ክትቫት ፅውዘ ማኽተነውዙ አቅምድ ሊጊሰነውዝ መልቁ እፈርዙ ቕጅወዝመ ተከቁ አካልዙ ቘጨድ ማኽተኩ። ክርጘዙ ምፅነድም ቃፅቨኩ።
ኻግር አቅቨ ተግዝ ግንቭት 6-15/2017 ዓ.ስ አሽ ሽልሜዙ ማኽተነ ክትቫት ይውሽተጘ ብላ ክልል ትኽነ ቢሮ ፊሰው ሚዝረድ ቓሊሰኩ።
እን ዝምረይዝ ጝታ እድምድ ፃይጨ እርፊስ ኪርም አኰ እምት አቐቊ እንቅም ክልሊዙ ጅውንጢል ሻቘ ሚሊዮን 749 ሽኽዝ 171 መልቁ እፈሪዝ ክትቫትድ ይወናንስ ኻለይ ፃይሽት ዝምረ ኪርምሽኩ። ወይ ኽምረም 101 ሽኽዝ ንየ መልቁ ኪትቭሰናንስ ሰራሸኩ። አቨርገሌ ወረደም 12 ሽኽዝ 700 እፈር ኪትቭሰናንስ ኻለይ ፃይኩ።
ሽልሜ ከረከረተዝመ ቫይረስዝ ተረው ፅውዘ የጝ። ፅውዘድኻይሉ ቕጅወዝመ ክርጘም ቲክንዘው የጝ።ንቕፀዝ ከረከረውድ ሽልሜ እትለነዊዝ ቃውስ 4-5 ግርቂል አሽ የጝ።
ንጭቱ ይና ዲቭየይዝም ወይ ኽምረ ብሔረ እቅ ጭሰጭሰን አቨርገሌ ወረደ 01 ቀቨሌ ኒየራቁ ኻትመይል ክትቫቲዝመ ፅውዘይል እቀ ኽቭሪዙ ልብትንድ ውር ተከጘ አንቭቭስነ ቀኑን።
“ሽልሜዝ ጭቑ አይንቀት አርፈ ጨቨቅ መልቊዝ ይውሽተቁ ክትቫተን እኩጙ፤ እቀ ኽቭርድም ጉስጉሽተነዊዝ ፍ ጝቕመ ቃፅርሸው ኰሪዝ ኪትፍሰኩ። እን ቓሊሰ ንጭ ቕየ ፃቭሽት ሽልሜዙ ክትቫት ይውሽትጠ አቐጘ ፃቭሽተነውድ ቲክን እንቅም ሙየ ጉይጥድ ችጝሽጘው ስፍረይል ተረነዊዝ ሊግዘው ሰት ቲረ ኻያጙ የጝ” የቁድ ኒየራቁ ኻትመ ቀጠነ 6ዙ ፅበተ ዊዝር አልጋነሽ ወልዴ ጛይ።
ሽልሜዙ ክትቫት ንቕፀውዝ ሻቘ እምቲዝ ሊን ኪትቭሽየቁ መልቁ እፈሪዙ እግዘድ ቈሻንድ፤ እንዝጘም ሽልሜዙ ፅውዘድ ኻግርሸንትል ፈራቐውዝ እትላንድ ኻግር አቅቨ ዝምረ ፃቨነውዝ ክትቫትድ ፃቭሽተኩ።
“ሽልሜዙ ፅውዘ እቀጘ ኻቨረዝመ ንቕፀቁድ ክርጘዝ ፃቨው ሽወ የጝ። ቃውሰቁ እምተኒዝ እቀ ኽቭሪዙ ልብትንድ ሳስ የው ዊኑ፤ ምጝግስትም አቕሽ እን ጥላይዙ ትንዝንድ አውቑጠም ፈራቐውዝ ትንዛጙ ዊንየውም። እንም አቐነዊዝ ንቕፀቁ መልቁ እፈር ክርጘዝ ብንኩኑን። ነንት ኰሪዝ ግነ ክርጘ እዳዘነው ቸልጫቅ ይሽም ፅውዘድ ማኽተናንስ ቸልሰው አቕንቲል የጝ ፅብነውድ” የቁድ ቈሽ ኒየራቁ ኻትመ ቀጠነ 8ዙ ጽበተ አቐቊ ዊዝር ሙሉ ወልዳት ጛይ።
