‘‘ማርፅነውድ ይና ድመ አጥጘ የጝ’’ …ማርፀጥ

ምጝግስት ኽግ ፊሰተ፣ ኽግ ፋፅመተዝመ ኽግ ቲርጉመተ ይሽተቍ ሻቘ መንግስትዝቍ ፅረንዝ አድልሸው የጝ። እንዳይ ሻቘ መንግስትቍ ፅረንድቅ እድወ ጝታይታቕምቱ ችጘር ፃየቍ አቐነውድ የጝ አርቕሽተውድ። እንዳጊስ ግነ ኽግ ፊሰተ አካልድ የነትም ኽዝቭዙ ደርግቭሽጥ ምኽር ጝንጥድ አጉረው ስልጣን ፃየቍ አጛንስቅ ኽግ ፋፅምዘተድም አነ ኽግ ቲርጉመተድ ጝይውሽተው ቲግቭሪዝ ልክ ሰባንድ የውድየንት አክንውርናⶔ አየውም? ጊምግመነውዝ፣ ደርግቨው ኽዝቭድ በነዊዝ ቑጠ፤ ኢኮኖሚቍ፣ ገረዱቍ፣ ፖለቲኩቍዝመ ባኽልቍ ገባንድ ቓለነውዝ እርውድጥጘ ፃቨነውዙ ችጘር ፃየው የጝ። አትረቍ ምኽር ጝንጥ ፅብጘውዜ ቀሰው ጭሰጭሰን፣ እፍርት፣ዲሞክራሲ ተከተከቍድ ሲፍንጥጘ ፃቨነው ቸልጘኩ፤ ጛስጛዊዝ ቈሽ ማርፀው ዊንም ደርግቨው እቀ ኽቭርድ ውር ገቨ በነጘድ ሊሊሳቍ፣ እቀ ኽቭሪጅቅ ድመድምሽታቍ ምኽር ጝንጥ ፅብጘውዜ ቈሽ ደርግቨው ኽዝቪል ፈጥርሸው ችግሰድ ጝዝ ልክ አጉረው የጝ አቐውድ። ወይ ኽምረታት ተከቍ ብሔረ እቅ ጭሰጭሰን ይሽትጝ ላጥ ዞናኒስ ቺተውዝ ጝታቕምቱ ምኽር ጝን ሳ ቀቨሌስ ኪርም ፌደራሊል አጢስ እንቅ ስልጣንዙ እርከኒልቅ ምኽር ጝንዝ ደርግቭሸቍ ኽዝቨን ቈሽ ላጢስ ቺዘውዝ ድምሽተነውዙ አገነድ አጉረው የጝ። ዊገድ ግነ ቲግቭርዝ ቓልሽታንድ ኽዝቪዙ ድመድ አውቑጠ ድምሽታጙ የጝ? የውድ ቓልሽታንድ ዊሰድ ዋቕረ ምልክትዝ አቒል ሊቨው የጝ አቐውድ። ንጭቱ ይና ኽትሚዝም ኽምጠ ዊከ ጋዜጠሸን፣ደርግቨው እቀ ኽቭሪስ ቓለድ ለምትር፣ደርግቭሽጥ አካላኒዙ ዊሰድ ጥቅልዝር ክታጎ አልትርኩች ቀሰው ንቫቭ። ወይ ኽምረ ብሔረ እቅ ጭሰጭሰንድ ክልልዝቍ ምኽር ጝን አቫላን፣ ብሄረ እቅ ጭሰጭሰኒዝቍ አቫላንዝመ ቃወጥዝ፤ ደርግቨው እቀ ኽቭሪጅቅ እጝቅ ወረጢልቅ ፃቭሽታጙ ዊነው ምኽርኽረድ ጛሰነድ ችጝኩ። ፋጥርሸቍ መድረካኒልም እቀ ኽቭርድ እኩጙ የቍ ቀሰው ጭሰጭሰንዝቍ ቢተንጥድ፣ ሲርየ እፍርትዝቍ ችጝስጥ ዝመ ላጥም ንቕፀቍ ኮርቍ ችግስጥድ ጒየነውዝ ደረጀ ጨቨቅ ፅበው ፋፅምዘተድ ቲግቭሩ ዊሰ ይውጠ ማጥን ዋቕረጥ ጉየነውድ የጝ ቓለ ነየጥድ ዊግትጘውድ። አት አለነ ካሴ ዝቛለ ወረደ 01 ቀቨሌ ፅበተ ነይጘው ቓለይዝ ማርፀተ ዝመ ማርፅሸተ አልተአልተነውዝ ውር ቢተኩ? ውርስ እቻዝነ? የነውዝ ማኽርሸነውድ ቀሰው ቲግቭር አቐነውድ ጋልፅጝ፣ አነ ጚ ይጘኩ ፃቭኑን የናንስ አቕሽጚ ጝታ ዋቕርጥድ ጡሸውዝ ፃይሽጝ ኒየቱ መንግስቱ ፅረይል ችጘኩ ይጝ አምናቍ አቐነውድ የጝ ዊግትጘውድ። ምላሰን ይጝ ጒጘውድ ቈሽ” ወይትጘድ ግቭር ኪፍልሰውጚ እፍርት ፃይ ተረውም ቓሊነቅም። ጒደነይስ ጒደነ፣ ክንድጝ ጝኒስ ክንድጝ ጝን፣ ኽክምነይስ ኽክምነ እጀውድ ወይ ኽምረ አቑዝ እንቅ ገቨድቅ ግፅይስ ፀናቕን የጝ አሩሽናጙ ፅብነውድ “ይጘኩ። ቓለ ነየተድ ይጘጘድ እቀ ኽቭርድ ንጭቱ አኸቨድ ቈሽ አውማው ፋጥርሸው መድራኺልቅ አጠ ጡሸኩ የው ኻሰቭድ አልሰነዊስ ፈው ጭ ግሪ አርቕየውም የቍ አጛንድ “ ወሸው ወሸውድ ፊራጙ፣ ወሽየውድ ተራጙ የነው ይናቅለ ሲነድ ይናግል ችጝኩ፣ አውር ኒንቅ ዲቈው ጚ ወሽ ይና ዋቕረይዝ ቲጝቭሩ ዊሰ ነየው ቓሊነቅም” ይጝ ነስየ ግነ እማንዝ ኽዝቭዙ ድመድ ወይሽት ሳይስ ኪርም ኒየይል አሽ ፅበው መንግስቱ ፅረድ ጝቸለው ቸለዊዝቅ ቲግቭሩ ዊሰ ይው በነቍ አቐነውድም ጭቭስየቍም። ላየ ቓለ ነየተድ አት አምባው ወልዴ ጝታ ጋቢዝ “ፋጥረሸው መድራኽድ ቀሰው ዊነጘዝመ እጅር እጝቅ ጝጝን ጝጝን አቕ ዊግታጙ ዊነው ቅሬተድ አደቫቫይል ፍ ዊግታንስ አገነ ፋጥረው የጝ” የቍ አጛንድ ነስየ ግነ ዲቈቍ ዚምናኒዝቅ ጒነቍ ዋቕርጢዝ ቲግቭርዝ ዊሰ ይውሽቲጝቀት እኔንትም፣ እዴንትም ሰራሽነኩን ይሽታጙ፤ አነ ጚ ሰራሽቲጝቀት እዳቓጙ ዊናንስቅ ኽዝቭዙ ዋቕረድ አብልሽ የጝ ፅበውድ። ነንም ጝታ ደርግቭሸጢዝ ምላስንዝ ዋቕረጥድ ክልልዝም አነ ፌደራል መንግስትል ችጝ፣ ጝታ ጁነይል ኪርምሽጝ ችብርጝ ፅበቍ ጉጉዝቍ ሲርየ እፍርታንድም አጝነ ላጥ ቀሰው ጭሰጭሰንዝቍ ዋቕረጥድ ቺትጝ ዋጥርጥጘ ዊንጘጘድ የጝ ዊግትጘውድ። ዊዝር ፋንታይቱ ካሴ ወይ ኽምረ ብሔረ እቅ ጭሰጭሰን ምኽር ጝን ምጀ ጉቫኤ ይጘጘድ ኽዝቭዝቍ ማርፅሸ ተ ጥድ ፣ ደርግቨው ኽዝቪጅቅ አምረይዝ ሊጙን ዲምቅሽጝ ፅበው ችግሰድቅ ኽዝቪጅቅ ማኽርጝ፤ ፌደራልዝ ደርግቭሸቍድ ፌደራልዝ፣ ክልልዝ ደርግቭሸቍድ ክልልዝ፣ ብሔረ እቅ ጭሰጭሰኒዝ ደርግቭሸቍድ ቈሽ ብሔረ እቅ ጭሰጭሰንዝጘድ፣ ጝታይታ ደረጀይዝ ዋጥርጥጘ ቸለቍ ቲግቭራንድ ዊሰነው “ ምኽር ጝንጥድ ችበችብርጘው ቒየይል አራሰውዝ ጎየው ቃውሸነ የጝ “ የቍ አጛንድ፣ ዲቍስነው ለካቲት አርፈይዙ አሰነይዝ ድሃነ ምርፀ ክልል ዝመ ዝቛለ ምርፀ ክልሊል ፃቭሽተው አቭላይሽንድም እን ቒየድ ሲርየ ፃቨው አቐነውድ ዊግትጘኩ። አቭላይሽኒዙ አይነተ ዓለመድ እቀ ኽቭሪል ፅበው ጥቅለ ወይሰድ ውር ተከኩ? ቀሰው ጭሰጭሰንዝቍ፣ እፍርትዝቍ ዝመ አርወ አሩሽንዝ ጅሉዘ ፅበው ቓለድ ውር ተከጘድ ድምሰነውዝ፤ ደረጀ ጨቨቅ ፅበው ፋፅምዘተይዝ ቲግቭራንድ ቺዝን ይወነው፤ ብሔረ እቅ ጭሰጭኒዝ አቅምዝ ንየ አቐቍ ዋቕረጥድ ቈሽ ክልልዝመ ፌደራልዝቍ ምኽር ጝንጢል አልሰነውዝ “እቀ ኽቭርድ እርወ አሩሸተ ፃቨነው የጝ” የቍ አጛንድ ፋጥርሸቍ መደረካኒስ ጒሸቍ ዋቕረጥድ ፃየነውዝ ወረደይስ ኪርም ብሔረ እቅ ጭሰጭሰኒል አሽ ፅበቍ ፋፅምዘጥ (ቃወጥድ) አኽቨነውዝ ዋቕረጥድ ጝታይታ ደረጀይዝ ዋጥርጛንስ አምረዝ አድልድልጝ፣ ቸክሊስት ይውጝ፣ ዚርፍዚርፊዝ ደርግቭሸቍ ችብረ ሸውነ ሸውነ ኮሚቲጢዝ ጋብዝ ቲክንክነ ፃቨቍ አቐነውድ የጝ ዊግትጘውድ። ወይትኽዝቪዙ ድመድ ክልል ምኽር ጝኒዝም አነ ኽዝቭዝቍ ደርግቭሸጥ ምኽር ጝኒዝ ድምሽተነውዝመ ጝዋቕርጢዝ ጡሸው ዊሰ ችጘነውዝ ጋብዝ አወየው አቕንትዝ ቓልሽተኩ? ይሸት ጒሸው ዋቕረይዝ ዊዝር ፋንታይቱ ዊስጛንድ “ ወይቱ ጁነይል ጒሸቍ ንቕፀቍ ችጝስጥድ ቓልናንድ ክልሊዙመንግስቲዝመ ፌደራል መንግስትድ ሚሪሸቍ ዋቕርጥጛይ” የቍ አጛንድ እን ችግሰጥድም እንዝ በውግ ፃጝሽተቍ ክልልዝቍ ምኽርጝንጢልም አነ ፋጥርሸቍ መድረካኒልቅ አልሰቍ አጘጘዝመ ፌደራልድ ሚሪሸቍ ዋቕርጥድ ሚሪሸውዝ እንቅ ወረጢስቅ ፈቍ ድምሽትን ፃየቍ ጛልቍ እቅ፣ ሙሁራን፣ ኒየጥዝመ ሰቭዝቍ ቃወጥ ፅርሽጝ ፊርጝ 14 ሚኒስቴር ሰራሸነ ጝንጥል ዋቕረጥድ አልስጝ፤ ዋቕርጥድ ለምርሽን ችጘቍ ዊንጘጘዝመ ዊሰድ ግነ ቲግቭሪዝ ቓልሽትየው አቐነውድ አውማው ጁነይዙ እቀ ኽቭርድቅ ቅርሸው አቐነውድ የጝ ዊግትጘውድ። ቺተዝም ፌደራል መንግስቲዝ ሰራሽትጘኩ ይሽትጝ ኪርምሽጝ ችብረቍ ጒደንጥድ ሰራጨቅ የነውድ ኽየው ቀሰው ጭሰጭሰንዙ ዋቕረ አቕ መድረካኒል ጒሸነውድ ሊሊሰቍድ ዊዝር ፋንታይቱ “ይና አቅምዝ ኒየ አቐቍ ዋቕረጥድ ፌደራልዝመ ክልልዝ ቺዝን በርስን፣ ክልልድ ለሊቨለስ ሰቍጠ አስፓልትዙ ጉድነድ አሰናንስ ቻይናቱ ቀቭሽተተድ ሊቅስ ብላ ክልል ገጠር ጉጉዝ ዩ ሰቭድ ጣቀት ግሬዝ ኪርመኩን የው ደብዳቤዝ አርቒሳንስቅ ጣቅ ኮርዝ ኪርምሽጡ የው እምንት ፃይንኩኑን” የቍ አጛንድ ፌደራል ጋብዝ ነን አሽ ችጘው ዊሰ እጀው አቓንስቅ ጝታ ዋቕረድ አትርዝጝ ቃፅልዘቍ አቐነውድ የጝ ጋልፅጘውድ።

ንጉሱ ማሩ

መጋቪት 15/2017