ላጝጠ እርፉ ጊዙ ኦሎምፒክ ቲክርክርሸተ

ፓሪስቱ ኦሎምፒክ ዓልምት አንክርሰቁ ገባን ማኽሊስ ግቭፅትወ  ናዳ ሐፊስ ላጝጠ እርፉ ሽል ጝርጊዙዊል ፃይር ሻምላዙ ቲክርክረ (ፌንሲንግ) ፃቨነውድ ዊኑ።

“ይቑረት ማጥንኻስቫጙ ዊኑን፤ ይቑረ  ኦሎምፒክ ሲትፍሸተ አራንስ ይበን ዊኑ” የነውዝም ኰሪዝ ዊነው  ጝር ወይሰድ ጋልፅርኩች።

ጊዙረቊ ኲየንጣን እኒንት ፃቨነው በንዙ የነው አልምትል ክንሸው ቲግቭር የጝ፤አነጚ   ላጥ ኲየንጣንድ ኹረዝቁ አይንተኒል ትኩርት ፃቭጛንድ፥ ናዳ ሐፊስቱድ ግነ ጝር ጊዙረነውድ ላጢዝ ቺት የው  ኦሎምፒክዙ ቲክርክረይል ሲትፍሽራንስ አጉረውዝ ደምዝት ጭሰነውድ አንክርሰው የጝ።

ናዳ ቲክርክረይል ሲትፍሽራንድ ጊዙ አቐነውድ አርቐቊድ ዊትቁድ ዊንጙ፤ ቲክርክረይዝም 16 ትረ ፍር ገረዱ ዲምቅሽኒዝ ላጝጠ እርፉ ሽል ጝር ጊዙዊል ፃየነውድ ጋልፅር አልምት ኽየተ ሚድየኒዙ ጂጘዙ አውር ኻለይ አቐነው ቸልድርኩች።

27 እምትወ ውሸብለ ናዳ”ይቕመቱ አካውንቲል የጝ ጊዙ አቐነዊዝመ 16ትረ አቕ አሰነውድ ኲርዘኩ የው እፃ ፃፍ ዊነውድ” ይራንድ፤ ላዘ ጋቢዝ ቈሽ አልምቲስ አርቕሽትን ችጘነዊስ ከስጘ ላጥ እቁኒዛትም ጒሰጒሰው ቲግቭር ፋፅመነውድ ዊግትርኩች።

ላብራቶሪዙ ሙየ ጉርየ አረይ  ናዳ ሻምላዙ ቲክርክረይል ሲትፍሽራንስ ጝር ዶክተረኒስም ፍቃድ ይውሽትረጘ፤ እንዝጘም እውነ አዊንም አቕንቲል አቕር  ቸልት ፃይረይ አቐነውድ ዓልምስ ቓሊሰናንስ ቲክርክረዙ ሲትፍሸተ አቐነውድ ዊግትርኩች።

“ጊዙ አረይ ኲየን አዊንም ገቨድ አክንወናንስ ገውተች፤ጊዙ አቕር ኦሎምፒክ ቲክርክርሸተ እውነት ቓለነውድ አዊንም ገቨ ፃቨነው ቸልደጘ ቓሊሰው የጝ” ይርኩች።

እንቸን አምኰረ አትሌትሸን ላጝጠ እርፉ ሽል ፃይር ዓልምት መድረኺል ጝር ኻግር ግቭፅቱ ባንዲረድ ሲትርኩች፤ ይና ኻግር ኢትዮጵየት ኲየንጣንድስ አቑ ጉየናንስም ችግሽትጘኲ፤ ላዘ ጋቢዝ ቈሽ ኻስቭሻቊ ኹረዝቁ አይንተንድ አልስጥን የነው ዲዝጝሸው የጝ። አዊን ቺዝጠጘድ ዊሰድ ክታግስ በጥኩን።

ኪሮስ ወ/ተንሳይ

መዝየ 15/2017