መልቁ ምጀ ብዝጝ ቕጅወይዙ አቕንትድ ዊግታቁ አቐነዊዝ ኲየን እቀጘ ሚከርድረይ አቐጘ ጉየቁድ ዊዝር ሙሉ ኲየን አውንቲስም ዲቈውዝ ጨጝቅሽረዊዝመ እምጥጝረውድ ጝርቑሪዙ ዳኽንነይዝ አቐነውድ የጝ ዊግትረውድ።
“ክትቫትድ ቃውስን ይናቑሪዝ ይውሽትጠ ፃቨነውድ ቈሽ ሲቅሽኒዝ ናፀ አናንስመ ይናቑሪዙ ትኽነድ እቻቐው አጠጘድ ፃቨኩ”ይራንድም ዊዝር ሙሉ ጝር ኻሰቭድ አድለች።
“ይና ሰቭድቃውስን ማኽተነዊል ሲርየ ፃቨው አቐነዊዝ ጊዝ ጨቨቅ እቀ ኽቭርድ አኽቭሸው አጋሊዝቅ ትኽነዙ ክንድጝ ይወነዊስ ከስጘ ጝንዝ ጝን ልወርደነውዙ አፅቨም ፃይነቅ የጝ” የቁድ አቨርገሌ ወረደ 01 ቀቨሌዙ ትኽነ ኤክስቴንሽንዙ ሙየ ጉርየ ዊዝር ሰጡ አሰፋ ጛይ።
እቀ ኽቭርድ ሽልሜዙ ፅውዘድ ኽክምነ ወስሰኩ የው ቓለድ ላውጥሻጙ ኰሪዝ ኪትቭሰነውዙ ባኽልድ ሊግዛጙ ተረነውድ ሙየ ጉርየሸን ጝታ ቓለይዝ አድልጝኩጙ።
2016ቱ አምረይዝ ወረደዝጘ 16 እፈር ሽልሜዝ ክረነውድ ጉየቁድ ዊዝር ሰጡ ጝታ ቀበሌይዝጘ 1230 እፈር ኪትቭሰናንስ ኻለይ ፃይጝ ሰቭ ኪርምሸጘዝመ እን ሚዝረድ ነይረው ሰቲስ ኪርም 75 ላይስ አጥጘ እፈር ክትቫትድ ፊሰነውድም ሚርይጝኩጙ።
መደቨኘ ክትቫትድ ጝታ እድምድ 45 ግርቅዝ ኪርም ላው አምረይል አሽ ይውሽተው አቓንድ፤
ሽልሜዙ ክትቫት ቈሽ ፃይጨ እርፊስ ኪርም ላው አምረዝመ ሻቘ እርፊል አሽ ፅበቊ እፈሪዝ ይውሽተኩ።
ንቕፀቁ ክትቫተን ፅውዘድ ማኽትነ ቸልሸቁ ፅውዘንድ ኪትቭሸነው ቸላቅ የነዊስ ጭቑ እቅ አካልዙ ቘጨዝመ ክርጘዝ አጋልሽትጛንድ ቓልሽተኩ። ተክዘ ሽልሜዙ ክትቫት ሊን ፊሰቁ እቂስ 85 ላይስ ፅውዘ ማኽተነው አቅም ፃየቁ አጛንድ፤ ሊጘትረ ክትቫት ፊሰቁድ ቈሽ 95 ላይስ ንየ ማኽተነውዙ ቸልት ፃየቁ ጛይ፤ አነጚ 100% ፅውዘ ማኽተው ክትቫት ግነ እጀውም።
