ሰሙነ ትንሣኤ

አዳም ስመ ሔዋንስ ዝቨትል ፅበቊስ ቃውሰተ እደረትቑር ዊንጙ።እንቅም አይንት እፅዋቲዝመ ዘፈኒዝ ኪብሸው ካኽሸው ኤደንቱ ገነትም ፅብጛጙ ዊንጙ። ሲመይቱ እደረ አምላክም ጛት ልወርዳጙ ዊኑ።

ላውድ አየት እንቅም ዘፈኒዙ ፍርድ ኹጛንስ እደረ አምላክ ፊቅዱ፤ አነጚ ቀሰዊዝመ ጭቓድ አርቒሰው ዘፊስ (በለሲዝ)ኹርነቅ፤ የው እዝንድ ሰይጣን አዳምስመ ሔዋን ገነትዝ ፍጝ ክርጘዙ ክርጘል ሊቭጛንስ ፃቩ።

አዳም ስመ ሔዋንስ ገነትስ ፍጘት እግርገ እደረት ቑጠ አደረ፣ገነት ተከው ስፍረ በነዊዝ  ሰራሽጘው ኽጤትዝ ኻዝንጙ፤ እደረትም ስቑርት ፃቫንስ ሱባኤ (ጸሎት) ፃይጙ። እደረም ፀሎቲዝመ ጝታ ጨውንድ ቓል ስቑርት ፃቨናንስ ቃል ጡው ።  ቃል ኪዳንድም “ክኹር ትኹሪስ እኹርጭ 5500 ዚምንዝ እግርገ ቓዘኩን” የው ዊኑ።ዊግተጘ እዳቕየውም  ድንግል ማርያምቲስ እኹርሽ  አዳምት ጝቑር ቑርጅቅ ቓዙ።

ንጭቱ ይነ ዲቭየይዝ  እደረ አምላክቱ ትንሣኤድ ሚሪሸውዝ ሳቁጠ ኻትመዙ ፅበተ አቐቊ መሪጌታ ይትባረክ አለሙጅቅ  ‹ሰሙነ ፋሲካ›ቱ ወረጘነይዝ ጅሉዘ ዊንተ ፃቭነውድ አንቭቭስነ ቀኑን።

ኽምጠ ዊከ፦ይና አፅቨይዝ ክታ ኻሰቭድ አድልትርነ አነ የነዊዝ እቀጘ ሚዜንዘኩን።

 መሪጌታ ይትባረክ ፦ያንም ፃቀው አርቕትድ አድላንስ ፃቭርናንስቅ ሚዜንዘኩን።

ኽምጠ ዊከ፦ሰሙነ ፋሲካ ዊንም ትንሳኤ ወረጘ የጝ?

 መሪጌታ ይትባረክ፦ እልት ትንሣኤስ  ኪርም  ዳግም ትንሣኤ አሽ ፅበቁ  ግርቅድ  ቅድስት ምከንሸንትል ፋፅምሸው ሚንፍሱዝመ ሐዋርያኒዙ አግልግለ ቃውሰተ ትንሣኤ ዝጘድቅ አክኑሽጘኩ።  ሸወጭድም  ‹ሰሙነ ፋሲካ› ዊንም ‹ትንሣኤ› ይሽትጛጙ፤ጝታይታው ሚስጥሩ ሽⶔዝትም ፃየቁ ጛይ። ጝታ ላው ላውድ እጅጝዝ ቓልናን፦

ሲኑ፦ ‹ፀአተ ሲኦል› ዊንም ‹ማዕዶት› ይሽተች፡፡ እንቸን ግርየሸን እደረ ጝ ትንሣኤይዝ ኒቭሰንድ ሲኦልስ ፊስ ገነትዝጎ ከሰው ግርየድ ኻስቨነ የጝ ።

