ኢትዮጵየትጘድ ክንድጝዙ ዊርተድ ደድሰናስ ሰራሽተቍ ሰባንድ ንቕፀቍ አጝሽም ፃቭሽተው ልቕረይዝ ልክ ግነ ፈኑ አቐነው ቸልሽየው አቐነውድ ጝንድጝ ሚኒስቴርድ ፊሰው ሚዝረድ ቓሊሰኩ። ቺተዝም ቈሽ ዲቍስነቍ እምታኒዝ ዊነው ክንድጝዙ ስረትድ አጉረው ችግሰ ዊነው አቐነዊዝ አርቕትዝመ ቸልት ፃየው እጅርዙ ኻይል ፍርዘነዊል ፈራቐው ቢተ ፋጥርሸነውድም የጝ ቓሊሰውድ።
ኢትዮጵየትል ፋጥርሸቍ ክንድጝዙ ዊርተ ችግሰይዝ ናፀለ ምላሰን እጀውም፣ ምላሰንድም ችግስጥድ ፈራቐው ቢተ ፃየቍ አጛንስቅ አጉረው እክሰም በነቍ ጛይ።
አዲስ አበባ ዩኒቨርሲቲስ ቺተው በንዝመ ጥቅልዘተ ክንድጝዙ ክፍል ዲቈተድ ፕሮፌሰር ዓለማየሁ ተ/ማሪያም ሳብጢዝ ኢትዮጵየቱ ጂጘ አግልግለይዝጅቅ ፃቭጘው ዊንተይዝ “ክንድጝ ይሽታንድ ክፍል እግዝን ጨርሰነው አቒጝቀት ዊንም ዲግሪ ፃነነው ጭቑ አቒጝቀት ዊርተ ፃየው ክንድጝዙ ስረት ፈጣቐነውዝ ቲግቭሩ ፃቨነው የጝ በንዘውድ” የነውዝም ጋልፅጘኩ።
ፕሮፌሰርድ ጝታ ቓለይዝም ፊንላንድ ታጘድ የቍ ኻግራንድ ውርም አይንት ኻውየተም አነ ማዕድን እጀው ጝታ ኻግርት ክንድጝዝ ላውጠነው ቸልጘጘድም የጝ ተክዘዝጘ ጕጘውድ።
ክንድጝዙ ዊርተ ጋብዝ ቢተ ፋጥርሸነውድ ፅንኸዝ ቺተት እግርገ ክንድጝዙ ዊርተድ ኻይሰናንሰ ክንድጝዙ ኢንቨስትመንትድም ፈራዘናንስ፣ ስረተ ክንድጝድ ቺዝሸናንስ፣ ክንሰጥዙ አቅምዝመ ቸልትድ ሊጊሰነዊል የውም ክንድጝዙ ዊርተድ ሊሚስጥጘ ቸለቍ ጎዘ መዛንድ እቻዘነዊል ትኩርት ፃቭን ሰራሸነው ጡሸጘድም የጝ ጋልፅሽተውድ።
ኵርጀነዊስ ናፀ አቐው ክንደተ ፋጥረናንስ ክንደጢዝመ ክንሰጢል ላብጠቱ ልብትን ፋጥረነውዝ ዊርተ ፃየው ክንድጝ ይወነውዝ፣ ክንደጥድ ክንሰጢስ ችጘው አርቕቲስ ቈሽን ልብተነውዝ ይውሽተው ፈተነድ ጝቕምቱ ቸልትዝ ዲቈነው ቸለው፣ ችግሰጢዝም ጝቕምቱ እክሰ ይወው ክንደተ ፋጥረነዊል ሲሪሸው ስረተ ክንድጝ አስለነው ጡሸጘድም የጝ አምንሽተውድ።
