ክልኾ ይጉፅኹ አግልገሎቲ

ንግስቴ ተስፋ

እዝቡ ትራንስፖርቱ እያንትካው አግልግሎቴ እይጚው ዳንጉዊጝስ መናሀርካኻዳ ካንትስታው ኽቴ ናቴ ጊጝትጚ፣ ግርብስ ቡንክትጛማ መኪናሾ ቱጚ፣ ንብሬቶ ዳዴኽጝ፣ እግ እላቲውሳ ፄጌራው እንፃኽስትጚስታ ኬቬቬርጛውላ ይጉጝጊ ግልፅስ ካንትስታው ብቲ እሺኾ:: ችግሮ ኽይጝስስታ እምቢት ንኹሳ አግልግሎቴ እይጝስ ኩፅኒ ቴክኖሎጂስ አጌዝስትኹሳ ኢ-ትኬቲንጉሳ ሲስተሞ ቴግባርዳ እሽፅጝስ ጄሜርስትኹ እንፅኺ ሚንችካስ ፉሬ እያ::

እንጚኪላ 2016 ምሬት አሜታዳ ዋልታ መናሃርካዳ ሙካሪታ ጄሜርስታማ ናካዳ አማኻሪ ክልልዳ ዋኽስዋኾ ቴግባርዳ እሼማጊያኽ:: ክልልዳ አግስታንኩ 252 መናሀርካዳ ታምብስታንታ ፄውጝስ እንፅኺ ይስጛማ ሲፋ::

አማኻሪ ክልሉ ትራንስፖርት አግልግሎቲው ዜርፍ እንፅኼ ጄሜርኹ 1968 ምሬት አሜታ ደብረ ማርኮስ፣ ወሉስታ ጎንዴርዳ መናሃርካዋ ቲሪትጝፅጝስ ያኼስጉ ናካዳ ክልልዳ ዋኽስዋኾ ዝቤን ካሴው እንፃኽስትጚሊ ፃምርትጛማ ይስኹ አኽⶓ አማኻሪ ክልል ትራንስፖርትስታ ሎጂስቲክስ ስልታን ዌና “ጉዞ” ናው ሜፄትዳ ፍሽኹ ንቫር ካንትፄ::

አማኻሪ ክልልዳ አግስታንኩ ሊጊሲሚ ዝቤንስ አግልግሎቴ እያንኩ መናሃርካዴስ አገው ግምጃቤት ኬቴሙ ቺፅጝፂዳ አግስታው መናሃሪ እምፕሊያኽ:: መናሀሪ አግልግሎቴ እይⶓ ጄሜሩኒዴስ ዝቤንካዋ ቼፍፁኒውላ ቱስቲስ አጌላጌልጝዳ ኩፅኒ ሚንችካውላዳ ክሬቴ ፌቴራ::

ክልልታ ቴግባርዳ እሼታ ጄሜርስትኹ ቴግባር ኩፅኒ እሺኹሳ ዳንጉዊኔ ኔኬትጝስ ካሊፃው አችዳ አግስታው አኽⶓ ቴኬምስታንትካ እዩኑ አሳብዳ ጉሽካ::

ጌርክ ቺፋ ግ/ቤትዴስ አዚኔ ትራንስፖርቶ ቴኬምስታንኩ ክንትፃንቲ አብርሃም የኔት እዩኑ ካንቲዳ ኢ-ትኬትንግ ጄሜራውላስ መኪናዋ አግፅጝሱላ ቼጌርስታሺኑሳ ጊዞ ታክሳና:: መናሀሪዳ ቱዋማ ቴሮ ማንዳማ ቻናው መኪናኪላ  አግስታቲውሳ ጊዞ ፌይፁንኩ አኽⶓ ዙሜካ::

አሜትዴስ ናቴ ኩፅኒ ኢ-ትኬትንግ ቴግባርዳ እሽጝ እግ ኬቤርስታታ፣ እንዜጛንትካ /ዳድቴን/ ቼጌርስታኑላ ቴሮ ማንዴካማ ፋያኑ ዙራሙሪሾ እንዜጛንታ እድሎ ፌቴርⶓ ድኹዌካ::

ዝኩፂ ጝንስታ ጝን አቕ አግስታኑ ግ/ቤት ኬቴምዳ ያኹኒውላ ኬፄርስትካማ እንፃኽስታኑ ኩፅኒ አዚኒ ኬቴምዳ አኽጝስ  ዙራዙራማ እንፃኽስትጝ ጉላላ ጋው ያኻ:: ጌርክ ቺፋ ትራንስፖርቶ ቴኬምስትጝ ግዴቲ አኽጝስ ኢ-ትኬትንግ ቴግባርዳ እሺጝ አንጌሌትስትጞ ይጉፅጝዴስ ፌይኹስ ጊዞስታ ጌንዜቦ ኬሴራቲንታ ፄውⶓ ድኹዌካ::

እሊውስ ዴሜካ ኢ-ትኬትንግ ቴግባርዳ እሺኒዴስ ፌያፌያማ መኪናው እንፂጝ ጌቴማኒ ፐርሰንትስ ኬታን እስትካማ እንኩርስትኹ ታሪፍዴስ ጃላ ኬይፅጝ ናካኪላ ችግርታ ዲጋው አኽⶓ ጉሽካ:: እን ዴሜካ እምፕልታቖ ቼጌርፂ አኺኒሾ ሚፃው አኽጝስ ትኩታው አካል ችግሮ ኽያታ ካንቴ እይካ::

ዊዛሮ የትነበርሽ ከበደኪላ ግ/ቤት መናሀሪዴስ እንጃቢሪ ኬቴምሾ ጊፁ እንፅኺስ ዙራዙራንኩስታ ጝን አቖ ጎቤንጛ ካሳኒስ ትራንስፖርቶ ቴኬምስታና:: ቤዴራ ኹን ሺንኪትጜካማ ቱጝስ ቼግርስታንኩ አኽጝስ ደላሊስ ብሮ ኬየካማ ወንቤሮ እሜያንታ ፄዋሺንኩ አኽⶓ ድኹዌካ:: ኹን ሳትስ ትራንስፖርቶ አግፄካማ ካስጝስኪላ ቼግርስታሺካ:: ጋያኪ ቹትካ ስራስራዋ እሚንኩ፣ ሼርካ /ንፍስ ፁርካ/፣  ሹማጌልካስታ አካል ጉዳቴን ትራንስፖርቱ ዜርፍዳ ጉዲስታንትካስታ ቱስቴ አግልግሎቴ አግፅጝስ ቼጌርስታሺንኩ አኽⶓ ቶኬምካ::

ዊዛሮ የትነበርሽ ናኑውስታጊ ኢ-ትኬቲንግ ጄሜሩኒዴስ ኩፅኒ ወረፊ ዝኪኒውላ ዋሺኒኪ አቒ ሺንኪትጛውላ ቤዴራ ሲፊስ ቴሮ እሜማ አጌላጌልስታው እንፃኽስትጚ ዝኩⶓ ጉሽካ:: እንኩርስትኹሳ ታሪፎ ኬይጝስ እንዴስ ቤዴራ ፍሻሺኑሳ ቱስታ ጋውሳ ጌንዜቦ ይጉፅⶓ ዙሜካ:: ሜዴብስትኹ ወንቤርዴስ ጃላ ቻኒጝኪላ ኢ-ትኪቲንግስ ፌኬድስታቲው አኽጝስ እግ ኬቤርስትⶓ ድኹዌካ:: “ጌቤል ሼቤራኒ ዳዲኺስ አዳዲ” ናኒስታጊ መናሀሪዳ ሺንኪትጛኒስ ክችስ ቱዋው ዳዲኺስታ ደላሊኪላ ናካዳ ይጉጝስ ሴኬኬና ጋቲታ አግልግሎቴ አግፄካማጊ አኽⶓ ጉሽካ::

ፌያፌያማ መኪናውስታ ትራንስፖርቶ ፋያንትካው ቼፍ ሜቴቴንጛውላ ይጉዋኒ ቼጌርስታንኩ አኽⶓ ጉሽካ:: እንሳ ኩፅኒ ስምሪትካስታ ኢ-ትኬትንጉ ቴቬቬርጝፃንትካ ካንትካማጊ መኪናዋ ሜዴባንታ ካሴ ዲግስካ::

ሹፌር አምሳሉ ሁነኛው ኪላ ትራንስፖርቱ ዜርፍዳ አሴሜርጜካማ ሊጊሲሚ አሜትስ እንፃኽስቴካማጊ አግስታና:: ኢ-ትኬትንግ እሺያሱሳ ወክቶ ታክሳኒስ ዳድቴን መኪናኻዳ ቱኒዴስ ፋሌንጋ ጌንዜቦ ኬታን ኬታላዳ ጋቻ ፌቴርስታሺኹሳ ጊዞ ታክስካ::

ኢ-ተኬትንግ ቴግባርዳ እሽጝ ኩፅኒ ውላጊ ጚውሳ ግዴቴስታ ሜብቶ ሺሻማ እንዜጝትጛታ ፄውⶓ ጉሽካ::

ቱስታ ጋው ሹፌርካው ልኺትጚዴስ ፊጝስ ሜዴብስቱኑ ቤዴራ ሲፊስስታ ቴርስ እዝብስ አጌላጌላንታስታ ቱስቴ ሚፄ አግፃንታ ካሊፅⶓ ቶኬምካ:: አዲጊ ኔኬታታ ኪላ ምክንያታ አኽⶓ ዙሜካ::