ሽልሜዙ ክትቫቲስ ጋብዝጋብ ላጥ ቈሽተተ ትኽነዙ አግልግለን ይውሽተቁ አጘጘ ጉየቁድ ዊዝር ሰጡ፤እንዝም ሲርየ ጝታ እድምድ ላው አምረይስ ኪርም አኰ እምት አቐቊ ክትቫት ኪርምየቁዝመ ኪርምጝ ቀቨቁ መልቁ እፈሪዝም ይውሽታጙ አቐነውድ እንዝጘም ጝታ እድምድ ላው አምረዝ ሳ አቐቊስ መደቨኘ ክትቫትዙ አፅቨ ይውሽተጘም ደድስጘኩ።
አኰ እምትዝ ሳ ፅዊተቁድ ቺዘነውዝመ ትኽነዙ ችብረንጢዝጎ ኽክምነ እፃቐነው ሰቭም አክኑሸጘ፤ ፍጥሩ ኪፍርዝመ ላንቃዙ ባይትንዝ አጋልሽትጝ እኹርሸቁ፤ ፋጥርሽንዝ ጠማም ልኩ ፃይጝ እኹርሸቁ እፈርድም ቺዘነውዝ ኽክምነ ችጛንስም ፃቭሽተው አቐጘ ትኽነ ሚኒስቴር ፊሰው ሚዝረድ ቓሊሰኩ።
ጝታ እድምድ አኰ እምቲዝ ሳ አቐቊ መልቁ፣ ጊዙረቁዝመ ኒቭሰቁ ኩየንጣን፣ደርሰው ኹረዙ እጅጝት ቺዘነውዙ ሰቭም አክኑሸኩ። ቫይታሚን ኤዙ ጠብተ፣ አጉለዙ አልተተ ኽፅዙ ጥላ ይወነው፤ እኹርኒጅቅ ፃየፃይሽተው ፊስቱላ (ጫ፣ ድኽረ፣ ዊንም ሊጘድቅ እግዝግዘነውዙ ችግሰ ) ዝመ ማኽፀንዙ ፈነው አጋልዘቁ ኲየንጣንድ ቺዘነውዝመ ምርመረ ፃቭሽተው አቐጘም ብላ ክልል ትኽነ ቢሮድ ፊሰው ሚዝረድ ቓሊሰኩ።
ፅውዘድ እትለት እግርገ ወረጘ ፃቭሽትጠ ጡሸኩ? የው ዋቕረይዝ ፅዊተቁ እፈር ጅውነይል ችጝሸው ትኽነዙ ችብረይል ፊሰነውዝ ኽክምነዝመ ምኽር ችጝጥጘ ጡሸጘ የጝ ሙየ ጉርየሸን ጉይጘውድ።
ቲክንዝንም ሽልሜዙ ፅውዘ ባኽሉ ጉግዝ ኻክመነው ቸልሸኩመ? የው ዋቕረ አልስነዊዝም ሽልሜዙ ፅውዘ ቫይረስ አቐነዊዝ ባኽሉ ጉግዝ ኻክመነው ቸልሻው አቐጘ ሚርይጝ፤ ክንሸው ዲዝጝትዝ “እነ አለሞቼ” ይሽታጙ አቑ እቓራየጘ ፃቨነውዝ ወሰው እልዙ ቕጅወዝ አጋልሽትጝጠ ፃቨነው አቕንቲዝ ተንሽጝጠ ጡሸጘም ሙየ ጉርየሸን ኻስቭዝጝኩጙ።
ግንቭት6-15/2017 ዓ/ስ አሽ ይውሽተው ክትቫትድ ሽልሜይስ ከስጘ ንቕፀቁ ክትቫተንዝመ ምርመረ ፃቭሽተው አቐነዊዝ እንቅም እቀ ኽቭርዙ ክፍላን ቲክንክንጝ አሩሽጝጠ ጡሸኩ ይና ዲቭየይዙ እፃ የጝ። ዲግ አጥን።
ኪሮስ ወ/ተንሳይ
ግንቭት 15/2017