ትንሣኤት ጛምርሲስ  ሲኑ እደረ  ኢየሱስ ክርስቶስ ኒቭሰንድ ሲኦልስ ገነትዝጎ ዊሰነዊዝመ ዓርቭ ትኰር ፋፅምሸውድ ሲኑስ ይውሽት ‹ማዕዶት› ዊንም ‹ፀአተ ሲኦል›ይሽተነውዝ  ሽⶔ ትርኩች። እክሰድም ከረከረነ ዊንም ከረነው የነት የጝ።

ሲልዝ፦እደረ  ኢየሱስ ክርስቶስ ዕልት ጝትንሣኤዝ ሐዋርያት አኽቭሽጝ ዊንጘው ዲቭሽተው ጝኒል ጥው ጋልፅሽታንድ ቶማስ ጛጅቅ ዊንየውም።

ሐዋርያተንድም እደረ አምላክ ክርጘዝ ጎነውድ ቶማስ ድቁጝሽም  ‹‹ያን ቓሊንቀት አምናቅም›› ዩ፡፡ ጝ ሸወጪዝ እደረ አምላክ  ቶማስ ችጝሸዊዝ ሊጘት ጋልፅሽቱ ፡፡

እደረም ሐዋርያ ቅዱስ ቶማስት ‹‹ክዘፍርነድ ነሽና ይጋብድ ዳቕ፤አምንድረር ጚ አምኒረር አተ››የው አጭነዝ ሲቭሽተው ጋብድ፣ኽየው ምስማርዝ ቺንክርሸው  ናኒዝመ ልኩድ ደምደምጠጘድ ፃቨነውዝ ትንሣኤድ ደድሱ።

ርቭ፦እደረ ክር ዲቭሽተው ሲዘ ግርቂዝ  እግርገ መቃቭሪዝ ጭጝ ጒሰው አልዓዛርቱ ኻስቨነ ጚ፡፡ ክርስቶስቱ ሥልጣን አልዓዛርት ክርጘዝ ጎነውድ ቓልጝ ንቕፀው ኽዝቭ እደረት አምነነዊስ  ‹አልዓዛር› ይሽትር ጭጝሸች፡፡

ኪልዝየ፦ እንቸን ግርየሸን  አኰ ግርቅዝመ ግቨርዝ እግርገ “አኰ ሽኽዝ አኰላ  ዓምረ ፋፅምሻንድ ክኹር ኹሪዝ  እኹርጭ ቓዘኩን” ይሽት ቃል ጥውሸው አዳምቱ ምነነድ ፋፅምሽ ጝቑርቑርጅቅ ቃውሰው ክቭሪዝጎ ጥወነውድ ኻስቨነ አቕር ‹የአዳም ኀሙስ› ዊንም ‹አዳም› ይሽትር ኪብርሸች (ሉቃ. ፳፬፥፳፭-፵፱)፡፡

እን ኰሪዝ ምከንሸንትል ሐዋርያተንድ ፃቭጘው ኻይማኖቱ ስረቲስ ከስጘ፤ እቀ ኽቭርድ ግረቨዝ ጎነውዝ ኪዊል ፅበቁ እፈርድ አኽቨነውዝ ክረቁ እቂዙ ክርስትነ ሽጙድ ጒይስጛጙ ጣመነ አድለነውዙ ባኽሉ ቱፊት እኩ። እኒን አዳምስ እደረ አምላ ጥወዉ ቃል ኪዳንድ ቓሊሰነ የጝ።

ዐርቭ፦ትንሣኤቱ  ኽየሲቭንቱ ዋልጠትረ ግርየ ዐርቭ ቈሽ ክርስቶስት ብሪዝ ሲሪሽረይ ቅድስት ምከን ኻስቨነ አተጘድ   ‹ቤተ ክርስቲያን› ይሽትር ጭጝሸች (ማቴ. ፳፮፥፳፮-፳፱፤ ሐዋ. ፳፥፳፰)፡፡

