ሚጊብጚ ክንቲው ፃንኩትስ

ታደለ አጋጄ

ክንታንትካው ምጋቢስ እይስትኹ ሊሊቲ ትኩትስ ጊዝዴስ ጊዞ ሜጌብስታንትካው ቼፍ አሌምዴስ 418 ሚሊዮንዴስ ጃላ ታምብⶓ ንቫር ቶኬሜ::

66 ሚሊዮን አባላምቲ አችዳ ክንታንኩ ክንታንትካ ፋይፃውሳ ምግቦ አግፃኑላስ ይጉጝስ ክንቴ ፋያኑላስ ጌዴድስትካማ ሲፍጛንታ ፄውስታ ኔ:: ፅናት አፍሪካዳ ዝኩኽሳ አኺኔ ካንትኹሰ ዴሜካ 23 ሚሊዮን ስራስሪ ዳላውሳ ምግቦ አግፃላ:: ምግቡስታ አክሞ አቲጙ ምክንያቲስ 121 ሚሊዮን ያኻንኩ ድሜ ክንቲስ ታምቡንኩ ስራስሪ ክንቲው ማንድዴስ ሴጋ አኽⶓ እርዳትፄ::

ይቶፒያ ክንቲ ጝናሱሳ ምጋቤ ጄሜርትኹ 1994 ም/አታዳ አሌሙ ምግቡ ፕሮግራምሊ ቴቬቬርጝስያኽ:: ክንቲ ጝናሱ ምጋቢ ጄሜርኹኪላ ክንታንትካው ክንቲው ጁትጝጚ ዴሜካታ፣ ክንታንትካው ክንቴ ኬውጝፅጙ ሜቴን ኔኬታታስታ ክንታንትካው ክንቴ ቻቤልጝጚ ኬሽጝጛታ ዝኩኽሳ ትክሞ እርዳትስትጝስያኽ::

ክንቲ ጝንካዳ ቴጌቤርስታው ምጋቢዉ ፕሮግራም ስራስሪውሳ ግርቦ ባዛባዝጝ ኔኬታታ ፄውⶓ ፅናት ቼሜትጝፃ:: ፅናት እንሳ ውኖ እርዳትፃውኪላ ክንቲ ጝንካዳ ምጋቢው ፕሮግራም ጄሜርስታያሱ ጊዝዳ ጝንአቕስ ፋይፃውሳ ስሩሳ ፋዮ ዋኽትጝፅጝስ ስራስሪ ድማ ጋቲታ ሊሊትጙንኩ እንፅኺኩ ዜርፍካዳ አሴሜርጛኩ አኽⶓ ቶኬማ::

አዊ ብሄረሰቡ ቺፅጝፂዳ ሊሊትጙንኩ ክንቲ ጝንካዳ ክንታንትካው ምጋቢው ቴርት ካስጛማጊ አግስቴ:: አንኪሺ ጉዋጉሲ ወረዳ ሻሽኒ ትክላሊ እምፕላንቲ አች ክንቲጝናዳ ቤዴራ ሚዲቢኒው ክንታንትካዉ ምጋቢ ቴርት እይስታማጊያኽ::

ኤልሳቤት ንጉሴ ሻሽኒ ትክላሊ እምፕላንቲ አች ክንቲ ጝናሱ ቤዴራ ማዲቢኒው ክንታንታኽ:: ስልኪስ ዙሚኹስታጊ ክንቲ ጝና ኹሉ ቺፋ ሲፍጝታታ ቲንቴ:: ክንታንትካው ፉሪው ሳትዳ ምግቦ ሜጌብስታንኩ አኽⶓ ዙሜ:: ክንታንታ ኤልሳቤት ክንቲ ጝናዳ እይስታው ምጋቢው ፕሮግራምስ ዴስቴናኽ::  ክንቲ ጝናዳ ጛጂስ ሜቴናውሳ ክንቴ ክንትጝስስታ ስራስሪሊ አብርታ እንክርጝስ ፌይፂ::

አቶ ባህሩ ሞላ ቱልቲ ኬቤሊው ዝኩዋንትካ ያኻኒስ ሻሽኒ ትክላሊ እምፕላንቲ አች ክንቲ ጝናዳ ሹኻ አርፋዴስ ጄሜራማ ቤዴራ ክንታንትካስ ምጋቢው ፕሮግራም እይስታማጊ አኽⶓ ዙሜካ::

