቱሳ እንፅኼ አኮሜችካማጊያኽ:: አውጚው ቴሌብጂንስ ንባሮ እዩንኩ ዚጋሚ ወረዳው አሬሳቻንትካ ሳኑሳ እርሺውሳ እንፅኼ እንፃኽስትካማጊ አግስታንኩ አኽⶓ ዲብስካ::

ክብሩ ተሰማ ዚጋሚ ወረዳ አኺቲ ኬቤሊው አሬሳቻንቲ ያኻኒስ ሳኑሳ እርሼ ትራክተርስ አሬሴካማጊ አኽⶓ ዙሜካ:: እርሺ ሳኑዳ ካቢትጝጛማ አሬስስታኒ ኬሽኹ ምርቱ ድምከኒ ዝኩⶓ ዙሙንኩ አሬሳቻንቲ ቤራስ ሳኑዳ አሬስጝስ ማልጛ ይዝኩዊ አኽጝስኪላ ትራክተርስ አሬስⶓ ድኹዌካ::

እርሺ ሳኑዳ አሬስስታማ አዊስ ታስስታኒ አሪሜ ኔኬታማ ምርት ኩፅኒ ዴሜካው አኽⶓ ቶኬምካ:: ሴብል ዋጉኒዴሰ ፋሌንጋ ኹዋንቲስ ድሳቲታ ሳኑ እርሺ ኬፍንኹ ፍሺ ዝኩኽ አኽⶓ ዲብስካ::

ሳኑዳ ትራክተርስ አሬስስትኹሳ ብቴ ቤራስ ጌሌቤትጝፄካማ አሬስጝስ ኬሽኹሳ ምርቶ ዋግፅጝስ ፅሬቶ ፄዋንኩ አኽⶓ ድኹዌካ::

ግብርኒኩ ውማይቴንካውሳ ኩስጜ ቻቤልካማ ችኹ ዎክትስ ፋይፃውሳ ግባቶ ጄውጝስ ቴርትⶓ ቶኬምካማ አሬሳቻንትካ ኬሽኹሳ ዝኩዊኔ ጉሳንታ  ኩስጜ ቤንጝፃንኩ አኽⶓ ዲብስካ::

እሊው አኺቲ ኬቤሊው አሬሳቻንቲ ዳምተው እንየውኪላ እርሺ ሳኑዳ ካቢትጝጛማ አሬስስታኒ ብቲው አሉምት ዴሜክጝስ ኬሽኹሳ ምርቶ እያው አኽⶓ ድኹዌካ:: ሴብሎ ድፃውሳ አሪሜ ኔኬታታ ፄዋው አኽጝስ ምርቱ ድምክኒ ዝኩዋው አኽⶓ ቶኬምካ::

ጛኪላ ችኽዳ ዜራኑ ሴብልስ ሳኑሳ እርሼ አሬሴካማጊ አግስታንኩ አኽⶓ ዙሜካ:: አሬሳቻንትካ ዴስስ እሪ እሉዋውላስ ብቲ አሬስስታላኽ ናው ዴስዴስ ፊⶓ ቶኬምካ:: ቢሪስ አሬስጝስ ማልጛ ቼጌርፃው አኽጝስኪላ አሬሳቻንትካ ትራክተሮ ክራይትጝስ እርሼ ላሳላስፅካማ አሬስካማጊ አኽⶓ ዲብስካ::

ሚንቾ ብቴ እሜማ ጉድጛ አሬሳኑላስ ዜርጝዴስ ኪቻ ልቓ ብቴ ካቢትጝፃማ አሬስጝስ ሴብሎ ዜራኒ ኬሽኹሳ ምርቶ አግፅጝስ ካሊስታው አኽⶓ ቶኬምካ::

አኺቲ ኬቤሊው አሬሳቻንታ ብርኬ ትላሁን ጛው ዙራሙሪዴስ ሳኑሳ እርሼ ቢሪስ አሬስጝዴስ ፌካማ ትራክተርስ አሬስጝስ ላሳላስፅካማጊ አኽⶓ ዲብስካ::  አሬሳቻንትካ ምርት ዴሜካታ ግብርኒው ውማይቴንካ ኩስጝፃኑ ስሬታስ እርሼ ዎክትስ አሬሴካማጊ አኽⶓ ድኹዌካ:: ችኽዳ ታፊ፣ ሹምቢ፣ ቤርቤርስታ ፄጌርጙንኩሳ ሴብልካዋ አሜሬትጝስ ቴርትⶓ ዲብስካ::

ሳኑ እርሺ አሪሚ ዋጋቲታኪላ ፄዋው አኽⶓ ዲብስካ::

ቤዴራማ ትራክተርስ አሬስስትኹ ብቲ ኬሽኹሳ ምርቶ እያው አኽጝስ አሬሳቻንትካ ግባትስ ሚንቾ ጌንዜቦ ፍሽጝዴስ ኪቻ እርሼ ካቢትጝፃማ አሬስጝስ ጉዶ ምርቶ አሜሬታንኩ  አኽⶓ ዲብስካ::

ችኽዳ ዜርስታው ሴብልስ እርሼ ጌሌቤትጝፄካማ አሬሳንታ ግብርኒኩ ውማይቴንካ ኩስጝፃንኩ አኽⶓ ድኹዌካ::

ዚጋሚ ወረዳው ግብርኒ ፅፌት ጝናዳ ሴብል ልማቱ ውማይቲኒ ሀብታሙ አብዬ እንዴስ ፍና ሚንቾውላ ዴስስታያሱ እሺኹ ሳኑ እርሺ ዲጊዴስ ናቴ ትራክተርስ  አሬስታታ ፄውስትⶓ ጌሌፅካ:: ወረዳታጊ አሬሳቻንትካ ሳኑሳ እርሼ ቢሪስኪ ያኻ ትራክተርስ አሬሴካማጊ አኽⶓ ቶኬምካ:: ምስሊስ ዜርስታው ሴብልስ ሳኑዳ ብቲ አሬስስታማ ላሳላሳታ ፄውስታማጊ አኽⶓ ጉሽካ::

ግብርኒው ቢሩ ፌቴርኹ እስካዊ አችትጝጚስ አሬሳቻንትካ እምፕልትስ እርዳትጜካማጊ እንፃኽስታንኩ አኽⶓ ጌሌፅካ::

እርሺ ሳኑዳ አሬስስታኒ አሪሚስታ ኹዋንቲ ድሳታ ፄዋው አኽጝስ ምርቱ ድምክኒ ዝኩዋው አኽⶓ እርዳትፅካ::

ችኹ እርሺስ ያኻውሳ ግባቶ አሬሳቻንትካስ ታምባታ ፅሬት ፄውስታማጊ አኽⶓ ጉሽካ:: እንኮጛ ቱዋማ እጂኹሳ ጉልሌ ዜሮ ካፅካማጊ አኽⶓኪላ ቶኬምካ:: ዎክትስ እርሼ አሬስጝስ ኬሽኹሳ ምርቶ አሜሬትጝስ ካላንታ ሳኑሳ እርሼ አሬሴካማ ላሳላስፅጝ ቱስታው አኽⶓ ጌሌፅካ::

ችኽዳ ዜርስታው ሴብልስ ውላ አሬሳቻንትካ ሳኑሳ እርሼ ካቢትጝፅካማ አሬሳንታ እንፅኼንቶ ፌያፌይጝፄካ::