እደረ ኢየሱስ ክርስቶስ ፃይሽተው ኰሪስ ኪርም አክንዋጙ ተረው ቓዘነውዙ ሰቭድ አርቭ ትኰር አስኩ።ምከንሸንቱ ሚስጥር እንቅ ገቨድ ፋፅምሸው አቐነዊዝ አርቭ ምከንቱ ግርየ ይሽተኩ።

ስቭክት፣ ክንድጝ፣ ተአምራት፣ ትንሣኤ ፃቭሽትኩ። እናይቅ ምስጢራተ ምከን ፋፅምሽጘውድ ዓርቭ አቐነዊዝ ዓርቭ ምከን ይሽት ጭጝሽኩ።ዓርቭ ትርጉሚዙ  አሰነ የጝ።

ቅዳን ሲቭንት፦ሰሙነ ፋሲካቱ  ቅዳንሲቭንት ኽዝቭድ ላው ላውድ አየት አርየ አሪሸነው ቸልሻው አቓንስቅ   ‹ደበቱ አርየ (ደርሰው አርየ)› ይሽትር ጭጝሸች፡፡

ቃውሰተ ሲንቭት እደረ  ኢየሱስ ክርስቶስ ሚስቅልድ መውር ፊራንድ ቀራኒዮ አሽ ሊዝጛጙ ቲክነቊስ፤ ትንሣኤዝ ኰረም  ኻር  ዲቭኒዝጎ ሽቱ ፃይጝ ፊረቊዝ ቅዱሳን እቁኒዝ   ይሽትር ሽⶔትረይ ጚ።

እደረ ኢየሱስ ክርስቶስ ክርጘይዝ ቺት ጎነውድ  መግደላዊት ማርያም ቃውስር ቓለነውድ፣ ቅዱሳን እቁን  ጝ አካልድ ሽቱ እቓሰናንስ  ዲቭኒዝጎ ፊርጙ፤ እደረ አምላክም ጋልፅሽት   ትንሣኤዝ ማጥን አቭዝርተ ድቈጘ  ኦርቶዶክስ ተዋሕዶ ምከን ክንሰች።  (ማቴ. ፳፰ ፥፩-፲፭)

ኽየ ሲንቭት፦ እርወነ ትንሣኤይዝ ሸወጭ ተትረይ ኽየሲቭንት  ‹ዳግም ትንሣኤ› ይሽትር ዚክርሸች፡፡ ንየይል ጋልፅሽታንትጘ  እደረ ትንሣኤ ትኰር ዲቭሽተው ሚረይዝ ጥው ቅዱሰን ሐዋርያኒስ ማኽሊል ችጝሽ  “ዲግ ክታግስ አነ!”  የነውዝ ትንሣኤድ ጋልፃንድ፤ ሐዋርያ ቶማስ ችጝሽየውም ዊኑ።

እግርገም ፊረዊዝ ዋጥራንድ  እደረ ከርጘ ኻቕ ጎጘድ እምጥጘዝ ድቁጛንድ  ‹‹እግረ ክትን  ‹ቓልኑን ›ይርን ክንስትነዝመ ሚዝርድትርነ የጝ፤ ያን ወረጘድ  ‹ድምስ› የር ሚዝርድጭር? ዊንም ክንስጭር? አቓውም፤ያን ቓሊቀርምም አምናቅምም ›› ዩ፡፡

አቓንስቅም እጅርዝ እንቅ፤ማርፀቁ ጝቀነጢዙ እዘኒዙ ኻሰቭ አርቐው፣ጝ ቀሰውነይድ ደይ እጀው ባኽሪዙ አምላክ  መድኃኔ ዓለም ክርስቶስ ቃውሰተ ትንሣኤዝጘድቅ አበው ሐዋርያት ዲቭሽተው ጝኒል ላውንትዝ አኽቭሽጘጘ ሚረድ ብዚንቀት ጥው   ‹‹ዲግ ክታ እንቅዝቅ አነ !››የነውዝ ጝታ ማኽሊል ችብሩ ፡፡ ቶማስትም ‹‹አምነው ጚ ጣርጥርሽተአተ፤ እንወች  ሲቭሽተቁ ይናንጣኒዝመ ልቁጣኒዝ፣ሲቭሽው  ጒድንድም(ጋብድ) ለው  ቓል ›› የው ቓሊሱ፡፡