ክንታንትካስ ምግቦ ዲግሳንቲ አኽⶓ ዙሙንኩ አቶ ባህሩ እምፕል ክንታንቲስ ኾሺስታ ቱሺ ጌርክ ቺፋ እይስታው አኽⶓ ድኹዌካ:: ክንታንትካው ምጋቢ ጄሜርጝ ክንታንትካ ዴስቴንካ ያኼካማ ክንቲ ጝና ካሳንታ ፄውⶓ ጉሽካ::

ክንታንትካው ምጋቢስ ቹዋ ታብል ጛውሳ ታምቦ ፊትጝጝ ቱስታው አኽⶓ ቶኬሙንኩ አቶ ባህሩ ክንታንትካ ሻየስታ ኾሼ ዝቓኑሳ ኩባየ ቹዋ ታብል ጄውⶓ ዙሜካ::

ምንግስት ያጉኽ ምጋቢዉ ፕሮግራም ስራስሪዉ  አካሉ ልግስስ ማልጛ ፋይፃው አኽⶓ ዲብስካ::

ሻሽኒ እምፕላንቲ አች ክንቲ ጝናዳ ቤዴራ ሚዲቢኒዉ ክንትፃንታ ንብረት አስፋው ክንቲ ጝናዳ ክንታንትካስ ምጋቢው ቴርት እይስታማጊ አኽⶓ ድኹዌካ:: ቴሳስ እምፕልዴስ ጄሜርካማ ስራስሪ ሳትስ ምግቦ ሜጌብስትካማ አኽⶓ ዙሜካ::

ክንቲ ጝናዳ 115 ክንታንትካ ቤዴራ  ሚዲቢኒው ክንታንትካኽ:: ወረዳው ባጄትስ ክንታንትካ ምጋቢውሳ ቴርቶ አግፃንታ ፄውስትⶓ ድኹዌካ:: ክንትፃንታ ንብረት ዙሙኑውስታጊ ምግቡ ፕሮግራም ጄሜርጝዴስ ቤዴራ ስራስሪ ሲፍጜካማ ክንቲጝና አንታቲንኩ እሺና:: ክንታንትካ ክንቲ ጝናዳ ዴስቴንካ ያኼካማ ፌይፃላ:: ክንታንትካው ቼፍ ዴሜክጝስ እሊት ክንትፃንታ ሚዲብስቴታ ክንትፄታጊ አኽⶓ ዙሜካ::

“ምጋቢው ፕሮግራም ስራስሪስ ማልጛ ፋይፃንቲያኽ” ኑንኩ ክንትፃንታ ንብረት ክንታንትካ ክንቴ እርዳትስታንታስታ ሲፍጛንታ ፄውኽ አኽⶓ እንክርፄካ:: ስራስሪ ክንቲ ጝናዳ እሺጝስ ጉድ ምግባር ፅንታ ዝኩዋታ ፄዋው አኽⶓ ቶኬምካ:: ምጋቢው ፕሮግራም ቤዴራ ማዲቢኒዴስ ሲፋማ እሊኩ ቤንኩ ክንታንትካስ ጄሜርጝ ቱስታው አኽⶓ ድኹዌካ:: ስራስሪውሳ ምግቦ ዲግሳንኩ ሜዴብስታንታኪላ ካሲካ::

እሊት ሻሽኒ ትክላሊ እምፕላንቲ አች ክንቲ ጝናሱ ቤዴራ ሚዲቢኒው ክንትፃንታ ዘውዴ መለሰ ክንትፅⶓ ጄሜርትኹዴስ ጊዝዴስ  ናቴ ክንታንትካዉ ምጋቢውሳ ቴርቶ ቴኬምስታንታ ያኼካማጊ አኽⶓ ዙሜካ::

ስራስሪ ኹሉ ቺፋ ምግቦ አግፃንኩ አኽጝስ ሲፍጜካማ ክንቲጝና ይንታና:: ምግቡ ሳት ታምባው ጊዝዳ ዴስቴንካ አኽⶓ እንክርፄካ::

