ትዕግሥት አሰፋ ለንደንቱ ማራቶንድ ኻቕች

መዜ 19/2017 ዓ.ስ. ፃጝሽተው ለንደንቱ ማራቶን ቲክርክረይዝ አትሌት ትዕግሥት አሰፋ ቃውሰተ አቐነውዝ ኻቕርኩች። ቲክርክረድ 2:15:50 ሴኮንድዝ ጥወነውዝ ሊጘትረ ሳልጠው ሰት ሚዝግቭሰነውዝ ኻቕርኩች።

አትሌት ትዕግሥት ሚዝግቭስረው ሰትድ እቁኒዝ ጭቑ ዉጢሽተው ሪከርድ አቕ ሚዝግቭሽኩ።

ፓሪስቱ ኦሎምፒኪዝ ሊጘትረ ፈነውዝ አይምረ ችጝረይ ትዕግሥት አሰፋ፣ ለንደን ማራቶኒዝ እንዝሚቅ ኬንያትወ ፔሬስ ጄፕቺርቺርትስ ፃይሽት ዊነው ሳልጠው ሰትድ 26 ሰከንድ ቺዝሸነውዝ ኻቐነው ቸልድርኩች።

ትዕግሥት “ዲቈው አምረይዝ (ለንደንቱ ማራቶን) ሊጘትረ  ዊኑ ፈውድ፤ አቓንስቅም እን አምረይዝ ኻቐነዊዝ እቀጘ ቺተው  አቐነዊዝ እምጥጝኩን”፡፡ ይራንድ ቢቢሲ ዋንስ  ዊግትርኩች።

ዲቈው አምረይዝ ቕዝቕዘይጅቅ ፃየፃይሽት ዊቱ ችግሰ አጋልዘጘ ጉይረይ አትሌት ትግስት፤ልኲዙ ሚደለይል ቕጅወ ዊነጘዝመ ንጭቱ አምረይዝ አየርዙ ፀቫይድ ሚቸው ዊነጘም ዊግትርኩች።

ንጭት አምረይዙ  ለንደንቱ ማራቶንዝ ኬንያትወ ጄፕኮስፔ ሊጘትረ፣ ኔዘርላንድትወ ሲፈን ሀሰን ቈሽ  ሻቘትረ አቐነውዝ ቲክርክረድ አሽትኩ።

ትዕግሥት ዲቈው አምረይዝ ለንደንቱ ማራቶን ሪከርድ ሚዝግቭሰናንስ ዉጢረይ አረጘ  ዊግትር ዊንድርሽም፤ሊጘትረ አቐነውዝ ኻተነውድ አጅሽተው የጝ።

ፓሪስቱ ኦሊምፒክ ሻምፒዮና ሲፋን ሀሰን ንጭቱ አምረይዝ ፃጝሽተው ለንደንቱ ማራቶኒዝ ሸወትረ አቕር አስርኩች። አትሌት ትዕግሥት አሰፋ እኹርሽረውድ አዲስ አበባቲስ ጣቅዝ ችጝሽረይ   ሆለታ ኻትመይል  የጝ።

አትሌት ትዕግሥት አሰፋ 2024ቱ ፓሪስቱ ኦሎምፒክ፣ አትሌት ሲፋን ሀሰንት ቲክንድር ሊጘትረ ፈነውዝ ኢትዮጵየስ አይምረዙ ሜዳሊያ ነስርኩች።

ትዕግሥት  አትሌቲኪሲዝጎ ጥውረውድ ክንድጝ ጝንጥዝ ማኽሊል ፃቭሽተቊ ቲክርክረንጢዝ አቐጘ ጉይር፤ እንዝ ኒቭስ ኻይልዘነ ክንሰተይዙ እኩሰድ ቀለው ዊንየጘ ዊግትርኩች።

ትዕግሥት 2016 ዓ.ስ ጀርመን በርሊንትል ፃጝሽተው 48ትረ ማራቶንዙ ቲክርክረይዝ አልምቱ እቁኒዙ ማራቶን ሪከርድድ ሊጘ ደቂቀዝ ንየ ቺዝሸነውዝ ኻቕርኩች።

ሊግዘው ኰርዝ 800 ሜትር ውጥየተ ዊንድረይ ትዕግሥት፣ ሊግዘው እክልትዙ ውጠል ሲትፍሽረውድ ስኻርድር የጝ።

2016ቱ ኦሊምፒክድ ኢትዮጵየት ደርግቭር 800 ሜትርዝ ሲትፍሽርኩች፤ አነጚ ግቨር ፋፅመነድ ዲቈነው በነዊስ ቲክርክረይዝ ቢዘ አቕር ዊንድርኩች። አትሌትሸን 800 ሜትሪስ ከስጘ 400 ሜትርዝም ቲክርክርሽራጙ ዊንድርኩች።

ኪሮስ ወ/ተንሳየ

መዝየ 30/2017