አገው ግ/ቤት መናሀሪዳ ኢ-ትኬቲንጉ ቴቬቬርጝፃንታ ዊዛሩ ወለተፃድክ ይግዛው ጛሾስ ኢ-ትኬቲንግ መናሃሪዳ እሺኹሳ ድጙትጜስታ ቱስታ ጋቲውሳ ልኺትጜ ይጉፅⶓ ጌሌፅካ::

ትራንስፖርቱ ዜርፍዳ እሺኹሳ አንጌሌትስትⶓ፣ ታሪፍዴስ ጃላ ኬይፅⶓስታ ፊቴ ቻኒⶓ ቼፍጝጝስ ካሊፅኹ እንፃኽስትጚ አኽⶓ ኽይትጝፄካ::

ፌያፌያማ ትራንስፖርቱ ፋያንትካውስታ መኪናው ፋይ ሜቴቴንጛውላ ይጉዋኒ ሜሜሪ ፌኬዳውሳ እንፃኽስትጜ ቴግባርዳ እሽፅጝስ ፐርሰንትስ ታሪፎ ዴሜካማ ችግሮ ኽይጝስ እንፃኽስታኑ እንፅኺዳ ፌያፌያማ ክሬቲ ዲጋውሳ ፋዮስታ ሜሜሪ ጉሽፃ ፄውጝስ እንፃኽስታንኩ አኽⶓ ቶኬምካ:: ክሬቴ ዲግሳንኩስኪላ ሼውቴ ፌቴርካማ ሜሜሪ ዋታኔ ናውሳ አቕፃንኩ አኽⶓ ጌሌፅካ::

መናሃሪዳ እሺኹ አግልግሎቴ እይጚው ችግር ልቓሱላ ያኹኒ ኽይስታታ ኢ-ትኬትንግ ምክንያታ አኽⶓ ጉሽካ:: ሜብትስታ ግዴቲኪላ ኬቤርስታማ ኪቪቪርጚስታ ሰላማዊ ትራንስፖርቱ እንዜጝትጚ ዝኩዋታ ፄውጝስ ታምባውሳ አዲጌ ኔኬትጝስ ታምቦ ፊትጛማጊ አኽⶓ ዊዛሩ ወለተፃድክ ቶኬምካ::

አገው ግ/ቤት ኬቴሙ ቺፅጝፂ ትራንስፖርት ፅ/ጝናዳ ዳዱስታ ትራፊክ ዴክቱ ቼፍጝጚው ቴቬቬርጝፃንቲ አቶ ታማኙ ዮሀንስ እምቢትንኹ፣ አሜችኹስታ ፍታዊ ትራንስፖርቱሳ አግልግሎቴ እይጝስ ኢ-ትኬትንግ ቢዲሪዳ እንኩርስታው እንፃኽስትጚ አኽⶓ ጉሽካ:: ኢ-ትኬቲንጉ ቴግባር እንፅኺሾ ቱስቱኒዴስ ፋሌንጋ ታሪፍዳስታ ፊቴ ቻኒጝዳ እሺኹሳ ችግሮ ኽይⶓኪላ ጌሌፅካ::

መናሀሪዴስ ሴግዳ እጋዋ ያኻያሱ አግልግሎቴ አግፅጙስታ እይጙ ካስትዳ ታምባውሳ አዲጌስታ ንብሬቶ ዜሬፍስትⶓ ካላካልጝፅጝስ ካሊስትኹ ኢ-ትኬትንግ ቴግባርዳ እሺኒዴስ ጉሽፃማ አኽⶓ ኽይትጝፄካ:: እንጚስኪላ 2017 ምሬት አሜታዴስ እንሳ ዜጌቤ ቴርስንኹሳ ወክቶ ኺስታ አዲጊ ታምባያሱ አኽⶓ አቶ ታማኙ ቶኬምካ::

ፌይጝ ናማ ፊቴ ኬይፃውስታ ቻናውሳ ሹፌሮኪላ ቶኬማማ እጎ ኬቤርፅጝዳ ኬፍቲኒ ታምብ ዝኩኽ አኽⶓ ቶኬምካ::

ትራንስፓርቶ ፋያንትካውስታ መኪናው ቼፍ ሜቴቴንጛውላ ይጉዋኒ እዝብ ቼጌርስታቲታ ሜሜሬ ጉሽፃ ፄዌካማ እንፃኽስታኑ ፐርሰንቱ ድምክኒስ አግልግሎቲ ሲፋታ ፄውስታው አኽⶓ ጉሽካ:: ትራንስፖርቱስታ ሎጂስቲክሱ ሜምሪሊ ቲቪቪርጚስ ችግሮ ኽያኑ ዳድ ዝኩⶓ አቶ ታማኙ ጌሌፅካ::

አገው ግ/ቤት መናሃሪዳ ጌርክስ ክቻክቺስ 600ዴስ ጃላ ዳድቴን አግልግሎቴ አግፃንኩ አኽጞ ጉሽካ::