ጘጝም ምልክትድ ቓል ደምደምነዊዝ  ትንሣኤዝመ  አምላክነይድ ጝ በኒዝጘድ ልብተነዊዝ   “እደረ አምላክ” የውሚዝርድ፣  ክርስቶስቱ ትንሣኤድ  አምኑ፡፡ ሸወጪዝወ ሲንቭት  ትንሣኤዙ ምሥጢር ሊጘት ሐዋርያተኒዝ እትለው አቐነዊዝ፤  ትንሣኤቱ ሸወጭ ኽየሲቭንት  ‹ዳግም ትንሣኤ› ይሽት ኪብርሸኩ (ዮሐ. ፳፥፳፬-፴)፡፡

ኽምጠ ዊከ፦እን በልድ ኪብርሻንድ ምዕመኒስ ወረጘ ኻይሽታን?

መሪጌታ ይትባረክ፦እደረ አምላክ ቀንትዝ ማጥን ጝቕመት ዲቁስ ነይኩ፤ ጝስየይዝመ ብሪዝ ቀድስ ዘላልምቱ ቓደነ አቕኩ። ይንም አምር በልድ ኪብርዝናንድ ፃየውድ እጀውድ አቭኑሰነውዝ፣እፁሸቊዝመ ፅዊተቁድ ገቭሰነውዝ ( ልወርደነውዝ) አጠ ጡሸጘ ምከንሸንቱ ክንድጝ የጝ፤ እኒንትም ፃቨነው ክርስትነዙ ጋልፅሽተነ ሚግቭር የጝ።

ላዘ ጋቢዝ ቈሽ ፃም ፀሎት ፃቭነውድ ይናቕመስ ጭቑ አይንት አልም ዲግ አተ ማጥን የጝ፤ አነጚ ነን አልምትልም አነ ይና ኻግር ኢትዮጵየ ፅበው ይናስ ይናይቱ ጣይትንድ ቓስቒሰናንስመ ዲግዝጎ ዊሰናንስ እንቅም እቀኽቭሪዙ ችጘር የጝ።

በረኻይል ፈቁድም አጝነ ምጝግስትዙ ኢምሸጥድ እቀ ኽቭሪዝ ፈቁ አቐነዊዝ ጝታ ጝነቁድ እንዝጘም ጝታ ኻይማኖት ቃወጥድ ዲግዙ ተሚስነይል ሰራሽጝጠ ጡሸኩ የር አምነኩን፤ ምላሰንድም ፖለቲከኝጥድ እን ሊጘ አካላኒዝ ቢዘም አየቁም። እን አጋሊዝ ሊጘ ጓነኒል ፅበቁ ፖለቲከኝጥድ ጎርዝ ቲርፍዝነው ገቨ እጀው አቐነዊዝ ዊግሸነውዝ ጝታ ቺተንድ እክስጝጥጘድ ኻስቭዘኩን።

ኽምጠ ዊከ፦አሰነይዝ ይርነው ፅብሽ?

መሪጌታ ይትባረክ፦ቃውስ እንል አቭኑስርናንስቅ ሚዜንዘኩን፤አሰነይዝም ዓልምትል ፅበቁ እንቅ ክርስትነ ኻይማኖት ቲክነጢዝቅ ትንሣኤቱ በሊል ወዝ ችጝዘት የነው በነኩን።

ብርሃነ ትንሣኤድ ጋልፀው አምላክ ብርሃነ ዕርገቲልም ዲግዝ ችጝዝነ!

ኪሮስ ወ/ተንሳይ

መዝየ 15/2017