ሻሽኒ ትክላሊ እምፕላንቲ አች ጝናሱ ጛሪ ምትኩ ዋሲሁን ክንቲ ጝናዳ ክንታንትካው ምጋቢ ጄሜርጝዴስ ቤዴራ ክንታንትካ ክንቲ ጝና ዴስቴንካ ያኼካማ አንታቲንኩ እሺና:: ይንቱኒዴስ ፋሌንጋ ዴሜካ አኾ ፃንቑትንኾ:: ምርክትንኾ ናኑ አኺኒ እሺⶓ ጌሌፅካ:: ምግቦ አግፅⶓ ጄሜሩኒዴስ ናቴ ኩፅኒ ስራስሪ ዴስቴንካ ያኼካማ ክንቲ ጝና ይንታንኩ ይጉዋንኩ ይንቱኒዴስ ፋሌንጋ ውላ ጝና ካንስ ንካማ ቼጌርፃቲኩ አኽⶓ እንክርፄካ፡፡

ስራስሪ ምግቦ ጄሜሩኒዴስ ፋሌንጋ ክንቲ ጝናዳ ጊዞ ፌይፅⶓ ፋያንኩ አኽⶓ ቶኬምካ:: ቤዴራ ሚዲቢኒው ክንታንትካ አሜት ቺፋ ሚንችካ ሜዜጌብስቱኒዴስ ፋሌንጋ ክንቲ ጝና ይንቴካማ ሲፍጛንኩ ልቓ ክንታንትካ እሺⶓ ጌሌፅካ::

ክንታንትካው ቼፍ ዴሜክጝስኪላ ላጛ ክንትፃንትካ ሜዴብስትካማ ክንትፃንኩ አኽⶓ ኽይትጝፅካ:: ክንቲ ጝናሱ ምጋቢው ፕሮግራም ክንታንትካ ክንቲ ጝናሳ እንካናንታ ፄዌ:: ጝናኻዳ ምግቦ አግፃቲንኩ ስራስሪ ምግቦ ማጌብስታንታ እርዳታው አኽⶓ ቶኬምካ::  ክንቴ ዴስቴንካ ያኼካማ ሲፍጛንታ ፄዋው አኽⶓ እርዳትፅካ:: እሊው ቤንዳ ክንታንኩ ክንታንትካስጊ ጄሜርጝ ፋይፃው አኽⶓ ጌሌፅካ:: ስራስሪስ ፋይፃውሳ ምግቦ   ቴርሳንኩሳ ኬፄርካማ እንፃኽፅጝ ቱስታው አኽⶓኪላ ጉሽካ::

ምጋቢው ቴርት ጌፄሩ እምፕልታቕስ ማልጛ ፋይፃንቲ አኽጝስ እሊኩ ክንታንትካስጊ ጄሜርጝ ቱስታው አኽⶓ ጌሌፅካ::

አንኪሺ ጉዋጉሲ ወረዳው ክንቲዉ ፅፌት ጝናሱ አላፊ ደሳለው ቤዛ ክንታንትካው ምጋቢ ወረዳታጊ ሴዛ ክንቲ ጝንካዳ  ጄሜርⶓ ጌሌፅካ:: ወረዳታጊ ቤዴራ  ሚዲቢኒዉ  780 ክንታንትካስ ምጋቢው ቴርቶ እይስታማጊ አኽⶓ እርዳትፅካ:: ምጋቢው ቴርትስ ያኻው እምፕል ሚሊዮንዴስ ጃላ ያኻው ምግብ ክንታንትካስ ዲጋማ ሜጌብስታንታ ፄውስታማጊ አኽⶓ ቶኬምካ:: ምጋቢውሳ ቴርቶ ቤዴራ ሚደቢኒዴስ ሚዲቢኒው ክንታንትካስ እሳንጝፅጝስ እክድ እምስትⶓ ቶኬምካ:: እሊኩ ምጋቢ ጄሜራያስኩ ክንቲ ጝናስ እሳንጝፃንኩ አኽⶓ ጌሌፅካ::

ክንታንትካው ምጋቢ ክንቴ ኬውጝፃንኩሳ  ይጉፃው አኽⶓ ቶኬምካ:: ክንቲው ፃንኩትዳ ታምባሺኹሳ ችግሮ ይጉፃው አኽⶓ ጉሽካ:: ከንቲ ጝንካ ዝኩኽ አብትስ ክንታንትካስ ያኻውሳ ምግቦ አሜሬታንታ ፄውስታው አኽⶓ ቶኬምካ::