አይር ፊልየዙ ጒደነዝ ልውጠ ነስነ ጡሸኩ

ኢትዮጵየ ቺተቺተቍ አጋለኒዝ ችጝረቍ አገንጥድ ጨቅሽጘውድ ለወንትዝ ሠራሸነዊስ ቃጥ እጥልቃን ቺተንጥድ ምፅነይስ ንዬ ምቀነውዝ ቅሬተ ፋጥረነውዙ ጭቓ አምል ላውድ የጝ። ላው ኻግርዝቍ ዜገን ቺተቺተቍ ኻለየንዝ ጅልውዘ ቺተቺተነውድ ፍጥሩ አቕንት አቕሽም ቺተንድ ግነ ላብጠ ሠራሸነዊስ ቺዛው አቐነውድ አርቐነው ግድን የኲ።

ኢትዮጵዩቁድ ዲቈው ኻዝንሰው ሲጘዙ ፈወነድ ዳበነውዝ ዲግ አቐው አቭላይተዝ፣ ቲክርክረዝመ ድርድርዝ አስልሸነዊስ ዲቈውዝ  ዊቱ ቺተንድ ፅይጝ አቭርድንዝ ሠራሸነው ጚ ጠመንጀዝ ልውጠ ተራው አቐነውድ ልብተነው ጥውሸኩ።

ላብጠ ሠራሸነው ቸልሻጙ እርቨነ እጀቊ ምላሠንጥዝ ጉርነዝ ጉርነ ፃየፃይሽተነው እግርገ እዳቐነውዙ ቓሊሠነ የጝ። ትውፅውፀዙ ቓሊሠነም አየው አቐነውድ አምነነው ተሚሠኩ። ኢትዮጵየቱ ዝቨይል ዚልቅትነይ ፅየው ዲግ ተራንስ ለወንትነይዝ ሠራሸነውዙ ተሚስነይድ አትረው አቕንትዝ አርቐነው ጥውሸኩ።

ኢትዮጵየቱ ሊግዘው ሲጘ አቒዝ ትውፅውፀ ተምዘው እጅርዝ ይውሽተውድ ግብ ፣ እፅውን ፣ ወጢሰነው ፣ ዲቊ ያንድም ቅወነው አቐነውድ ከድሸው አየውም። አፄቱ ዚምኒዝም አቑ ጝጊስ እግርገ ቃፅለቍ ምጝግስተኒዝ አርቕሽተው ገቭ የጝ። እን ስኽፍ ሸው ጋፅድ እን ዚምኒዝ ፋፅምሻንድ ቓለነው ቈሽ ዲቈቁ አኲርጝን እምተኒዙ ፓለቲከዙ ጕዥትኒስ ቢዘ ላዬ እማንትድ ድቁጠ ቸለው እጀውም።

ላው ጥውሸውዝ አርቕሽትጠ ጥውሸው ኻለይድ ኢትዮጵየቱ ፅብንድ ጛሉ እጅሪስም አቑ ፓርቲዙ ተምዝቲስ ንዬ አቐነውድ የጝ።

ይና ኽዝቭድ ጝ ኻግሩ ቅምንዙ ለወንትነይዝመ ሉዓሉነይድ ኪብርሽ ናፅነይዝ ፅባንስ ዲሞክራሲዝመ እጅርነይዙ ሚቭትድ ኪብርዝጠ ቸለው ስረት ኲንሽጠ ግድን የኩ። እንቅም አውትነይዝመ እምንትድ እርውነይዝ አቭንሽትጘው ዲሞክራሲው ስረት ተሚሠኩ። ስረትድ ፅባንድ ቺተንጥድ ገይፀ አቕጝ ናፅነይዝ ፅበነው ባኽል አቐኩ።

ኢትዮጵዩቁድ እን ዊስነተ ኰሪዝ አትረቍ፣ እክልዝጝ ቓለቍዝመ ስጙርትዝ ኻስቨቍ አጥጘ ጥውሸኩ። ወይሰዝ አቒጝቀስ ምላሠንዝ ቃውሸው ኽዝቭ ሚቭትዙ ሳቕርሽንዝ አጋልሽታውም።

ኢትዮጵየትቍ ሲጝቍ ፃለታንድ ይና አቒል ጥውጛጙ ኻምዘናንስ የውም ጝታው አርወድ ኻይሠናንስ ፃቭጘው ልቕረድ በክን እዳጠጘ ፃቨነው ቸልሸውድ ይውድም አቑ ክው ኻሳቭድ እርወ የጝ የው አትለዙ አልትልትን ተራንድ የጝ። ኢትዮጵየ እኒስ ሚቅ እሩዘተ ጥውሻጙ እሩዚጝቀስ እዳረውድ ዚምን ጨቨቅ ዊነቍ ቃወጥዝመ ኽዝቨንድ ኻግር ቀነኩን የነዊስ ቢዘ ቲግቭርዝ ጋልፅሽተው ሠቭ ሠራሸነው ቸለቅ የነዊዝ የጝ። ንጭትል ጭቑ ችብርን አምርቱ ልውጠድ ተምዘነው ባልተ አቐኩ። አጠ ጥውሸውድ እን ዚምኒዝቍ ኹለንድ አምርትል ችጘናንስ ግቨር ጕደነይል አጢስ ፊረነውዝ ትውፅውፀዙ ሚሪየድ አይር ኹሪዝ ቓሊሠነው ተሚሰኩ። ምላሠንድም አይር ጕደነ ቲክነነውዝ ታትነቱ ጕደነይስ ፈነውዝ አይር ፊልየ ቓሊሠነው ቸልሽየውዜ ልውጠ ተርጠ ቸላውም።

ወንድሙ ቸኮለ

መዝየ 30/2017