ሐማስት እግዝግዘዝ ስሪል ፅበቍ እዳቐቍ እስራኤልትቍ አግትሸቍድ በርሰነውዝ ከምሸድ እክሰው አቐውዜ ጋዛትል ፃቭሽተው ዝምረድ ችብረው አቐነውድ ጥቅለተ ሚኒስትር ቤንያሚን ኔታኒያሁ ዊግትጙ።።
ጥቅለተ ሚኒስትርድ እኔንት ዊግትጘውድ እስራኤል ጋዛትል ፃጝዝራጙ ፅብረው ዊተድሩ ዝምረይል ልውጠ ፃቭተጘድ ምዕራቭቍ ኻግራንዝቍ ቃወጥ ይውጘው ጣንቅቅዘነድ ቲክን የጝ።
ዩናይትድ ኪንግደምቱ ጥቅለተ ሚኒስትር ሰር ኪር ስታርመር፣ ፈረንሳይቱ ፕሬዝዳንት ኢማኑኤል ማክሮን ስመ ካናዳቱ ጥቅለተ ሚኒስትር ማርክ ካርኒ እስራኤል ጋዛትል ፃጝዝረው ዊተድሩ ዝምረድ ችብስተጘድ ኻስቭዝጝኩጙ።
ቃወጥድ ላውንዝ ፊስጘው ጋልፀነይዝ “እስራኤል አይር ብዝረው ዝምረድ ችብስረይ አቒረውዜ ፣ ከቨዙ አልስኒል ማልደው ጊግቭንድም ጕይረውዜ ጝታ ዊሰይዝ ኪው የው ተግረ ፊስነኩን” የነውዝም የጝ ጣንቅቅዝጘውድ።
እንዝ ኻሚተቍድ ጥቅለተ ሚኒስትር ኔታኒያሁ ቃወጢዝ ይጘው ዊሰይዝ “ሐማስ ዲምስሽተነዊዝ በውግ እስራኤል ፃቭራጙ ፅብረው ጝር ፅብንድ ማኽተነውዙ ጣይትንድ ችብስተጘዝመ ፍልስጤምቱ ኻግርነይድ ሲሪሽተጘድ ዋቕረነው ሐማስ ፋፅመው ዚረ ድሰነውዙ ወንጀሊዝ ቈደ አልሰነውዝመ ላየ ጪጭፍንዝ አይዝዃችቱ አቭኑወ አልሰነት የጝ” ይጝኩጙ።
ጥቅለተ ሚኒስትርድ ቈሸዝም “ሐማስ እዳቐቍ አግትሸቍድ በርስሽ፣ ጝከምሸድ ዊንም አጭነድ ጊምዝሽ፣ ጪጭፈቊ ቃወጥድ ስድት ፊረቍ አጝሽ፣ እንዝጘም ዊተድሩ ፍልውልወድ ችብስጝሽ ጣይትንድ አምርቲስ ኪርም ችብርጠ ቸለኩ” የቍ አጛንድ እንዝ ቢዘ እስራኤል ለምትረው ገቨ እጀው አቐነውድ የጝ ዊግትጘውድ።
እስራኤል ጝርቕመት ማኽተናንስ ቸልሰው ዲሊስን ሐማስትል ችጝቱዊል አሽ ጣይትንድ ቃፅለው አቐነውድ አርቒሰቍድ ኔታኒያሁ “እኔን ጣይትንድ ስልጠነዙ እግርገ እዳቕንዝጅቅ ፃቭሽተው የጝ” ይጝኩጙ።
ዩናይትድ ኪንግደም፣ ፈረንሳይ ስመ ካናዳትቍ ቃወጥድ ላውንትዝ ፊስጘው ጋልፀነድ ምዕራቭቍድ እንዝ በውግ ፊስጘቍ ጋልፀንጢስቅ አትረው አቓንድ፣ ጋዛትል ፅበው እጅርነይዙ ችግሰድ እቀጘዝ ኻስቭዘጘድም የጝ ጋልፅጘውድ።
ኻግራንድ ዋቕርጘዊዝ ሲርየ እስራኤል ዊሰ ይዊረውዜ ኻትርሸው ተግረ ፊስነኩን የነውድ አቕሽ ጚ አወየው ተግረ ፊሰቍ አጘጘድ ግነ ጋልፅጘው ገቨ ግነ እጀውም።
ሚዝረድ፦ ቢቢሲቱ የጝ።
ንጉሱ ማሩ
ግንቭት 15-2017
