ብላ ክልሊል ፃቭሽተው ኻግሩ ምኽርኽረድ ዲግዝ ኻትሹ፡፡

መጋቪት 27 ኪርም መዝየ 1/2017 ዓ.ስ አሽ ማኽርጛጙ ዊነቁ እቀ ኽቭርዙ ደርግቭሸጥ ችጘር ጉይጥዝመ ኻግሩ ምኽርኽረ ጉቫኤ ሲትፍሸጥ አኽቭጘቁ አጀንድጥድ ፌዴራል ፊርጝ አልሰቁ 270 ደርግቭሸጥ ማርፅጝ ጉይሸቁ አጀንድጥድ ኽድርዝ ይውጝ ኻተነድ ችጝኩ።

ኢትዮጵየትል ችጝሸቁ ቺተቺተቁ ፖለቲከዝመ ኻሰቭዙ ቃወጥ እንዝጘም እቀ ኽቭሪዙ አድላንዝ ማኽሊል እቀጘ ሲርይቁ ኻግሩ ኻለየኒል ኻሰቭዙ ቺተንዝመ ጥወጥውጫቅ የነው ቓልሽታጙ አቐነዊዝ፤እን ችግሰድ ቓቭዘናንስም ፈራቐቊ ኻግሩ ኽዝቭዙ ምኽርኽረንድ እንቅትቅ  ጥቅልዘው ጉግዝ ፃጝዘነውዝ ኻግሩ ጥወጥውሽትን ፋጥረው የጝ።

ሲርይቁ አቐቊ ኻግሩ ኻለየኒል ጥቅልዘተ ኻግሩ ምኽርኽረ ፃጝዘነው ፤ ቺዘው ኻግሩ ጥወጥውሽትን ኲነናንስኻግሩ ኻለያኒል አልት ልትን ሰራሸነውዙ ባኽል ዲቭርዘነው፤ እንዝጘም ሺርሽርሸቁ እሴተንድ እሩዘናንስም ቸልሰው ስረት ኲነነው የጝ።

ዊዝር ብርቱካን መንግስቴ ሳቁጠ ወረደዙ ደርግቭሸተ አራንድ “ይና ወረደይል ጉይሸቁ ዋቕረንጥድ አልሰናንስ ቀሰው አገነ ችጝኩን፤ እን መድረኽድ እቁኒዙ እርውነይድም ደድሰው የጝ። ምኽርዝም እኪራው ችግሰ እጀውም የር አምነኩን” የነውዝ ጋልፅርኩች።

ኽዝቭድ ጉየቁ ዋቕረንጥድ ጡሸውዝ ጒይሽጘጘ ጉይረይ ሲትፍሸተ ዊዝር ብርቱካን፤ ኻግሩ ምኽርኽረ ፃቨነውድ ቺተቺትንድ አፂሰነውዝ ላውንትድ አትርዘው አቐጘ ጉይርኩች።

መድረኽድ ናፅነይዝ ዋቕረንጥድ አልሰነውዝመ ማኽረነው ቸልሸው ዊነጘ ጉይረይ ዊዝር ብርቱካን፤ ኻግሩ ምኽርኽረድ ኻግርሸንትል ፅበቁ ችግሰንጥድ ፅንኸ ፃቨነውዝ ተግ ጨቨቅ ዊሰ ይወኩ ይር አምንደጘ ጋልፅርኩች።

“ዋቕርሸቁ ዋቕረንጥድ እንቅም ጅውንጢዝቁድ ኽይጠጘድ ተከተከቁ ጛይ” የውድ ቈሽ አምደወርቅ ኻትመ ጭሰጭሰንዙ ደርግቭሸተ ውሸብለ አየነው አበበ ጋልፅኩ።

ብላ ክልሊል አጋልዘው ፃውተዙ ችግሰዙ ጎንድ ኽዝቪዝ አልተቁ ዋቕረንጥድ ምጝግስት ኰሪዝ ዊሰ ይዋቅ  የነውድ አቐጘ ጉየው ውሸብለ አየነው፤ዋቕርሸቁ ዋቕረንጢስ ዊሰ ይውሽተውዜ በራኸይል ፅበቁ ከምሸጥድ ጝታ ኪው ዋጥርጝ ዲግድ ዊነዊዝጎ ዋጥራየው ምላሰን እጀው አቐጘድ ሚሪኩ።