ወይ ኽምረ ብሄረ እቅ ጭሰጭሰን ፃግቭጂ ወረደድም ፃይነው ክንድጝዙ ዚምኒዝ ክንደጥ አርቕጥጘ ጡሸው አርቕትድ ቂስምጝ ክፍሊስ ክፍሊዝጎ ከርጛንስ ጝታ ቸልጘው አቅሚዝቅ ልቕርድጛጙ አቐነውድ የጝ ቓለ ነየጥድ ዊግትጘውድ ።
ክንደተ አማኑኤል ሞገስ ፃተ ለወትረ ደረጀ ክንድጝ ጝኒዝ 6ትረ ክፍልዙ ክንደተ ነየው ቓለይዝ አምረ ጨቨቅ ክፍሊስ ክፍሊዝጎ ዲቁን የነውድ ጭቑ አቒጝቀት ውር ቑጠ አርቕ ዲቁን ይነ የጝ ጡሸውድ” የው አቓንድ እን አምረይዝ ክልል አቅቨ ደረጀዝ አስልሽ ይውሽተው ፈተነድ ቀሰው ፈን ነስጝ ዲቈናንስ ቃውሰ አስልሽት ፃቨነውድ የጝ ጋልፀውድ።
ላየ ቓለ ነየተሸን ቈሽ ብሩክታዊት መላኩ ፃተ ለወትረ ደረጀ ክንድጝ ጝኒዝ 8ትረ ክፍልዙ ክንደተ አራንድ ” ሲን 5-7/2017 ዓ.ስ አሽ ነይሽተው ክልል አቅቨ ፈተነድ ቀሰው ፈን ሚዝግቭስን ዲቍናንስ ክንሰጥድ ነይጘው አትርዘነ ክንድጚስ ከስጘ ክንደጥ ይናስ ይናይ ጓነ ጓነዝ አናጙ አፅንኽናጙ ችጝሽነኩን” ይረይ አራንድ ይፃምረይስ ኵርጅ(ቐዳቕ) ዲቈኩን የው ዘስክረው ክንደተ ፅብሽ ግነ ጝቕመነት የጝ ኻጝልዛጙ ፅበውድ። አቓንስቅም ነንም እዳረይ ግሬሸንት አሩሸነውዝ አንቭቨነው ጡሸኩ የነውዝ ጝር ምኽርድ አድልድርኩች።
ክንደተሸን ፃየፃይሰነውዝም ከቨጥ መፃፍጣንዝመ ጝነ መፃፍ እጀው አቐነውድ ጝታ ክንደነ ክንሰነይል ጥቕዘ ፋጥረጘድ ጋልፅር ” እጀውድ እጀውም እርውድጠ ዋቕረነውድ ፅበጘ አቕ ይና ናኒል ፅበቍ መፃፍጣኒዝመ እንዝ በውግትቍ ሽታንድ አንቭቭናጙ አስልሽነ ጡሸኩ” ይርኩች።
ዊዝር በለጡ ደሳለኝ ፃግቭጂ ወረደይዝ ፃተ ለወትረ ደረጀ ክንድጝ ጝኒዙ አውር ክንሰተ ይጘጘድ ጝታ ክንድጝ ጝንድ 1 ሽኽዝ 6 ላዝ 39 ክንደጥ ሚዝግቨናንስ ኻሊ 1ሽኽዝ 89 ክንደጥ ሚዝግቭጘጘዝመ እንዳጊስም 1 ሽኽዝ 1 ክንደጥ ክንደነዊል ችጝሽጘኩ የቍ አጛንድ” እንዳጊስም 6ትረ ክፍሊል 76፣ 8ትረ ክፍሊል 104 ክንደጥ ክንስናጙ ችጝሽነኩን” የቍ አጛንድ ክልል አቅቨ ደረጀዝ ይውሽተው ፈተነድ ቀሰው ፈን ነስጝ ዲቍጛንስ ክንሰጥም አጝነ ክንደጥ እንጎይስ ከቨከቭሽትጛጙ የጝ ይጘኩ።
