ትራምፕ ጝታቕመት ካቶሊክዙ ጳጳስ ተክዝ ቓሊሰው  ኤአይዙ ተከ በርሰነውድ ኽምዘ ጕሱ

‎‎አሜሪካቱ ፕሬዝዳንትድ  ዶናልድ ትራምፕ እጅር ሰራሸተ ልብትንዝ (ኤአይ)ዝመ ካቶሊክዙ ጳጳስ ፃቭ ቓሊሰው ተከድ ገረዱ ሚዲየል በርሰነውድ ካቶሊክዙ እምንት ቲክነጢዝ ዛን ቲክንዝኩ።

‎‎እኔን ፃረው ጝነ መንግስቲል (ዋይት ሐውስ) አራሰውዝ ገረዱ ሚዲየል  ሼር ፃቭሽተው ፎቶድ ካቶሊክዙ ሊቀ ጳጳስ ፍራንሲስታ ክርጘይዝ ጝታ ኽዝንድ ጋልፅጛጙ ፅብጘው ኮሪዝመ ላየ ሊቀ ጳጳስ ማርፀናንስ አስልሽት ፃቭሽተው ኮሪዝ አቐነውድም የጝ ዊግሸውድ።

‎‎ኒው ዮርክ ችጝሸው ካቶሊክዙ ጉቫኤድ  ትራምፕ ጝ እምንቲል ቀልዳጙ የጝ የነውዝም ጝታ ኽዝንድ ጋልፅጝኩጙ።

‎

‎እኔን ፎቶድ ገረዱ ጋፂል ላጥፍሸውድም  ዶናልድ ትራምፕ ጋዜጠኝጥዝ “ጳጳስ አቐነው በነኩን ” ይጝ ባልትጘት እግርገ የጝ።

‎‎ትራምፕ ካቶሊክዙ እምንትድ ማለማልጛጙ የጝ ይሽትጝ ዊግሸነውዝ አፍለቱ አሜሪካት ፕሬዚዳንት ግነ አየቍም ። በውገቱ ፕሬዝዳንትድ ጆ ባይደን እምታንዝ በውግ  ታምፓ ፍሎሪዳትል ሽል ቀቨነውዙ ቲግቭርድ ከቨቍ ጛልቍ እቅዝ አስልሸው ሰልፍል ችጝሽጝ ሚስቅልዙ ተከ ሰራሽጛንስመ አማትቭጛንድ ቓልሽተነዊዝ ኽምዘ ጒሽ ዊነጘድም ቢቢሲቱ ዘገቨድ ቓሊሰኩ።

‎‎ቫቲካንቱ  ቃል ለምሰተድ ማቲዮ ብሩኒ ቅዳም ሲንቭትኮር  ትራምፕ በርስጘው ተከይዝ ጅሉዘ ምከንሸንቱ ችብረድ ወረጘ አቐጘድ ዋቕርሽጝ ዊሰናንስ ቋጥቭሽጝም ዲቁጝኩጙ።

‎‎እኔን አቐው ኮሪዝ ቫቲካን ተረው ሸወጪ ዕርቭቲስ ኪርም ቃፅለው ሊቀ ጳጳስድ ማርፀናንስ አኽቭሸቍ ጳጳሳንድ ለምረናንስ አስልሽን ፃቭራጙ የጝ ችጝሽረውድ።

‎‎አርቭ ኩኑ ትራምፕ ጝታ ገረዱ ሚዲየይዝ በርስጘው ፎቶድ ጳጳሳን ሲርጘው ፃረው ከበዝመ ቆፍ ፃቭጝም የጝ ቓልሽተውድ።

‎‎ኤአይዝ ሰራሽተው እን ተከይዝም ትራምፕ ጝታ ቕልመይል ኽየው ሚስቅል ፃቨቍ አጛንድ ጝታ ለወ ጨውለይዝ(ዘፍርነይዝ) ሚሪጘኩ። ጝታ በዊልም ፅሞነ (ዝምተ) አንቭቭሸኩ።

‎‎ተከድ ፈነውድ ቲክንም  ኒው ዮርክንቱ ጳጳስ ደርግቨውድ ኒው ዮርክቱ  ቅምኒል ችጝሸው ካቶሊክዙ ጉባዔል ጝቅሬተድ  ኤክስዝ ድወነውድ አርቒሰው አቓንድ “ኪብርሸቍ ፕሬዚዳንት እን ተከይል ውርም አይንት ጥቨቭም አነ ነቅሰው ገቨ እጀውም” የነውዝም ጓነድ ፃፍኩ።

‎‎”ቀንሸተ ይናይር  ሊቀ ጳጳስ ፍራንሲስት ገነ ዲቭናጙ የጝ፤ እንዝጘም ካቶሊክዝቍ እምንት አቅልድ ተረቲዝ ሊቀ ጳጳስ አቐውድ ማርፀናንስ ቅዱስ ጴጥሮስቱ ምከኒል ፀሎትዙ ግሬ ኪርምጥጘ የጝ። አቓንስቅም ቀለድትርነ ጡሻውም  ” የውኩ ጓነድ ጝጋልፀነይዝ።

‎‎ሚዝረድ BBCቱ የጝ።

ንጉሱ ማሩ

መዝየ 30/2017