እፍርድኒዝ ማጥን ፣ዲግዝመ ሲርይቁ እፍርታኒዙ አርውሽትነይዝ ማጥን ፅበቁ ቢተንድ ጉይሽጘጘ ውሸብለድ ዊግተው አቓንድ፤ ምጝግስትም  ጒይሸቁ ዋቕረንጢስ ሳልጠውዝ ዊሰ ይወኩ  የው አምነው አቐጘም ጋልፅኩ።

263 ወረድጥድ ደርግቨቁ 4 ሽኽዝ 500 እቀ ገረደ ደርግቨጥ አጀንደ አኽቨነውዙ ሰቭ አክኑሸነውድ ጉየቁድ ኮሚሽነር መላኩ ወልደማርያም፤ ፃጘድ ሲትፍዘተዝመ ጥቅልዘተ፣ ግልፅነይዝመ ነፅነይዝ አክኑሸው አቐጘ ጉይጝኩጙ።

ሲትፍሸጥድ ኻግርዝ አርወቁ  ኻሰቨን(አጀንደን) ጉይሸነውድም ሚርይጝኩጙ።

ሲትፍሸጥድ 270 እቀ ገረደ ዲርግቨጥድ ማርፀነውድ ጉየቁድ ኮሚሽነር መላኩ፤ እንዛ ደርግቭሸጥድ አሰነይዙ አጀንደ አኽቨነዙ ምኽርኽረ ፃቨነውድም ጉይጝኩጙ።

እግዘዝ  4 ሽኽዝ 500 ንየ አቐቊ እቀ ገረደ ደርግቭሸጥ፤ ክልሊል ፅበቁ 263 ወረድጢስ ማርፅሽተቁ ጛይ። ወረደ ጨቨቅ እቀ ገረደንድ ደርግቨቁ  ባሕርዳር ኻትመይል ዊነው ክልሉዝመ ኻግሩ አጀንድጢል ማኽረነውድም ጋልፅሽትኩ።

ኢትዮጵየቱ ኻግሩ ምኽርኽረ  ኮሚሽን ኮሚሽነር አት  መላኩ ወልደማርያም፤ እቀ ኽቭሪዙ ደርግቭሸጥ አልስጛጙ ዊንጘቁ አጀንድጥድ “ቀለቁ ገባኒል ትኩርት ፃቭየቁም ዊንጙ፤ ኽየቁዝመ ኻግርዝ አርወቁ  አጀንድጥድ ሚርየቁ ዊንጙ” የነውዝ ጋልፅጝኩጙ።

እቀ ገረደይዙ ደርግቭሸጢዙ ምኽርኽረድ እቀጘ ሩደውዝመ ፈኑ ዊነጘም አት መላኩ ፃጘድ ሲትፍዘተ፣ ጥቅልዘተ፣ እቀጘ ፈኑ፣ ግልፅነይዝመ ነፅነይዝ አክኑሸው ዊነጘ ጋልፅጝኩጙ።

ምኽርኽረይዙ ፃጘድ “ይና ዜገንድ አወየው ደረጀል ችጝጘጘ ቓለነው ቸልሽኩ” ይጛንድ ድምሽተቁ ኮሚሽነርድ  “ክንድጝ ፊስነው ፃጘ የጝ የነው ቸልንኩኑን” የነውዝ ጝታ ኻሰቭድ አድልጝኩጙ።

“ እን ምኽርኽረይዙ ፃጘይዝ ብላ ክልሊል ቓልነው ገቨድ፤ ዜገኒዙ ነቃቐው ሲትፍሽንድ አጉረተ ዊነጘ፣ ፅበው ችግሰድ ጊግቪንቀ፣ ኽየው ተከ ቓሊስጘውድ ኻግሩ አቐው ገቨድ ቓሊስጘው ዊኑ”ይጛንድ ኻግሩ ምኽርኽረ ኮሚሽን ኮሚሽነር አት  መላኩ ወልደማርያም ጋዜጠዙ ጋልፀነይል ጉይጝኩጙ።

ኪሮስ ወ/ተንሳይ

መዝየ 15/2017