ሶማሊያቱ እስለመዙ ከምሸተ ጓነድ አልሸባብ ቑልፍ ጅውንጥድ እግዝግዘናንስ ፃቨው ልቕረድ ቲክን ፃቭሽተው ሹሹድኒዝ አሜሪከስመ ሱማሊየስ ከምሸተ ጓነይል አየርዝ ጠቃዝን ፋፅመነውድ ሱማሊያቱ መንግስትድ ጋልፁ።
አይነተ ኻትመሸንስ ሞቃዲሾስ ሰሜንቱ ጋብዝ ችጝሽረይ አዳነን ያባል ትል “ጡሸት ፃየውዝመ ፃምርሸው አየርዙ ጠቃዝን ፋፅምሸውድ አልሸባብ ኻትመሸንት ዊረው ሰትዝ እግርገ የጝ ይሽትኩ።
አልሸባብ ኻትመሸንት እግዝግዛንድ ዊተድሩ ዝምረዝ ቑልፍ ኪርምሰነ ፃቨናንስ ኻሊሽት ዊነጘድም ድቍሽት ዊኑ።
ሶማሊያቱ አርቒሰነ ሚኒስቴር ሰራሸነ ጝንድ ኤክስዙ ጋፂል ፊሰው ጋልፀነይዝ አየርዙ ጠቃዝኒዝ ክረቍ 12 ከምሸጥ ማኽሊስ እስለመዙ ከምሸተ ጓነይዙ አጉረው ሹሹደተ ችጝሸነውድም የጝ ጋልፅሽተውድ።
አልሸባብ ዲቈው አርፈይዝ ፕሬዚዳንት ሀሰን ሼክ ሞሀሙድ አጃቢ ታው መኪነይል ትኩርት ፃቨው ጣቃዝን ፋፅምሸነውድም አርቕሽተኩ።
ከምሸተ ጓነድ ደግምግመዝ ፋፅመው ጠቃዝንጢዝ ቲክንክነጥ ሱማሊየትቍ እስለመዙ ከምሸጥ ጓንጥድ ጝታ ፍልውልወድ ሊጘት ኪርምሽጠ ቸለኩም ይሽትኩ።
ደቡብ ዝመ ማኽሉ ሱማሊያ ፈራቐቍ ጅውንጥድ እግዝግዘውድ አልሸባብቱ መንግሥትዝጅቅ 20 እምታን አጥጘ ሹሹዳጙ ዊንኩ።
ከምሸተ ጓነድ ሶማሊያቱ ፌዴራል መንግሥትድ ኻይልዝ ጊምዘነውዝ እስለሙ መንግስት ሲርየናንስ በንኩ።
አፍሪካ አቭርድንዝ ቃውሸው ዲግዙ ኪብርዘተ ኻይልድ አውሮፓቱ እግዝግዝንዝ 2022 ዝመ 2023 ከምሸጥ ጓንጥድ ሰይጥጘዝመ ጠቃዘነዊስ ጊግቨነዊል ትኩርት ፃቭጥጘድ ፃቭ ዊንኩ።
ጓነድ ንቕፀቍ ቲክንክነጥ ዊተድሩ ጠቃዝንጥድ ፋፅምሽጝሽም ነንም ሶማሊየስ ኽየው ጎውት አቕ ቃፅልኩ። እኔን ጎውቲስ ናፀ አቐው ጅውነ ፋጥረናንስ አፍሪከቱ አቭርድንድ ፃቫጙ ፅበው ዲግ ኪብርዘነውዙ ሰቭድ አትር ቃፅልጠ ፃቭሽትጠ ጡሸኩ የው ቓለም ይውሽታጙ ችጝሸኩ።
ንጉሱ ማሩ
መዝየ 15/2017