ክንደጥ ፈተነ ተራንድ እምጥጘቍ ጚ ጎውተቍ አጥጘ ጡሻውም የቍ አውር ክንሰተሸን 6ትረ ክፍልድ ሲን 3-4፣ 8ትረ ክፍልድ ቈሽ ሲን5-7 /2017 ዓ.ስ አሽ ይውሽተኩ”ይጝኩጙ።
አት አደሩ ተሻለ ፃግቭጂ ወረደ ክንድጝ ፅፈሽ ጝንዙ ዲቈተ ይጘጘድ፣ 2017 ክንድጝ ዚምኒዝ ለወትረ ደረጀ ክንድጝ ጝንጢል 13 ሽኽዝ 6ላዝ 81 ሚዝግቨናንስ ኻሊጝ 10 ሽኽዝ 3 ላዝ 25 ክንደጥ ሚዝግቨነው ቸልሽ ዊነጘዝመ፣ ሊጘትረ ደረጀ ክንድጝ ጝንጢል 6 ላዝ 66 ሚዝግቨናንስ ኻሊጝ ጝታ ኻለይድ 100 ፐርሰንትዝ እሩዘነው ቸልጘጘድ ዊግትጝ፣” ነንቱ ሰቲዝ ለወትረ ደረጀ ክንድጝ ጝንጢስ 1ሽኽዝ 84 ሲዘ ክንደጥዝመ ሊጘትረ ደረጀ ክንድጝ ጝንጢል 67 ክንደጥ ጝታ ክንድጝድ ቀቭጝኩጙ” ይጘኩ።
ዲቈተድ ነይጘው ቓለይዝ ላው ክንደተም አቕሽ ክንድጚስ ቢዘ አጠ በንሽታው ነንቱ ሰቲዝ ሽኽዝ እጊተቍ ክንደጥ ክንድጝ ቀቨነውድ ኻዝንሰው አቐነውድ ጋልፅጝ “ዳቐቍድ ዳቕጝ ፃይነቍ ክንደጥድ በንሽተው አርቕቲዝመ ቸልቲዝ ፃይጝ ዲቍጛንስ እኹረጢስ ኪርም አውማው ሚሪሸው አካልድቅ ፃቫጙ ፅበው ከቨድ አትርዝጠ ጡሸኩ” ይጝኩጙ።
ክንደጥ ጝታ ክንድጝድ ቀቨናንስ ኽየው ምላሰንድ ስድት አቐነውድ ዊግተቍ ዲቈተድ” ወረደ ምኽር ጝንዝጘድ እን ችግሰድ ተረቲዝ ችብሰናንስ ማኽርሻጙ ችጝሸኩ” የቍ አጛንድ ችግሰድ ወረደይስ አቅምዝ ንየ አቓጙ አቓንስቅ እቀ ኽቭርድ ፅበው ፃጀድ አርውሽ ጛውር ቸልጠ ማጥን ፅበቍ ዋርብድ ሚንወዝ አግልግልጥጘ ፃቨነው ጋብዝ ከቨ ፃቭጠ በንሽተው አቐነውድም ዊግትጝኩጙ።
አዴንት ስሪል 8 ለወትረ ደረጀ ክንድጝ ጝንጥዝመ፣ ላው ሊጘትረ ደረጀ ክንድጝ ጝንጥ ፅበነውድ ጋልፀቁድ አት አደሩ ፖለቲከዝቍ ቃወጥ ከርን ከቨነው ቸልሽይሽም ክንሰጥዝመ ሙየ ጒጥዝ ግነ መንግስቱ ፅረ ፅበቍ ቀቨሊጢጅቅ እርወ ሚስክርም አርፈይስ ኪርምጝ ከቭጛጙ አቐጘዝመ 6ትረ፣ 8ትረዝመ 12ትረ ክፍልዙ ክንደጥድ አስልሸው ክልሉዝመ ኻግር አቅቨ ፈተንጥድ ጡሸውዝ ፊስጛንስ ቸልሰቍ ሰባንድ ሰራሽጛጙ አቐነውድም ዊግትጝኩጙ።
ንጉሱ ማሩ
መዝየ 30/2017
